Yesaya 37:1-38
37 Di Kownu Heskia yere a tori, dan wantewante a priti en krosi. Baka dati a weri krosi di sma gwenti weri te den e sari* èn a go na ini na oso fu Yehovah.
2 Dan Heskia meki Eliakim di ben abi a frantwortu fu sorgu taki sani waka bun na ini na oso fu Kownu* èn Sekretarsi Sebna nanga den edeman fu den priester weri krosi di sma gwenti weri te den e sari. Dan a seni den go na Profeiti Yesaya, a manpkin fu Amos.
3 Di den doro na Yesaya, den taigi en: „Disi na san Heskia taki: ’A dei disi na wan dei fu bigi nowtu, wan dei fu pir’ai èn fu bigi syen. Bika wi kon de leki wan uma di de fu meki en pkin, ma di no abi a krakti fu du dati.
4 Kande Yehovah yu Gado o yere den sani di a rabsakei* taki. A kownu fu Asiria ben seni en fu spotu a libilibi Gado. Kande Yehovah yu Gado o aksi en frantwortu fu den sani di a taki. Begi gi den sma di tan abra na ini a kondre disi.’”
5 Na so den futuboi fu Kownu Heskia go na Yesaya.
6 Ne Yesaya taigi den: „Na disi un musu go taigi un masra: ’Disi na san Yehovah taki: „No arki den sani di den futuboi fu a kownu fu Asiria taki fu spotu mi. No meki den frede yu.
7 Mi o poti wan prakseri na en ede, so taki a o drai go baka na en eigi kondre te a kisi wan boskopu. Dan mi o meki sma kiri en nanga fet’owru leti drape na ini en eigi kondre.”’”
8 Di a rabsakei yere taki a kownu fu Asiria hari kmoto na Lakis, a drai go baka na a kownu. Di a doro drape a si taki a kownu ben e feti nanga den sma fu Libna.
9 A kownu ben yere tu taki Kownu Tirhaka fu Etiopia ben hari kon feti nanga en. Di a yere disi, a seni boskopuman go na Heskia baka. A taigi den:
10 „Disi na san un musu taigi Kownu Heskia fu Yuda: ’No meki a Gado fu yu di yu e fertrow kori yu te a e taki dati a no o meki a kownu fu Asiria wini Yerusalem.
11 Luku, yu srefi yere taki den kownu fu Asiria pori ala den tra kondre. Dan fa yu kan denki taki yu o kisi ferlusu?
12 Den gado fu den tra kondre di den afo fu mi ben pori, ben man ferlusu den sma fu den? Yu sabi ete san psa nanga den sma fu Gosan, Haran, Resef nanga den sma fu Eden di ben de na Tel-Asar?
13 Pe a kownu fu Hamat, a kownu fu Arpad èn a kownu fu den foto Sefarfayim, Hena nanga Ifa de now?’”
14 Ne Heskia teki den brifi fu den boskopuman èn a leisi den. Baka dati a go na a oso fu Yehovah èn a poti den brifi na gron na fesi Yehovah.
15 Dan Heskia begi Yehovah. A taki:
16 „Tye Yehovah di e tiri den legre, Gado fu Israel, di e sdon na tapu en kownusturu na tapsei* fu den kerub-engel. Yu w’wan na a tru Gado fu ala den kownukondre na grontapu. Na yu meki hemel nanga grontapu.
17 Tye Yehovah, arki mi. Yehovah, opo yu ai fu si san e psa èn poti prakseri na ala den sani di Sanherib seni taigi wi fu spotu a libilibi Gado.
18 Yehovah, yu srefi sabi taki den kownu fu Asiria pori ala den kondre nanga den eigi kondre srefi.
19 Den kownu fu Asiria bron den gado fu den tra kondre nanga faya, fu di den gado dati no ben de trutru gado. Na sma meki den fu udu nanga ston. Fu dati ede den kownu fu Asiria ben man pori den.
20 Dati meki wi e begi yu, Yehovah wi Gado, puru wi na a anu fu a kownu fu Asiria, so taki ala kownukondre na grontapu o sabi taki yu Yehovah, yu w’wan na Gado.”
21 Bakaten Yesaya, a manpkin fu Amos, seni boskopu gi Heskia. A taki: „Disi na san Yehovah, a Gado fu Israel, taki: ’Fu di yu begi mi fu poti prakseri na a tori fu Kownu Sanherib fu Asiria,
22 meki mi, Yehovah, taki san o psa nanga en:
„Na umapkin fu Sion* e wiswasi yu èn a e lafu yu.
Na umapkin fu Yerusalem e seki en ede.
23 Suma yu e spotu èn suma yu e kosi?
Suma yu e bari?Suma yu e luku na so wan heimemre fasi?
Na a Santawan fu Israel!
24 Yu seni yu futuboi kon fu spotu Yehovah. Yu taki:’Nanga den someni fetwagi fu mi,mi o kren go te na den moro hei bergièn te na den moro fara presi fu Libanon.
Mi o koti den hei sedrebon nanga den moro bun yaneifer-bon di de drape.
Mi o go na den moro hei presi fu Libanon pe den bigi busi de.
25 Mi o diki peti èn mi o dringi watra.Nanga mi ondrofutu mi o meki den liba* na ini Egepte kon drei.’
26 Yu no yere san mi o du? Someni langa kba mi taki dati mi o du a sani disi.
Sensi ten mi seti a tori disi kba.
Now mi o meki a psa trutru.
Na yu o meki den tranga foto kon tron brokopresi pe nowan sma e tan.
27 Den sma di e libi na ini den foto disi no o man du noti.Den o frede srefsrefi èn den o firi syen.
Den o kon de leki sani di e gro na gron èn leki grun grasi.Den o tron leki grasi na tapu den dak di kon drei na ini a faya winti fu owstusei.
28 Mi sabi precies te yu e sdon, te yu e opo go na dorosei èn te yu e kon na insei baka.Mi sabi tu te yu ati e bron nanga mi.
29 Mi sabi den sani disi, bika mi yere fa yu ati e bron nanga mi èn fa yu e opo yu sten gi mi.
Dati meki mi o poti mi aka na ini yu noso èn mi o poti wan t’tei na ini yu mofo fu tyari yu leki wan asi.Mi o meki yu drai gwe baka na a srefi pasi di yu ben teki fu kon dyaso.”
30 Heskia, disi na fa yu o sabi taki den sani disi o kon tru: A yari disi unu o nyan sani di gro fu densrefi.* Tra yari unu o nyan aleisi di gro fu den siri aleisi di ben fadon na gron a yari disi. Ma a yari baka dati unu o sai siri èn unu o koti a n’nyan fu den. Boiti dati, unu o prani droifibon èn unu o nyan den froktu fu den.
31 Den sma fu Yuda di lowe gwe èn di de na libi ete o de leki bon di teki rutu. Den rutu fu den o beri go na ini a gron èn den o gi bun froktu.
32 Bika den sma di tan abra o kmopo na Yerusalem èn den sma di tan na libi o kmopo na Sion-bergi. Yehovah di e tiri den legre o meki a sani disi psa nomonomo.
33 Dati meki Yehovah e taki fu a kownu fu Asiria:
„A no o kon na ini a foto disièn a no o sutu nowan peiri tapu a foto.A no o teki nowan schild fu go feti nanga a fotoèn a no o meki nowan dan lontu en.”’
34 ’A srefi pasi di a teki fu kon feti, na a pasi dati a o teki fu drai gwe baka.Ma na ini a foto disi a no o kon’, na so Yehovah taki.
35 ’Mi o opo feti gi a foto disi èn mi o ferlusu den sma di e libi drape.Mi o du disi fu mi nen ede èn fu mi futuboi David ede.’”
36 Baka dati na engel fu Yehovah psa go na ini a legrekampu fu den Asiriasma, dan a kiri 185.000 srudati. Di sma wiki fruku m’manten, den si den dedeskin fu ala den srudati disi.
37 Dati meki Kownu Sanherib fu Asiria hari gwe. A drai go baka na Ninefei èn a tan drape.
38 Wan dei di Sanherib ben e saka kindi boigi na ini a tempel fu en gado Nisrok, dan Adrameilek nanga Sareiser, den eigi manpkin fu en, kiri en nanga fet’owru. Baka dati den lowe go na a kontren fu Ararat. Dan en manpkin Esar-Hadon bigin tiri leki kownu.
Futuwortu
^ Noso: „a paleis fu Kownu”.
^ Na so den ben e kari na edeman fu den sma di ben e kanti win gi a kownu fu Asiria.
^ Noso kande: „na mindri”.
^ Noso: „uma fu Sion di no sribi nanga wan man ete”.
^ Noso: „den kriki fu Nijl-liba”.
^ Noso: „di gro kon fu siri di ben fadon na gron”.
