Yesaya 24:1-23
24 Luku! Yehovah e meki a kondre* kon leigi èn nowan sma o tan drape moro.
A e drai en tapu èn a e yagi den sma di e libi drape go na ala sei.
2 Sani o de a srefi gi ala sma:
gi a pipel nanga a priester,gi a futuboi nanga en masra,gi na umasrafu nanga en misi,gi a sma di e bai sani nanga a sma di e seri sani,gi a sma di e leni trawan sani nanga a sma di go leni sani na trawan,gi a sma di e teki rente nanga a sma di e pai rente.
3 A kondre o kon leigièn sma o teki ala sani fu a kondre tyari gwe,bika na Yehovah taki dati.
4 A kondre e sari,* a e pori gwe.
A gron kon drei, a e pori gwe.
Den prenspari sma fu a kondre e pina.
5 Den sma di e libi drape doti a kondre,fu di den no du san a wet e taki.Den kenki den wetèn den no hori densrefi na a ferbontu di ben musu tan fu ala ten.*
6 Dati meki fluku kon tapu a kondre èn a pori en krinkrin.Na den sma di e libi drape meki taki disi psa.
Fu dati ede furu fu den sma na ini a kondre no de moro.Wan tu fu den nomo tan abra.
7 A nyun win e sari* èn a droifibon kon drei.Ala den sma di ben e meki prisiri e geme now.
8 Nowan prisiri poku de fu yere moro. Iya, nowan tamboerijn,nowan sten fu sma di e meki prisirièn nowan harpu de fu yere moro.
9 Den no e singi moro te den e dringi win.Sopi kon de wan bita sani gi den sma di e dringi en.
10 Sma gwe libi a foto èn a tron wan brokopresi.Den tapu ala oso èn nowan sma kan go na ini.
11 Na strati sma e bari fu di den wani win.
Nowan sma e prisiri moro.Nowan prisiri de na ini a kondre moro.
12 A foto tron wan brokopresi.Den naki a portu broko èn a tron wan ipi broko ston.
13 Na disi o psa nanga a pipel fu a kondre. Na mindri den tra pipel
den o de leki den olèif di tan abra baka te sma seki den bon.Den o de leki den droifi di tan abra baka te sma piki droifi na den bon.
14 Den o opo den stenèn den o bari fu prisiri.
Na ini a kontren fu a se* den o ferteri fa Yehovah bigi.
15 Den o prèise Yehovah na ini a kontren pe son e opo.*Den o prèise a nen fu Yehovah, a Gado fu Israel, na den èilanti na ini a se.
16 Te na den moro fara presi fu grontapu wi e yere sma e singi:
„Meki a Ret’ati Gado kisi glori!”
Ma mi e taki: „Mi e mangri gwe, mi e mangri gwe!
A kba gi mi! Den bedrigiman e bedrigi sma.Na wan bedrigi fasi den bedrigiman e bedrigi sma.”
17 Un sma di e libi na ini a kondre, soso frede unu o frede. Unu o fadon na ini wan olo èn unu o fasi na ini wan val.
18 Iniwan sma di e lon gi a b’bari di e meki en frede, o fadon na ini wan olo.Iniwan sma di e kmoto na ini na olo, o fasi na ini wan val.
Den sroisi fu hemel o opoèn a gron o seki.
19 A gron priti opo,a gron beifièn a gron seki hebi.
20 A kondre e slingerslinger leki wan drungumanèn a e seki go-kon leki wan kampu na ini wan bigi winti.
Den sondu fu en de leki wan hebi na en tapu.Dati meki a o fadon èn a no o opo moro.
21 Na a ten dati Yehovah o poti prakseri na a legre na hemelnanga den kownu na grontapu.
22 A o tyari den kon makandraleki strafman di sma tyari kon makandra na ini wan petièn a o sroto den na ini straf’oso.Baka furu dei a o poti prakseri na den.
23 A furu mun o dungruèn a faya son o lasi en krakti,bika Yehovah di e tiri den legre tron Kownu na tapu Sion-bergi èn na ini Yerusalemèn den owru man fu a pipel* e si a glori fu en.
Futuwortu
^ Noso: „grontapu”.
^ Noso kande: „e drei”.
^ Noso: „owru ferbontu”.
^ Noso kande: „e drei gwe”.
^ Noso: „fu west-sei”.
^ Noso: „na owstusei”.
^ Hebrewtongo: „den owru man fu en”.
