A brifi fu Yudas 1:1-25
1 Mi, Yudas, di de wan srafu fu Yesus Krestes, ma wan brada fu Yakobus, e skrifi den wan di Gado wi Tata, kari èn di a lobi. A kibri den poti na wan sei gi Yesus Krestes, fu di den na fu en:
2 Meki a sari-ati, a freide, nanga a lobi fu Gado kon moro furu gi unu.
3 Lobiwan, mi ben angri fu skrifi wan brifi fu fruteri unu fu a fasi fa Gado o frulusu wi alamala. Ma now mi feni en fanowdu fu skrifi unu wan brifi fu gi unu deki-ati fu feti tranga gi a wan-enkri Kresten leri di sma ben gi den santawan.
4 Mi e skrifi unu, fu di wan tu man di no e lespeki Gado, boro kon na un mindri. Langa ten kaba Gado Buku ben taki dati Gado ben o strafu den sortu man disi. Den e teki a bun-ati fu wi Gado leki wan okasi fu du ogri sani sondro fu syen èn a e kon na krin taki den no e horibaka gi Yesus Krestes, a wan-enkri wan di de wi Masra èn di bai wi.
5 Unu sabi ala sani kaba. Toku mi wani memre unu na a sani disi: Yehovah ben fri en pipel na ini a kondre Egepte, ma bakaten a kiri den wan di no ben abi bribi.
6 Boiti dati, yu ben abi engel di ben drai baka gi a libi di Gado ben seti gi den sensi a bigin èn di gowe libi a tanpresi fu den. Fu dati ede Gado tai den nanga têgo keti na ini deki dungru, teleki den kisi krutu na a bigi dei.
7 Na so a ben de tu nanga Sodom nanga Gomora èn den foto di ben de krosibei fu den. Den ben prisiri fu du hurudu èn den ben gridi fu abi seks na wan fasi di no fiti. Gado strafu den nanga têgo faya èn na so fasi den tron wan eksempre fu warskow wi.
8 Aladi dati de so, toku den man disi lobi dren, den e doti a skin èn den no abi lespeki gi den wan di e tiri den. Boiti dati, den e taki ogri fu den wan di kisi glori.
9 Wan leisi a gran engel Mikael ben abi wan kesekese nanga Didibri. A ben e haritaki nanga en fu a dedeskin fu Moses. Toku a no ben prefuru fu krutu Didibri èn fu kosi en. A ben taki nomo: „Meki Yehovah strafu yu.”
10 Ma den man disi e taki ogri fu iniwan sani di den no e frustan trutru, èn te den e frustan wan sani, dan den e tyari densrefi leki meti di no man denki. Na a fasi dati den e pori den libi.
11 Helu fu den, bika soso fu kisi gudu den waka a pasi fu Kain èn den feti fu go du den srefi ogri di Bileam ben du. Neleki Korak, den lasi den libi fu di den ben e taki sani fu gens den wan di ben e tiri den.
12 Te den sma disi e kon na den fesa di unu e hori fu sori taki unu lobi makandra, den de leki bigi ston di kibri na ondro watra. Den na skapuman di e prakseri den eigi bere nomo sondro syen èn den na wolku di no abi watra, wolku di winti e wai go-kon. Den na bon di no e gi froktu te a ten fu den doro. Iya, den na bon di dede* krinkrin èn di rutu puru.
13 Den na krasi skwala fu se di e meki den eigi syen kuku kon na tapu leki skuma. Den na stari di no e waka wán pasi nomo èn den o tan na ini a moro deki dungru fu têgo.
14 Iya, Heinok, a di fu seibi afo te yu ben o teri komoto fu Adam, ben taki profeititori fu den tu. A ben taki: „Luku, Yehovah ben kon nanga den dusundusun santawan fu en
15 fu strafu ala sma. A kon tu fu sori den san na den ogri di den du di meki taki den o kisi a strafu èn san na den takru sani di den ogri sondari ben taki fu en.”
16 Den sma disi na sma di gwenti krutukrutu èn di e kragi fu a fasi fa a libi fu den e waka. Den e du san den eigi takru lostu e meki den du, den e dyaf nanga den mofo èn den e prèise sma soso fu densrefi kan kisi wini fu dati.
17 Ma unu, lobiwan, prakseri den sani di den apostel fu wi Masra Yesus Krestes ben taki kaba.
18 Prakseri taki den ben gwenti fu taigi unu: „Na ini den lasti dei, spotuman o de di o du den ogri sani di den eigi lostu e meki den du.”
19 We, na den man disi e tyari prati kon na mindri sma. Den na sma di e tyari densrefi leki meti èn den no abi a yeye fu Gado.
20 Ma lobiwan, meki a santa bribi fu unu yepi unu fu kon moro tranga èn begi nanga santa yeye.
21 Te unu e du dati, dan Gado o tan lobi unu, aladi unu e wakti teleki wi Masra Yesus Krestes sori unu sari-ati, so taki unu kan kisi têgo libi.
22 Sosrefi, tan sori sari-ati gi den wan di e tweifri.
23 Hari den puru na ini a faya, so taki unu kan frulusu den. Tan sori sari-ati gi trawan, ma unu srefi musu luku bun. Srefi a krosi fu den un musu frede fu fasi, fu di den flaka den krosi nanga a sondu libi fu den.
24 We, Gado man kibri unu fu no fadon èn fu de sondro fowtu. Na so unu kan de nanga bigi prisiri na fesi Gado di abi glori.
25 En na a wan-enkri Gado, wi Frulusuman, èn na en meki wi Masra Yesus Krestes frulusu wi. Iya, na Gado abi a glori, a grani, a makti, nanga a reti fu tiri sensi owruten, sosrefi now èn fu têgo. Amen.
Futuwortu
^ Grikitongo: „dede tu tron.”
