Psalm 105:1-45
-
Den sani di Yehovah du fu sori taki a e tai hori na en pipel
105 Un taki Yehovah tangi. Kari en nen.Meki den pipel kon sabi san a du.
2 Singi gi en. Prei poku gi en.Poti prakseri na* ala den bigi sani di a du.
3 Meki bigi gi a santa nen fu en.
Meki na ati fu den wan di e suku Yehovah, prisiri.
4 Suku Yehovah èn a krakti fu en.
Tan suku yepi na en.
5 Memre den bigi sani di a du.Memre den wondru fu en nanga a fasi fa a koti krutu,
6 iya, unu di de bakapkin fu en futuboi Abraham,unu di de manpkin fu Yakob, den wan di a teki leki en pipel.
7 En na Yehovah wi Gado.
A e koti krutu na heri grontapu.
8 Ala ten a e memre a ferbontu fu en.Fu têgo a e memre den sani di a pramisi.
9 Na a ferbontu dati a ben meki nanga Abrahamèn a ben sweri gi Isak taki a ben o hori ensrefi na a ferbontu dati.
10 A sweri di a ben meki kon de leki wan wet gi Yakobèn leki wan ferbontu di a ben meki nanga Israel fu ala ten.
11 A ben taigi en: „Mi o gi yu a kondre Kanan.A o de wan famirigudu gi yu.”
12 Na a ten dati den no ben de nanga furu sma.Iya, den ben de nanga wan tu sma nomo èn den ben e libi na ini a kondre leki trakondre sma.
13 Den ben waka fu a wan kondre go na a trawan,fu a wan kownukondre go na a trawan.
14 A no meki nowan libisma pina den.Ma fu den ede a pir’ai gi kownu.
15 A ben taki: „Un no musu fasi den salfuwan fu mièn un no musu du nowan ogri nanga den profeiti fu mi.”
16 A meki angriten kon na ini a kondre.A meki taki den no ben abi n’nyan moro.*
17 A seni wan man go na fesi a pipel.A man disi ben de Yosef, di den ben seri leki srafu.
18 Den tai en futu nanga isri ketièn den poti wan isri banti na en neki.
19 A heri pisi ten dati den sani di Yehovah taki meki Yosef tron wan moro bun sma.Te fu kba a ten doro taki den sani di Gado ben pramisi en kon tru.
20 A kownu seni sma fu go puru en na straf’oso.Iya, a tiriman fu a pipel meki sma lusu en.
21 A gi Yosef a frantwortu fu na oso fu enèn a poti en leki fesiman fu luku ala den gudu fu en.
22 A ben kisi a reti tu fu tiri den heihei man fu Kownuèn fu leri den koniman fu Egepte san na trutru koni.
23 Ne Israel kon na Egepte.Na so Yakob kon tan leki wan trakondre sma na ini a kondre fu Kam.
24 Gado meki a pipel fu en kisi furu pkin.A meki den kon moro tranga leki den feanti fu den.
25 A gi pasi taki na ati fu den feanti kenki, so taki den bigin teige en pipel.Na so den bigin seti sani fu bedrigi den futuboi fu en.
26 Ne Gado seni en futuboi Moses go drape.A seni Aron tu, di a ben teki fu go nanga en.
27 Den ben sori den Egeptesma den bigi sani fu Gadoèn den ben e du wondru na ini a kondre fu Kam.
28 A seni dungru kon èn a ben dungru na ini a heri kondre.Den tu man disi ben du san Gado taki.
29 Gado kenki a watra fu den Egeptesma kon tron bruduèn a kiri den fisi fu den.
30 Todo ben kon lai na ini a kondre.Den todo ben de srefi na ini den kamra fu a kownu.
31 Ne a taki dati kawfrei ben musu kon na ini a kondre.Maskita ben lai tu na ala den kontren fu den.
32 Na presi fu alen, a meki pispisi ijs fadon kmoto na hemel.A meki a bliksem koti faya na ini a kondre fu den.
33 Na so a kiri den droifibon nanga den figabon.Na ini a heri kondre a koti den bon trowe.
34 Dan a meki sprenka kon na ini a kondre.Iya, yongu sprenka di ben furu so te, taki sma no ben man teri den.
35 Den nyan ala sani di ben e gro na ini a kondre.Den nyan ala sani tu di sma ben prani na den gron fu den.
36 Baka dati Gado kiri ala den fosi pkin fu den libisma nanga den meti na ini a kondre.Iya, a kiri ala den fosi pkin di den ben kisi.
37 Dan Gado meki den Israelsma kmoto na ini a kondre nanga solfru èn nanga gowtu.Nowan sma fu den lo fu den ben kon swaki.
38 Den sma fu Egepte prisiri di den Israelsma gwe,bika den ben kon frede den Israelsma.
39 Gado bradi wan wolku fu tapu den
èn a gi den wan faya, so taki leti ben kan skèin gi den na neti.
40 Di den aksi en meti fu nyan a gi den tokoro-fowru.*A gi den brede fu hemel, so taki den ben kan nyan den bere furu.
41 A priti wan bigi ston opo èn watra bigin lon kmoto na ini.Leki wan liba a watra disi ben e lon psa na ini kontren pe watra no de.
42 Gado memre den santa sani di a ben pramisi en futuboi Abraham.
43 A puru en pipel na ini a kondre. Den ben e prisiri srefsrefi.Den sma di a ben teki leki en pipel ben e bari fu prisiri.
44 A gi en pipel den kondre fu den trakondre sma.A meki den kisi ala den sani di den trakondre sma ben wroko tranga fu feni.
45 Gado du disi, so taki den ben kan du san a takièn den ben kan hori densrefi na den wet fu en.
Prèise Yah!*
Futuwortu
^ Noso kande: „Taki fu”.
^ Hebrewtongo: „A broko ala den bredetiki”. A kan taki disi ben de tiki pe sma ben gwenti anga brede.
^ Bakratongo: „kwartel”. Disi na wan pkin fatu fowru di langa sowan 18 centimeter. A meti fu en bun fu nyan.
^ Noso: „Haleluyah!” „Yah” na a syatu fasi fa sma e skrifi a nen Yehovah.
