Kapitel Erfu

¡Helu fu den Sma Di E Opo Densrefi Teige Yehovah!

Yesaya 9:8–10:4

1. Sortu takru fowtu Yerobeam ben meki?

DI A pipel di Yehovah ben meki wan frubontu nanga den, ben prati na ini tu kownukondre, dan a noordsei tin-lo kownukondre ben kon na ondro a tirimakti fu Yerobeam. A nyun kownu ben de wan krakti tiriman di ben sabi tiri. Ma a no ben abi trutru bribi na ini Yehovah. Fu a sani disi ede meki a ben meki wan takru fowtu di ben abi takru bakapisi gi a heri historia fu a noordsei kownukondre. Na ondro a Wet fu Moses, den Israèlsma ben kisi a komando fu teki waka dri tron wan yari go na a tempel na Yerusalem, di ben de na ini a zuidsei kownukondre Yuda now (Deuteronomium 16:16). Fu di Yerobeam ben frede taki den waka dati, di den sma di ben de na ondro en tiri ben e teki doronomo, ben sa meki den kisi a prakseri fu kon de wán baka nanga den brada fu den na zuidsei, dan a „ben meki tu gowtu pikin kaw èn a ben taigi a pipel: ’A hebi tumusi gi unu fu opo go na Yerusalem. Disi na yu Gado, o Israèl, di ben tyari yu komoto na a kondre Egipti.’ Ne a ben poti a wan na Bethel, èn a trawan a ben poti na Dan.”​—1 Kownu 12:28, 29.

2, 3. Sortu bakapisi a fowtu fu Yerobeam ben abi gi Israèl?

² Wan pisi ten a ben gersi leki a plan fu Yerobeam ben wroko. Safrisafri a pipel no ben e go na Yerusalem moro èn ben bigin anbegi na fesi den tu pikin kaw (1 Kownu 12:30). Ma na anbegi disi fu den sma di ben fadon komoto na bribi ben pori a tin-lo kownukondre. Na ini den yari di ben kon baka dati, srefi Yehu di warti fu kisi prèise fu di a ben sori so wan faya fu puru na anbegi fu Bâ-al komoto na Israèl, ben tan boigi gi den gowtu pikin kaw (2 Kownu 10:28, 29). Sortu tra bakapisi ben kon fu a tumusi fowtu bosroiti di Yerobeam ben teki? Dyugudyugu tapu a kontren fu politiek èn pina gi a pipel.

 ³ Fu di Yerobeam ben fadon komoto na bribi, dan Yehovah ben taki dati a siri fu en no ben sa tiri a kondre, èn te fu kaba a noordsei kownukondre ben sa ondrofeni wan takru rampu (1 Kownu 14:14, 15). A wortu fu Yehovah ben kon tru. Seibi fu den kownu fu Israèl ben tiri tu yari langa noso moro mendri — son wan ben tiri soso wan tu dei nomo. Wán kownu ben kiri ensrefi, èn sma di ben lobi makti ben kiri siksi fu den kownu èn ben teki a kownusturu nanga tranga. Spesrutu baka a tiri fu Yerobeam II, di ben kaba wan sani fu 804 b.G.T. na a ten di Usia ben e tiri na ini Yuda, Israèl ben lai nanga bruya, ogri di sma ben e du nanga tranga, èn a kiri di sma ben e kiri trawan. Nanga a situwâsi disi na prakseri, Yehovah e seni wan warskow noso „wortu” langalanga gi a noordsei kownukondre nanga mofo fu Yesaya. „Wan wortu ben de, di Yehovah ben seni go gi Yakob, èn a ben fadon na tapu Israèl.”​—Yesaya 9:8. *

Heimemrefasi Nanga Asrantifasi Musu Kisi na Atibron fu Gado

4. Sortu „wortu” Yehovah e seni go gi Israèl, èn fu san ede?

⁴ Sma no sa poti a „wortu” fu Yehovah na wan sei. „A pipel sa sabi dati trutru, iya, den alamala, Efraim nanga den sma di e libi na Samaria, fu a heimemre fasi fu den ede èn fu na asranti fasi fu na ati fu den ede” (Yesaya 9:9). „Yakob”, „Israèl”, „Efraim” nanga „Samaria” e sori alamala go na a noordsei kownukondre Israèl, pe Efraim na a moro prenspari lo èn Samaria na a mamafoto. A wortu di Yehovah abi gi a kownukondre dati na wan krakti krutu fruklari, bika na ati fu Efraim  kon tranga fu a fadon di a fadon komoto na bribi èn sondro lespeki a de asranti nanga Yehovah. Gado no sa kibri a pipel gi den takru bakapisi fu den godelowsu fasi fu den. Gado sa dwengi den fu yere noso fu poti prakseri na a wortu fu en.​—Galasiasma 6:7.

5. Fa den Israèlsma e sori taki den krutu fu Yehovah no abi krakti na den tapu?

⁵ Ala di a situwâsi e go na baka, a pipel e lasi hebi, so srefi den oso fu den — di furutron ben meki fu ston fu tokotoko èn fu bunkopu udu. ¿Na ati fu den e kon safu leki wan bakapisi fu dati? ¿Den sa poti prakseri na den profeiti fu Yehovah èn drai go baka na a tru Gado? * Yesaya e skrifi fa a pipel e handri na wan asranti fasi tapu dati: „Ston fadon, ma nanga ston di den koti wi sa bow. Den fala den Sikomoorbon, ma wi sa poti sedre ini a presi fu den” (Yesaya 9:10). Den Israèlsma e tyalensi Yehovah èn e weigri fu arki den profeiti fu en, di e taigi den fu san ede den e ondrofeni den problema dati. Fu taki en leti, a pipel e taki: ’A kan taki wi e lasi oso di meki fu ston fu tokotoko èn fu bunkopu udu di kan pori, ma wi sa du moro leki fu meki den sani disi di wi lasi kon bun baka, fu di wi sa bow baka nanga moro bun materiaal — ¡ston di den koti èn sedre!’ (Teki gersi Yob 4:19.) A wan-enkri sani di ben tan abra gi Yehovah ben de fu gi den moro trangaleri.​—Teki gersi Yesaya 48:22.

6. Fa Yehovah e meki taki a takru plan di Siria nanga Israèl meki fu feti nanga Yuda no e wroko?

⁶ Yesaya e taki moro fara: „Yehovah sa opo den sma di e gens Resin fu feti nanga en” (Yesaya 9:11a). Kownu Peka fu Israèl nanga Kownu Resin fu Siria e wroko makandra. Den e meki wan takru plan fu wini a tu-lo kownukondre Yuda èn fu poti wan kownu na tapu a kownusturu fu Yehovah na Yerusalem, di e du san den kownu dati wani — wan „manpikin fu Tabe-el” (Yesaya 7:6). Ma a takru plan di den meki no sa waka bun. Resin abi tranga feanti, èn Yehovah sa „opo” den feanti disi fu feti  nanga „en”, Israèl. A wortu „opo” wani taki fu gi den pasi fu feti wan bun feti di sa tyari wan kaba kon na a wrokomakandra nanga den sani di den abi na prakseri.

7, 8. San na a bakapisi gi Israèl taki Asiria wini Siria?

⁷ A wrokomakandra disi e bigin kon na wan kaba te Asiria e kon feti nanga Siria. „A kownu fu Asiria ben hari go na Damaskus [a mamafoto fu Siria] èn ben teki en abra èn a ben tyari a pipel fu en go na ini katibo na Kir, èn a ben kiri Resin” (2 Kownu 16:9). Di Peka lasi a tranga kownu di ben e wroko makandra nanga en, dan a e si taki a takru prakseri di a abi nanga Yuda no man go doro. Fu taki en leti, syatu baka a dede fu Resin, Hosea e kiri Peka srefi, èn baka dati a e teki a kownusturu fu Samaria nanga tranga.​—2 Kownu 15:23-25, 30.

⁸ Now Siria, di ben wroko makandra nanga Israèl fosi, e kon na ondro a makti fu Asiria, a moro prenspari makti na ini a kontren. Yesaya e taki na fesi fa Yehovah sa gebroiki a nyun politiek seti disi: „A [Yehovah] sa sutu faya gi den feanti fu a wan dati [Israèl], Siria fu owstusei èn den Filistiasma fu bakasei, èn den sa nyan Israèl nanga opo mofo. Nanga ala den sani disi na prakseri, na atibron fu en no drai baka, ma a e langa na anu fu en ete” (Yesaya 9:11b, 12). Iya, Siria na a feanti fu Israèl now, èn Israèl musu sreka ensrefi gi a feti di Asiria nanga Siria e kon feti nanga en. Den broko go nanga tranga na ini a kondre. Asiria e meki Hosea, a sma di teki a kownusturu nanga tranga, tron a futuboi fu en, èn a e aksi kefalek furu edemoni. (Wan tu tenti yari na fesi, Asiria ben kisi furu moni fu Kownu Menahem fu Israèl.) ¡Den wortu fu a profeiti Hosea de tru srefisrefi: „Freimdesma nyan a krakti fu en [Efraim]”!​—Hosea 7:9; 2 Kownu 15:19, 20; 17:1-3.

9. Fu san ede wi kan taki dati den Filistiasma e feti „fu bakasei”?

⁹ ¿Yesaya no e taki tu dati den Filistiasma sa broko go nanga tranga na ini a kondre „fu bakasei”? Iya. Bifo a ten fu a kompas di e wroko nanga magneiti, den Hebrewsma ben kon sabi a sei pe den ben musu go fu di den ben luku pe a son e opo. So bun, „owstusei” ben de a fesisei, ala di westsei, a presi na sekanti  pe den Filistiasma ben e tan, ben de „bakasei”. Na „Israèl” di Yesaya 9:12 e taki fu en, kan wani taki Yuda tu na ini a kefal disi, bika den Filistiasma ben broko go nanga tranga na ini Yuda na a ten fu a tiri fu Akas, di e libi na ini a ten fu Peka, èn den e teki wan lo foto nanga fortresi fu Yudea abra èn e go tan na ini den. Neleki Efraim fu noordsei, na so a fiti taki Yuda kisi a strafu disi fu Yehovah, bika a lai tu nanga sma di fadon komoto na bribi.​—2 Kroniki 28:1-4, 18, 19.

Fu na ’Ede te na a Tere’ —Wan Nâsi fu Sma Di E Opo Densrefi Teige Yehovah

10, 11. Sortu strafu Yehovah sa tyari kon tapu Israèl fu di den e tan opo densrefi teige en?

¹⁰ Ala di a noordsei kownukondre e pina fu ala den sani dati — èn ala di den profeiti fu Yehovah e meki sani bekènti na wan krakti fasi — toku a e tan opo ensrefi teige Yehovah. „A pipel srefi no drai kon baka na a Sma di ben naki den, èn den no suku Yehovah fu den legre” (Yesaya 9:13). Fu dati ede a profeiti e taki: „Yehovah sa koti ede nanga tere puru fu Israèl, sproiti nanga warimbo, na ini wán dei. A grani sma nanga a sma di trawan e lespeki srefisrefi, na a ede, èn a profeiti di e gi falsi leri, na a tere. Èn den wan di e tyari a pipel disi, na den wan di e meki den wakawaka; èn den wan di den e tyari, na den wan di bruya.”​—Yesaya 9:14-16.

¹¹ Na „ede” nanga a „sproiti” e prenki „a grani sma nanga a sma di trawan e lespeki srefisrefi” — den fesiman fu a nâsi. A „tere” nanga a „warimbo” e sori go na falsi profeiti di e taki wortu di e plisi den fesiman fu den. Wan Bijbel sabiman e skrifi: „Den e kari den falsi Profeiti a tere, fu di na moreel sei den ben de a moro lagiwan fu a pipel, èn fu di den ben de den hoigri bakaman fu godelowsu tiriman èn ben e horibaka gi den.” Professor Edward J. Young e taki fu den falsi profeiti disi: „Den no ben de fesiman, ma ala di den ben e waka baka pe den fesiman ben e tyari den, den ben e kori sma èn ben e saka densrefi pasa marki èn den ben de leki wan tere fu wan dagu di e seki.”​—Teki gersi 2 Timoteus 4:3.

 Srefi ’Weduwe Nanga Boi Di No Abi Papa’ Na Sma Di E Opo Densrefi Teige Yehovah

12. O dipi krukafasi saka go na ini a libimakandra fu Israèl?

¹² Yehovah na a Sma di e horibaka gi weduwe nanga boi di no abi papa (Exodus 22:22, 23). Toku, yere san Yesaya e taki now: „Yehovah no sa prisiri srefi nanga den yonkuman fu den, èn a no sa abi sari-ati nanga den boi fu den di no abi papa èn nanga den weduwe fu den; bika den alamala na sma di fadon komoto na bribi nanga ogriman èn ibri mofo e taki don sani. Nanga ala den sani disi na prakseri, na atibron fu en no drai baka, ma a e langa na anu fu en ete” (Yesaya 9:17). ¡A fadon di sma fadon komoto na bribi pori ala pisi fu a libimakandra, so srefi den weduwe nanga den boi di no abi papa! Nanga pasensi Yehovah e seni den profeiti fu en go èn a e howpu taki a pipel sa kenki den fasi fu den. Fu eksempre: „Drai kon baka na Yehovah, yu Gado, o Israèl, bika yu naki futu na ini yu fowtu”, na so Hosea e begi (Hosea 14:1). ¡A musu hati a Sma di e horibaka gi weduwe nanga boi di no abi papa, taki a musu tyari a krutu kon srefi na den tapu!

13. San wi kan leri fu a situwâsi na ini a ten fu Yesaya?

¹³ Neleki Yesaya, na so wi e libi na ini muilek ten bifo a dei fu Yehovah kon te a sa krutu den godelowsuwan (2 Timoteus 3:1-5). Fu dati ede a de prenspari trutru taki tru Kresten e tan krin na yeye fasi, na moreel sei èn na frustan sei, awansi na ini sortu situwâsi den de na ini a libi, so taki Gado kan tan feni den bun. Meki ibriwan fu den de na ai fu kibri a matifasi di den abi nanga Yehovah. No meki no wan sma di komoto gowe fu „Babilon a Bigiwan” noiti moro „abi wan prati nanga en na ini den sondu fu en”.​—Openbaring 18:2, 4.

Falsi Anbegi E Meki Ogri Kon Di Sma E Du Nanga Tranga

14, 15. (a) San na den bakapisi fu na anbegi di sma e anbegi ogri yeye? (b) Fu sortu pina di Israèl sa pina doronomo Yesaya e taki na fesi?

¹⁴ Fu taki en leti, falsi anbegi na a anbegi di sma e anbegi ogri  yeye (1 Korentesma 10:20). Soleki fa a ben de fu si bifo a Frudu, dan a krakti di ogri yeye abi tapu sma e meki taki den e du ogri nanga tranga (Genesis 6:11, 12). Fu dati ede a no de wan sani fu fruwondru, taki di Israèl fadon komoto na bribi èn e bigin anbegi den ogri yeye, dan ogri di sma e du nanga tranga èn godelowsufasi e furu a kondre.​—Deuteronomium 32:17; Psalm 106:35-38.

¹⁵ Yesaya e taki nanga wortu di de krin fu frustan, fu a panya di godelowsufasi nanga ogri di sma e du nanga tranga e panya na ini Israèl: „Godelowsufasi kon bron neleki wan faya; a sa bron maka-busibusi nanga takru wiwiri krinkrin. Èn a sa teki faya ini den kapuweri fu a busi, èn den sa tyari go na loktu neleki na opo di smoko e opo go na loktu. Ini na atibron fu Yehovah fu den legre den bron a kondre, èn a pipel sa de leki sani di bron ini a faya. No wan sma no sa sori sari-ati, srefi no na a brada fu en. Èn sma sa koti puru na a reti-anusei èn angri sa  kiri den trutru; èn sma sa nyan na a kruktu-anusei, èn den no sa nyan den bere furu trutru. Ibriwan fu den sa nyan a meti fu en eigi anu, Manase Efraim, nanga Efraim Manase. Makandra den sa feti nanga Yuda. Nanga ala den sani disi na prakseri, na atibron fu en no drai baka, ma a e langa na anu fu en ete.”​—Yesaya 9:18-21.

16. Fa den wortu fu Yesaya 9:18-21 e kon tru?

¹⁶ Neleki wan flam di e panya fu maka-busibusi go na maka-busibusi, na so sma no man tapu ogri di sma e du nanga tranga èn esi-esi a e doro „den kapuweri fu a busi”, èn e meki wan krinkrin busi faya kon fu ogri di sma e du nanga tranga. Sma di e fruklari sani fu Bijbel, Keil nanga Delitzsch, e taki dati na ogri di sma e du nanga tranga na „a pori di sma e pori densrefi na a moro ogri-ati fasi na a ten fu wan bruya borgufeti. Fu di den no ben abi no wan safu firi, meki den ben nyan makandra sondro taki a ben satisferi den.” Kande a lo Efraim nanga a lo Manase poti aparti dyaso bika den de den moro prenspari lo di e teki presi gi a noordsei kownukondre èn, leki bakapikin fu den tu manpikin fu Yosef, den de moro krosibei famiri fu den tin lo. Ma ala di dati de so, toku den e tapu na ogri di den e du nanga tranga pe den e kiri den brada fu den, soso te den e feti nanga Yuda na zuidsei.​—2 Kroniki 28:1-8.

Kruka Krutuman E Miti a Krutuman fu Den

17, 18. Sortu krukafasi de na ini a wet sistema èn na ini a sistema fu tiri fu Israèl?

¹⁷ Baka dati Yehovah e poti na ai fu en di e krutu sma, na tapu kruka krutuman nanga tra heihei-man fu Israèl. Den sma disi e gebroiki a makti fu den na wan fowtu fasi fu di den e fufuru den mofinawan nanga den wan di e pina, di e kon na den fu suku retidu. Yesaya e taki: „¡Helu fu den wan di e meki ordru di e du sma ogri èn den wan di, ala di den e skrifi doronomo, skrifi fu soso problema nomo, fu pusu den mofinawan gowe fu wan  krutu afersi èn fu puru a retidu fu den wan fu a pipel fu mi di e pina, so taki den weduwe kan tron a sani di den fufuru èn so taki den kan fufuru srefi den boi di no abi papa!”​—Yesaya 10:1, 2.

¹⁸ A Wet fu Yehovah e tapu ala fasi fu kruktudu: „Unu no musu du kruktudu te unu e krutu sma. Unu no musu desko den mofinawan, èn unu no musu lobi wan prenspari sma moro leki trawan” (Lefitikus 19:15). Fu di den heihei-man disi no e poti prakseri na a wet dati, dan den e meki den eigi „ordru di e du sma ogri”, so taki den kan meki a sani di de krinkrin a moro ogri-ati sortu fasi fu fufuru sani, de akruderi wet — a teki di den e teki den weiniki gudu fu weduwe èn fu boi di no abi papa. A no de fu taki dati den falsi gado fu Israèl breni gi den kruktudu disi, ma Yehovah no breni gi den sani disi. Now Yehovah e gebroiki Yesaya fu poti en prakseri na den godelowsu krutuman disi.

19, 20. Fa a situwâsi fu den kruka krutuman fu Israèl sa kenki, èn san sa pasa nanga a „glori” fu den?

¹⁹ „San unu sa du na a dei te den e poti prakseri na unu èn na a pori, te a e kon fu farawe? Na suma unu sa lowe go fu kisi yepi, èn pe unu sa libi a glori fu unu, boiti taki sma musu boigi na mindri den strafuman èn taki sma e tan fadon na mindri den wan di den kiri?” (Yesaya 10:3, 4a) Den weduwe nanga den boi di no abi papa no abi eerlijk krutuman na suma den kan go fu aksi fu yepi den. Fu dati ede a fiti srefisrefi taki Yehovah e aksi den kruka krutuman dati fu Israèl na suma den sa go now, taki Yehovah e aksi frantwortu fu den. Iya, heri esi den sa kon sabi taki „a de wan kefalek takru sani fu fadon ini na anu fu a libi Gado”.​—Hebrewsma 10:31.

²⁰ A „glori” fu den godelowsu krutuman disi — a biginen, grani nanga makti di den abi na grontapu èn di e kon fu a gudu nanga a posisi fu den — sa de fu wan syatu pisi ten. Son wan fu den sa tron strafuman di sma e kisi na ini feti èn den ’sa boigi’ noso saka kindi na gron na mindri tra strafuman, ala di sma sa kiri den wan di tan abra fu den godelowsu krutuman  disi èn den dedeskin fu den sa kon tapu nanga den sma di dede na ini feti. A „glori” fu den godelowsu krutuman disi de so srefi a gudu di den kisi na wan fasi di no fiti èn di a feanti sa fufuru.

21. ¿Yehovah no atibron moro nanga Israèl te wi e prakseri den strafu di den kisi?

²¹ Yesaya e tapu a lasti strofe disi nanga wan takru warskow: „Nanga ala den sani disi na prakseri [ala den helu di a nâsi ondrofeni te so fara], na atibron fu en no drai baka, ma a e langa na anu fu en ete” (Yesaya 10:4b). Iya, Yehovah abi moro sani fu taigi Israèl. Yehovah no sa hari na anu fu en di a e langa, kon baka, te leki a e tyari wan lasti pori kon na tapu a noordsei kownukondre di opo densrefi teige en.

Noiti No Meki Tra Sma Kisi Wi Nanga Leitori èn Nanga a Prakseri Di Den E Prakseri Densrefi Nomo

22. San wi kan leri fu den sani di ben pasa nanga Israèl?

²² A wortu di Yehovah ben taki nanga mofo fu Yesaya, ben kon hebi na tapu Israèl èn ’no ben drai kon baka na en sondro bakapisi’ (Yesaya 55:10, 11). Historia e skrifi a sari kaba fu a noordsei kownukondre Israèl, èn wi kan prakseri nomo a pina di den sma di ben libi na ini a kondre ben musu ondrofeni. Neleki fa dati ben feni presi trutru, na so a wortu fu Gado sa kon tru na tapu a disiten seti fu sani, spesrutu na tapu Krestenhèit di fadon komoto na bribi. ¡Fu dati ede a de prenspari srefisrefi taki Kresten no e gi yesi na propaganda di e fruteri lei èn di e taki sani fu gens Gado! Tangi fu a Wortu fu Gado, den koni taktik fu Satan puru kon na doro langa ten kaba, so taki den no abi fu kisi wi, soleki fa a ben pasa nanga a pipel fu Israèl fu owruten (2 Korentesma 2:11). Meki a de so, taki wi alamala noiti no e tapu fu anbegi Yehovah „nanga yeye èn nanga waarheid” (Yohanes 4:24). Na ini a kefal dati, na anu fu en di a e langa, no sa naki den anbegiman fu en, soleki fa a ben du nanga Efraim di ben opo ensrefi teige en; a sa poti den anu fu en lontu den na wan switi fasi, èn a sa yepi den ala di den e waka a pasi di e go na têgo libi na wan paradijs grontapu.​—Yakobus 4:8.

[Futuwortu]

[Aksi fu a tori disi]

[Prenki na tapu bladzijde 139]

Godelowsufasi nanga ogri di sma e du nanga tranga e pasa na ini Israèl leki wan busi faya

 [Prenki na tapu bladzijde 141]

Yehovah sa aksi frantwortu fu den wan di e luru fu du ogri na tra sma