Yosua 5:1-15
5 Te fu kaba ala den kownu fu den Amorietsma di ben e libi na west-sei fu Yordan-liba nanga ala den kownu fu den Kanansma di ben e libi krosibei fu a se, yere taki Yehovah meki a watra fu Yordan-liba kon drei leti na fesi den Israelsma, teleki den alamala koti abra. Dati meki den kon frede srefisrefi èn fu den Israelsma ede den lasi-ati.
2 Na a ten dati Yehovah taigi Yosua: „Meki ston nefi èn bigin besnèi den mansma fu Israel baka.”
3 Sobun, Yosua meki ston nefi, dan a bigin besnèi den mansma fu Israel na Gibeyat-Haralot.
4 Disi na fu san ede Yosua besnèi den sma: baka di a pipel komoto na Egepte, dan ala den mansma di ben de srudati, dede na pasi na ini a sabana.
5 Ala den mansma di komoto na Egepte ben besnèi, ma den mansma di gebore na ini a sabana, baka di den komoto na Egepte, no ben besnèi.
6 Fotenti yari langa den Israelsma waka na ini a sabana, teleki ala den srudati di ben komoto na Egepte èn di no ben arki Yehovah, dede. Yehovah ben sweri gi den sma disi taki den no ben o si a kondre di Yehovah ben pramisi den afo fu den fu gi wi, wan kondre di lai merki nanga oni.
7 Ma a meki den manpikin fu den man disi teki a presi fu den papa. Na den manpikin disi Yosua besnèi, bika den no ben besnèi di den ben de na pasi.
8 Di den kaba besnèi ala den mansma, dan den man disi tan na ini a kampu, teleki den kisi densrefi baka.
9 Sobun, Yehovah taigi Yosua: „Tide mi puru a syen fu Egepte na unu tapu.” Fu dati ede, den e kari a presi dati Gilgal te na a dei fu tide.
10 Na so den Israelsma tan na Gilgal. Na a di fu tinafo dei fu a mun den hori a Paskafesa na mofoneti na ini Yerikow-sabana.
11 A dei baka a Paskafesa den bigin nyan a nyanyan di ben e gro na ini a kondre. Na a srefi dei dati den nyan brede sondro srudeki nanga losi siri.
12 A dei baka di den nyan a nyanyan di ben e gro na ini a kondre, den no kisi mana moro. Sensi a ten dati, mana no fadon komoto fu hemel moro. Na so den Israelsma bigin nyan a nyanyan fu a kondre Kanan a yari dati.
13 Wan dei, di Yosua ben de na Yerikow, a opo en ai luku èn a si taki wan man ben e tanapu na en fesi nanga wan feti-owru na ini en anu. Fu dati ede Yosua waka go miti a man èn a aksi en: „Yu e horibaka gi wi, noso gi den feanti fu wi?”
14 Ne a man piki en: „A no de leki fa yu prakseri. Mi kon dya leki wan edeman fu a legre fu Yehovah.” Di Yosua yere dati, a boigi nanga en fesi go na gron èn a aksi a man: „San mi masra kon taigi a futuboi fu en?”
15 Dan na edeman fu a legre fu Yehovah taigi Yosua: „Puru yu susu na yu futu, bika yu e tanapu na wan santa presi.” Ne Yosua du dati wantewante.
