Yeremia 17:1-27
17 „Den sondu fu den sma fu Yuda skrifi nanga wan isri skrifitiki. Nanga wan tiki di abi wan dyamanti penti den sondu fu den krabu na tapu den ati di de leki ston èn na tapu den tutu fu den altari fu den.
2 Srefi den manpikin fu den e memre den altari nanga santa postu di den ben poti na sei bigi bon, na tapu den hei bergi,
3 èn na tapu den tra bergi di de na den opo presi. Mi o meki sma teki ala den gudu nanga den tra sani fu unu. Iya, den o pori ala den hei presi pe unu e anbegi falsi gado. Na dati o pasa nanga unu, fu di unu sondu na ini a heri kondre.
4 Na unu no ben wani a kondre di mi ben gi unu. Dati meki mi o meki unu tron futuboi gi den feanti fu unu na ini wan kondre di unu no sabi. Bika mi ati e bron srefisrefi nanga unu. A de leki wan faya di o bron ala ten.”
5 Yehovah taki: „Fluku musu kon tapu a sma di e frutrow na tapu libisma nanga a krakti fu den, èn di drai baka gi Yehovah.
6 A o tron leki a wan-enkri bon na ini a sabana. A no o si te bun e kon. Na presi fu dati a o tan na den drei presi na ini a sabana èn na wan sowtu kontren pe nowan sma e tan.
7 Blesi o kon tapu a sma di e frutrow na tapu Yehovah èn di e bribi taki Yehovah e horibaka gi en.
8 A o tron leki wan bon di prani na sei watra èn di sutu en rutu go na wan liba. Te a faya, a no o firi en. Na presi fu dati a o abi furu wiwiri. Awinsi dreiten hori wan heri yari langa, toku a no o bruya. A no o tapu fu gi froktu.
9 Na ati na a moro bedrigi sani di de èn a ogri srefisrefi. Suma kan sabi en?
10 Mi, Yehovah, na a sma di e luku san de na ini na ati èn mi e ondrosuku den niri. Mi o pai ibri sma gi a fasi fa a e libi èn gi den sani di a e du.
11 Wan sma di kon gudu na wan kruka fasi de leki wan anamu di e teki eksi di no de fu en. Heri esi a sma o lasi den gudu fu en. Te fu kaba a o si taki a de wan don man.”
12 Sensi a bigin a kefalek kownusturu fu Gado de hei. A de wan santa presi gi wi.
13 Yehovah, yu na a howpu fu Israel. Ala den sma di drai baka gi yu o kisi syen. Na tapu a gron den o skrifi den nen fu den sma di gowe libi yu. Disi o pasa nanga den, fu di den gowe libi Yehovah di abi a watra di e gi sma libi.
14 Yehovah, efu yu dresi mi, dan mi o kon betre trutru. Efu yu frulusu mi, dan mi o kisi frulusu trutru, bika yu na a sma di mi e prèise.
15 Den sma e taigi mi: „Fu san ede den sani di Yehovah taki, no e kon tru? Grantangi, meki den kon tru.”
16 Ma mi tan wan skapuman di e waka na yu baka. Mi no ben angri fu si na ogri dei. Yu sabi san mi e taki èn yu e si san e pasa.
17 No meki mi frede, bika yu na mi kibripresi te rampu kon.
18 Meki den sma di e frufolgu mi, kisi syen, ma no meki mi kisi syen. Meki den frede, ma no meki mi frede. Meki rampu miti den, iya, meki a rampu de tu tron moro hebi.
19 Yehovah taigi mi: „Go tanapu na a portu fu den manpikin fu a pipel pe den kownu fu Yuda e kon na inisei èn pe den e go na dorosei. Yu musu go tanapu tu na ala den tra portu fu Yerusalem.
20 Yu musu taki: ’Un kownu fu Yuda, ala sma fu Yuda, nanga ala sma fu Yerusalem di e pasa na den portu disi, un arki Yehovah.
21 Disi na san Yehovah taki: „Un musu luku bun taki unu no tyari nowan lai pasa den portu fu Yerusalem na Sabat-dei.
22 Na Sabat-dei un no musu puru nowan lai na ini un oso èn un no musu du nowan wroko. A Sabat-dei musu de wan santa dei gi unu, soleki fa mi ben taigi den afo fu unu.
23 Ma den afo fu unu no arki èn den no gi yesi. Na presi fu dati den ben tranga-ede, den no arki èn den no teki leri.”’
24 ’Yehovah taki: „Efu unu e du soifri san mi taki, sobun, efu unu no tyari nowan lai pasa den portu fu a foto disi na Sabat-dei, efu unu si a dei disi leki wan santa dei, èn efu unu no du nowan wroko na a dei dati,
25 dan den kownu di e sidon na tapu a kownusturu fu David, nanga den granman fu den, o rèi asiwagi nanga asi pasa den portu fu a foto disi. Iya, den kownu, den granman, den sma fu Yuda, nanga den sma di e tan na Yerusalem o pasa den portu disi. Fu ala ten sma o libi na ini a foto disi.
26 Sma o kon fu den foto fu Yuda, fu a birti fu Yerusalem, fu a kontren fu Benyamin, fu a lagipresi èn a bergikontren, èn fu Negeb-sabana. Den o kon na a oso fu Yehovah èn den o tyari heri bron-ofrandi, srakti-ofrandi, nyanyan-ofrandi, switismeri, nanga ofrandi fu taki en tangi.
27 Ma efu unu e trangayesi mi fu di unu no e si Sabat-dei leki wan santa dei èn unu e tyari lai pasa den portu fu Yerusalem na Sabat-dei, dan mi o sutu faya gi den portu fu unu. A faya o bron den toren fu Yerusalem pe unu e tan èn nowan sma o man kiri a faya.”’”
