Yohanes e fruteri 10:1-42
10 „Fu tru, mi e taigi unu: Efu wan sma no e waka na a doro fu go na ini a skapupen, ma a e kren kon na inisei na wan tra presi, dan a sma dati na wan fufuruman nanga wan abani.
2 Ma a sma di e waka na a doro go na inisei, na a skapuman fu den skapu.
3 A man di e hori wakti na a doro e opo a doro gi en èn den skapu e arki en sten. A e kari en eigi skapu na den nen èn a e tyari den go na dorosei.
4 Te a tyari ala den skapu fu en go na dorosei, a e waka na den fesi èn den skapu e waka na en baka, fu di den sabi en sten.
5 Noiti den o waka na baka wan sma di den no sabi. Na presi fu dati den o lowe gi en fu di den no sabi en sten.”
6 Yesus ben fruteri den sma na agersitori disi, ma den no ben sabi san den sani disi ben wani taki.
7 Fu dati ede Yesus taki ete wan leisi: „Fu tru, mi e taigi unu: Mi na a doro pe den skapu musu pasa.
8 Ala sma di kon fu teki mi presi, na fufuruman nanga abani. Ma den skapu no arki den.
9 Mi na a doro. Efu wan sma waka pasa mi fu go na inisei, a o feni frulusu. A sa man go na inisei èn na dorosei, èn a o feni weigron.
10 A fufuruman e kon soso fu fufuru, fu kiri, èn fu broko sani. Mi kon fu meki sma kisi libi, iya, den o kisi têgo libi.
11 Mi na a moro bun skapuman. A moro bun skapuman e gi en libi gi den skapu fu en.
12 Te wan wrokoman no de wan skapuman èn a no en abi den skapu, dan a o gowe libi den skapu èn a o lowe te a e si wan busidagu e kon. Dan a busidagu o grabu wan tu fu den skapu èn den trawan o lon go na ala sei.
13 A man o lowe fu di en na wan wrokoman èn a no e broko en ede nanga den skapu.
14 Mi na a moro bun skapuman. Mi sabi mi skapu èn mi skapu sabi mi,
15 neleki fa a Tata sabi mi èn mi sabi a Tata. Mi o gi mi libi* gi den skapu.
16 Mi abi tra skapu tu, di no de fu a skapupen disi. Mi musu tyari den kon tu, èn den o arki mi sten èn den o tron wán ipi di abi wán skapuman.
17 A Tata lobi mi fu di mi gi mi libi gi den. Dati meki mi man kisi mi libi baka.
18 Nowan sma puru en na mi anu, ma na fu di mi wani, meki mi gi mi libi. Mi abi a reti fu gi mi libi èn mi abi a reti fu kisi mi libi baka. Na a Tata gi mi a komando fu du disi.”
19 Baka dati den Dyu bigin haritaki nanga makandra baka fu den sani di Yesus taki.
20 Furu fu den ben e taki: „A abi wan ogri yeye na en tapu èn a law. Fu san ede unu e arki en?”
21 Trawan taki: „Wan sma di abi wan ogri yeye na en tapu no man taki den sani disi. Wan ogri yeye no man meki breni sma si, a no so?”
22 Na a ten dati, wan fesa ben e hori na Yerusalem pe den sma ben memre a ten di den Dyu ben gi a tempel abra na Gado. A ben de a kowru ten fu a yari
23 èn Yesus ben e waka na ini a tempel na ini a gadri fu Salomo.
24 Ne den Dyu lontu en èn den taigi en: „O langa yu o meki wi wakti? Efu yu na a Krestes, dan taigi wi dati krin.”
25 Yesus piki den: „Mi taigi unu, ma toku unu no e bribi. Den sani di mi e du na ini a nen fu mi Tata, e sori krin taki na mi.
26 Ma unu no e bribi, fu di unu a no mi skapu.
27 Mi skapu e arki mi sten. Mi sabi den èn den e waka na mi baka.
28 Mi o gi den têgo libi èn den no o dede kwetikweti. Nowan sma o puru den na mi anu.
29 Den skapu di mi Tata gi mi prenspari moro ala tra sani. Nowan sma kan puru den na a anu fu a Tata.
30 Mi nanga a Tata na wán.”
31 Agen den Dyu teki ston fu trowe na en tapu.
32 Yesus piki den Dyu: „Mi sori unu furu moi sani di a Tata taigi mi fu du. Fu sortuwan fu den sani disi unu wani ston mi kiri?”
33 Den Dyu piki en: „A no fu di yu du wan moi sani, meki wi wani trowe ston na yu tapu fu kiri yu, ma na fu di yu afrontu Gado. Iya, yu meki yusrefi tron wan gado, aladi yu na wan libisma.”
34 Yesus piki den: „Na ini a Wèt fu unu Gado skrifi: ’Mi taki: „Unu na gado”’, a no so?
35 Gado e kari den sma di a krutu ’gado’, èn libisma no man puru san skrifi na ini Gado Buku.
36 Mi na a sma di Gado meki kon santa èn di a seni kon na grontapu. Sobun, fa unu kan taigi mi: ’Yu afrontu Gado’, fu di mi taki dati mi na Gado Manpikin?
37 Efu mi no e du den sani di mi Tata taigi mi fu du, dan un no musu bribi mi.
38 Ma efu mi e du den, dan bribi den sani di mi e du, awansi unu no wani bribi mi. Dan unu o sabi now èn fu ala ten taki a Tata de wán nanga mi èn mi de wán nanga a Tata.”
39 Dati meki den pruberi fu grabu en. Ma a gowe, so taki den no ben man kisi en.
40 Ne a abra Yordan-liba èn a go baka na a presi pe Yohanes ben e dopu sma fosi, dan a tan drape.
41 Furu sma ben kon na en èn den taki: „Yohanes no du nowan wondru, ma ala den sani di Yohanes taki fu a man disi, tru.”
42 Na so furu sma drape bigin bribi na ini en.
Futuwortu
^ Griki wortu: psuke. Luku „Moro sani”, nr. 8.
