Rut 4:1-22
4 Na so Boas go na a portu fu a foto èn a go sdon drape. Ne a si a man di a ben taki fu en. Dati na a man di ben kan bai Rut puru na nowtu. Di a man waka psa, Boas kari en, dan a taigi en: „Kon yere mi mati, kon sdon dyaso.” Sobun, a man go na Boas, dan a go sdon.
2 Baka dati Boas kari tin owru man fu a foto kon, dan a taki: „Un sdon dyaso.” Ne den go sdon.
3 Dan Boas taigi a man: „Naomi drai kon baka fu Moab èn a abi fu seri a pisi gron fu wi brada Elimeilek.
4 Dati meki mi prakseri fu taki a tori disi nanga yu. Now di den owru man nanga den tra sma de dyaso, yu abi na okasi fu bai a pisi gron. Efu yu wani bai* a gron, dan yu kan bai en. Ma efu yu no wani bai en, dan yu musu taigi mi, so taki mi sabi san mi o du. Yu na a fosiwan di abi a reti fu bai a gron, ma efu yu no bai en, dan na mi o abi fu bai en.” Ne a man taki: „Mi o bai a gron.”
5 Dan Boas taki: „Te yu bai a gron fu Naomi, dan yu musu bai en tu fu Rut, na uma fu Moab, a frow fu a man di dede. Na so a gron kan tan tapu a nen fu a man dati.”
6 Di a man yere disi, a taki: „Mi no o man bai a gron, noso mi o lasi. Mi e gi yu primisi fu bai a gron gi yusrefi, fu di mi no man bai en.”
7 Fosi, sma na ini Israel ben abi a gwenti disi: Te den ben e bai wan gron baka, noso te den ben e kenki sani nanga makandra, noso te den ben e du iniwan tra bisnis, dan wan fu den ben e puru wan fu den s’su fu en èn a ben e gi a tra sma a s’su dati. Na so sma ben e seti den sortu tori disi na ini Israel.
8 Dati meki a man di ben musu bai a gron baka, taigi Boas: „Bai a gron gi yusrefi.” Dan a man puru en s’su na en futu.
9 Ne Boas taigi den owru man nanga ala den sma di ben de drape: „Tide unu srefi si taki ala den sani di ben de fu Elimeilek, Kilion nanga Maklon, mi bai fu Naomi.
10 Boiti dati, mi o trow nanga* a Moab uma Rut di ben de a frow fu Maklon. Na so a famirigudu o tan tapu a nen fu a man di dede. Dan en famiri nanga den sma fu a foto kan tan memre a nen fu en. Tide unu na kotoigi fu disi.”
11 Ne ala den sma di ben de drape na a portu èn den owru man, taki: „Wi na yu kotoigi! Meki Yehovah blesi a frow nanga suma yu o trow èn meki a de leki Rakel nanga Lea di ben tron m’ma fu den pkin fu Israel. Meki a de so taki sani waka bun nanga yu na ini Efrata èn taki yu kisi wan bun nen* na ini Betlehem.
12 Meki den pkin di Yehovah o gi yu nanga a yongu uma disi, kon furu leki den pkin na ini na osofamiri fu Peres, a manpkin fu Tamar nanga Yuda.”
13 Baka dati Boas trow nanga Rut èn a go d’don nanga en. Dan Yehovah meki Rut kon de nanga bere èn a kisi wan manpkin.
14 Ne den uma taigi Naomi: „Prèise Yehovah, fu di a sorgu taki wan famiriman bai yu puru na nowtu tide. Meki a pkin disi kisi biginen na ini Israel.
15 A* gi yu nyun libi baka èn a o sorgu gi yu na tapu yu owrudei, bika en na a manpkin fu Rut. Rut lobi yu èn a bun moro leki seibi manpkin.”
16 Naomi teki a pkin, dan a brasa en hori. Na en ben e luku a pkin* gi Rut.
17 Den uma fu a birti taki: „Naomi kisi wan manpkin.” Dan den gi a pkin wan nen. Den kari en Obed. En na a p’pa fu Isai, a p’pa fu David.
18 Disi na den pkin nanga bakapkin fu Peres: Peres tron a p’pa fu Hesron.
19 Hesron tron a p’pa fu Ram. Ram tron a p’pa fu Aminadab.
20 Aminadab tron a p’pa fu Naheson. Naheson tron a p’pa fu Salmon.
21 Salmon tron a p’pa fu Boas. Boas tron a p’pa fu Obed.
22 Obed tron a p’pa fu Isai èn Isai tron a p’pa fu David.
Futuwortu
^ Noso: „bai baka”.
^ Hebrewtongo: „meki wan nen bekènti”.
^ Dati na a granpkin fu Naomi.
^ Noso: „ben e sorgu a pkin”.
