Yeremia 15:1-21
15 Yehovah taigi mi: „Awinsi Moses nanga Samuel ben o tanapu na mi fesi, toku mi no ben o du bun gi a pipel disi. Mi ben o yagi den puru na mi fesi meki den gowe.
2 Efu den taigi yu: ’San o pasa nanga wi?’, dan yu musu taigi den: ’Disi na san Yehovah taki: „Den wan di musu kisi wan takru siki, o kisi wan takru siki! Den wan di musu dede nanga feti-owru, o dede nanga feti-owru! Den wan di musu dede fu angri, o dede fu angri! Den wan di musu go na ini katibo, o go na ini katibo!”’
3 ’Mi o meki fo rampu miti den’, na so Yehovah taki. ’Feti-owru o kiri den, dagu o tyari den gowe, busimeti nanga meti di e frei o kiri den èn den o nyan den.
4 Ala den kownukondre fu grontapu o beifi te den e si san mi du nanga den, fu di Kownu Manase, a manpikin fu Heskia di e tiri Yuda, du wan lo ogri na ini Yerusalem.
5 Yerusalem, suma o sori sari-ati gi yu? Suma o sari yu, èn suma o teki en ten fu aksi fa sani e go nanga yu?’
6 ’Na yu gowe libi mi’, na so Yehovah taki. ’Yu e tan waka go na baka. Mi o langa mi anu fu du yu ogri. Mi kon weri fu yu. Mi no o sari yu moro.
7 Mi o wai a pipel disi puru neleki fa sma e wai aleisi na den portu fu a kondre. Mi o puru den pikin fu den na den anu. Mi o kiri mi pipel, fu di den no e tapu nanga den sani di den e du.
8 Mi si taki den masra fu furu uma dede. Den uma dati furu leki den aisanti fu se. Na mindridei mi o meki wan sma tyari pori kon na tapu den mama nanga den yonkuman. Mi o meki frede teki den wantronso, èn den o bruya.
9 Na uma di kisi seibi pikin kon swaki. En blo de na tapu. A son fu en saka, aladi a de deiten ete. A kisi syen èn a kon lagi.’ ’Mi o meki feanti kon nanga feti-owru fu kiri den sma fu den di tan abra’, na so Yehovah taki.”
10 Ke mi mama, fu san ede yu ben musu meki mi? Mi tron wan man di de na ini dyugudyugu ala ten èn di abi trobi nanga heri grontapu. Mi no leni nowan sma wan sani, èn mi no go leni sani na nowan sma. Toku den alamala e kosi mi.
11 Yehovah taki: „Yu kan de seiker taki mi o horibaka gi yu. Te den feanti tyari rampu nanga banawtu kon, yu kan de seiker taki mi o yepi yu.
12 Wan sma kan broko isri na pisipisi? A kan broko na isri fu noordsei? A kan broko kopro na pisipisi?
13 Mi o meki sma teki ala den gudu nanga tra sani fu unu. Sondro fu pai den o teki ala den sani fu unu, fu di unu du sondu na ini a heri kondre.
14 Mi o meki den feanti tyari den sani fu unu go na wan kondre di unu no sabi. Bika mi ati e bron srefisrefi. A de leki wan faya di o bron unu.”
15 Yehovah, yu sabi san e pasa nanga mi. Grantangi, no frigiti mi. Poti prakseri na mi èn strafu den sma di frufolgu mi. No wakti moro langa fu puru atibron na den tapu, noso mi o dede. Luku fa sma e spotu mi fu yu nen ede.
16 Di mi feni den wortu fu yu, mi nyan den. Dan mi ati bigin prisiri. Iya, mi e prisiri srefisrefi, bika mi e tyari a nen fu yu, Yehovah, a Gado di e tiri den legre.
17 Mi no sidon nanga sma di e meki spotu èn di e meki prisiri nomo. Fu di yu e tiri mi, mi e sidon mi wawan. Yu furu mi nanga bigi atibron.
18 Fu san ede mi abi pen ala ten? Fu san ede a mankeri fu mi no man dresi? A no wani kon betre kwetikweti. Mi no man frutrow yu. Yu de leki wan kriki di drei te sma e suku watra.
19 Fu dati ede Yehovah taki: „Efu yu kenki a denki fu yu èn yu drai kon baka na mi, dan mi o teki yu baka èn yu o wroko gi mi. Efu yu puru warti sani na ini sani di no warti, dan yu o tron mi takiman. Den o kon baka na yu, ma yu no o go baka na den.”
20 „Mi meki yu de leki wan tranga kopro skotu gi a pipel disi. Den o feti nanga yu, ma den no o man wini yu, bika mi de nanga yu. Mi o kibri yu èn mi o frulusu yu”, na so Yehovah taki.
21 „Mi o puru yu na a anu fu den ogriman, èn mi o frulusu yu fu den ogri-ati sma.”
