Psalm 40:1-17
Gi a fesiman fu den pokuman. Wan singi fu David.
40 Nanga mi heri ati mi ben e howpu tapu* Yehovah.A poti yesi arki* mi èn a yere fa mi ben e bari suku yepi.
2 A puru mi na ini wan peti pe watra e kuku kon na tapu.A puru mi na ini a fisti tokotoko.
Dan a poti mi tnapu na tapu wan stonbergi.A meki mi tnapu steifi.
3 Baka dati a leri mi wan nyun singi,wan prèisesingi gi a Gado fu wi.
Furu sma o si san Gado du èn den o kisi bigi lespeki gi en.Den o fertrow tapu Yehovah.
4 Koloku fu a sma di e fertrow tapu Yehovahèn di no e suku yepi na den heimemre sma noso den sma di e bribi lei.*
5 Yehovah mi Gado, yu du furu sani.Iya, yu du kfalek moi sani gi wièn ala ten baka yu e prakseri wi.
Nowan sma de leki yu.Awinsi mi ben o wani ferteri sma fu ala den sani di yu du,tòg mi no ben o man, bika den furu tumsi.
6 Yu no ben wani* den meti di wi ben e srakti leki ofrandi nanga den tra sortu ofrandi fu wi.Ma yu opo mi yesi, so taki mi ben kan yere yu.
Yu no ben aksi bron-ofrandi noso sondu-ofrandi.
7 Dati meki mi taki: „Luku, mi kon.
Na ini a bukulolo den skrifi fu mi.
8 Gado, mi e prisiri* fu du a wani fu yu.A wet fu yu de dipi na ini mi ati.
9 Na mindri a bigi grupu di kon makandra, mi e taki fu a retidu fu yu.
Iya, mi no e hori mi mofo.Yehovah, yu sabi dati heri bun.
10 Yu na wan Gado fu retidu èn mi no e kibri dati gi sma.
Mi e ferteri ala sma taki yu e du san yu pramisi èn taki yu e ferlusu wi.
Na fesi a bigi grupu di kon makandra, mi e ferteri taki yu e sori sma bun-ati* èn taki ala ten yu e taki san tru.”
11 Yehovah, mi e begi yu, tan abi sar’ati nanga mi.
Tan sori mi bun-ati* èn horbaka gi mi ala ten, so taki mi kan feni kibri.
12 Den problema fu mi furu so te, taki mi no man teri den moro.
Mi abi so furu sondu, taki mi no man si pe mi e go.Den furu moro den w’wiri na mi ede.Dati meki mi las’ati.
13 Yehovah, mi e begi yu, du mi wan bun èn ferlusu mi.
Yehovah, kon yepi mi es’esi.
14 Meki ala den sma di e suku fu kiri mi, kisi syen.Broko den saka.
Meki den sma di e prisiri te ogri miti mi, drai gwe baka.Meki den fesi fadon.
15 Son sma e taki: „Ai! Kisi en moi!”
Meki den sma disi skreki fu di den kisi syen.
16 Ma meki ala sma di e suku yu, breiti.Iya, meki den prisiri nanga yu.
Meki den sma di e angri fu yu ferlusu den, taki ala ten:
„Meki Yehovah kisi glori.”
17 Mi no abi nowan sma fu yepi mi èn mi pôti.Yehovah, poti prakseri na mi.
Yu na mi Yepiman èn yu na mi Ferlusuman.Mi Gado, no kon lati.
Futuwortu
^ Noso: „Mi wakti nanga pasensi na tapu”.
^ Noso: „beni fu arki”.
^ Noso: „sma di e lei”.
^ Noso: „prisiri nanga”.
^ Noso: „mi e angri”.
