Yohanes e fruteri 3:1-36
3 Wan Fariseiman ben de di ben nen Nikodeimus. A ben de wan tiriman fu den Dyu.
2 Wan neti a man disi kon na Yesus èn a taigi en: „Rabbi, wi sabi taki yu na wan leriman di komopo fu Gado, bika nowan sma man du den wondru di yu e du, efu Gado no de nanga en.”
3 Yesus piki en: „Fu tru mi e taigi yu: Efu wan sma no gebore baka, dan a no sa man si a Kownukondre fu Gado.”
4 Nikodeimus taigi en: „Fa wan man kan gebore te a owru kaba? A no man go baka na ini en mama bere fu gebore ete wan tron, a no so?”
5 Yesus piki en: „Fu tru mi e taigi yu: Efu wan sma no gebore fu watra nanga yeye, dan a no sa man go na ini a Kownukondre fu Gado.
6 Te wan sma gebore fu wan libisma, dan en na wan libisma, èn te wan sma gebore fu a yeye, dan en na wan manpikin fu Gado.
7 No fruwondru fu di mi taigi yu: Un musu gebore baka.
8 A winti e wai pe a wani èn yu e yere taki a e wai, ma yu no sabi fu pe a komopo èn pe a e go. Na so a de nanga wan sma di gebore fu a yeye.”
9 Nikodeimus aksi en: „Fa dati kan dan?”
10 Yesus piki en: „Fa a du kon taki yu no sabi den sani disi aladi yu na wan sma di e gi Israel leri?
11 Fu tru mi e taigi yu: Wi e taki fu sani di wi sabi èn wi e taki fu sani di wi si, ma unu no e bribi den sani di wi e taki.
12 Efu mi taigi unu sani di abi fu du nanga grontapu, ma toku unu no e bribi, dan fa unu o bribi te mi e taigi unu sani di abi fu du nanga hemel?
13 Sosrefi, nowan sma opo go na hemel, boiti a sma di saka komoto na hemel, dati na a Manpikin fu libisma.
14 Neleki fa Moses ben opo a sneki go na loktu di a ben de na a sabana, na so den sa musu opo a Manpikin fu libisma go na loktu tu,
15 so taki ala sma di e bribi na ini en, kan kisi têgo libi.
16 Bika Gado ben lobi grontapu so te, taki a gi en wan-enkri Manpikin,* so taki ala sma di e bribi na ini en no sa dede, ma sa kisi têgo libi.
17 Bika Gado no seni en Manpikin kon na grontapu fu krutu grontapu, ma fu meki grontapu kisi frulusu nanga yepi fu en.
18 Efu wan sma e bribi na ini en, dan a sma no sa kisi krutu. Ma efu wan sma no e bribi na ini en, dan a sma kisi krutu kaba, bika a sma disi no e bribi na ini a nen fu a wan-enkri Manpikin di Gado srefi meki.
19 We, na fu a sani disi ede den o kisi krutu. A leti kon na grontapu, ma libisma ben lobi a dungru moro leki den ben lobi a leti, bika den ben du ogri.
20 Bika a sma di e du ogri sani, no lobi a leti èn a no e kon na ini a leti tu, so taki sma no sa si taki a e du ogri.
21 Ma a sma di e du san reti, e kon na ini a leti, so taki sma kan si krin taki a du sani soleki fa Gado wani.”
22 Baka dati, Yesus nanga den disipel fu en go na ini a kontren fu Yudea. A tan wan tu dei nanga den drape èn a ben e dopu sma.
23 Ma Yohanes ben e dopu sma tu na wan presi di nen Enon krosibei fu Salim, bika furu watra ben de drape èn den sma ben tan kon na en fu teki dopu.
24 Na a ten dati sma no ben trowe Yohanes na strafu-oso ete.
25 Den disipel fu Yohanes bigin meki trobi nanga wan Dyu fu a gwenti di sma ben abi fu krin densrefi.
26 Baka dati den go na Yohanes èn den taigi en: „Leriman, yu ben fruteri wi fu wan man di ben de nanga yu abrasei fu Yordan-liba. We, a man dati e dopu sma èn ala sma e go na en.”
27 Yohanes piki den: „Wan sma no man kisi wan sani, efu a no Gado na hemel gi en.
28 Unsrefi yere di mi taki dati mi a no a Krestes, ma Gado seni mi kon fu waka na fesi a sma dati.
29 Na a trowmasra abi a trowmisi. Ma te a mati fu a trowmasra e tanapu drape èn e yere a trowmasra, dan a e prisiri trutru fu yere a sten fu a trowmasra. Fu dati ede mi e prisiri srefisrefi.
30 A wroko fu a sma dati o go na fesi, ma a wroko fu mi o go na baka.”
31 A sma di komopo fu tapusei, hei moro ala tra sma. A sma di kon fu grontapu, de fu grontapu èn a e taki fu sani di abi fu du nanga grontapu. A sma di komopo fu hemel, hei moro ala tra sma.
32 A e taki fu sani di a si èn di a yere, ma nowan sma wani bribi san a e taki.
33 A sma di e bribi den sani di a taki, e sori krin taki Gado e taki tru.
34 Bika a sma di Gado seni kon, e taki san Gado e taki, bika Gado no gridi fu gi sma en yeye.
35 A Tata lobi a Manpikin èn a poti ala sani na ini en anu.
36 A sma di e bribi na ini a Manpikin, e kisi têgo libi. A sma di no e gi yesi na a Manpikin, no sa kisi libi, ma a bigi atibron fu Gado e tan na en tapu.
Futuwortu
^ Noso: „a wan-enkri manpikin di Gado srefi meki.”
