Psalm 69:1-36
Gi a fesiman fu den pokuman: A musu prei leki a poku di nen „Den Leilibromki”.* Wan psalm fu David.
69 Mi Gado, ferlusu mi, mi e sungu gwe èn mi de fu dede.
2 Mi saka go dipi na ini tokotoko pe mi no abi nowan presi fu tnapu.
Mi kon de na ini dipi watra.Bigi watra srepi mi tyari gwe.
3 Mi bari so furu, taki mi kon weri.Mi no abi sten moro.
Mi wakti mi Gado so langa, taki mi ai kon weri.
4 Mi no du nowan ogri.Ma tòg den sma di e teige mi furu moro leki den w’wiri na mi ede.
Den sma di wani puru mi na pasi,den takr’ati feanti fu mi, kon furu srefsrefi.
Mi no fufuru noti, ma tòg den dwengi mi fu gi den san mi abi.
5 Gado, yu sabi den dondon sani di mi du.Den fowtu fu mi no kibri gi yu.
6 Yehovah di e tiri den legre èn di de a Moro Hei Masra,mi e begi yu, no meki den sma di e wakti yu kisi syen fu mi ede.
Gado fu Israel,no meki den sma di e kon suku yepi na yu kisi syen fu mi ede.
7 Na fu yu ede meki mi teki a koskosi fu sma.Mi kisi bigi syen.
8 Mi eigi brada no sabi mi moro.Den pkin fu mi eigi m’ma e si mi leki wan trakondre sma.
9 A lobi di mi abi gi yu oso de leki wan faya di e bron na ini mi.A srefi fasi fa sma e kosi yu, na so den e kosi mi.
10 Mi ben e saka misrefi èn mi ben faste.*Ma srefi fu a sani dati den ben e spotu mi.
11 Di mi weri rowkrosi,*sma bigin koti odo gi mi.
12 Den sma di e sdon na den portu e taki mi tori.Drunguman e meki singi fu mi.
13 Yehovah, arki a begi fu mina wan ten di yu feni bun.
Yu na wan Gado di abi furu lobi.*Sobun, piki mi èn sori taki yu na mi ferlusuman trutru.
14 Puru mi na ini a tokotoko.No meki mi saka go moro dipi.
Ferlusu mi fu den sma di e teige mi.Puru mi na ini a dipi watra.
15 No meki bigi watra srepi mi tyari gwe.No meki mi sungu go na ini a dipi se.No meki a peti* swari mi.
16 Tye Yehovah, piki mi, fu di yu lobi fu sori sma bun-ati.*
Yu abi furu sar’ati. Mi e begi yu, poti prakseri na mi.
17 No drai yu fesi gi yu futuboi.
Piki mi es’esi, bika mi de na nowtu.
18 Kon na mi èn ferlusu mi.Puru mi na a anu fu mi feanti.
19 Yu srefi sabi fa sma kosi mi èn fa den gi mi syen.
Yu e si ala den feanti fu mi.
20 Mi ati broko fu di sma kosi mi. A soro dati no man drei.*
Mi ben e howpu taki wan sma ben o sari mi, ma nowan sma no ben de.Mi ben e howpu taki sma ben o kon trowstu mi, ma mi no feni nowan sma.
21 Na presi fu dati, den gi mi vergif* fu nyan.Di watra kiri mi, den gi mi asin fu dringi.
22 Meki a fesa* fu den tron wan krafana gi denèn meki a gudu fu den tron wan val fu fanga den.
23 Meki den ai fu den kon dungru, so taki den no man si.Meki den futu* tan beifi.
24 Puru atibron na den tapu.Meki den firi a bigi atibron fu yu.
25 Meki a kampu fu den* tron wan brokopresi.No meki nowan sma tan na ini den tenti fu den.
26 Bika den e hari go na baka den sma di yu ben naki.Den e tan taki fu a pen fu den sma di yu ben gi mankeri.
27 Meki den sondu fu den kon moro furu.No si den leki ret’ati sma.
28 Figi a nen fu den puru na ini a buku fu libi.No skrifi a nen fu den makandra nanga a nen fu den ret’ati sma.
29 Mi e pina èn mi ati e sari.
Mi Gado, ferlusu mi èn kibri mi.
30 Mi o singi fu prèise a nen fu Gado.Mi o gi en glori èn mi o taki en tangi.
31 Disi o gi Yehovah moro prisiri leki te mi ben o gi en wan mankaw,iya, a o prisiri moro leki te mi ben o gi en wan yongu mankaw di abi tutu.
32 Den safr’ati sma o si disi èn den o breiti.
Un alamala di wani dini Gado, un teki dek’ati.
33 Bika Yehovah e arki den pôtismaèn a no o fergiti den sma fu en di de na strafu.
34 Meki hemel nanga grontapu prèise en.Meki a se nanga ala sani di e libi na ini prèise en tu.
35 Gado srefi o ferlusu Sionèn a o bow den foto fu Yuda baka.Dan a pipel fu en o go libi drape èn a kondre o kon de fu den.
36 Den bakapkin fu den futuboi fu en o kisi a kondre dati leki guduèn den wan di lobi a nen fu en o libi drape.
Futuwortu
^ Sma no sabi san disi wani taki trutru. Kande disi na wan instrument noso wan melodie. Noso a kan abi fu du nanga wan fasi fa sma ben e meki poku.
^ Soleki fa a sori, dan disi na a grebi.
^ Noso: „Mi no man teki en moro”.
^ Noso: „takru w’wiri”.
^ Hebrewtongo: „tafra”.
^ Hebrewtongo: „dyonku”. Bakratongo: „heup”.
^ Noso: „a kampu fu den di abi skotu”.
