Psalm 106:1-48
106 Prèise Yah!*
Un taki Yehovah tangi, bika a bun.En bun-ati* de fu têgo.
2 Suma kan taki fu ala den bigi sani di Yehovah du?Noso suma man prèise Gado gi ala den bun sani di a du?
3 Koloku fu den sma di e du sani na wan reti fasièn di e du ala ten san bun.
4 Yehovah, mi e begi yu, prakseri mi te yu e du bun gi yu pipel.
Sorgu gi mi èn ferlusu mi.
5 Na so mi srefi kan fadon ini a bun di yu e du gi den sma di yu teki leki yu pipel.Dan mi kan prisiri na a srefi fasi leki fa yu pipel e prisirièn mi kan meki bigi makandra nanga a pipel di yu teki leki a gudu fu yu.
6 Wi sondu neleki den afo fu wi.Wi du sani di no bun. Na soso ogri wi du.
7 Den afo fu wi di ben de na Egepte no ben abi warderi gi* den bigi sani di yu du.
Den fergiti taki yu ben sori den a bigi lobi* fu yu.Di den ben de na a se, iya, na a Redi Se, den trangayesi yu.
8 Tòg yu ferlusu den, so taki yu nen ben kan kisi glori.Na so ala sma ben kan kon sabi a bigi makti fu yu.
9 A bari a Redi Se èn a watra drei gwe.A meki den waka psa na ini a dipi se neleki den ben e waka psa na ini wan drei sabana.
10 A ferlusu den fu den sma di e teige den.A puru den na a anu fu den feanti fu den.
11 A watra tapu den feanti fu den.Nowan fu den tan na libi.*
12 Na a ten dati den ben e bribi a pramisi fu Gado.Den bigin singi prèisesingi gi en.
13 Ma es’esi den fergiti den sani di a du.Den no wakti Gado fu a gi den rai.
14 Na ini a sabana den poti prakseri nomo na den eigi lostu.Den tesi Gado na ini a drei sabana.
15 A gi den san den aksi en,ma a naki den nanga wan takru siki di ben meki den kon swaki èn den dede te fu kba.
16 Den sma na ini a kampu bigin dyarusu tapu Moses.Den ben e dyarusu srefi tapu Aron, a santawan fu Yehovah.
17 Ne a gron opo en mofo, dan a swari Datan.A gron tapu ala den sma di ben de makandra nanga Abiram.
18 Wan faya bron den sma di ben kon makandra nanga den.A faya bron ala den ogrisma di ben de drape.
19 A pipel meki wan pkin kaw na Horeb.Den boigi gi wan popki fu gowtu.
20 Den teki wan popki fu wan mankaw, wan meti di e nyan grasi,dan den bigin gi a popki dati glori na presi fu mi.
21 Den fergiti Gado, a Ferlusuman fu den.Iya, den fergiti a sma di ben du bigi sani na ini Egepte.
22 Den fergiti den bigi sani di a du na ini a kondre fu Kam.Iya, den fergiti fa a meki den kisi bigi lespeki gi en di a du bigi sani na a Redi Se.
23 A ben de fu puru den na pasi.Ma Moses, a sma di a ben teki leki en futuboi, opo taki gi den na fesi Gado.Na so na atibron fu Gado kon saka, so taki a no kiri den.
24 Den ben wiswasi a bun kondre.Den no ben e bribi a pramisi fu Gado.
25 Den ben e tan krutukrutu na ini den tenti fu den.Den no ben e du san Yehovah ben taki.
26 Ne a opo en anu èn a sweritaki a ben o meki den dede na ini a sabana.
27 A sweri taki a ben o meki den bakapkin fu den dede na mindri den trakondre smaèn taki a ben o panya den go na difrenti kondre.
28 Boiti dati, den go anbegi Bâal fu Peorèn den go nyan den sani di sma ben gi leki ofrandi na den dedewan.*
29 Den ben e du sani di ben hati Gado firi.Dati meki a strafu den nanga wan siki.
30 Ma di Pinehas opo du wan sani,Gado no strafu den go doro.
31 Sensi a ten dati, Gado si Pinehas leki wan ret’ati smafu ala ten, iya, fu têgo.
32 Den meki Gado ati bron di den ben de na a watra fu Meriba.*Na den meki taki sani no waka bun gi Moses.
33 Den meki Moses ati bron srefsrefièn a bigin taki dondon sani nanga en mofo.
34 Den no kiri ala den trakondre sma,soleki fa Yehovah ben taigi den fu du.
35 Ma den go moksi nanga den trakondre smaèn den teki den gwenti fu den abra.*
36 Den tan dini den falsi gado fu den trakondre sma.Den gado disi meki den kon ini bigi problema.
37 Den ben e gi den manpkin nanga den umapkin fu denleki ofrandi na den ogri yeye.
38 Den tan trowe a brudu fu sma di no du nowan ogri,iya, den trowe a brudu fu den eigi manpkin nanga umapkin.Den ben e gi den leki ofrandi na den gado fu den Kanansma.Na so den pori a kondre nanga a brudu fu sma di no du nowan ogri.
39 Den sani di den ben e du meki taki den tron sma di no krin.Den drai baka gi Gado fu go huru nanga falsi gado.*
40 Ne Yehovah ati bron srefsrefi nanga a pipel fu enèn a bigin teige den sma di a ben teki leki a gudu fu en.
41 Ibri tron baka a ben meki den trakondre sma wini den.Na so den pipel di ben e teige den ben basi den.
42 Den feanti fu den ben e pina denèn den ben abi makti* na den tapu.
43 Someni leisi a ferlusu den,ma tòg den ben e opo densrefi teige en èn den ben e trangayesi en.Na fu den sani disi ede meki a lagi den.
44 Tòg a ben e poti prakseri na a nowtu fu denèn a ben yere di den ben e bari suku yepi na en.
45 A ben e prakseri a ferbontu di a ben meki nanga denèn a ben e sari den, fu di a ben abi bigi* lobi* gi den.
46 A ben meki ala den sma di ben hori den na ini katibo sari den.
47 Tye Yehovah wi Gado, ferlusu wi.Puru wi na ini den kondre pe wi de èn tyari wi kon na wán,so taki wi kan gi yu santa nen glorièn prèise yu nanga bigi prisiri.
48 Prèise Yehovah, a Gado fu Israelfu ala ten, iya, fu têgo.
Ala den sma musu taki: „Amen!”*
Prèise Yah!*
Futuwortu
^ Noso: „Haleluyah!” „Yah” na a syatu fasi fa sma e skrifi a nen Yehovah.
^ Noso kande: „no ben ferstan”.
^ Noso: „tan abra”.
^ Dati na ofrandi di den ben e tyari gi dedesma noso gi falsi gado di no de na libi.
^ Meriba wani taki „hartaki”.
^ Noso: „den leri den gwenti fu den”.
^ Disi wani taki dati den go anbegi falsi gado.
^ Hebrewtongo: „anu”.
^ Noso: „bun furu”.
^ Noso: „Na so a de!”
^ Noso: „Haleluyah!” „Yah” na a syatu fasi fa sma e skrifi a nen Yehovah.
