Tori fu den apostel 20:1-38
20 Baka a dyugudyugu, Paulus seni kari den disipel. Baka di a gi den dek’ati èn a taki den odi, a teki waka go na Masedonia.
2 A waka psa na ini den kontren dati fu gi den disipel drape furu dek’ati. Baka dati a go na Grikikondre
3 èn a tan drape dri mun langa. Ma di a ben de fu teki wan sipi go na Siria, a kon yere taki den Dyu ben meki mofo fu kiri en. Dati meki a besroiti fu psa na ini Masedonia baka.
4 Den sma di ben go nanga en ben de Sopater di ben de wan manpkin fu Pirus fu a foto Bereya, Aristarkus nanga Sekundus fu Tesalonika, Gayus fu Derbe, Timoteyus, èn Tikikus nanga Trofimus fu a distrikt Asia.
5 Den man disi ben go na wi fesi èn den ben e wakti wi na ini Trowas.
6 Ma baka a fesa fu brede sondro srudeki, wi teki wan sipi gwe libi Filipi èn baka feifi dei wi miti den na ini Trowas. Drape wi tan seibi dei.
7 Na a fosi dei fu a wiki wi ben kon makandra fu nyan. Ne Paulus bigin taki nanga den sma di ben de drape, fu di a ben o gwe a dei baka dati. A tan taki te mindrineti.
8 Den ben leti furu lampu na ini a kamra na a sodro fu na oso pe wi ben kon makandra.
9 Wan yongu man di nen Etikus ben e sdon na a fensre. Di Paulus ben e taki go doro, a yongu man disi fadon na ini wan dipi sribi. Ne a fadon fu a di fu dri sodro go na gron. Di den go na en, den si taki a dede.
10 Ma di Paulus saka go na gron, a go d’don na tapu a yongu man, a brasa en èn a taigi den sma: „No bari moro, bika a de na libi.”
11 Baka dati Paulus go na sodro, a broko a brede èn a nyan. A taki nanga den brada wan heri pisi ten teleki dei broko, dan a gwe libi den.
12 Den tyari a boi gwe èn den kisi bun furu trowstu fu di a ben de na libi.
13 Baka dati, wi teki wan sipi go na Asus pe wi ben o teki Paulus, bika na dati a ben taigi wi fu du. En srefi ben wani waka go drape nanga futu.
14 Na so a miti wi na Asus, dan wi teki en na ini a sipi èn wi go na Mitileine.
15 Di wi hari gwe fu drape a tamara fu en, wi doro abrasei fu Kios. Ma a dei baka dati wi doro na Samos èn a tamara fu en wi doro na Mileite.
16 Paulus ben besroiti fu hari psa Efeise, so taki a no ben o abi fu lasi ten na ini a distrikt Asia, bika a ben e meki muiti fu doro na Yerusalem na a dei fu a Pinksterfesa.
17 Ma di a ben de na Mileite, dan a seni sma go na Efeise fu kari den owruman fu a gemeente kon.
18 Di den kon na en, a taigi den: „Unu sabi heri bun fa mi tyari misrefi na un mindri sensi a fosi dei di mi poti futu na ini a distrikt Asia.
19 Mi ben e dini Masra leki wan srafu nanga ala sakafasi èn nanga watra-ai. Fu di den Dyu meki mofo fu kiri mi, meki mi kisi furu tesi.
20 Tòg dati no tapu mi fu ferteri unu ala sani di o tyari wini gi unu èn fu gi unu leri. Mi du dati na presi pe furu sma de èn oso fu oso.
21 Mi ferteri den Dyu nanga Grikisma finfini taki den musu abi berow, den musu teki Gado sei èn bribi na ini wi Masra Yesus.
22 Ma now mi musu go na Yerusalem, fu di a santa yeye taigi mi fu du dati. Ma mi no sabi san o psa nanga mi drape.
23 Ibri leisi te mi e go na wan tra foto a santa yeye e tan sori mi taki sma o poti mi na straf’oso èn mi o kisi tesi.
24 Ma mi no e si mi libi leki wan prenspari sani.* A wan-enkri sani di prenspari gi mi, na fu lon a streilon te na a kba èn fu klari a wroko di Masra Yesus gi mi fu du. A wroko dati na fu preiki finfini fu a bun nyunsu taki Gado e sori sma bun-ati.
25 Ma mi sabi taki nowan fu unu di mi ferteri fu a Kownukondre, o si mi moro.
26 Fu dati ede mi e teki unu leki kotoigi tide taki mi no abi nowan brudu-paiman,
27 bika mi no hori noti na baka. Iya, mi ferteri unu ala sani di Gado wani libisma fu du.
28 Poti prakseri na unsrefi èn na ala den skapu, bika santa yeye poti unu leki skapuman fu teki fesi na ini a gemeente fu Gado di a bai nanga a brudu fu en eigi Manpkin.
29 Mi sabi taki te mi gwe, ogri busidagu o kon na un mindri èn den o du ogri nanga den skapu.
30 Sma na un mindri o taki sani di no tru, fu hari den disipel kon na den baka.
31 Fu dati ede, tan na ai èn hori na prakseri taki dri yari langa mi tan sori ibriwan fu unu fa fu tyari unsrefi. Mi du dati dei nanga neti èn nanga furu watra-ai.
32 Meki Gado nanga a boskopu fu a bun-ati fu en, kibri unu. A boskopu disi kan meki unu kon tranga èn a kan meki unu kisi a sani di Gado e gi ala santawan.
33 Mi no gridi gi nowan sma en solfru, gowtu, noso krosi.
34 Unu srefi sabi taki den anu disi wroko fu sorgu misrefi nanga den sma di ben de nanga mi.
35 Mi sori unu na ala fasi taki un musu wroko tu fu man yepi den swakiwan. Tan prakseri den wortu di Masra Yesus srefi ben taki: ’Wan sma o de moro koloku te a e gi sani, leki te a e kisi sani.’”
36 Baka di Paulus taki den sani disi, dan en nanga ala den sma saka kindi, dan a begi.
37 Ne den alamala bari krei, den brasa Paulus èn den bosi en,
38 fu di den ben e sari trutru di a taigi den taki den no ben o si en moro. Ne den tyari en go na a sipi.
Futuwortu
^ Noso: „mi libi no abi nowan waarde gi mi”.
