Rut 3:1-18
3 Ne Naomi, a m’ma fu a masra fu Rut, taigi en: „Mi pkin, a no mi musu suku wan presi gi yu fu tan?* A no mi musu sorgu taki sani waka bun nanga yu?
2 A no nanga den yongu uma fu Boas yu ben wroko? En na wan famiri fu wi. Tideneti a o wroko* na a presi pe den e masi groto.
3 Go wasi èn lobi switismeri oli gi yu skin. Weri yu moi krosi èn go na a presi pe den e masi groto. Solanga a man no kba nyan èn dringi, yu no musu meki a sabi taki yu drape.
4 Te a e go sribi, yu musu luku pe a e go d’don. Puru a duku di e tapu en futu èn go d’don na en futusei. Baka dati ensrefi o taigi yu san yu musu du.”
5 Ne Rut taigi Naomi: „Mi o du ala san yu taigi mi.”
6 Dan a go na a presi pe den e masi groto èn a du ala san Naomi taigi en.
7 Na a momenti dati, Boas ben e nyan èn dringi. A ben e firi bun. Baka dati a go d’don na a ipi groto di ben de drape. Safrisafri Rut waka go na Boas, a puru a duku di ben e tapu Boas futu, dan a go d’don na en futusei.
8 Mindrineti Boas bigin beifi. Dati meki a opo sdon. Ne a si wan uma e d’don na en futusei.
9 Boas aksi en: „Suma na yu?” Rut piki: „Mi na Rut. Mi e begi yu: Teki mi na ondro yu frei,* bika yu na a sma di abi a frantwortu fu bai mi puru na nowtu.”*
10 Ne Boas taki: „Meki Yehovah blesi yu, mi pkin. Yu ben sori kba taki yu abi lobi*, ma now dati de moro krin fu si, fu di yu no go suku wan yongu man fu trow, awinsi na wan guduwan noso wan pôtiwan.
11 No frede mi pkin. Mi o du ala san yu aksi mi. Ala sma na ini a foto sabi taki yu na wan bun uma.
12 A tru taki mi kan bai yu puru na nowtu, ma wan moro krosbei famiriman de di kan du dati tu.
13 Tan dyaso tideneti, dan tamara m’manten mi o luku efu a famiriman dati wani bai yu puru na nowtu. Efu a du dati, dan a bun. Meki en bai yu puru. Ma efu a no wani du dati, dan mi o du en. Mi e sweri na Yehovah, a libilibi Gado, taki mi o bai yu puru na nowtu. Tan d’don dyaso teleki m’manten.”
14 Dati meki Rut tan d’don na Boas futusei teleki m’manten. Fosi dei broko, a opo fu gwe fu di a no ben wani sma si en. Dan Boas taki: „Sma no musu sabi taki wan frow ben kon dya pe wi e masi groto.”
15 A taki tu: „Tyari a dyakti fu yu kon, dan yu hori en opo.” Sobun, Rut hori a dyakti opo, dan Boas kanti sowan 25 kilo* groto go na ini a dyakti. Ne a opo en poti na tapu Rut ede. Baka dati Boas go na ini a foto.
16 Dan Rut go na Naomi. Di a doro, Naomi aksi en: „Fa sani go* mi pkin?” Ne Rut ferteri Naomi ala san a man du gi en.
17 A taigi Naomi: „A man gi mi sowan 25 kilo groto, dan a taigi mi: ’Yu no musu go nanga leigi anu na a m’ma fu yu masra.’”
18 Ne Naomi taki: „Mi pkin, wakti luku fa sani o waka, bika a man disi no o rostu solanga a no seti a tori disi tide.”
Futuwortu
^ Hebrewtongo: „wan presi gi yu fu rostu.”
^ Noso: „wai den buba puru na a groto”.
^ Hebrewtongo: „Bradi a lanki fu yu krosi abra yu umasrafu”. Soleki fa a sori, dan a ben aksi Boas fu yepi en.
^ Kande disi ben de siksi sea.
^ Hebrewtongo: „Suma na yu?”
