Psalm 35:1-28
Wan psalm fu David.
35 Yehovah, mi e begi yu, opo taki gi mi na fesi den wan di e gens mi.Feti nanga den sma di e feti nanga mi.
2 Teki yu pkin schild* nanga yu bigi schildèn opo kon yepi mi.
3 Grabu yu lansri nanga yu aksi fu feti nanga den wan di e hari kon na mi baka.
Taigi mi: „Mi o ferlusu yu.”
4 Meki den sma di e onti mi, kisi syen. Broko den saka.
Meki den sma di e seti sani fu du mi ogri, drai gwe. Meki den fesi fadon.
5 Meki den kon de leki aleisibuba di winti e wai gwe.Meki na engel fu Yehovah yagi den gwe.
6 Meki a pasi fu den kon dungru èn gratite na engel fu Yehovah e hari go na den baka.
7 Bika mi no du noti nanga den, ma tòg den seti wan nèt fu kisi mi.Mi no du noti, tòg den diki wan olo fu meki mi fadon go na ini.
8 Meki ogri miti den sondro taki den ben ferwakti dati.Meki a srefi nèt di den ben seti gi mi fanga den.Meki den dede te den fadon go na ini a nèt.
9 Ma mi o prisiri nanga Yehovah.Mi o prisiri fu di na en ferlusu mi.
10 Nanga mi heri ati mi o taki:
„Yehovah, suma de leki yu?
Na yu e ferlusu den mofinawan fu den sma di tranga moro den.Na yu e kibri den mofinawan nanga den pôtiwan gi den sma di e pina den.”
11 Ogr’ati kotoigi e lei gi mi na fesi krutu.Den e aksi mi sani di mi no sabi.
12 Den pai mi ogri fu bun.Den e meki mi firi leki wan sma fu mi dede.
13 Ma te den ben siki, mi ben e weri rowkrosi.*Wan heri pisi ten mi ben e pina misrefi fu di mi no ben e nyan.*Te Gado no ben e arki den begi fu mi,
14 mi ben e waka lontu leki wan sma di e row. Mi ben e firi leki wan mati fu mi noso mi eigi brada dede.Mi ben e sari neleki fa wan sma e sari te a lasi en m’ma.
15 Ma di mi kisi problema den ben e prisiri èn den kon makandra.Iya, den kon makandra fu luku fa den kan du mi ogri.Den tan taki ogr’ati lei fu mi.
16 Den ogrisma e spotu mi.*Den e luku mi nanga atibron.
17 Yehovah, o langa yu o tan luku san den e du?
Ferlusu mi fu di den e du ogri nanga mi.Iya, puru a warti libi fu mi na ini a mofo fu den yongu lew.*
18 Dan mi o prèise yu na mindri ala den sma di kon makandra.Mi o prèise yu te mi de na mindri furu sma.
19 Sma tron mi feanti sondro fu mi du den wan sani. No meki den prisiri te ogri miti mi.Mi no du nowan ogri, ma tòg sma de di e teige mi. No meki den spotu mi.
20 Den no e taki switi nanga sma.A wan-enkri sani di den abi na prakseri,
na fu taki lei fu den sma di no e suku trobi nanga trawan.
21 Den e opo den mofo fu lei gi mi.Den e taki: „Ai! Kisi en moi! Nanga wi eigi ai wi si san psa.”
22 Yehovah, yu srefi si san psa. Mi e begi yu, no tan tiri.
Yehovah, no tan farawe fu mi.
23 Mi e begi yu, opo! Wiki èn koti krutu gi mi.Yehovah mi Gado, krutu a tori fu mi na wan reti fasi.
24 Yehovah mi Gado, krutu mi na wan reti fasi fu di yu na wan Gado di e du san reti.No meki den prisiri fu na ogri di miti mi.
25 No meki den taki: „Ai, na disi wi ben wani!”
No meki den taki: „Wi swari en.”
26 Meki ala den sma di breiti taki ogri miti mi, kisi syen.Meki den fesi fadon.
Meki den sma di e denki taki den bun moro mi, kisi syen. Broko den saka.
27 Ma meki den wan di breiti taki mi e du san reti bari fu prisiri.Meki den tan taki:
„Meki Yehovah kisi glori, bika a breiti te sani e waka bun nanga den futuboi fu en.”
28 Mi o taki* fu a retidu fu yuèn heri dei mi o prèise yu.
Futuwortu
^ Furu leisi na man di ben e sutu bo ben e tyari a schild disi.
^ Noso kande: „Den ogrisma e spotu mi fu kisi wan pisi brede”.
^ Noso: „yongu lew di abi w’wiri na den neki kba”.
^ Noso: „Mi o denki dipi”.
