Sari singi 5:1-22
5 Ke Yehovah, memre san pasa nanga wi. Mi e begi yu, luku fa sma e spotu wi.
2 Trakondre sma teki a kondre di wi ben musu kisi. Sma fu tra kondre teki den oso fu wi.
3 Wi kon de leki pikin di no abi papa moro. Den mama fu wi kon de leki uma di masra dede kaba.
4 Wi ben abi fu pai moni fu kan dringi wi eigi watra èn fu kan bai wi eigi udu.
5 Den feanti di e hari kon na wi baka de so krosibei kaba taki den de fu kisi wi. Wi kon weri. Wi no kisi okasi srefi fu teki bro.
6 Wi go suku yepi na Egepte èn na Asiria, so taki wi ben kan feni wan sani fu nyan.
7 Na den afo fu wi ben sondu. Den no de moro. Ma na wi ben abi fu tyari den sondu fu den.
8 Na sma di ben de futuboi nomo ben e tiri wi. Nowan sma e kon fu puru wi na den anu.
9 Wi e gowe go suku nyanyan, aladi wi sabi taki wi kan lasi wi libi, fu di sma de na ini a sabana di kan kiri wi nanga feti-owru.
10 A buba fu wi kon faya neleki wan onfu, fu di angri e kiri wi srefisrefi.
11 Sma meki den wefi na Sion nanga den yongu uma na den foto fu Yuda, kisi syen.
12 Den anga den granman na wán anu nomo. Srefi den owru man den no lespeki.
13 Srefi den yongu man ben abi fu syow anumiri. Boi di ben e syow hebi udu, ben e suku fu fadon.
14 Den owru man srefi no e sidon na a portu moro. Den yonkuman no e prei poku moro.
15 Wi ati no e prisiri moro. Fosi wi ben e dansi meki prisiri, ma now na soso sari wi e sari.
16 A kownu-ati fu wi fadon komoto na wi ede. We, helu fu wi, fu di wi sondu!
17 Dati meki wi ati kon siki. Iya, na fu dati ede meki wi ai kon dungru.
18 Fu di sma gowe libi a bergi fu Sion, meki a kon tron wan brokopresi. Srefi sabanadagu waka lontu drape.
19 Ma Yehovah, fu têgo yu o tan sidon na tapu yu kownusturu, di o tan fu ala ten.
20 Fu san ede yu frigiti wi fu ala ten? Fu san ede yu gowe libi wi so langa?
21 Yehovah, meki wi drai kon baka na yu, dan wi o kon baka wantewante. Meki ala sani kon de leki fa a ben de fosi.
22 Ma wi sabi taki yu drai yu baka gi wi. Yu ati ben bron srefisrefi nanga wi.
