Yeremia 50:1-46
50 Yehovah gi Profeiti Yeremia wan boskopu di abi fu du nanga Babilon, a kondre fu den Kaldeyasma. A taki:
2 „Taigi ala pipel èn fruteri ala sma a sani disi. Poti wan marki leti-opo meki ala sma si dati. Un man, fruteri den ala sani, no kibri noti gi den. Taki: ’Den teki Babilon abra. Bel kisi syen. Merodak kon frede. Den popki fu en kisi syen. Den fisti gado fu en kon frede.’
3 Wan kondre komoto na noordsei fu kon feti nanga Babilon. Sma o skreki te den si san a kondre dati du nanga Babilon. Nowan sma o libi drape moro. Den libisma nanga den meti lowe. Den alamala gowe.”
4 Yehovah taki: „Na a ten dati den Israelsma nanga den sma fu Yuda o waka kon èn den o krei. Den o suku Yehovah, a Gado fu den.
5 Den e aksi sortu pasi e go na Sion. Na Sion den e go. Den e taki: ’Kon meki wi seti wan frubontu nanga Yehovah fu ala ten, di nowan sma o frigiti.’
6 A pipel fu mi tron neleki wan ipi skapu di de fu dede. Den skapuman fu den meki den lasi pasi. Den meki den wakawaka lontu nomo na tapu den bergi. Den e waka fu a wan bergi go na a trawan. Den frigiti pe a tanpe fu den de.
7 Ala sma di feni den, nyan den. Den feanti fu den taki: ’A no wan ogri wi e du, bika den sondu teige Yehovah, a tanpe fu retidu. Iya, den sondu teige Yehovah di ben de a howpu fu den afo fu den.’”
8 „Un lowe fu Babilon èn fu a kondre fu den Kaldeyasma. Un musu tron neleki den bokoboko di e waka na fesisei fu na ipi.
9 Mi o meki furu bigi pipel komoto na noordsei fu kon feti nanga Babilon. Den o seti densrefi fu go feti nanga en èn den o teki en abra. Den peiri fu den de leki den peiri fu wan tranga man di e kiri pikin. Den no e misi.
10 Den o teki Kaldeya abra èn den o teki ala den gudu fu en teleki a sari den”, na so Yehovah taki.
11 „Disi o pasa nanga unu fu di unu ben prisiri èn unu ben breiti di unu fufuru a gudu fu mi. Unu ben e dyompodyompo leki wan umakaw na ini yongu grasi, èn unu ben e bari leki asi.
12 A mama fu unu kisi bigi syen. Na uma di meki unu, lasi-ati. A de wan kondre di no prenspari srefisrefi. A de wan drei sabana èn wan presi pe watra no de.
13 Fu di Yehovah ati bron na en tapu meki nowan sma o tan drape moro. A heri kondre o tron wan brokopresi. Iniwan sma di e waka pasa Babilon o luku nanga opo mofo èn en o froiti te a si omeni rampu miti Babilon.
14 Un alamala di e sutu nanga bo, seti unsrefi lontu Babilon fu go feti nanga en. Un sutu na en tapu. Sutu ala un peiri, bika a sondu teige Yehovah.
15 Meki babari na ala sei te unu e go feti nanga en. A gi ensrefi abra. Den pilari fu en fadon. Den skotu fu en fadon broko, bika Yehovah en ati e bron. Un puru atibron na tapu Babilon. Den sani di a du, na dati un musu du nanga en.
16 Na Babilon un musu kiri den sma di e sai èn den sma di e koti nyanyan na kotiten. Na wan ogri-ati fasi sma o kon feti nanga Babilon nanga feti-owru. Dati meki sma o lowe go baka na den eigi pipel èn na den eigi kondre.
17 Israel na wan skapu di lasi pasi. Na den lew meki a lasi pasi. Fosi, a kownu fu Asiria nyan en. Baka dati Kownu Nebukadresar fu Babilon kawkaw en bonyo.
18 Fu dati ede Yehovah di e tiri den legre, a Gado fu Israel, taki: ’Neleki fa mi ben strafu a kownu fu Asiria, na so mi o strafu a kownu fu Babilon nanga a kondre fu en.
19 Mi o tyari Israel kon baka na a weigron fu en, èn a o nyan grasi na Karmel nanga Basan. Na Efrayim-bergikontren èn na Gilead-bergikontren a o nyan en bere furu.’”
20 Yehovah taki: „Na a ten dati mi o suku den fowtu fu Israel nanga den sondu fu Yuda, ma mi no o feni noti. Mi o gi den sma di mi no kiri, pardon.”
21 Yehovah taki: „Go feti nanga a kondre Meratayim èn nanga den sma di e libi na Peikod. Kiri ala den sma drape èn pori ala sani krinkrin. Du ala san mi taigi yu fu du.
22 A babari fu feti de fu yere na ini a kondre. Ala sani pori krinkrin.
23 Luku fa a mokro di masi ala den pipel fu grontapu, broko now! Luku fa Babilon pori na so wan fasi taki den pipel skreki fu en!
24 Babilon, mi poti wan trapu gi yu èn yu fadon na ini, ma yu no sabi dati srefi. Den feni yu èn den grabu yu, fu di yu ben wani feti nanga Yehovah.
25 Yehovah opo en maksin èn a tyari en fetisani kon na doro fu strafu den Kaldeyasma. A Moro Hei Masra Yehovah di e tiri den legre abi wan wroko fu du na ini a kondre fu den Kaldeyasma.
26 Fu farawe un musu kon, dan un opo den maksin fu en. Puru ala sani na ini den maksin èn poti den na tapu ipi neleki fa sma e poti aleisi na tapu ipi, dan un pori den. No meki nowan sma drape tan na libi.
27 Kiri ala den yongu mankaw fu en. Srakti den alamala. Helu fu den, bika a dei fu den doro. A ten doro fu strafu den!
28 Wan babari de fu yere. A de a babari fu den wan di lon èn di lowe komoto na a kondre fu Babilon fu fruteri na Sion taki Yehovah, a Gado fu wi, puru atibron na Babilon tapu. Na fu en tempel ede a puru atibron na en tapu.
29 Taigi den man di e sutu nanga bo taki den musu go feti nanga Babilon. Seti kampu lontu en. No meki nowan sma lowe. Pai en gi ala sani di a du. Den sani di a du, na dati un musu du nanga en, bika a opo ensrefi teige Yehovah, a Santawan fu Israel.
30 Fu dati ede den yonkuman fu en o fadon na den pren, èn na a dei dati sma o kiri ala den fetiman”, na so Yehovah taki.
31 A Moro Hei Masra Yehovah di e tiri den legre taki: „Ai, yu asranti Babilon, mi o kon feti nanga yu. A ten o kon te mi o strafu yu.
32 Asranti Babilon o stotu en futu èn a o fadon. Nowan sma o opo en baka. Mi o sutu faya gi den foto fu en, èn a o bron ala sani na en lontu.”
33 Yehovah di e tiri den legre taki: „Sma e kwinsi den Israelsma nanga den sma fu Yuda. Ala den sma di tyari den na ini katibo grabu den èn den no wani lusu den.
34 Ma a sma di bai den baka tranga. Yehovah di e tiri den legre na en nen. A o koti krutu gi den èn a o sorgu taki nowan dyugudyugu de na ini a kondre. A o bruya den Babilonsma.”
35 Yehovah taki: „Te den feanti o kon feti nanga den Kaldeyasma, den Babilonsma, den granman nanga den koniman, den o kiri den.
36 Te den feanti o kon feti nanga den sma di e taki soso sani, den sma disi o du don sani. Te den o kon feti nanga den tranga man, den man disi o kon frede.
37 Den o pori den fetiwagi èn den o kiri den asi. Te den o kon feti nanga ala den trakondre sma di e tan drape, den sma disi o du leki umasma. A feanti o pori den gudu fu den èn den o tyari ala sani gowe.
38 Wan takru sani pasa nanga a liba. A kon drei, fu di a kondre lai afkodrei-popki. Den sma di e anbegi den e du law sani fu di den kisi takru dren.
39 Den meti di e tan na ini a sabana, den sabanadagu di e bari krei, nanga den stroisifowru o tan drape. Noiti moro sma o tan drape èn a foto no o de moro.”
40 Yehovah taki: „Neleki Sodom, Gomora, nanga den foto na ini a birti fu den, Gado o drai en tapu. Nowan sma fu a presi dati èn nowan sma fu wan tra kondre o tan drape.
41 Luku! Wan pipel e kon fu noordsei. Wan bigi pipel nanga makti kownu o kon fu den moro farawe presi fu grontapu.
42 Den o kon nanga bo èn nanga lansri. Den abi ogri-ati èn den no e sari sma. A babari fu den de leki a babari fu wan krasi se. Na tapu asi den o kon leki wán man fu kon feti nanga yu, umapikin fu Babilon.
43 A kownu fu Babilon yere wan boskopu di abi fu du nanga den. Dati meki a lasi-ati. A de na ini banawtu! A abi pen neleki wan uma di de fu meki wan pikin.
44 Luku! Wan sma o kon neleki wan lew di komoto na wan bigi busibusi na sei Yordan-liba. A o go na a tanpe di e tan fu ala ten. Wantronso mi o meki den Babilonsma lon gowe libi a kondre fu den. Dan mi o poti wan sma fu tiri en. Suma de leki mi? Suma kan tapu mi fu du san mi wani? Suma na a skapuman di kan tanapu na mi fesi?
45 Fu dati ede, un man, arki san Yehovah bosroiti fu du nanga Babilon èn san a wani du nanga a kondre fu den Kaldeyasma: Sma o srepi den pikin skapu gowe. Na fu den ede a o meki a tanpe fu den tron wan brokopresi.
46 Te den teki Babilon abra, wan bigi babari o de fu yere èn grontapu o seki. Na mindri den pipel wan babari o de fu yere.”
