Psalm 68:1-35
Gi a fesiman fu den pokuman. Wan singi fu David.
68 Meki Gado opo du wan sani. Meki den feanti fu en panya go na ala sei.Meki den sma di no lobi en lon gi en.
2 Yagi den gwe neleki fa winti e wai smoko gwe es’esi.Neleki fa faya e meki kandrafatu smèlter,na so den ogrisma musu dede gwe na fesi Gado.
3 Ma meki den ret’ati sma prisiri.Meki den de nanga bigi prisiri na fesi Gado,iya, meki den breiti srefsrefi.
4 Un singi gi Gado. Un singi fu prèise* en nen.
Singi gi a sma di e rèi psa na ini a sabana.*
En nen na Yah.* Un prisiri na en fesi.
5 Gado di de na ini en santa tanpresi, na wan p’pa gi den pkin di no abi p’pa moro.A de wan krutuman di e opo taki gi den uma di masra dede kba.
6 Gado e sorgu taki den sma di de den w’wan abi wan oso fu tan.A e fri den sma di de na straf’oso èn a e meki sani go bun nanga den.
Ma den trangayesi sma* musu tan na ini wan kontren di drei.
7 Mi Gado, di yu ben e tiri* a pipel fu yu,iya, di yu ben e waka psa na ini a sabana (Sela)
8 grontapu seki.Gado meki alen fadon* kmoto fu hemel.Iya, a Gado fu Israel meki a Sinai-bergi disi seki.
9 Mi Gado, yu meki taki wan bigi alen fadon.Di yu pipel* ben weri yu gi den krakti baka.
10 Den ben e tan na ini den tenti fu yu.Na fu di yu na wan bun Gado, meki yu ben sorgu gi den mofinawan.
11 Yehovah taigi en pipel san den musu du.Den uma di e ferteri a bun nyunsu na wan bigi legre.
12 Den kownu nanga den legre fu den e lowe. Iya, den e lowe!
Den uma di tan na oso o kisi wan tu fu den gudu di den srudati teki fu den feanti.
13 Un man, aladi unu ben e d’don na mindri den kampufaya,*tòg unu o kisi wan doifi di abi solfru na en heri frei.Wan pisi fu en frei na fu gowtu.*
14 Di na Almaktiwan yagi den kownu kmoto na ini a kondre,dan snew fadon na Salmon.*
15 Na Gado ben meki a bergi fu Basan.*A bergi fu Basan abi furu ede èn den hei.
16 Fu san ede yu e dyarusu so, yu bergi di abi furu ede?Fu san ede yu e dyarusu tapu a bergi di Gado teki* fu libi na tapu?
Iya, Yehovah o tan drape fu ala ten.
17 Gado abi dusundusun fetwagi.
Yehovah kmoto fu Sinai-bergi fu go na ini a santa presi.
18 Yu opo go na loktu.Yu tyari mansma gwe leki strafman.Wi Gado Yehovah,* yu teki den leki kado,iya, srefi den tranga-ede sma yu teki fu kan tan na den mindri.
19 Prèise Yehovah, di e tyari a lai fu wi ala dei.En na a tru Gado di e ferlusu wi. (Sela)
20 A tru Gado na wan Gado di e ferlusu sma.Na Yehovah, a Moro Hei Masra, e puru sma na dede.
21 Iya, Gado o naki na ede fu en feanti broko pispisi.A o naki na ede broko fu iniwan sma di e tan* du sani di no bun.
22 Yehovah taki: „Mi o tyari den kmoto na Basan.Mi o puru den na ini den dipi presi fu se,
23 so taki yu kan waka na ini a brudu fu yu feantièn taki den dagu fu yu kan leki a brudu fu den.”
24 Gado, sma si fa yu e waka leki winiman na fesi a bigi grupu.Mi Gado, mi Kownu, den si fa yu nanga den sma di wini a strei e waka go na ini a santa presi.
25 Den singiman e waka te na fes’sei. Den sma di e prei poku e waka na den baka.Na mindrisei yu abi den yongu uma di e naki tamboerijn.
26 Prèise Gado na mindri den sma di kon na wán.Prèise Yehovah, unu di kisi libi fu a P’pa fu Israel.
27 Luku Benyamin drape, a moro yonguwan di e wini den pipel.Luku den granman fu a lo fu Yuda nanga den sma fu den di e bari fu prisiri.Luku den granman fu a lo fu Seibulon nanga den granman fu a lo fu Naftali.
28 A Gado fu yu taki dati yu o kisi krakti.
Mi Gado, sori wi a krakti fu yu, leki fa yu ben du dati kba di yu ben yepi wi.
29 Den kownu o tyari kado kon gi yu,fu gi grani na yu tempel na ini Yerusalem.
30 Strafu den busmeti di e libi na mindri warimbo,iya, strafu ala den mankaw nanga den pkin fu den.Meki den pipel boigi gi yu èn meki den tyari pispisi solfru kon.*
Ma meki den sma di lobi feti panya go na ala sei.
31 Sma o tyari kopro sani kmoto fu Egepte.*Den sma fu Kus o hasti fu tyari kado gi Gado.
32 Un kownukondre fu grontapu, un singi gi Gado.Un singi prèisesingi* gi Yehovah. (Sela)
33 Un singi gi a sma di e rèi na hemel di de sensi owruten.
Yere! A krakti sten fu en de leki dondru.
34 Prèise Gado fu a krakti fu en.
A e tiri Israelèn a krakti fu en de na ini den wolku.
35 Sma musu abi bigi lespeki gi Gado di de na ini a santa presi fu en.
En na a Gado fu Israel,di e gi a pipel fu en krakti nanga makti.
Prèise Gado.
Futuwortu
^ Noso: „prei poku gi”.
^ Noso kande: „tapu den wolku”.
^ „Yah” na a syatu fasi fa sma e skrifi a nen Yehovah.
^ Noso: „sma di e opo densrefi”.
^ Hebrewtongo: „waka na fesi”.
^ Hebrewtongo: „dropu”.
^ Hebrewtongo: „gudu”.
^ Noso kande: „den skapupen”.
^ Noso: „gowtu di abi wan geri-grun kloru”.
^ Noso: „a ben de neleki snew ben fadon na Salmon”.
^ Noso: „Basan na wan bun bigi bergi”.
^ Noso: „wani gi ensrefi”.
^ Hebrewtongo: „Yah”.
^ Noso: „waka e”.
^ Noso kande: „meki den trapu na tapu pispisi solfru”.
^ Noso kande: „Heihei man o kmoto na Egepte”.
^ Noso: „prei poku”.
