Kapitel Tin

A Pramisi fu wan Granman fu Vrede

Yesaya 8:19–9:7

1. San a libisma famiri ondrofeni sensi a ten fu Kain?

SO WAN siksi dusun yari pasa kaba, a fosi libisma beibi ben gebore. A nen fu en ben de Kain, èn a geborte fu en ben de spesrutu srefisrefi. No a papa nanga mama fu en, no den engel, èn srefi no a Mekiman ben si wan libisma beibi bifo. A nyunyun pikin disi ben kan gi howpu na wan libisma famiri di kisi krutu. ¡A ben de wan sari sani trutru di, baka di a ben gro kon bigi, a ben tron wan kiriman! (1 Yohanes 3:12) Sensi a ten dati, a libisma famiri si a kiri di sma kiri kefalek furu tra sma. Libisma, di abi a firi fu du san takru, no de ini vrede nanga makandra noso nanga Gado.​—Genesis 6:5; Yesaya 48:22.

2, 3. Gi sortu fruwakti Yesus Krestes ben opo a pasi, èn san wi musu du fu kisi den blesi dati?

² So wan fo dusun yari baka a geborte fu Kain, wan tra beibi ben gebore. A nen fu en ben de Yesus, èn a geborte fu en ben de spesrutu srefisrefi tu. Wan nyunwenke ben meki en nanga a krakti fu a santa yeye — a wan-enkri geborte di feni presi na a fasi dati na ini a historia. Na a ten fu a geborte fu en, furu engel di ben de nanga prisiri ben singi prèisesingi gi Gado, èn ben taki: „Glori na ini den moro hei presi na Gado, èn na grontapu vrede na mindri sma fu bun wani” (Lukas 2:13, 14). Yesus no ben de wan kiriman srefisrefi, ma a ben opo a pasi gi libisma fu de ini vrede nanga Gado èn fu kisi têgo libi.​—Yohanes 3:16; 1 Korentesma 15:55.

³ Yesaya ben taki na fesi dati sma ben sa kari Yesus „Granman fu Vrede” (Yesaya 9:6). A ben sa òfer en eigi libi fu a bun fu a  libisma famiri, èn na so fasi a meki taki sma kan kisi pardon fu sondu (Yesaya 53:11). Na ini a ten disi, sma kan abi vrede nanga Gado èn kisi pardon fu sondu tapu a gron fu bribi na ini Yesus Krestes. Ma den blesi dati no e kon fu densrefi (Kolosesma 1:21-23). Den wan di wani den blesi dati musu leri fu gi yesi na Yehovah Gado. (1 Petrus 3:11; teki gersi Hebrewsma 5:8, 9.) Na ini a ten fu Yesaya, Israèl nanga Yuda e du sani heri tra fasi.

Den E Go Suku Yepi na den Ogri Yeye

4, 5. San na a situwâsi na ini a ten fu Yesaya, èn na suma son sma e go fu suku yepi?

⁴ Fu a trangayesi ede fu den sma fu a ten fu Yesaya, meki den de na ini wan tumusi takru situwâsi na moreel sei, wan trutru kondisi fu dungru na yeye fasi. Srefi a zuidsei kownukondre Yuda, a presi pe a tempel fu Gado de, no abi vrede. Leki wan bakapisi fu a de di a pipel fu Yuda no de getrow, meki den de na ini kefar taki den Asiriasma o broko go nanga tranga na ini a kondre, èn muilek ten de na den fesi. Na suma den e go fu suku yepi? A de wan sari sani taki furu fu den e go suku yepi na Satan, no na Yehovah. Nôno, den no e kari Satan na en nen. Na presi fu dati, den e du afkodrei, neleki Kownu Saul fu owruten, èn e suku lusu gi den problema fu den fu di den e pruberi fu taki nanga den dedewan.​—1 Samuèl 28:1-20.

⁵ Son sma e horibaka srefi gi na afkodreiwroko disi. Yesaya e sori go na a fadon dati di sma e fadon komoto na bribi, te a e taki: „Efu den ben sa taigi unu: ’Go na den sma di de leki asi fu den ogri yeye noso na den wan di abi wan yeye di e taki na fesi san o pasa èn di e bari nanga fini sten èn e taki sani nanga safri sten’, ¿dan a no na a Gado fu den iniwan pipel musu go? ¿Den musu go na den dede sma fu a bun fu den sma di de na libi?” (Yesaya 8:19) Sma di de leki asi fu den ogri yeye, kan kori tra sma, „e bari nanga fini sten èn e taki sani nanga safri sten”. Wan sma di de leki wan asi fu den ogri yeye èn di de na  libi kan meki den sortu babari disi sondro fu buweigi den mofobuba fu en èn e meki a gersi leki den yeye fu den dede sma e meki den babari disi. Ma sontron den ogri yeye kan abi fu du langalanga nanga dati èn e du leki den de a dedesma, soleki fa a ben pasa kande di Saul ben aksi sani na a heks fu Endor.​—1 Samuèl 28:8-19.

6. Fu san ede den Israèlsma di du afkodrei, spesrutu abi fowtu?

⁶ Ala den sani disi e pasa na Yuda ala di Yehovah gi a komando taki den no mag du afkodrei. Na ondro a Wet fu Moses a de wan sondu pe wan sma e kisi dedestrafu (Lefitikus 19:31; 20:6, 27; Deuteronomium 18:9-12). Fu san ede wan pipel di de wan spesrutu gudu fu Yehovah, e du so wan seryusu fowtu? Bika den drai den baka gi a Wet nanga rai fu Yehovah èn „a bedrigi krakti fu sondu . . . tranga na ati [fu den]” (Hebrewsma 3:13). „Na ati fu den kon de sondro firi neleki fatu”, èn den kon kisi wan mi-no-ke fasi gi a Gado fu den.​—Psalm 119:70. *

7. Fa furu sma na ini a ten disi e waka baka den Israèlsma fu a ten fu Yesaya, èn san sa de a tamara fu den sma dati efu den no abi berow?

⁷ Kande den e prakseri: ’Sortu bun a Wet fu Yehovah e gi te wi e kisi fu du nanga a de di den Asiriasma de fu kon feti nanga wi?’ Den wani wan esi-esi èn wan makriki lusu gi a muilek situwâsi fu den èn den no wani wakti Yehovah fu a kan du a wani fu en. So srefi na ini a ten fu wi, furu sma e poti a wet fu Yehovah na wan sei èn e suku den sma di de leki asi fu den ogri yeye, e suku bodoi na horoscoop, èn e suku yepi na tra fasi fu afkodrei fu lusu den problema fu den. Ma a de wan don sani na ini a ten disi taki den wan di de na libi e suku wan lusu gi den problema fu den na den wan di dede, neleki fa a ben de wan don sani na ini a ten dati. A tamara fu iniwan sma di e du den sani dati sondro fu abi berow, sa de nanga den „kiriman èn huruman èn . . . sma di e anbegi kruktu gado èn ala den leiman”. Den no abi a fruwakti fu libi na ini a ten di e kon.—Openbaring 21:8.

 A ’Wet Nanga Seryusu Fruklari’ fu Gado

8. San na „a wet” nanga „a seryusu fruklari” pe wi na ini a ten disi musu go fu kisi tiri?

⁸ A wet fu Yehovah di e tapu afkodrei, makandra nanga den tra komando fu en, no kibri na ini Yuda. A e tan fu di sma skrifi en. Na ini a ten disi a heri Wortu fu en di skrifi, de fu kisi. Dati na Bijbel, di no abi soso den wet nanga ordru fu Gado na ini di tyari kon na wan, ma so srefi wan tori fu a fasi fa Gado ben handri nanga a pipel fu en. A Bijbel tori disi fu a fasi fa Yehovah ben handri de wan seryusu fruklari, noso buweisi, di e leri wi fu a fasi fa Yehovah de èn fu den eigifasi fu en. Pe den Israèlsma musu go fu suku tiri, na presi fu suku rai na den dedewan? Yesaya e piki: „¡Na a wet èn na a seryusu fruklari!” (Yesaya 8:20a) Iya, den wan di e suku trutru sabi musu go na a Wortu fu Gado di skrifi.

9. ¿A kari di sondari di no abi berow e kari Bijbel tekst wanwan leisi abi iniwan waarde?

⁹ Son Israèlsma di e teki prati na afkodrei e taki kande taki den e lespeki a Wortu fu Gado di skrifi. Ma den sani disi di den e taki no abi waarde èn den taki na wan hoigri fasi. Yesaya e taki: „Fu tru den sa tan taki san de akruderi a fruklari disi, di no sa abi a leti fu musudei” (Yesaya 8:20b). Na sortu fruklari Yesaya e sori go dyaso? Kande a e sori go na a fruklari: „¡Na a wet èn na a seryusu fruklari!” A kan taki son Israèlsma di fadon komoto na bribi e sori go na a Wortu fu Gado, neleki fa sma na ini a ten disi di fadon komoto na bribi nanga tra sma kan kari Bijbel  tekst. Ma disi na soso wortu nomo. A kari di wan sma e kari Bijbel tekst no sa tyari en go na no wan „leti fu musudei” noso a no sa kisi sabi fu Yehovah, efu a no e du a wani fu Gado èn no e tan fara fu du di no krin. *

 „A No wan Angriten fu Brede”

10. Fa a pipel fu Yuda e pina fu di a drai en baka gi Yehovah?

¹⁰ Trangayesi na Yehovah abi leki bakapisi taki sma de na ini dungru na frustan sei (Efeisesma 4:17, 18). Na yeye fasi, a pipel fu Yuda kon breni, èn den no e frustan sani (1 Korentesma 2:14). Yesaya e taki fu a situwâsi fu den: „Ibriwan sma trutru sa pasa go na ini a kondre nanga hebi kwinsi èn nanga angri” (Yesaya 8:21a). Fu di a nâsi no de getrow — spesrutu na a ten fu a tiri fu Kownu Akas — dan a tan di Yuda sa tan leki wan kownukondre di abi srefidensi, e kon na ini kefar. Feanti e lontu a nâsi. A legre fu Asiria e feti nanga den foto fu Yudea, a wan baka a trawan. A feanti e pori a fatu gron, èn e meki taki nyanyan no de furu. Furu sma de „nanga hebi kwinsi èn nanga angri”. Ma wan tra sortu angri e pina a kondre tu. Wan tu tenti yari na fesi, Amos ben taki na fesi: „ ’¡Luku! Dei e kon’, na so a Soeverein Masra Yehovah taki, ’èn mi sa seni wan angriten kon na ini a kondre, a no wan angriten fu brede, èn a no wan dreiwatra fu watra, ma fu sma yere a wortu fu Yehovah’” (Amos 8:11). ¡Now wan srefi sortu angriten na yeye fasi e pina Yuda!

11. Yuda sa leri wan sani fu a trangaleri di a e kisi?

¹¹ ¿Yuda sa leri wan sani fu a situwâsi èn drai go baka na Yehovah? ¿A pipel fu en sa drai den baka gi afkodrei nanga na anbegi fu kruktu gado èn drai kon baka „na a wet èn na a seryusu fruklari”? Yehovah e si na fesi san den sa du: „A musu pasa taki fu di angri e kiri en èn a meki ensrefi kon mandi, dan fu tru a sa kari ogri kon na tapu a kownu fu en èn na tapu a Gado fu en èn trutru a sa luku go na loktusei” (Yesaya 8:21b). Iya, furu sma sa gi a libisma kownu fu den a fowtu taki a tyari den go na ini a situwâsi disi. ¡Na wan don fasi son wan sa gi srefi Yehovah a fowtu fu den rampu fu den! (Teki gersi Yeremia 44:15-18.) Na ini a ten disi, furu sma e handri na a srefi fasi, èn e gi Gado a fowtu fu rampu di kon fu a godelowsufasi fu libisma ede.

12. (a) Sortu bakapisi a abi taki Yuda drai en baka gi Gado? (b) Sortu prenspari aksi e opo kon?

 ¹² ¿A kari di den sma di e libi na ini Yuda e kari ogri kon na tapu Gado, sa tyari vrede kon gi den? Nôno. Yesaya e taki na fesi: „A sa luku go na grontapu, ¡èn luku! banawtu nanga dungru, dungrufasi, tranga ten nanga dungru sondro wan enkri krin leti” (Yesaya 8:22). Baka di den opo den ai fu den go na hemel fu gi Gado a fowtu, dan den e luku go na grontapu baka, na den fruwakti fu den di de sondro howpu. A drai di den e drai den baka gi Gado abi rampu leki bakapisi (Odo 19:3). Ma fa a de nanga den sani di Gado ben pramisi Abraham, Isak nanga Yakob? (Genesis 22:15-18; 28:14, 15) ¿Yehovah no sa meki den pramisi fu en kon tru? ¿Den Asiriasma noso wan tra srudati makti sa tyari wan kaba kon na a kownulin di Gado ben pramisi Yuda nanga David? (Genesis 49:8-10; 2 Samuèl 7:11-16) ¿Den Israèlsma sa kisi krutu fu de na ini dungru fu têgo?

Wan Kondre Di Den ’Handri Sondro Lespeki’

13. San na „Galilea fu den nâsi”, èn fa a du kon taki sma e „handri [en] sondro lespeki”?

¹³ Now Yesaya e sori go na wan fu den moro takru rampu di e feni presi èn di e kon na tapu den bakapikin fu Abraham: „A dungrufasi no sa de neleki a ten di a kondre ben de na ini banawtu, neleki fositen di sma ben handri a kondre fu Seibulon nanga a kondre fu Naftali sondro lespeki èn di sma ben meki taki a kisi grani na a tra ten — a pasi na a se, na ini a kontren fu a Yordanliba, Galilea fu den nâsi” (Yesaya 9:1). Galilea na wan kontren na a noordsei kownukondre Israèl. Na ini a profeititori fu Yesaya a abi na ini tu „a kondre fu Seibulon nanga a kondre fu Naftali” èn so srefi „a pasi na a se”, wan owruten pasi di ben e waka na a Se fu Galilea èn ben e go na a Mindrikondre Se. Na ini a ten fu Yesaya, sma e kari a kontren „Galilea fu den nâsi”, kande fu di sma di no de fu  Israèl e libi na ini furu fu den foto fu en. * Fa sma e „handri [a kondre disi] sondro lespeki”? Den heiden Asiriasma e wini a kondre, e tyari den Israèlsma go na ini katibo, èn e meki heiden, di no de bakapikin fu Abraham, tan na ini a heri kontren. ¡Na so fasi a tin-lo noordsei kownukondre lasi gowe fu a historia leki wan aparti nâsi!​—2 Kownu 17:5, 6, 18, 23, 24.

14. Na sortu fasi a „dungrufasi” fu Yuda sa de moro mendri leki di fu a tin-lo kownukondre?

¹⁴ So srefi Yuda de na ondro a kwinsi fu den Asiriasma. ¿A sa saka go dipi na ini wan „dungrufasi” fu ala ten soleki a tin-lo kownukondre di Seibulon nanga Naftali ben prenki? Nôno. Na wan „tra ten” Yehovah sa tyari blesi kon gi a kontren fu a zuidsei kownukondre Yuda èn srefi gi a kondre di a noordsei kownukondre ben tiri fosi. Fa?

15, 16. (a) Na sortu „tra ten” a situwâsi sa kenki gi „den distrikt Seibulon nanga Naftali”? (b) Fa a kondre di sma ben handri sondro lespeki kon kisi grani?

¹⁵ Na apostel Mateus e piki na aksi disi ini a tori fu a diniwroko fu Yesus na grontapu di a skrifi nanga yepi fu a santa yeye. Mateus e taki fu a bigin fu a diniwroko dati: „Baka di a ben gowe libi Nasaret, dan [Yesus] ben go tan na ini Kaperna-um, na a se, na ini den distrikt Seibulon nanga Naftali, so taki san ben taki nanga mofo fu a profeiti Yesaya, ben sa kon tru, di ben taki: ’¡O kondre fu Seibulon èn kondre fu Naftali, na a se pasi, na abrasei fu a Yordanliba, Galilea fu den nâsi! a pipel di ben sidon na ini dungru ben si wan bigi leti, èn leti ben skèin na tapu den wan di ben sidon na ini wan kontren fu a skaduw fu dede.’”​—Mateus 4:13-16.

¹⁶ Iya, „a tra ten” di Yesaya ben taki fu dati na fesi, na a ten fu a diniwroko fu Krestes na grontapu. Yesus ben de moro furu na Galilea na ini en libi na grontapu. A ben bigin nanga  a diniwroko fu en na ini a distrikt Galilea èn na drape a ben bigin meki bekènti: „A kownukondre fu hemel kon krosibei” (Mateus 4:17). Na Galilea a ben hori a barinen Bergitaki fu en, a ben teki den apostel fu en puru na mindri trawan, a ben du a fosi wondru fu en, èn a ben sori ensrefi na so wan 500 bakaman baka na opobaka fu en (Mateus 5:1–7:27; 28:16-20; Markus 3:13, 14; Yohanes 2:8-11; 1 Korentesma 15:6). Na a fasi disi Yesus ben meki a profeititori fu Yesaya kon tru fu di a ben gi grani na „a kondre fu Seibulon nanga a kondre fu Naftali”. A no de fu taki, Yesus no ben du a diniwroko fu en na a pipel fu Galilea wawan. Fu di Yesus ben preiki a bun nyunsu na ini a heri kondre, dan a „ben meki taki [a heri nâsi Israèl] kisi grani”, so srefi Yuda.

A „Bigi Leti”

17. Fa „wan bigi leti” e skèin na ini Galilea?

¹⁷ Ma fa a de nanga „wan bigi leti” na Galilea di Mateus e taki fu dati? Disi ben de so srefi wortu di a ben teki fu a profeititori fu Yesaya. Yesaya ben skrifi: „A pipel di ben e waka na ini dungru, si wan bigi leti. Fu a sei fu den wan di ben e libi na ini a kondre fu dipi skaduw, leti srefi skèin na den tapu” (Yesaya 9:2). Na a fosi yarihondro G.T., heiden leitori ben kibri a leti fu waarheid. Dyu relisi fesiman ben poti moro ete na tapu a problema fu di den ben e hori densrefi na a relisi gwenti fu den di nanga dati den ben „meki a wortu fu Gado lasi en krakti” (Mateus 15:6). Den wan di ben abi sakafasi ben e kisi kwinsi èn ben bruya, fu di den ben e waka baka „breni tyariman” (Mateus 23:2-4, 16). Di Yesus a Mesias ben kon, dan den ai fu furu sma di ben abi sakafasi ben opo na wan wondru fasi (Yohanes 1:9, 12). A fiti taki a profeititori fu Yesaya e taki fu a wroko di Yesus ben du na a ten di a ben de na grontapu èn fu den blesi di ben de a bakapisi fu a srakti-ofrandi fu en, leki „wan bigi leti”.​—Yohanes 8:12.

18, 19. Sortu reide den wan di ben du wan sani na tapu a leti ben abi, fu de nanga prisiri srefisrefi?

 ¹⁸ Den wan di ben du wan sani na tapu a leti, ben abi furu reide fu de nanga prisiri. Yesaya ben taki moro fara: „Yu meki a nâsi kon furu; yu meki a prisiri kon bigi gi en. Den prisiri na yu fesi soleki nanga a prisiri di den abi na ini a ten fu a kotiwroko, leki den sma di e prisiri te den e prati den sani di den fufuru na ini feti” (Yesaya 9:3). A bakapisi fu a preikiwroko fu Yesus nanga den bakaman fu en ben de taki opregti sma ben kon na fesi, èn den ben sori taki den ben wani anbegi Yehovah nanga yeye èn nanga waarheid (Yohanes 4:24). Ini moro mendri leki fo yari, ipi-ipi sma ben teki Krestendom. Dri dusun sma ben teki dopu na a dei fu a Pinksterfesa fu 33 G.T. Syatu baka dati, „a nomru fu den man ben tron wan sani fu feifi dusun” (Tori fu den Apostel 2:41; 4:4). Fu di den disipel ben sori a leti fayafaya, meki „a nomru fu den disipel ben tan kon moro furu srefisrefi na ini Yerusalem, èn wan bigi ipi priester ben bigin gi yesi na a bribi”.​—Tori fu den Apostel 6:7.

¹⁹ Neleki den wan di e prisiri nanga den bogobogo sani di den koti noso den wan di e prisiri nanga a prati di den e prati den warti sani di den fufuru, baka di den wini wan bigi srudatifeti, na so den bakaman fu Yesus ben prisiri nanga a kon di den ben kon moro furu (Tori fu den Apostel 2:46, 47). Baka wan pisi ten, Yehovah ben meki taki a leti skèin na mindri den nâsi (Tori fu den Apostel 14:27). So bun, sma fu ala ras ben prisiri taki a pasi fu go na Yehovah ben opo gi den.​—Tori fu den Apostel 13:48.

„Neleki na ini a Dei fu Midian”

20. (a) Na sortu fasi den Midiansma ben sori taki den de feanti fu Israèl, èn fa Yehovah ben tyari wan kaba kon na a de di den ben de wan kefar? (b) Fa na wan „dei fu Midian” di de na ini a ten di e kon, Yesus sa tyari wan kaba kon na a de di den feanti fu a pipel fu Gado de wan kefar?

²⁰ Den bakapisi fu den sani di a Mesias ben du de fu ala ten, soleki fa wi e si na den wortu disi fu Yesaya: „A tyatyari fu  a lai fu den èn a tiki na tapu den skowru fu den, a tiki fu a sma di e pusu den fu wroko, yu masi na pisipisi neleki na ini a dei fu Midian” (Yesaya 9:4). Furu yarihondro bifo a ten fu Yesaya, den Midiansma ben span anu makandra nanga den Moabsma fu kori Israèl fu go du sondu (Numeri 25:1-9, 14-18; 31:15, 16). Baka ten, Midiansma ben meki den Israèlsma kon frede den fu di den ben e feti nanga den èn ben e fufuru na den dorpu nanga den pranigron fu den, seibi yari langa (Krutubakra 6:1-6). Ma baka dati Yehovah ben wini den legre fu Midian nanga yepi fu Gideon, a futuboi fu en. Baka a „dei [dati] fu Midian”, no wan buweisi no de taki oiti den Midiansma ben meki a pipel fu Yehovah pina baka (Krutubakra 6:7-16; 8:28). Na ini a ten di no de so fara moro, Yesus Krestes, a moro bigi Gideon, sa tyari wan kaba kon na den disiten feanti fu a pipel fu Yehovah (Openbaring 17:14; 19:11-21). Dan, „neleki na ini a dei fu Midian”, a pipel fu Yehovah sa wini krinkrin èn fu têgo, no nanga a koni fu libisma, ma nanga a krakti fu Yehovah (Krutubakra 7:2-22). ¡Noiti moro a pipel fu Gado sa pina na ondro a tyatyari fu a kwinsi di sma e kwinsi den!

21. San a profeititori fu Yesaya e sori ini a tori fu feti na ini a ten di e kon?

²¹ A sori di Gado e sori a krakti fu en no de fu gi glori na feti. Yesus di ben kisi wan opobaka, na a Granman fu Vrede, èn fu di a sa pori den feanti fu en, dan a sa tyari vrede kon fu têgo. Now Yesaya e taki dati den e bron sani di srudati e weri, krinkrin nanga faya: „Ibri buta fu a sma di e stampu tranga èn a dyakti di den lolo na ini brudu, tron sani srefi fu sma bron den krinkrin na ini faya” (Yesaya 9:5). Noiti moro sma no sa firi den seki di e kon fu den buta fu srudati di e waka na ini pas. Sma no sa si den srudatikrosi moro di lai nanga brudu èn di de fu fetiman di feti meki na ati fu den kon tranga. ¡Feti no sa de moro!​—Psalm 46:9.

„Tumusi Bun Raiman”

22. Sortu difrenti profeiti nen Yesus kisi na ini a buku Yesaya?

²² Na a ten fu a wondru geborte fu en, a sma di ben gebore  fu de a Mesias, ben kisi a nen Yesus, di wani taki, „Yehovah Na Frulusu”. Ma a abi tra nen, profeiti nen di ben sori a prenspari rol fu en èn a hei posisi fu en. Wan fu den nen dati na Imanuèl, di wani taki, „Gado De Nanga Wi” (Yesaya 7:14, futuwortu). Now Yesaya e taki fu wan tra profeiti nen: „Wan pikin kon gebore gi wi, wan manpikin den ben gi wi; èn a kownu tirimakti sa kon na tapu en skowru. Èn en nen sa de: Tumusi Bun Raiman, Tranga Gado, Têgo Tata, Granman fu Vrede” (Yesaya 9:6). Prakseri den furu sani di den difrenti profeiti nen disi wani taki.

23, 24. (a) Na sortu fasi Yesus na wan „Tumusi Bun Raiman”? (b) Fa Kresten raiman na ini a ten disi kan waka baka na eksempre fu Yesus?

²³ Wan raiman na wan sma di e gi rai. Di Yesus Krestes ben de na grontapu, dan a ben gi kefalek moi rai. Wi e leisi na ini Bijbel taki „den ipi sma ben fruwondru fu a fasi fa a e gi leri” (Mateus 7:28). A de wan koni Raiman di abi firi gi sma, èn na wan tumusi aparti fasi a e frustan a fasi fa libisma de. A rai fu en no de soso fu gi sma piri-ai nomo noso fu strafu den. Moro furu a de na a fasi fu gi leri èn fu gi lobi-ati rai. A rai fu Yesus de tumusi bun fu di a de ala ten koni, volmaakti èn a no kan misi. Te wi e waka baka a rai dati, dan a e tyari wi go na têgo libi.​—Yohanes 6:68.

²⁴ A rai fu Yesus no de soso wan sani di e kon fu en koni frustan. Na presi fu dati a e taki: „San mi e leri, a no fu mi, ma na fu en di ben seni mi kon” (Yohanes 7:16). Yehovah Gado na a Fonten fu a koni fu Yesus, soleki fa a ben de nanga Salomo (1 Kownu 3:7-14; Mateus 12:42). Na eksempre fu Yesus musu buweigi leriman nanga raiman na ini a Kresten gemeente fu meki a leri fu den abi den gron na tapu a Wortu fu Gado ala ten.​—Odo 21:30.

„Tranga Gado” èn „Têgo Tata”

25. San a nen „Tranga Gado” e fruteri wi fu Yesus di de na hemel?

²⁵ Yesus na so srefi „Tranga Gado” èn „Têgo Tata”. Disi no wani taki dati a e teki a makti nanga a posisi fu Yehovah  abra, di de „Gado, a Tata fu wi”, sondro fu abi reti na tapu (2 Korentesma 1:2). „A [Yesus] . . . no ben prakseri fu teki sani abra nanga tranga, dati wani taki, fu de a srefi leki Gado” (Filipisma 2:6). Den e kari en Tranga Gado, no Almakti Gado. Noiti Yesus ben prakseri fu ensrefi taki en na Gado na Almaktiwan, bika a ben taki fu a Tata fu en leki „a wan-enkri tru Gado”, dati wani taki, a wan-enkri Gado di sma musu anbegi (Yohanes 17:3; Openbaring 4:11). Na ini den Buku fu Bijbel, a wortu „gado” kan wani taki „maktiwan” noso „trangawan” (Exodus 12:12; Psalm 8:5; 2 Korentesma 4:4). Bifo Yesus ben kon na grontapu, a ben de „wan gado”, di ben „de na ini a skin leki di fu Gado”. Baka na opobaka fu en, a ben drai go baka srefi na wan moro hei posisi na hemel (Yohanes 1:1; Filipisma 2:6-11). Moro fara a titel „gado” wani taki wan tra sani tu. Den ben e kari krutuman na ini Israèl „gado” — wan leisi Yesus srefi ben kari den so (Psalm 82:6; Yohanes 10:35). Yesus na a Krutuman di Yehovah poti èn „di sa krutu den libiwan nanga den dedewan” (2 Timoteus 4:1; Yohanes 5:30). A de krin, a fiti srefisrefi taki den e kari en Tranga Gado.

26. Fu san ede wi kan kari Yesus „Têgo Tata”?

²⁶ A titel „Têgo Tata” e sori go na a krakti nanga a makti fu a Mesias Kownu fu gi libisma a howpu fu libi fu têgo na grontapu (Yohanes 11:25, 26). Na erfenis fu wi fosi papa, Adam, ben de dede. Yesus, a lasti Adam, „ben tron wan yeye di e gi libi” (1 Korentesma 15:22, 45; Romesma 5:12, 18). Neleki fa Yesus, a Têgo Tata, sa libi fu têgo, na so a libisma famiri di e gi yesi sa nyan bun fu têgo fu den winimarki fu a de di a de tata.​—Romesma 6:9.

„Granman fu Vrede”

27, 28. Sortu tumusi moi winimarki e kon now èn na ini a ten di e kon gi den sma di e libi na ondro a tiri fu a „Granman fu Vrede”?

²⁷ Boiti têgo libi, libisma abi vrede fanowdu tu, vrede nanga Gado èn vrede nanga a sma na en sei. Srefi na ini a ten  disi, den wan di e saka densrefi na ondro a tiri fu a „Granman fu Vrede”, „naki den feti-owru fu den kon tron prugu èn den lansri fu den kon tron grasi-nefi” (Yesaya 2:2-4). Den no e kweki bita-ati fu kesekese ede di abi fu du nanga politiek, wan pisi kontren, ras noso kesekese na ekonomia sei. Den de na ini wánfasi ini na anbegi fu a wán tru Gado, Yehovah, èn den e du muiti fu tan abi bun matifasi nanga den sma na den sei, inisei èn dorosei fu a gemeente.​—Galasiasma 6:10; Efeisesma 4:2, 3; 2 Timoteus 2:24.

²⁸ Na a reti ten fu Gado, Krestes sa seti vrede na grontapu di sa de na heri grontapu, di sa seti bun èn di sa de fu têgo (Tori fu den Apostel 1:7). „Na a kownu tirimakti di de pasa marki èn na vrede, wan kaba no sa kon, na tapu a kownusturu fu David èn na tapu en kownukondre so taki a kan seti en bun èn fu horibaka gi en nanga yepi fu retidu èn nanga yepi fu regtfardikifasi, fu bigin nanga now èn te ten di no skotu” (Yesaya 9:7a). Te Yesus e gebroiki a makti fu en leki a Granman fu Vrede, dan a no sa go tiri na wan ogri-ati fasi. A no sa puru a fri wani fu den sma di e libi na ondro a tiri fu en èn a no sa poti den na en ondro nanga tranga. Na presi fu dati, ala sani di a sa du sa de „nanga yepi fu retidu èn nanga yepi fu regtfardikifasi”. ¡Wan kenki di e gi kowru-ati srefisrefi!

29. San wi musu du efu wi wani nyan bun fu a blesi fu vrede fu têgo?

²⁹ A bosroiti fu Yesaya na a pisi disi fu a profeititori fu en e naki wi ati trutru te wi e prakseri den tumusi moi sani san a profeiti nen fu Yesus wani taki. A e skrifi: „Iya, a faya fu Yehovah fu den legre sa du disi” (Yesaya 9:7b). Iya, Yehovah e handri nanga faya. A no e du noti sondro en heri ati. Wi kan de seiker taki awansi san a e pramisi, a sa du dati dorodoro. Fu dati ede, efu iniwan sma e angri fu nyan bun fu vrede fu têgo, dan meki a dini Yehovah nanga en heri ati. Meki a de so, taki ala futuboi fu Gado de „fayafaya gi tumusi bun wroko”, neleki Yehovah Gado nanga Yesus, a Granman fu Vrede.​—Titus 2:14.

[Futuwortu]

[Aksi fu a tori disi]

[Karta/​Prenki na tapu bladzijde 122]

(Efu yu wani si pe den sani disi skrifi, luka a buku)

Korasin

Betsaida

Kaperna-um

Lagipresi fu Genesaret

Se fu Galilea

Magadan

Tiberias

Yordanliba

GADARA

Gadara

 [Prenki na tapu bladzijde 119]

A geborte fu Kain èn di fu Yesus ben de ala tu spesrutu srefisrefi. Soso di fu Yesus ben abi wan koloku bakapisi

[Prenki na tapu bladzijde 121]

Wan angriten sa de di takru srefisrefi moro leki wan angri fu brede èn wan dreiwatra fu watra

 [Prenki na tapu bladzijde 127]

Yesus ben de wan leti na ini a kondre