Tori fu den apostel 1:1-26
1 Teofilus, na ini a fosi tori di mi skrifi yu, mi ferteri yu ala sani di Yesus ben du èn di a ben leri sma sensi a bigin
2 teleki a dei di Gado opo en go na hemel. Fosi a dei dati, santa yeye ben yepi en fu gi leri na den man di a ben teki leki apostel.
3 Baka di a pina, a meki den si en furu leisi, so taki den ben o de seiker taki a ben de na libi. Den si en na ini wan pisi ten fu 40 dei èn a ben e ferteri den fu a Kownukondre fu Gado.
4 Di a kon makandra nanga den, a taigi den: „Un no musu gwe libi Yerusalem. Tan wakti a sani di a Papa pramisi, soleki fa mi ben taigi unu.
5 A tru taki Yohanes ben dopu sma nanga watra. Ma baka wan tu dei unu o dopu nanga santa yeye.”
6 Di den kon makandra, den aksi en: „Masra, yu o seti a kownukondre baka gi Israel na ini a ten disi?”
7 A taigi den: „Na a Papa w’wan abi a reti* fu taki o ten son sani o psa èn unu no abi fu sabi o ten den sani dati o psa.
8 Ma unu o kisi krakti te a santa yeye kon na un tapu èn unu o de kotoigi fu mi na ini Yerusalem, na ini heri Yudea nanga Samaria èn te na den moro farawe presi fu grontapu.”
9 Baka di Yesus taki den sani disi, Gado opo en go na hemel leti na den fesi. Dan wan wolku tapu en, so taki den no ben man si en moro.
10 Di den ben e luku go na loktu fu si fa a ben e opo go na hemel, dan wantronso tu man na ini weti krosi kon tnapu na den sei.
11 Den taki: „Un man fu Galilea, fu san ede unu e tnapu e luku go na loktu? A Yesus disi di Gado puru na un mindri èn di opo go na hemel, o kon na a srefi fasi fa unu si a go na hemel.”
12 Baka dati den disipel gwe fu a bergi di den e kari Olèif-bergi èn den drai go baka na Yerusalem. A bergi disi de krosbei fu Yerusalem èn a pasi fu doro drape langa sowan wán kilometer.*
13 Di den disipel doro na ini a foto, den go na ini a kamra na a sodro fu na oso pe den ben e tan. Den disipel disi ben de Petrus, Yohanes, Yakobus, Andreas, Filipus, Tomas, Bartolomeyus, Mateyus, Yakobus di de a manpkin fu Alfeyus, Simon di sma sabi leki wan man di e du sani nanga en heri ati èn Yudas* di de a manpkin fu Yakobus.
14 Leki wán man, den alamala tan begi makandra nanga wan tu umasma. Maria, a mama fu Yesus, èn den brada fu Yesus ben de nanga den tu.
15 Na a ten dati, sowan 120 sma ben kon makandra. Petrus opo tnapu na mindri den brada èn a taki:
16 „Brada, den sani di den santa buku taki fu Yudas ben musu kon tru. Santa yeye ben meki David taki na fesi dati Yudas ben o tyari sma go grabu Yesus.
17 Yudas ben de wan fu wi èn a ben wroko makandra nanga wi.
18 (A man disi bai wan gron nanga a moni di a ben kisi gi na ogri di a ben du. Baka dati a fadon nanga en ede go na gron, en bere panya opo* èn en heri inbere kon na doro.
19 Ala den sma di e libi na ini Yerusalem kon sabi a tori disi. Fu dati ede den kari a gron dati Akeldama na ini a tongo fu den. Disi wani taki „Brudugron”.)
20 A sani disi ben skrifi na ini a buku fu den Psalm: ’Meki en tanpresi tron wan brokopresi èn no meki nowan sma tan na ini.’ A skrifi tu: ’Meki wan tra sma teki a wroko fu en leki fesiman.’
21 Dati meki a de fanowdu fu poti wan tra sma na en presi. A musu de wan man di ben de makandra nanga wi a heri pisi ten di Masra Yesus ben du en wroko* na wi mindri,
22 fu a ten di Yohanes dopu Yesus teleki a dei di Gado puru en na wi mindri opo go na hemel. Neleki wi, a musu de wan man di si taki Masra kisi wan opobaka.”
23 Fu dati ede den teki tu man. A wan ben de Yosef di sma sabi tu leki Barsabas noso Yustus èn a trawan ben de Matias.
24 Ne den begi Gado èn den taki: „Yehovah,* yu na a sma di sabi fa ala sma ati tan. Sori wi sortwan fu den tu man disi yu teki
25 fu du a wroko disi èn fu tron wan apostel na presi fu Yudas di gwe libi en wroko fu go du san en srefi wani.”
26 Baka dati den iti lot fu kon sabi sortwan fu den tu man disi Gado ben teki. Ne a lot fadon tapu Matias èn a tron wan apostel neleki den 11 trawan.*
Futuwortu
^ Noso: „makti”.
^ Grikitongo: „wan Sabat-dei waka”. Na so fara wan Dyu ben mag waka tapu Sabat-dei.
^ Den ben kari en Tadeyus tu.
^ Noso: „a panya opo na mindrisei”.
^ Hebrewtongo: „go na inisei èn na dorosei”.
^ Luku „Tra prenspari sani” A5.
^ Noso: „sma ben si en a srefi leki den 11 tra apostel”.
