Psalm 22:1-31
Gi a fesiman fu den pokuman: A musu prei leki a poku di nen „Dia fu musdei”.* Wan singi fu David.
22 Mi Gado, mi Gado, fu san ede yu gwe libi mi?
Fu san ede yu no kon yepi mi?Fu san ede yu no e yere fa mi e bari krei?
2 Mi Gado, heri dei mi e kari yu. Ma yu no e piki mi.Te neti srefi mi e tan kari yu.
3 Ma yu na wan santa Gado.Na ala sei fu Israel sma o prèise yu.
4 Na yu den afo fu wi ben e fertrow.Den fertrow yu èn ibri tron baka yu ferlusu den.
5 Na yu den kari èn den kisi kibri.Na yu den fertrow èn den no kisi syen.
6 Ma mi na wan woron. Mi a no wan libisma.Sma e spotu mi èn den e wiswasi mi.
7 Den wan di e si mi e spotu mi.Den e seki den ede èn den e taki:
8 „A ben e fertrow tapu Yehovah. We, dan meki Gado yepi en!
Efu a Gado fu en lobi en so, dan meki a ferlusu en!”
9 Na yu puru mi na ini mi m’ma bere.Di mi ben de na mi m’ma bobi ete, dan na yu ben meki mi firi taki noti no man psa nanga mi.
10 Na yu e sorgu mi* sensi di mi m’ma meki mi.Sensi di mi ben de na ini mi m’ma bere, na yu na mi Gado.
11 No tan farawe fu mi, bika nowtu e kon miti mièn nowan tra sma de di man yepi mi.
12 Furu yongu mankaw e lontu mi.Den tranga mankaw fu Basan kon tnapu na mi lontu.
13 Den feanti fu mi e piri den mofo fu tapu skreki gi mi.Den de leki wan lew di e bari èn di e priti wan meti pispisi.
14 Den kanti mi trowe leki watra.Ala mi bonyo kmoto na den skrufu.
Mi ati kon de leki kandrafatu.A smèlter gwe na ini mi skin.
15 Mi no abi krakti moro. Mi kon de leki wan pisi broko prapi.Mi tongo fasi na tapsei fu mi inmofo.Yu tyari mi kon te na a mofo fu grebi.
16 Mi feanti lontu mi leki dagu.Wan bigi grupu ogr’ati sma tapu mi lontu.Neleki wan lew den e beti mi na mi anu nanga mi futu.
17 Mi kan teri ala den bonyo fu mi.
Mi feanti e tnapu e luku, iya, den e tnapu e luku mi nomo.
18 Den e prati mi krosi na den mindrièn den e iti lot fu luku suma o kisi den krosi fu mi.
19 Ma Yehovah, mi e begi yu, no tan farawe fu mi.
Na yu e gi mi krakti, kon yepi mi es’esi.
20 No meki a fet’owru kiri mi.Iya, kibri a warti libi* fu mi, fu den dagu no grabu en.
21 Puru mi na ini a mofo fu a lew.Piki mi èn kibri mi gi den tutu fu den mankaw fu a sabana.*
22 Mi o ferteri den brada* fu mi fu a nen fu yu.Mi o prèise yu na mindri den sma di kon makandra fu anbegi yu.
23 Unu di e lespeki Yehovah, un prèise en!
Ala un bakapkin fu Yakob, un gi en glori!
Abi bigi lespeki gi en, un alamala di de bakapkin fu Israel.
24 A no du leki a no e si fa den mofinawan e pina.A no drai en fesi gi den.
A arki den di den bari suku yepi na en.
25 Mi o prèise yu na mindri den furu sma di kon makandra fu anbegi yu.Na fesi den sma di abi bigi lespeki gi Gado, mi o du den sani di mi ben pramisi.
26 Den safr’ati sma o nyan teleki den bere furu.Den wan di e suku Yehovah o prèise en.
Meki a de so taki unu abi wan koloku libi* fu têgo.
27 Sma o memre Yehovah te na den moro farawe presi fu grontapu èn den o kon na en.
Ala den lo fu grontapu o boigi gi en,
28 bika Yehovah na Kownu.Na en e tiri den pipel fu grontapu.
29 Ala den sma di abi en bun* na grontapu o nyan èn den o boigi gi Gado.Ala sma di o tron doti te fu kba, o saka kindi boigi gi en.Nowan fu den man hori densrefi na libi.
30 Den bakapkin fu den o dini en.Den o ferteri den sma di o kon bakaten fu Yehovah.
31 Den o ferteri sma fa a du sani na wan reti fasi.
Den o taigi den pipel di musu gebore ete, taki na en du ala den sani disi.
Futuwortu
^ A kan taki disi ben de wan melodie tu.
^ Hebrewtongo: „Den fringi mi gi yu”.
^ Hebrewtongo: „a wan-enkri wan”. Disi e sori go na a libi fu en.
^ A Hebrew wortu di gebroiki dyaso gi „brada” kan abi fu du nanga krosbei famiriman noso nanga tra Israelsma.
^ Hebrewtongo: „Meki a de so taki unu ati libi”.
^ Hebrewtongo: „Ala den fatuwan”.
