Tori fu den apostel 2:1-47

PREI

Santa yeye kon na sma tapu na a Pinksterfesa (1-13)
A lezing fu Petrus (14-36)
Den sma wani kenki den libi, baka a lezing fu Petrus (37-41)
- 3000 sma dopu (41)
Kresten e libi leki brada nanga sisa nanga makandra (42-47)

2 Na a dei fu a Pinksterfesa, den alamala ben de makandra na a srefi presi. ² Wantronso wan b’bari kmoto na hemel. A ben de leki te wan tranga winti e wai èn a ben de fu yere na ini a heri oso pe den ben e sdon. ³ Ne den si sani leki pkinpkin faya di ben kon na tapu na ede fu ibri sma drape. ⁴ Ne santa yeye kon na tapu den alamala èn den bigin taki difrenti tongo, soleki fa a santa yeye ben e meki den taki. ⁵ Na a ten dati, yu ben abi Dyu na ini Yerusalem di ben abi bigi lespeki gi Gado èn di ben kmopo fu ibri kondre na grontapu. ⁶ Di den yere a b’bari, wan bigi grupu sma kon makandra. Den no ben man bribi taki den disipel ben e taki a tongo fu ibriwan fu den. ⁷ Fu di den ben ferwondru, den taki: „Ala den sma di e taki drape na fu Galilea tòg? ⁸ Dan fa a du kon taki ibriwan fu wi e yere sma e taki na ini wi eigi tongo?* ⁹ Dyaso yu abi Partiasma, Mediasma, Elamsma nanga sma di e libi na ini Mesopotamia, Yudea, Kapadosia, Pontus nanga a distrikt Asia. ¹⁰ Yu abi sma tu fu Frigia nanga Pamfilia, sma fu Egepte nanga a kontren fu Libia di de krosbei fu Sireine, sma fu Rome, Dyu nanga sma di teki a Dyu bribi, ¹¹ èn sma fu Kreita nanga Arabia. Tòg wi e yere fa den e taki na ini wi eigi tongo fu den bigi sani di Gado du.” ¹² Iya, den alamala ben ferwondru srefsrefi. Den ben e taigi makandra: „San disi wani taki?” ¹³ Ma trawan ben spotu den sma disi èn den bigin taki: „Den dringi tumsi furu win.”* ¹⁴ Ma Petrus opo tnapu makandra nanga den tra erfu apostel. Ne a taki nanga wan tranga sten: „Sma fu Yudea nanga ala sma di e libi na ini Yerusalem, arki bun san mi e taki, bika un musu kon sabi den sani disi. ¹⁵ Den sma disi no drungu soleki fa unu e denki. Na neigi yuru m’manten* wi de. ¹⁶ San unu e si dya, na san Gado ben meki a profeiti Yoèl taki. ¹⁷ A ben taki: ’Gado taki: „Na ini den lasti dei mi o meki mi yeye kon na tapu ala sortu sma. Den manpkin nanga den umapkin fu unu o taki profeititori, den yongu man fu unu o kisi fisyun èn den owru man fu unu o kisi dren. ¹⁸ Na a ten dati mi o meki mi yeye kon srefi na tapu den mansrafu nanga den umasrafu fu mi èn den o taki profeititori. ¹⁹ Mi o meki taki wondru de fu si na hemel èn bigi sani o de fu si na grontapu. Brudu, faya nanga smoko o de fu si. ²⁰ A son o kon dungru èn a mun o tron brudu, fosi a bigi èn prenspari dei fu Yehovah* doro. ²¹ Ibri sma di e kari a nen fu Yehovah* o kisi ferlusu.”’ ²² Sma fu Israel, arki den wortu disi: Gado sori unu krin suma na Yesus fu Nasaret, fu di a meki a du kfalek sani, bigi sani nanga wondru na un mindri, soleki fa unu srefi sabi. ²³ Gado ben besroiti taki unu ben o grabu a man disi èn a ben sabi na fesi kba taki na so sani ben o psa. Unu meki ogri sma kiri en di den spikri en na wan postu. ²⁴ Ma Gado gi en wan opobaka èn a meki a kon na libi baka.* Dede no ben man tai en hori moro. ²⁵ David ben taki fu en: ’Ala ten mi e prakseri* Yehovah.* Noiti mi o frede, fu di a de na mi ret’anusei. ²⁶ Fu dati ede mi ati ben breiti èn mi ben e bari fu prisiri. Mi o tan abi howpu ²⁷ fu di yu no o libi mi na ini Grebi* èn yu no o meki a skin fu a sma di e tai hori na yu, kon pori. ²⁸ Yu sori mi a pasi fu libi èn mi o prisiri te mi de krosbei fu yu.’ ²⁹ Brada, mi kan taigi unu krin taki wi afo David dede èn den beri en. A grebi fu en de dya te na a dei fu tide. ³⁰ A ben de wan profeiti èn a ben sabi taki Gado sweri taki a ben o poti wan bakapkin fu en na tapu a kownusturu fu en. ³¹ A ben sabi kba taki a Krestes ben o kisi wan opobaka èn a ben taki fu a sani dati tu. A ben taki dati Gado no ben o libi a Krestes na ini Grebi* èn en skin no ben o pori. ³² Gado gi a Yesus disi wan opobaka èn wi alamala si dati. ³³ Yesus opo go na hemel, a go sdon na Gado en ret’anusei èn a kisi a santa yeye di a Tata ben pramisi. Fu dati ede a meki a yeye disi kon na wi tapu. Unu srefi si èn yere dati. ³⁴ Ma David no opo go na hemel. Tòg en srefi taki: ’Yehovah* taigi mi Masra: „Sdon na mi ret’anusei, ³⁵ teleki mi poti yu feanti leki wan bangi gi yu futu.”’ ³⁶ Sobun, meki ala den Israelsma sabi krin taki Gado meki a Yesus disi di unu spikri na wan postu, tron wi Masra nanga Krestes.” ³⁷ Di den yere disi, den konsensi bigin fon den èn den taigi Petrus nanga den tra apostel: „Brada, san wi musu du?” ³⁸ Petrus taigi den: „Un musu abi berow èn ibriwan fu unu musu dopu na ini a nen fu Yesus Krestes, so taki unu kan kisi pardon fu un sondu. Dan unu o kisi a santa yeye.* ³⁹ Bika na dati a ben pramisi unu, den pkin fu unu, nanga ala den sma di de farawe. Sobun, Yehovah* wi Gado ben o gi santa yeye na ala den sma di a ben o kari kon na en.” ⁴⁰ Petrus ferteri den furu tra sani èn a preiki finfini gi den. A tan gi den a dek’ati disi: „No moksi nanga den ogri sma disi moro, dan unu o kisi ferlusu.” ⁴¹ Ne den sma di ben bribi san Petrus taki, teki dopu. A dei dati sowan 3000 sma tron bribiman. ⁴² Den tan poti prakseri na den leri fu den apostel, den ben e libi bun nanga makandra,* den ben e nyan nanga makandra èn den ben e begi nanga makandra. ⁴³ Den apostel ben e du furu wondru nanga bigi sani. Dati meki ala sma bigin abi bigi lespeki gi Gado. ⁴⁴ Ala den sma di tron bribiman ben de makandra èn den ben e prati ala san den ben abi nanga makandra. ⁴⁵ Den ben e seri den gron fu den nanga den sani di den ben abi, dan den ben e prati a moni nanga makandra, so taki ibriwan fu den ben kan kisi san a ben abi fanowdu. ⁴⁶ Ibri dei den ben de na ini a tempel leki wán man. Den ben e prisiri trutru fu nyan na den oso fu den brada fu den èn nanga den heri ati den ben e prati n’nyan nanga makandra. ⁴⁷ Den ben e prèise Gado èn ala sma ben lobi den. Ibri dei Yehovah* ben e ferlusu sma èn moro nanga moro sma ben e tron bribiman.