Tori fu den apostel 15:1-41

  • Kresten na ini Antiokia e hartaki efu ala sma musu besnèi (1, 2)

  • Den tyari a tori go na den brada na ini Yerusalem (3-5)

  • Den owruman nanga den apostel e kon makandra fu taki fu a tori (6-21)

  • Brifi fu a tiri skin (22-29)

  • Wan brifi di gi den gemeente dek’ati (30-35)

  • Paulus nanga Barnabas prati èn den e go den eigi pasi (36-41)

15  Wan tu disipel ben kon fu Yudea èn den bigin leri den brada: „Efu unu no besnèi soleki fa Moses ben taki, dan unu no o kisi ferlusu.” 2  Ma Paulus nanga Barnabas no ben agri nanga den èn a sani disi tyari wán dyugudyugu kon. Fu dati ede den meki Paulus, Barnabas, nanga wan tu trawan go na den apostel nanga den owruman na ini Yerusalem fu taki fu a tori disi. 3  Baka di a gemeente tyari den man disi af’pasi, den drai go baka. Ne Paulus, Barnabas nanga den tra brada waka go na Fenisia nanga Samaria. Den ben e ferteri den brada drape finfini fa den sma di no de Dyu drai den libi. A sani disi ben meki den prisiri. 4  Di den doro na ini Yerusalem, dan a gemeente, den apostel nanga den owruman gi den man disi wan switikon èn den man ferteri den ala den sani di Gado ben meki den du. 5  Ma wan tu fu den sma di ben teki a bribi, ben de bakaman fu den Fariseiman fosi. Den sma disi opo fu den sturu èn den taki: „Den musu besnèi èn wi musu taigi den fu du san a Wet di Gado gi Moses e taki.” 6  Ne den apostel nanga den owruman kon makandra fu taki fu a tori disi. 7  Ma di den no ben man agri nanga makandra,* dan Petrus opo èn a taigi den: „Mi brada, unu sabi heri bun taki mi ben de a foswan di Gado seni fu tyari a bun nyunsu gi den sma di no de Dyu, so taki den ben kan teki a bribi. 8  Gado di sabi fa sma ati de, sori taki a feni den bun, fu di a gi den a santa yeye leki fa a gi wi dati tu. 9  A no si nowan enkri difrenti na mindri wi nanga den, ma a krin den ati fu di den ben bribi. 10  We dan fu san ede unu e tesi Gado fu di unu e poti wan hebi lai na tapu den disipel? Den afo fu wi no ben man tyari a lai dati èn wi srefi no ben man tyari en tu. 11  Ma wi e bribi taki a bun-ati fu Masra Yesus o meki wi kisi ferlusu neleki den.” 12  Di Petrus taki dati, dan ala sma tan pî èn den bigin arki di Barnabas nanga Paulus ferteri fa Gado meki den du furu wondru nanga bigi sani gi den sma di no de Dyu. 13  Baka di den kba taki, dan Yakobus piki den: „Brada, un arki mi. 14  Simeon* ferteri finfini fa Gado bigin poti prakseri na den sma di no de Dyu, so taki a ben kan puru wan pipel na den mindri di ben o tyari en nen. 15  Na disi den buku fu den Profeiti e taki tu. Den e taki: 16  ’Te den sani disi psa, dan mi o drai kon baka fu bow a broko oso* fu David baka. Mi o meki a brokopresi disi kon bun baka èn mi o bow en baka. 17  Na so den sma di tan abra fu a pipel disi kan suku Yehovah* fayafaya, makandra nanga ala den trakondre sma di e tyari mi nen, na so Yehovah* taki, a Gado di e du den sani disi 18  di a ben besroiti sensi owruten.’ 19  Fu dati ede mi besroiti fu no meki en muilek* gi den trakondre sma di wani dini Gado, 20  ma fu skrifi den taki den musu tan fara fu den sani disi: sani di abi fu du nanga falsi gado,* seks di Gado no feni bun,* meti di sma tyokro kiri* èn brudu. 21  Bika sensi owruten sma e taki fu Moses na ini ibri foto. Den e leisi den buku fu en nanga tranga sten na ini den snoga ibri Sabat-dei.” 22  Ne den apostel nanga den owruman besroiti fu teki tu man na den mindri èn fu seni den go na Antiokia, makandra nanga Paulus nanga Barnabas. A heri gemeente ben horbaka gi a besroiti dati. Den man disi ben de Yudas, di sma sabi tu leki Barsabas, nanga Silas. Den tu man disi ben abi furu frantwortu na ini a gemeente. 23  Den gi den brada wan brifi. Na ini a brifi ben skrifi: „Disi na wan brifi fu den brada fu unu, den apostel nanga den owruman. Wi e seni odi gi den brada fu Antiokia, Siria nanga Silisia di no de Dyu. 24  Wi yere taki wan tu sma fu dya kon na unu èn den taki sani di trobi unu. Den ben wani bruya unu, ma a no wi seni den kon. 25  Dati meki wi alamala besroiti fu teki tu man fu seni kon na unu makandra nanga Barnabas nanga Paulus, den lobi brada fu wi 26  di ben de klarklari fu dede gi a nen fu Masra Yesus Krestes. 27  Wi e seni Yudas nanga Silas kon, so taki den srefi kan ferteri unu san skrifi na ini a brifi disi. 28  Bika a santa yeye yepi wi fu teki a besroiti fu no poti nowan tra hebi na un tapu, boiti den prenspari sani disi: 29  Un musu tan fara fu sani di gi leki ofrandi na falsi gado, fu brudu, fu meti di sma tyokro kiri* èn fu seks di Gado no feni bun.* Efu unu e tan fara fu den sani disi, dan a o go bun nanga unu. Un tan bun.”* 30  Ne den seni den man go na Antiokia. Di den doro drape den meki ala den disipel kon makandra èn den gi den a brifi. 31  Baka di den leisi a brifi, dan den prisiri fu di a gi den dek’ati. 32  Yudas nanga Silas di ben de profeiti tu, hori furu lezing gi den brada fu gi den dek’ati nanga krakti. 33  Baka di den tan drape wan pisi ten, den brada taki den odi, dan den drai go baka na Yerusalem. 34 * —— 35  Ma Paulus nanga Barnabas tan na Antiokia. Den nanga furu trawan ben e gi sma leri èn den ben preiki a bun nyunsu fu a wortu fu Yehovah.* 36  Baka wan pisi ten Paulus taigi Barnabas: „Kow drai go baka na ala den foto pe wi ben ferteri sma a wortu fu Yehovah.* Dan wi kan si fa a e go nanga den brada drape.” 37  Barnabas ben wani nomonomo taki Yohanes, di sma sabi tu leki Markus, ben musu kon nanga den. 38  Ma Paulus no ben wani taki a kon nanga den, fu di Markus ben gwe libi den di den ben de na Pamfilia èn a no ben go nanga den fu du a preikiwroko. 39  A sani disi meki taki den tu man disi kisi bun bigi trobi. Dati meki ibriwan fu den go en eigi pasi. Barnabas meki Markus go nanga en èn den teki wan sipi go na Siprus. 40  Paulus teki Silas fu go nanga en. Ne den brada aksi Yehovah* fu meki sani waka bun nanga Paulus. Baka dati Paulus nanga Silas gwe. 41  Dan a waka psa na ini Siria nanga Silisia èn a gi den gemeente drape dek’ati.

Futuwortu

^ Noso: „Baka di den hartaki”.
^ Na so den ben kari Petrus tu.
^ Noso: „tenti”, „kampu”.
^ Luku „Tra prenspari sani” A5.
^ Luku „Tra prenspari sani” A5.
^ Noso: „mi feni taki unu no musu meki en muilek”.
^ Griki wortu: porneya. Luku Wortubuku.
^ Noso: „meti di sma kiri sondro fu meki a brudu lon kmopo”.
^ Hebrewtongo: „sani di doti fu di den abi fu du nanga falsi gado”.
^ Noso: „meti di sma kiri sondro fu meki a brudu lon kmopo”.
^ Griki wortu: porneya. Luku Wortubuku.
^ Noso: „Wi e winsi unu wan bun gosontu”.
^ Luku „Tra prenspari sani” A3.
^ Luku „Tra prenspari sani” A5.
^ Luku „Tra prenspari sani” A5.
^ Luku „Tra prenspari sani” A5.
Bijbel—⁠Nyun-Grontapuvertaling (Nyun wan 2023) 
Tori fu den apostel 15
Sranantongo
Leisi Bijbel tapu Internet
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt