Gi Titus 2:1-15
2 Ma yu musu tan taki fu sani di fiti a soifri leri.
2 Den man di owru kaba no musu du sani pasa marki. Den musu de seryusu. Den musu de nanga krin frustan. Den musu abi wan tranga bribi nanga tranga lobi èn den musu de sma di e horidoro.
3 Sosrefi, den uma di owru kaba musu tyari densrefi na wan fasi di fiti santa sma. Den no musu fruteri ogri-ati lei fu trawan. Den no musu lobi fu dringi furu win. Den musu de sma di e leri trawan bun sani.
4 Na so fasi den kan leri den yongu uma fu lobi den masra, fu lobi den pikin fu den,
5 fu de nanga krin frustan, fu libi wan krin libi, fu wroko na oso, fu de bun sma èn fu saka densrefi na ondro den eigi masra, so taki sma no kan taki takru fu a wortu fu Gado.
6 Sosrefi, tan gi den yongu man deki-ati fu de nanga krin frustan.
7 Na ala fasi yu musu de wan eksempre gi sma te yu e du bun sani. Na wan seryusu fasi yu musu leri sma sani di soifri.
8 Taki na wan fasi di fiti, so taki sma no man feni fowtu na tapu san yu taki. Na so fasi gensman o kisi syen, fu di den no man taki nowan takru fu wi.
9 Na ala fasi, srafu musu saka densrefi na ondro den basi fu den. Den musu pruberi fu plisi den sondro fu haritaki nanga den.
10 Den no musu fufuru sani fu den basi fu den, ma den musu sori taki sma kan frutrow den dorodoro, so taki den kan moi a leri fu Gado, wi Frulusuman, na ala fasi.
11 Gado meki sma si a bun-ati fu en èn na so fasi ala sortu sma kan kisi frulusu.
12 Disi e leri wi fu kakafutu gi ogridu èn gi den lostu fu grontapu. A e leri wi tu fu libi nanga krin frustan, fu de reti-ati sma èn fu dini Gado fayafaya na ini a ten disi.
13 Wi musu libi na a fasi disi, aladi wi e wakti a prisiri sani di wi e howpu na tapu. Boiti dati, wi e wakti tu fu si fa a gran Gado nanga Krestes Yesus, wi Frulusuman, o sori densrefi nanga glori.
14 Krestes gi ensrefi gi a bun fu wi fu kan frulusu wi fu wan libi di lai ala sortu kruktudu èn fu kan krin wan pipel gi ensrefi, wan pipel di ben o de spesrutu fu en èn di ben o de fayafaya fu du bun sani.
15 Tan taki fu den sani disi, tan gi sma deki-ati èn piri-ai gi den, fu di yu kisi a reti fu du dati. No meki nowan sma wisiwasi yu.
