Tori fu den apostel 10:1-48
10 Wan man ben de na Sesareya èn a ben nen Kornelius. A ben de wan legre-ofsiri* na ini a srudatigrupu di den ben e kari a Grupu fu Italiakondre.*
2 A man disi ben abi wan tranga bribi na ini Gado. En nanga ala den sma na ini en oso ben e anbegi Gado, a ben e du bun gi pôtisma èn a ben abi a gwenti fu begi Gado.
3 Wan dei, na wan ten fu dri yuru bakadina,* a si wan fisyun. Na ini a fisyun a si krin taki wan engel fu Gado kon na ini en oso. Na engel taki: „Kornelius!”
4 Kornelius piri en ai luku na engel fu di a ben frede. A taki: „Masra, san psa?” Na engel taigi en: „Gado yere den begi fu yu èn a si fa yu e du bun gi den pôtisma.
5 Fu dati ede seni wan tu man go na Yope fu go kari Simon di sma sabi tu leki Petrus.
6 A man disi e tan na Simon, wan man di e meki leer nanga a buba fu meti. Na oso fu en de krosbei fu a se.”
7 Di na engel kba taki, dan a gwe. Wantewante Kornelius kari tu futuboi nanga wan srudati fu en di ben abi wan tranga bribi na ini Gado.
8 A ferteri den ala sani, dan a seni den go na Yope.
9 A dei baka dati, di den ben de krosbei fu a foto, Petrus go na tapu a dak fu na oso fu begi na wan ten fu 12 yuru bakadina.*
10 Ma angri bigin kiri en èn a ben wani nyan. Di den ben e sreka a n’nyan gi en, a kisi wan fisyun.
11 A si hemel opo èn wan sani di ben gersi wan bigi duku ben e saka kon na grontapu. A ben gersi leki wan sani ben e hori en na den fo uku.
12 Ala sortu meti di e waka tapu fo futu, meti di e kroipi* nanga fowru di e frei na loktu ben de na ini a duku.
13 Ne wan sten taigi en: „Petrus, opo. Srakti wan meti, dan yu nyan!”
14 Ma Petrus taki: „Nôno Masra, kwetkweti. Noiti mi nyan wan sani di no krin èn di no santa.”
15 Ne a sten taki nanga en a di fu tu leisi. A taigi en: „Efu Gado meki wan sani kon krin, dan yu no musu taki moro taki a sani dati no krin.”
16 Baka di a sani disi psa a di fu dri leisi, a duku opo go na hemel wantewante.
17 Petrus ben e broko en ede ete fu sabi san a fisyun di a ben si ben wani taki. Ne den man di Kornelius ben seni, doro drape. Den ben aksi sma pe na oso fu Simon de èn now den ben tnapu na a portu.
18 Den bari aksi efu Simon di sma ben sabi tu leki Petrus, ben e tan drape.
19 Petrus ben e prakseri ete fu a fisyun, di a santa yeye taigi en: „Luku, dri man e aksi fu yu.
20 Opo, dan yu go na gron. Yu no abi fu tweifri fu go nanga den, bika na mi seni den kon.”
21 Dati meki Petrus saka go na gron na den man èn a taigi den: „Mi na a sma di unu e suku. Fu san ede unu kon dyaso?”
22 Ne den taigi en: „Wan legre-ofsiri di nen Kornelius seni wi kon. A de wan ret’ati man di e bribi na ini Gado èn a abi wan bun nen na a heri Dyu pipel. Wan santa engel ben tyari wan boskopu fu Gado kon gi en. A taigi en taki a musu seni kari yu fu kon na en oso, so taki a kan yere san yu abi fu taki.”
23 Fu dati ede Petrus kari den kon na ini na oso èn a meki den tan drape.
A dei baka dati, a sreka ala sani, dan a gwe nanga den. Wan tu brada fu Yope go nanga en tu.
24 A tamara fu en a doro na ini Sesareya. Kornelius ben wakti den kba èn a ben kari den famiriman nanga den bun mati fu en kon.
25 Di Petrus kon na ini na oso, Kornelius waka miti en èn a saka kindi fu gi en grani.
26 Ma Petrus meki a opo tnapu èn a taigi en: „Opo, mi na wan libisma leki yu.”
27 Den bigin taki nanga makandra èn den waka go na insei. Ne Petrus si taki furu sma ben kon makandra drape.
28 A taigi den: „Unu sabi heri bun taki wan Dyu no mag moksi nanga wan sma di no de wan Dyu èn taki a no mag go na a oso fu den. Ma tòg Gado sori mi taki mi no musu taki fu nowan sma taki a no krin noso taki a no santa.
29 Dati meki mi ben de klarklari fu kon di unu seni kari mi. Fu dati ede mi e aksi unu fu san ede unu seni kari mi.”
30 Kornelius piki en: „Fo dei psa, mi ben e begi na ini mi oso. A ben de a srefi ten disi, sowan dri yuru bakadina.* Dan wantronso wan man na ini brenki krosi ben e tnapu na mi fesi.
31 A taigi mi: ’Kornelius, Gado yere a begi fu yu èn a si den bun sani di yu du gi den pôtisma.
32 Fu dati ede, seni sma go na Yope fu kari Simon di sma sabi tu leki Petrus. A man disi e tan na ini na oso fu Simon, wan man di e meki leer nanga a buba fu meti èn di e tan krosbei fu a se.’
33 Dati meki mi seni sma kon na yu wantewante èn a bun taki yu kon. We, now wi alamala de na fesi Gado fu yere ala den sani di Yehovah* taigi yu fu taki.”
34 Ne Petrus taigi en: „Now mi e ferstan trutru taki Gado no lobi a wan sma moro a trawan.
35 Awinsi fu sortu kondre wan sma de, Gado o feni en bun efu a e lespeki Gado èn a e du san reti.
36 A boskopu di a seni gi den Israelsma na a bun nyunsu fu freide di Yesus Krestes tyari kon. Na en na Masra fu ala sma.
37 Unu sabi fu sortu tori sma ben taki na ini heri Yudea. (Den bigin taki a tori dati na ini Galilea, baka di Yohanes preiki gi sma taki den musu teki dopu.)
38 Den ben taki fu Yesus fu a foto Nasaret taki Gado ben salfu en nanga santa yeye èn a ben gi en krakti. Yesus ben e waka na ini a heri kondre e du bun gi sma èn a ben e dresi ala sma di Didibri ben pina, bika Gado ben de nanga en.
39 Wi srefi si ala den sani di a du na ini a kondre fu den Dyu èn na ini Yerusalem. Ma den kiri en di den spikri en na wan postu.*
40 Gado gi en wan opobaka na a di fu dri dei èn a meki sma si en.
41 Ma a no meki ala sma si en. Na wi nomo di nyan èn di dringi nanga en, si en baka di a kisi wan opobaka. Gado ben taki na fesi kba taki na wi ben o si en èn taki na wi ben o ferteri fu en.
42 A taigi wi tu fu preiki gi a pipel èn fu ferteri den finfini taki disi na a sma di Gado poti fu krutu den libiwan nanga den dedewan.
43 Na fu en ala den profeiti ben taki. Den ben taki dati ibri sma di e bribi na ini en o kisi pardon fu sondu na ini en nen.”
44 Petrus ben e taki ete fu den sani disi, di santa yeye kon na tapu ala den sma di yere a wortu fu Gado.
45 Den brada di ben kon nanga Petrus ben de sma di besnèi. Den ben ferwondru, fu di a santa yeye* ben kon tu na tapu sma di no de Dyu.
46 Den ben yere fa den ben e taki tra tongo èn fa den ben e gi Gado glori. Ne Petrus taki:
47 „Den sma disi kisi santa yeye neleki wi. Sobun, suma kan tapu den fu dopu na ini watra?”
48 Ne a taigi den fu dopu na ini a nen fu Yesus Krestes. Baka dati den aksi en fu tan wan tu dei nanga den.
Futuwortu
^ Noso: „centurio”. Disi na a edeman fu wan grupu fu 100 srudati.
^ Noso: „cohort”. Disi na wan grupu fu 600 srudati fu Rome.
^ Grikitongo: „a di fu neigi yuru fu a dei”.
^ Grikitongo: „a di fu siksi yuru fu a dei”.
^ Dati na meti soleki sneki nanga lagadisa.
^ Grikitongo: „a di fu neigi yuru fu a dei”.
^ Luku „Tra prenspari sani” A5.
^ Noso: „bon”.
^ Noso: „a santa yeye di Gado e gi sma leki kado”.
