Yona 3:1-10
3 Dan Yehovah taki nanga Yona ete wan leisi. A taki:
2 „Opo go na a bigi foto Ninefei èn fruteri den sma san mi taigi yu.”
3 Ne Yona opo go na Ninefei, soleki fa Yehovah taki. Gado ben e si a foto Ninefei leki wan bigi foto. A foto ben bigi so te, taki wan sma ben abi fu waka dri dei fu man doro na a tra sei fu a foto.
4 Sobun, Yona waka go na ini a foto. A waka wan heri dei èn a ben e taigi sma: „Ete fotenti dei, dan Ninefei o drai tapu.”
5 Ne den sma fu Ninefei bigin bribi na ini Gado. Dati meki den taki dati den no ben o nyan èn den ben o weri rowkrosi fu sori taki den e sari fu den ogri di den du. Iya, ala sma du disi, awinsi den ben gudu noso pôti, awinsi den ben owru noso yongu.
6 Di a kownu fu Ninefei yere a boskopu, a opo fu en kownusturu, a puru en kownukrosi, dan a weri krosi di sma gwenti weri te den e sari. Ne a saka sidon na ini asisi.
7 Dan a kownu nanga den heihei man seni boskopu gi ala sma na ini Ninefei. Disi na a boskopu:
„Nowan sma, nowan osometi, nowan kaw, èn nowan skapu musu nyan wan sani. Den no musu nyan notinoti. Watra srefi den no musu dringi.
8 Meki den weri krosi di sma gwenti weri te den e sari, iya, ala libisma nanga osometi musu abi den krosi disi na den skin. Dan den musu bari kari Gado bun tranga fu yepi den. Meki den tapu nanga na ogri fasi fa den e tyari densrefi èn meki den tapu nanga den ogri sani di den e du.
9 Kande a tru Gado o kenki prakseri èn a o sari wi. Kande en ati no o bron moro èn a no o kiri wi.”
10 Ne a tru Gado si san den du. A si taki den tapu nanga den ogri di den ben e du. A ben taki dati a ben o tyari rampu kon na den tapu. Ma dan a kenki prakseri èn a no tyari rampu kon na den tapu moro.
