Psalm 80:1-19
Gi a fesiman fu den pokuman: A musu prei leki a poku di nen „Leilibromki”.* Wan singi di sma musu memre. Wan psalm fu Asaf.
80 Gado, mi e begi yu, arki mi bika yu na a Skapuman fu Israel.Na yu e tyari Yosef leki fa wan skapuman e tyari den skapu fu en.
Yu di e sdon na tapu* den kerub-engel,mi e begi yu, meki yu leti skèin.*
2 Sori Efrayim, Benyamin nanga Manase a bigi makti fu yu.Kon ferlusu wi.
3 Gado, mi e begi yu, teki wi baka.Abi sar’ati nanga wi èn ferlusu wi.
4 Yehovah di e tiri den legre, o langa yu ati o bron nanga wi? O langa yu o weigri fu arki a begi fu yu pipel?
5 Na presi taki yu e gi den brede fu nyan, yu e meki den krei.Yu e meki den krei furu.
6 Yu meki den kondre na wi lontu feti nanga makandra fu luku suma o tiri wi.Den feanti fu wi e spotu wi o ten den wani.
7 Gado di e tiri den legre, mi e begi yu, teki wi baka.Abi sar’ati nanga wi èn ferlusu wi.
8 Neleki wan droifibon, yu rutu yu pipel puru na ini Egepte.
Yu yagi den trakondre sma kmoto na ini a kondre fu den, fu kan prani a droifibon drape.
9 Yu krin a pisi gron pe yu ben o prani en.A teki rutu èn a furu a heri kondre.
10 Den bergi ben de na ini a skaduw fu enèn den sedrebon fu Gado ben de na ondro den bigi taki fu en.
11 Den bigi taki fu en gro teleki den doro a seèn den pkin taki fu en doro te na a Gran Liba.*
12 Fu san ede yu broko den ston skotu puru di ben de lontu a droifidyari?Now ala sma di e waka psa e piki den froktu fu en.
13 Den bus’agu e kiri a bonèn den meti di e libi na ini a sabana e nyan en.
14 Gado di e tiri den legre, grantangi drai kon baka.
Luku kmoto fu hemel. Luku san e miti a droifibon disi!
Mi e begi yu, sorgu en.
15 Sorgu a pransun di yu prani nanga yu ret’anu,iya, sorgu a manpkin* di yu ben gi furu krakti, so taki yu kan kisi grani.
16 Sma koti a bon puru, dan den bron en nanga faya.
A pipel fu yu dede fu di yu pir’ai gi den.
17 Horbaka gi a man di de na yu ret’anusei,a manpkin fu libisma di yu ben gi furu krakti, so taki yu kan kisi grani.
18 Dan wi no o drai baka gi yu.
Hori wi na libi, so taki wi kan tan kari yu nen.
19 Yehovah Gado di e tiri den legre, mi e begi yu, teki wi baka.Abi sar’ati nanga wi èn ferlusu wi.
Futuwortu
^ Sma no sabi san disi wani taki trutru. Kande disi na wan instrument noso wan melodie. Noso a kan abi fu du nanga wan fasi fa sma ben e meki poku.
^ Noso kande: „na mindri”.
^ Noso: „meki sma si a leti fu yu”.
^ Dati na Eufraat-liba.
^ Noso: „a taki”.
