Yeremia 13:1-27
13 Yehovah taigi mi: „Go teki wan banti fu linnen-krosi èn tai en na yu mindribere. Ma yu no musu meki watra kisi en.”
2 Sobun, mi teki a banti èn mi tai en na mi mindribere soleki fa Yehovah taki.
3 Dan Yehovah taki nanga mi ete wan leisi. A taki:
4 „Teki a banti di yu tai na yu mindribere èn opo go na Eufraat-liba, dan yu kibri en drape na ini wan bergi-olo.”
5 Sobun, mi go kibri en na Eufraat-liba, soleki fa Yehovah taigi mi.
6 Ma baka wan heri pisi ten Yehovah taigi mi: „Opo go na Eufraat-liba èn teki a banti di mi ben taigi yu fu kibri drape.”
7 Sobun, mi go na Eufraat-liba èn mi diki a banti puru na a presi pe mi ben kibri en. Ne mi si taki a banti pori. A no ben bun fu gebroiki moro.
8 Dan Yehovah taigi mi:
9 „Disi na san Yehovah taki: ’Na a srefi fasi mi o pori Yuda, fu di a abi bigifasi. Mi o pori Yerusalem tu, fu di a abi bigifasi pasa marki.
10 A pipel disi ogri, den e weigri fu gi yesi na mi, èn den e du nomo san a takru ati fu den wani. Den e anbegi tra gado èn den e boigi gi den tu. Ma den o tron leki a banti disi di no bun fu gebroiki moro.’
11 ’Neleki fa wan banti tai steifi na a mindribere fu wan man, na so mi ben meki ala den sma fu Israel nanga ala den sma fu Yuda tai hori na mi’, na so Yehovah taki. ’Den ben o tron mi pipel, den ben o meki mi kisi biginen, glori, prèise, nanga grani. Ma den no ben gi yesi na mi.’
12 Yu musu taigi den: ’Disi na san Yehovah, a Gado fu Israel, taki: „Sma gwenti furu wan bigi watrakan nanga win.”’ Den o taigi yu: ’Yu denki taki wi no sabi taki sma gwenti furu wan bigi watrakan nanga win?’
13 Dan yu musu taigi den: ’Disi na san Yehovah taki: „Na so mi o furu unu nanga win teleki unu kon drungu. Iya, ala den sma di e libi na ini a kondre disi, den kownu di e sidon na tapu a kownusturu fu David, den priester, den profeiti, nanga ala den sma di e tan na ini Yerusalem o kon drungu.
14 Mi o naki den na makandra meki den broko. Iya, mi o naki papa nanga manpikin na makandra na a srefi ten”, na so Yehovah taki. „Mi no o abi nowan firi gi den èn mi no o sari den. Nowan sari-ati o tapu mi fu pori den.”’
15 Arki, un pipel, èn poti prakseri. Un no musu abi heimemre, bika na Yehovah srefi taki den sani disi.
16 Un gi un Gado Yehovah glori, fosi a meki ala sani kon dungru èn fosi unu stotu un futu na tapu den bergi te son dongo. Unu o winsi taki leti ben de, ma a o meki ala sani kon dungru. Iya, a o meki ala sani kon dungru pikapika.
17 Efu unu no arki, dan mi ai o lon watra èn mi o krei na wan kibripresi, fu di unu abi bigifasi. Mi o krei langalanga watra-ai, fu di sma o teki den skapu fu Yehovah tyari gowe.
18 Taigi a kownu nanga en mama: ’Un go sidon na wan lagi presi, bika den o puru den moi kownu-ati fu unu na un ede.’
19 Den foto na zuidsei tapu èn nowan sma de fu opo den. Ala den sma fu Yuda tron katiboman. Iya, den alamala go na ini katibo.
20 Opo yu ede luku suma e kon na noordsei. Pe den skapu de di yu kisi? Pe den moi skapu fu yu de?
21 Sensi a bigin yu ben abi krosibei mati di yu ben yepi. Ma san yu o taki te den poti prakseri na yu? Yu o kisi hebi pen leki wan wefi di de fu meki en pikin, a no so?
22 Yu o prakseri: ’Fu san ede den sani disi e pasa nanga mi?’ Na fu di yu du wan lo ogri, meki den puru a koto di ben e tapu yu skin. Ala yu bakafutu piri.
23 Wan sma fu Kus man kenki a kloru fu en skin? Wan penitigri man kenki den flaka na en skin? Efu dati kan, dan unu o man du bun tu, awinsi unu na sma di leri fu du ogri.
24 Dati meki mi o panya unu na ala sei neleki te a winti fu a sabana e wai drei grasi gowe.
25 Na disi o pasa nanga yu èn na disi mi o gi yu, fu di yu frigiti mi èn yu e tan frutrow na tapu sani di no tru”, na so Yehovah taki.
26 „Mi o opo yu koto go na tapu yu fesi, dan sma o si yu syenpresi.
27 Den o si taki yu du sutadu, taki yu de leki wan krasi asi, èn taki yu libi wan morsu libi leki wan huru-uma. Na tapu den pikin bergi èn na den gron mi si den tegu sani fu yu. Helu fu yu, Yerusalem! Yu no kan de krin. O langa yu o tan so ete?”
