Psalm 58:1-11
-
Wan Gado de di e krutu grontapu
-
Wan begi fu strafu den ogriwan (6-8)
-
Gi a fesiman fu den pokuman: A musu prei leki a poku di nen „No kiri mi”. Wan psalm fu David. Wan Miktam.*
58 Efu unu no e taki noti, dan fa unu o man krutu sani na wan reti fasi?
Un libisma, unu man krutu sani na wan reti fasi trutru?
2 Nôno, na soso ogri unu e denki na ini un ati.Unu e waka e du bigi ogri na grontapu.
3 Den ogrisma teki a takru pasi* sensi di den m’ma meki den.*Den trangayesi, den e lei sensi den gebore.
4 A vergif fu den de leki a vergif fu takru sneki.Den dofu leki a kobrasneki di e tapu en yesi.
5 A no wani arki a sten fu a sma di kroi en,awinsi a sma dati sabi bonu.
6 Gado, mi e begi yu, naki den tifi puru na ini den mofo.
Yehovah, broko a kaak fu den lew* disi.
7 Meki den sma dati no de fu si moro. Meki den de leki watra di e lon gwe es’esi.
Meki Gado span en bo fu sutu den peiri fu en, so taki den fadon na en fesi.
8 Meki den de leki wan pakro di e smèlter gwe te a e waka.Meki den de leki wan pkin di dede na ini en m’ma bere èn di no si a leti fu a son.
9 Den meki wan faya nanga makabon. Ma fosi a patu fu den kon faya,Gado o meki wan tranga winti wai den grun tiki nanga den drei tiki gwe.
10 A ret’ati sma o prisiri, fu di a si taki Gado strafu den ogriwan.A o waka na ini a brudu fu den ogrisma.
11 Dan sma o taki: „Wi man si krin taki den ret’ati sma e kisi blesi.
Now wi sabi taki wan Gado de di e krutu grontapu.”
Futuwortu
^ Noso: „e du ogri”.
^ Hebrewtongo: „sensi den kmoto na ini den m’ma bere”.
^ Noso: „yongu lew”.
