Gi den Romesma 7:1-25
7 Mi brada, a kan taki unu no sabi taki a Wèt na basi fu wan sma solanga a sma de na libi? (Mi e taki nanga den wan di sabi a Wèt.)
2 Fu eksempre, a Wèt e sori taki te wan uma trow, a tai na en masra solanga a masra de na libi. Ma efu en masra dede, a no abi fu gi yesi moro na den wèt fu en masra.
3 Dati meki te na uma ben o tron a wefi fu wan tra man, aladi en eigi masra de na libi ete, dan sma ben o taki dati a du sutadu. Ma te a masra fu en dede, a no abi fu gi yesi na den wèt fu en masra moro, èn a no du sutadu te a e tron a wefi fu wan tra man.
4 We mi brada, na so a de nanga unu tu. Fu di Krestes gi en skin, meki wi no abi fu gi yesi na a Wèt moro, ma wi kon de fu en, a sma di kisi wan opobaka. Dati meki wi musu du sani di e gi Gado glori.
5 Di wi ben e libi soleki fa wi skin wani, a Wèt tyari kon na krin taki sondu firi de na ini wi skin. Disi ben o meki wi dede te fu kaba.
6 Ma now wi no abi fu gi yesi na a Wèt moro, bika wi kon fri fu a Wèt di ben basi wi. Dati meki wi kan tron srafu na wan nyun fasi, sobun srafu di a yeye e tiri. Wi no abi fu de srafu na a owru fasi moro, sobun srafu fu a wèt di skrifi.
7 San wi sa taki dan? A Wèt na sondu? Kwetikweti! Trutru, mi no ben o sabi san na sondu efu a Wèt no ben de. Fu eksempre, mi no ben o sabi san na bigi-ai efu a Wèt no ben taki: „Un no musu abi bigi-ai.”
8 Ma a komando disi sori mi taki sondu meki mi abi ala sortu bigi-ai, bika sondro a Wèt mi no ben sabi san na sondu.
9 Fu taki en leti, sondro a Wèt, mi ben e libi nomo. Ma di a komando doro, mi kon sabi san na sondu. Na so mi kon sabi tu taki mi o dede.
10 Mi kon si tu taki a komando di ben musu tyari libi kon, tyari dede kon.
11 Bika a komando sori mi taki sondu kori mi èn na dati kiri mi.
12 Sobun, a Wèt srefi de santa, èn a komando de santa, a e krutu sani na wan reti fasi, èn a bun.
13 Ma a de so dan taki wan bun sani tyari dede kon gi mi? Kwetikweti! Na sondu tyari dede kon gi mi. Sondu gebroiki wan bun sani fu tyari dede kon gi mi, so taki a ben o kon na krin san na sondu. Iya, a komando e tyari kon na krin taki sondu na wan bun ogri sani.
14 Wi sabi taki a Wèt komopo fu Gado. Ma mi na wan sondu sma, wan srafu fu sondu.
15 Mi no man frustan fu san ede mi e tyari misrefi na so wan fasi. Bika san mi wani du, mi no e du, ma san mi no lobi kwetikweti, na dati mi e du.
16 Ma efu mi e du den sani di mi no wani du, dan mi e agri taki a Wèt bun.
17 Now mi no e du a sani disi moro, ma na a sondu di de na ini mi e du disi.
18 Bika mi sabi taki nowan bun sani de na ini mi, dati wani taki na ini mi skin. Mi wani du san bun, ma mi no man du en.
19 A bun di mi wani du, mi no e du, ma na ogri di mi no wani du, na dati mi e du.
20 Efu mi e du a sani di mi no wani du, dan a no mi e du a sani disi moro, ma na a sondu di de na ini mi e du disi.
21 We, mi kon si taki disi na a wèt di de na ini mi: Te mi wani du bun, dan ogri de na ini mi.
22 Na ini mi ati mi e prisiri trutru nanga a wèt fu Gado,
23 ma mi e si taki wan tra wèt de na ini mi skin, èn a e feti nanga a wèt fu mi frustan. A wèt dati na a sondu di de na ini mi skin, èn a e basi mi.
24 Ai, mi de fu sari fu tru! Suma sa frulusu mi fu a skin disi di e tyari mi go dede?
25 Mi e taki Gado tangi taki a frulusu mi nanga yepi fu wi Masra Yesus Krestes! Sobun, nanga mi frustan, mi na wan srafu fu a wèt fu Gado, ma nanga mi skin mi na wan srafu fu sondu di de leki wan wèt na ini mi skin.
