Kapitel Dri

„Meki Wi Poti Afersi Kon Reti”

Yesaya 1:10-31

1, 2. Nanga suma Yehovah e agersi den tiriman nanga a pipel fu Yerusalem nanga Yuda, èn fu san ede disi fiti?

DEN sma di e libi na ini Yerusalem kande wani krin densrefi baka te den yere a krutu di skrifi na Yesaya 1:1-9. Sondro tweifri a ben de so, taki na wan bigimemre fasi den ben sa wani fu sori go na ala den srakti-ofrandi di den e tyari gi Yehovah. Ma vers 10 te go miti vers 15 e gi a piki di Yehovah e gi fu krutu den sortu denki dati na wan krakti fasi. A e bigin: „Yere a wortu fu Yehovah, un ogri-ati tiriman fu Sodom. Poti yesi arki a wet fu wi Gado, un pipel fu Gomora.”​—Yesaya 1:10.

² Gado ben pori Sodom nanga Gomora, no soso fu den lagi seks du fu den, ma so srefi fu a tranga-ati nanga a heimemre fasi fu denki di den ben abi (Genesis 18:20, 21; 19:4, 5, 23-25; Esekièl 16:49, 50). Den sma di ben arki Yesaya musu e skreki srefisrefi fu yere taki Yesaya e teki den gersi den sma fu den foto dati di Gado ben fluku. * Ma Yehovah e si en pipel soleki fa den de, èn Yesaya no e safu a boskopu fu Gado fu „switi den yesi fu den”.​—2 Timoteus 4:3.

3. San Yehovah wani taki te a e taki dati a „weri” fu den srakti-ofrandi fu a pipel, èn fu san ede disi de so?

³ Luku fa Yehovah e denki fu na anbegi di a pipel fu en e anbegi en leki wan plekti nomo. „’Sortu wini mi e kisi fu den furu  srakti-ofrandi fu unu?’, Yehovah e taki. ’Mi weri kaba fu den heri bron-ofrandi fu den manskapu nanga a fatu fu den meti di kisi bun nyanyan; èn mi no prisiri nanga a brudu fu yongu mankaw nanga pikin manskapu nanga bokoboko’” (Yesaya 1:11). A pipel frigiti taki Yehovah no e libi fu den srakti-ofrandi fu den (Psalm 50:8-13). A no abi iniwan sani fanowdu di libisma kande e òfer gi en. So bun, efu a pipel e prakseri taki den e du Yehovah wan bun fu di den e pristeri den ofrandi fu den di den no e du nanga den heri ati, dan den kori den krabuyasi. Yehovah e gebroiki wan krakti fasi fu agersi sani. Den wortu „Mi weri kaba” kan vertaal tu nanga „Mi bere furu pasa marki” noso „Mi nyan tumusi furu”. ¿Yu sabi a firi te yu bere furu srefisrefi nanga nyanyan, taki a si di yu e si moro nyanyan wawan, e meki taki yu e tegu fu en? Yehovah ben firi na a srefi fasi fu den ofrandi dati — ¡a ben tegu fu den krinkrin!

4. Fa Yesaya 1:12 e tyari kon na krin taki a de di a pipel de na a tempel na Yerusalem de fu soso?

⁴ Yehovah e taki moro fara: „Te unu e tan kon fu si mi fesi, dan suma aksi disi fu na anu fu unu, fu trapu den fesi dyari fu mi nanga futu?” (Yesaya 1:12) ¿A no de so, taki Yehovah en eigi wet e aksi a pipel fu ’kon fu si a fesi fu en’, dati wani taki, fu de na en tempel na Yerusalem? (Exodus 34:23, 24) Iya, ma den e kon drape fu di a de wan plekti nomo gi den èn soso fu du sani fu a soifri anbegi leki wan gwenti nomo, sondro soifri firi fu ati. Gi Yehovah, a go di den e go furu leisi na den fesi dyari fu en de a srefi nomo leki ’a trapu di den e trapu a fesi dyari nanga futu’, èn den e du noti moro leki fu skuru a flur safrisafri gowe.

5. San na wan tu fasi fu anbegi fu den Dyu, èn fu san ede den sani disi kon tron „wan hebi” gi Yehovah?

⁵ ¡A no de fu fruwondru taki Yehovah e gebroiki srefi moro krakti wortu now! „No tyari siri-nyanyan ofrandi kon moro di no warti noti. Switismeri-sani — a de wan tegu sani gi mi. Nyun mun nanga sabadei, a kari kon na wán fu wan konmakandra — mi no kan frudrage a gebroiki fu towfru krakti makandra nanga a konmakandra nanga ala en seremonia. Mi sili no wani si den nyun mun fu unu nanga den fesa ten fu unu na ai. Den tron  wan hebi gi mi; mi kon weri fu tyari den” (Yesaya 1:13, 14). Siri-nyanyan ofrandi, switismeri-sani, Sabadei nanga konmakandra nanga ala den seremonia fu den, na alamala pisi fu a Wet fu Gado gi Israèl. Ini a tori fu den „nyun mun”, a Wet e gi a komando nomo taki den musu hori den, ma safrisafri den poti bun gwenti ini a hori di den e hori a fesa (Numeri 10:10; 28:11). Den ben si a nyun mun leki wan alamun sabadei, pe a pipel ben sa tapu fu wroko èn srefi ben sa kon makandra fu kisi leri fu den profeiti nanga den priester (2 Kownu 4:23; Esekièl 46:3; Amos 8:5). A no wan fowtu sani fu hori den sortu fesa dati. A problema de taki den e du den sani disi soso fu sma ai ede. Boiti dati, den Dyu e gebroiki „towfru krakti”, afkodreiwroko, makandra nanga a hori di den e hori a Wet fu Gado leki wan plekti nomo. * Fu dati ede meki na anbegi di den e anbegi Yehovah, na „wan hebi” gi en.

6. Na sortu fasi Yehovah kon „weri”?

⁶ Ma fa Yehovah ben kan firi „weri”? Te yu luku en bun, dan a abi „dinamik krakti pasa marki . . . A no e weri noso en skin no e kon hebi” (Yesaya 40:26, 28). Yehovah e gebroiki wan krin fasi fu agersi sani, so taki wi man frustan den firi fu en. ¿Oiti yu ben tyari wan hebi lai so langa taki yu ben weri pasa marki èn ben wani srefisrefi fu puru a hebi na yu tapu? Dati na fa Yehovah e denki fu na anbegi di a pipel fu en e anbegi en na wan hoigri fasi.

7. Fu san ede Yehovah no e arki den begi fu en pipel moro?

⁷ Now Yehovah e taki fu a moro dipi èn moro persoonlijk fasi fu ala den fasi di sma e anbegi. „Te unu e bradi den mindri-anu fu unu opo, mi e kibri mi ai gi unu. Awansi unu e begi furu, toku mi no e arki; un eigi anu kon furu nanga sma brudu di unu meki fadon” (Yesaya 1:15). A bradi di wan sma e bradi den mindri-anu opo èn a langa di a sma e langa den anu nanga den mindri-anu go na tapusei, na wan fasi fu sori taki a e seni wan tranga  begi go na Gado. A fasi disi no wani taki noti moro gi Yehovah, bika a pipel disi abi anu di furu nanga sma brudu di den meki fadon. Ogri di den e du nanga tranga de na ala sei na ini a kondre. A kwinsi di den e kwinsi den swakiwan, na wan aladei sani. A de wan tegu sani taki a pipel disi di bedrigi en èn di e prakseri densrefi nomo, e begi Yehovah èn e aksi blesi fu en. ¡A no de fu fruwondru dati Yehovah e taki: „Mi no e arki”!

8. Sortu fowtu Krestenhèit e meki na ini a ten disi, èn fa son Kresten e fadon go na ini wan srefi sortu trapu?

⁸ Na ini a ten fu wi, na a srefi fasi Krestenhèit no man kisi a bun-ati fu Gado nanga yepi fu den soso begi fu en di a e taki ibritron baka èn nanga yepi fu den tra relisi „wroko” fu en (Mateus 7:21-23). A de tumusi prenspari taki wi no e fadon go na ini a srefi trapu. Sontron wan Kresten e fadon go na ini a du fu wan seryusu sondu èn baka dati a e rideneri taki efu a e kibri a sani di a e du èn e du moro ini a Kresten gemeente, dan na a wan noso tra fasi, den sani di a e du sa meki a sondu fu en kon bun  baka. Den wroko dati di sma e du leki wan plekti nomo, no e plisi Yehovah. Soso wán fasi de fu dresi a siki di sma e siki na yeye fasi, soleki fa den tra vers fu Yesaya e sori.

A Dresi gi a Siki Di Sma E Siki na Yeye Fasi

9, 10. O prenspari a de fu de krin ini na anbegi di wi e anbegi Yehovah?

⁹ Now Yehovah, a sari-ati Gado, e taki na wan moro switi fasi di e hari sma moro fu arki. „Wasi unsrefi, krin unsrefi, puru a takru fasi fa unu e handri na fesi den ai fu mi, tapu fu du san takru. Leri fu du bun, suku retidu, gi piri-ai na a sma di e kwinsi trawan, gi a boi di no abi papa san a abi reti na tapu, opo taki gi na afersi fu a weduwe” (Yesaya 1:16, 17). Dyaso wi e feni wan grupu fu neigi ordru noso komando. Den fosi fo komando de negatief na a fasi disi, taki den abi fu du nanga a puru fu sondu; den lasti feifi komando na positief sani di sma musu du èn di e meki taki den e kisi a blesi fu Yehovah.

¹⁰ A wasi di sma musu wasi nanga krinfasi, de ala ten wan prenspari pisi fu a soifri anbegi (Exodus 19:10, 11; 30:20; 2 Korentesma 7:1). Ma Yehovah wani taki a krin di sma musu krin go moro dipi, iya, go te na ini na ati fu den anbegiman fu en. San moro prenspari na fu de krin na a sei fu bun gwenti nanga wet èn na yeye sei, èn na fu den sani disi Yehovah e taki. Den fosi tu komando na ini vers 16 no de taki sani taki ete wan tron baka nomo. Wan Hebrew sabiman fu tongo e taki dati a fosi komando, „wasi unsrefi”, e sori go na a fosi sani di wan sma e du fu krin ensrefi, ala di a di fu tu komando, „krin unsrefi”, e sori go na den muiti di wan sma e du doronomo fu tan hori a krinfasi dati.

11. San wi musu du fu feti nanga sondu, èn san noiti wi no musu du?

¹¹ Wi no kan kibri noti gi Yehovah (Yob 34:22; Odo 15:3; Hebrewsma 4:13). So bun, a komando di a gi: „Puru a takru fasi fa unu e handri, na fesi den ai fu mi”, kan wani taki wán sani nomo — fu tapu fu du san takru. Dati wani taki dati wi no musu pruberi fu kibri seryusu sondu, bika efu wi e du dati, dan dati srefi na wan sondu. Odo 28:13 e warskow: „A sma di e tapu den  sondu fu en, sani no sa waka bun gi en, ma a sma di e bekènti den èn e libi den, sa kisi sari-ati.”

12. (a) Fu san ede a prenspari fu „leri fu du bun”? (b) Fa owruman spesrutu kan gebroiki den tirilin fu „suku retidu” èn „gi piri-ai na a sma di e kwinsi trawan”?

¹² Wi kan leri furu fu den positief sani di Yehovah e komanderi na vers 17 fu Yesaya kapitel 1. Luku taki a no e taki „du bun” nomo, ma „leri fu du bun”. Wi musu studeri a Wortu fu Gado nanga wisrefi fu man frustan san bun ini na ai fu Gado èn fu wani du dati. Moro fara Yehovah no e taki „du retidu” nomo, ma „suku retidu”. Srefi owruman di abi furu ondrofeni musu ondrosuku a Wortu fu Gado finifini, so taki den kan feni a yoisti fasi fu handri son muilek afersi. Den abi a frantwortu tu fu „gi piri-ai na a sma di e kwinsi trawan”, soleki fa Yehovah e komanderi moro fara. Den tirilin disi de prenspari gi Kresten skapuman na ini a ten disi, bika den wani kibri na ipi taki den „wolfu di e kwinsi sma” no du den ogri.​—Tori fu den Apostel 20:28-30.

13. Fa wi na ini a ten disi, ben sa kan gebroiki den komando di abi fu du nanga a boi di no abi papa nanga a weduwe?

¹³ Den lasti tu komando abi fu du nanga wan tu fu den sma fu a pipel fu Gado di trawan kan du den ogri moro esi — pikin di no abi papa nanga mama, nanga weduwe. Grontapu wani srefisrefi fu gebroiki den sortu sma disi gi den eigi wini; disi no musu de so na mindri a pipel fu Gado. Lobi-ati owruman e „gi” den boi nanga umapikin na ini a gemeente di no abi papa „san [den] abi reti na tapu”, èn e yepi den fu kisi retidu nanga kibri fu ogri no miti den na ini wan grontapu di wani gebroiki den gi den eigi wini èn pori den. Owruman e „opo taki gi na afersi” fu a weduwe, noso soleki fa a Hebrew wortu kan wani taki tu, „feti” gi en. Fu tru, ala Kresten wani de wan presi fu kibri, fu trowstu èn fu retidu gi den wan na wi mindri di de ini nowtu, bika den warti srefisrefi gi Yehovah.​—Mika 6:8; Yakobus 1:27.

14. Sortu positief boskopu tyari kon na krin na Yesaya 1:16, 17?

¹⁴ ¡Dati na trutru wan krakti èn positief boskopu di Yehovah e tyari kon na krin nanga yepi fu den neigi komando disi! Sontron den wan di e du sondu, e overtoigi densrefi taki den no  man du san reti kwetikweti. Den fasi disi fu denki e meki sma lasi-ati. Boiti dati, den fowtu. Yehovah sabi — èn a wani taki wi musu sabi — taki nanga a yepi fu En, iniwan sondari kan tapu nanga a sondu fasi fu libi fu en, drai en baka gi sondu, èn du san bun na presi fu dati.

Wan Tranga Begi Di Begi na wan Reti Fasi èn na wan Sari-ati Fasi

15. Fa sontron sma e frustan den wortu „meki wi poti afersi kon reti na wi mindri” na wan fowtu fasi, èn san den wortu wani taki trutru?

¹⁵ Now Yehovah e taki na wan moro switi èn sari-ati fasi. „’Un kon now, èn meki wi poti afersi kon reti na wi mindri’, na so Yehovah e taki. ’Awansi den sondu fu unu ben sa de leki redi kloru, toku den sa kon weti neleki snew; awansi den ben sa redi leki redi krosi, den sa tron srefi leki wol’” (Yesaya 1:18). Furutron sma e frustan a kari di de na a bigin fu a kefalek moi vers disi, na wan fowtu fasi. Fu eksempre, The New English Bible e taki: „Meki wi go taki fu a tori” — neleki ala tu sei musu skeki fu meki wan kruderi. ¡Ma dati no de so! Yehovah no abi a fowtu, èn seiker a no abi a fowtu ini a fasi fa a e handri nanga a pipel disi di e opo densrefi teige en èn di e hoigri (Deuteronomium 32:4, 5). A vers no e taki fu wan takimakandra na mindri speri fu meki wan skeki, ma fu wan krutu fu sori san na retidu. A de neleki Yehovah e tyalensi Israèl dyaso fu kon na fesi wan krutu.

16, 17. Fa wi sabi taki Yehovah de klariklari fu gi pardon fu srefi seryusu sondu?

¹⁶ Dati kan de wan prakseri di e meki sma kon frede, ma Yehovah na a Krutuman di abi moro furu sari-ati èn di abi moro furu firi gi sma. A no abi en speri ini a man di a man gi pardon (Psalm 86:5). En wawan kan puru den sondu fu Israèl di de „leki redi kloru” èn meki den kon „weti neleki snew”. No wan muiti di libisma e du, no wan fasi fu wroko di sma e du, no wan srakti-ofrandi noso begi kan puru a flaka fu sondu. Soso a pardon di Yehovah e gi kan wasi sondu puru. Gado e gi a pardon dati ondro a kondisi di a e poti, di wani taki tu dati sma musu abi trutru opregti berow.

 ¹⁷ A tru sani disi de so prenspari, taki Yehovah e taki en ete wan tron leki wan puwema na wan fasi di kenki pikinso — sondu di de leki „redi kloru”, sa tron leki nyun wol di den no gi wan kloru èn di weti. Yehovah wani dati wi musu sabi taki en de trutru a Sma di e gi pardon fu sondu, srefi den sondu di seryusu srefisrefi, so langa a e si taki wi abi opregti berow. Den wan di e feni taki a muilek fu bribi taki disi de so ini a kefal fu den, e du bun fu go prakseri den eksempre soleki di fu Manase. A ben sondu na wan tumusi ogri fasi — yari langa. Toku a ben abi berow èn ben kisi pardon (2 Kroniki 33:9-16). Yehovah wani taki wi alamala, so srefi den wan di du seryusu sondu, sabi taki a no lati tumusi fu „poti afersi kon reti” nanga en.

18. Na fesi sortu bosroiti Yehovah e poti a pipel fu en di opo densrefi teige en?

¹⁸ Yehovah e memre a pipel fu en taki den musu teki wan bosroiti. „Efu unu e sori taki unu wani èn e arki trutru, dan unu sa nyan a bun fu a kondre. Ma efu unu no wani èn e opo unsrefi trutru teige mi, dan den sa kiri unu nanga wan feti-owru; bika Yehovah en eigi mofo taki dati” (Yesaya 1:19, 20). Dyaso Yehovah e poti krakti tapu den fasi fa den e tyari densrefi, èn a e gebroiki wan tra krin fasi fu agersi sani, fu poti krakti tapu san a wani bodoi. A bosroiti di Yuda musu teki na disi: Fu nyan noso meki sma kiri den. Efu den wani arki Yehovah èn gi yesi na en, dan den sa nyan den bun sani di a gron e meki. ¡Ma efu den e tan opo densrefi teige en, dan a feti-owru fu den feanti fu den sa kiri den! Pikinmoro a gersi wan sani di wi no kan frustan taki wan pipel ben sa wani a feti-owru fu den feanti fu den moro leki a sari-ati nanga den bogobogo sani fu wan Gado di e gi pardon. Ma toku dati de so nanga Yerusalem, soleki fa den tra vers fu Yesaya e sori.

Wan Kragisingi Di Abi fu Du Nanga a Lobi Foto

19, 20. (a) Fa Yehovah e tyari a firi di a abi taki den tori en, kon na krin? (b) Na sortu fasi ’regtfardikifasi tan na ini Yerusalem’?

¹⁹ Na Yesaya 1:21-23, wi e si o bigi na ogridu fu Yerusalem de a leisi disi. Now Yesaya e bigin nanga wan puwema di a skrifi  na a fasi fu wan kragisingi nanga yepi fu a santa yeye: „¡Fa a getrow foto tron wan huru-uma! A ben furu nanga retidu; regtfardikifasi srefi ben gwenti fu tan na ini en, ma now kiriman”.​—Yesaya 1:21.

²⁰ ¡A foto Yerusalem fadon trutru! Wan dei a ben de wan getrow wefi, ma now a tron wan huru-uma. San ben kan sori na wan moro krakti fasi san Yehovah firi fu a tori di den tori en èn taki den no meki en fruwakti kon tru? „Regtfardikifasi srefi ben gwenti fu tan na ini” a foto disi. O ten? We, srefi bifo Israèl ben de, na ini den dei fu Abraham, den ben kari a foto disi Salem. Wan man di ben de kownu nanga priester ben tiri a foto. A nen fu en, Mèlkiseidèk, wani taki „Kownu fu Regtfardikifasi”, èn soleki fa a sori, dan a nen ben fiti en bun (Hebrewsma 7:2; Genesis 14:18-20). A ben de so wan 1000 yari baka Mèlkiseidèk, taki Yerusalem ben doro wan heimarki na ondro a kownumakti fu  David nanga Salomo. „Regtfardikifasi srefi ben gwenti fu tan na ini en”, spesrutu te den kownu fu a foto ben poti na eksempre gi a pipel fu di den ben e waka na tapu den pasi fu Yehovah. Ma na ini a ten fu Yesaya, sma e memre den ten dati frafra.

21, 22. San a lun fu doti nanga a biri di moksi nanga watra, wani taki, èn fu san ede a fiti fu taki fu den fesiman fu Yuda na a fasi disi?

²¹ A gersi taki den fesiman na mindri a pipel de wan bigi pisi fu a problema. Yesaya e go doro nanga en kragisingi: „Yu solfru srefi tron a lun fu doti. Yu tarwebiri moksi nanga watra. Den granman fu yu tranga-ede èn den de mati fu den fufuruman. Ibriwan fu den lobi tyuku èn e feti na baka presenti. Den no e meki wan boi di no abi papa kisi san a abi reti na tapu, èn den no e handri srefi a krutu afersi fu wan weduwe” (Yesaya 1:22, 23). Tu krin agersitori di e kon esi baka makandra, e sreka a denki fu den leisiman gi san musu kon baka dati. Na ini en smeti-oso a smeti e puru a lun fu doti fu a solfru di a smèlter èn a e trowe dati gowe. Den granman nanga den krutuman fu Israèl de leki a doti, no leki a solfru. Den musu trowe den gowe. Yu no kan gebroiki den moro neleki biri di moksi nanga watra èn di no e tesi bun moro. ¡A dringi dati fiti nomo fu den trowe en gowe!

²² Vers 23 e sori fu san ede a fiti fu taki fu den fesiman na so wan fasi. A Wet fu Moses ben hei a pipel fu Gado, èn ben poti den aparti fu tra nâsi. A Wet ben du dati, fu eksempre, fu di a ben gi a komando fu kibri pikin di no abi papa nanga mama, nanga weduwe fu ogri no miti den (Exodus 22:22-24). Ma na ini a ten fu Yesaya, a boi di no abi papa no abi furu howpu taki den krutu sani fu a bun fu en. Fu a sei fu a weduwe, a no man kisi wan sma srefi fu luku a krutu afersi fu en, èn no wan sma sa meki muiti fu yepi en kwetikweti. Nôno, den krutuman nanga den fesiman disi abi tumusi furu fu du nanga a suku di den e suku den eigi bun — den e suku tyuku, den e feti na baka presenti èn den de leki patna gi fufuruman, èn soleki fa a sori, dan den e yepi den ogriman ala di den e meki den sma di den e du ogri, e pina. Moro ogri srefi, den abi „tranga-ede”, noso  tranga-ati, ini na ogri fasi fa den e libi. ¡Dati na wan sari situwâsi trutru!

Yehovah Sa Meki En Pipel Kon Soifri

23. San Yehovah e sori fu a fasi fa a e denki fu den sma di e gens en?

²³ Yehovah no sa frudrage fu têgo a fasi dati fa sma e gebroiki makti na wan fowtu fasi. Yesaya e taki moro fara: „Fu dati ede a tru Masra, Yehovah fu den legre, a Maktiwan fu Israèl, e taki: ’¡Aha! Mi sa fri misrefi fu den sma di e gens mi, èn mi sa teki refensi tapu den feanti fu mi’” (Yesaya 1:24). Yehovah e kisi dri titel dyaso di e poti krakti tapu a tirimakti di a abi reti na tapu èn tapu a bigi makti fu en. A wortu „¡Aha!” di a bari taki, kande wani taki dati a sari-ati fu Yehovah moksi now nanga a fasti bosroiti fu en fu du wan sani tapu na atibron fu en. Fu tru, wan reide de fu dati.

24. Sortu fasi fa den e soifri sani Yehovah abi na prakseri gi a pipel fu en?

²⁴ Yehovah en eigi pipel meki densrefi tron den feanti fu en. A fiti dorodoro taki Gado e teki refensi tapu den. Yehovah sa „fri” ensrefi noso hari ensrefi puru fu den. ¿Disi wani taki dati Gado sa figi a pipel di e tyari en nen puru krinkrin fu têgo? Nôno, bika Yehovah e go doro fu taki: „Èn mi wani meki mi anu drai kon baka na yu tapu, èn mi sa smèlter a lun fu doti fu yu leki nanga loog, èn mi sa puru ala den sani fu yu di no bun moro fu gebroiki” (Yesaya 1:25). Now Yehovah e gebroiki a fasi fa den e soifri sani leki wan agersitori. Na ini owruten, furutron wan sma di ben soifri sani ben poti loog, wan sani di de leki zoutzuur, fu yepi prati a doti fu a diri metaal. Na wan srefi sortu fasi, Yehovah, di no e si en pipel leki sma di ogri dorodoro, sa ’strafu den na a yoisti marki’. A sa puru soso den „sani fu [den] di no bun moro fu gebroiki” — den tranga-ede sma di trawan no wani srefisrefi èn di e weigri fu teki leri èn fu gi yesi * (Yeremia 46:28). Nanga den wortu disi, Yesaya abi a grani fu skrifi historia na fesi.

25. (a) Fa Yehovah ben soifri a pipel fu en na ini 607 b.G.T.? (b) O ten Yehovah ben soifri a pipel fu en na ini a ten disi?

 ²⁵ Yehovah ben soifri en pipel trutru fu di a ben puru a lun fu doti fu kruka fesiman nanga tra sma di ben opo densrefi teige en. Na ini 607 b.G.T., langa baka a ten fu Yesaya, den Babilonsma ben pori Yerusalem èn den sma di ben e libi na ini, den ben tyari gowe na ini katibo na Babilon 70 yari langa. Na son fasi disi de a srefi nanga wan sani di Gado ben du langa baka dati. A profeititori na Maleaki 3:1-5, di ben skrifi langa baka a katibo na ini Babilon, ben sori taki Gado ben sa du wan wroko fu soifri sma agen. A ben sori go na a ten te Yehovah Gado ben sa kon na en tempel na yeye fasi makandra nanga en „boskopuman fu a frubontu”, Yesus Krestes. Soleki fa a sori, dan disi ben pasa na a kaba fu a Fosi Grontapufeti. Yehovah ben go ondrosuku ala den sma di ben taki dati den na Kresten èn a ben prati den tru Kresten fu den falsiwan. San ben de a bakapisi?

26-28. (a) Sortu fosi kontru Yesaya 1:26 ben abi? (b) Fa a profeititori disi kon tru na ini a ten fu wi? (c) Fa a profeititori disi ben sa kan abi wini gi owruman na ini a ten disi?

²⁶ Yehovah e piki: „Mi wani tyari krutuman kon baka gi yu leki a fosi leisi, èn raiman gi yu leki na a bigin. Baka dati den sa kari yu: Foto fu Regtfardikifasi, Getrow Foto. Sion srefi sa kisi frulusu nanga yepi fu retidu, èn den wan di drai kon baka fu en, nanga yepi fu regtfardikifasi” (Yesaya 1:26, 27). Yerusalem fu owruten ben ondrofeni wan fosi kontru fu a profeititori disi. Baka di den katiboman ben drai go baka na a lobi foto fu den na ini 537 b.G.T., dan ete wan tron getrow krutuman nanga raiman ben de neleki den wan fu a ten di pasa. Den profeiti Hagai nanga Sakaria, a priester Yosua, a leriman fu Wet, Esra, nanga a granman Serubabel, den alamala ben tiri a getrow fikapisi di ben drai kon baka èn ben sori den fa fu waka na tapu den pasi fu Gado. Ma wan moro prenspari kontru ben feni presi na ini a di fu 20 yarihondro.

²⁷ Na ini 1919, a disiten pipel fu Yehovah ben komoto na ini a pisi ten pe den ben kisi tesi. Den ben kon fri fu a katibo na yeye fasi na ini Babilon a Bigiwan, a grontapumakti fu falsi relisi. A  difrenti na mindri a getrow salfu fikapisi dati nanga den kerki tiriman fu Krestenhèit di fadon komoto na bribi, ben kon de krin fu si. Agen Gado ben blesi en pipel, èn ben ’tyari krutuman nanga raiman kon baka gi den’ — getrow man di e gi a pipel fu Gado rai akruderi a Wortu fu en èn no akruderi den gwenti fu sma. Na ini a ten disi dusundusun fu den man dati de na mindri a „pikin ipi” di e kon moro mendri èn na mindri den milyunmilyun „tra skapu” di de kompe fu den èn di e kon moro furu.​—Lukas 12:32; Yohanes 10:16; Yesaya 32:1, 2; 60:17; 61:3, 4.

²⁸ Owruman e hori na prakseri taki ten na ten den e handri leki „krutuman” na ini a gemeente, so taki den kan hori a gemeente krin na moreel sei èn na yeye sei èn fu poti sma di e du ogri na a reti pasi. Den e broko den ede srefisrefi fu du sani na a fasi fu Gado, èn e waka baka a firi fu retidu di a e sori na wan sari-ati fasi èn na wan balansi fasi. Ma na ini moro furu afersi den e dini leki „raiman”. A no de fu taki dati disi de heri tra fasi leki fu de granman noso ogri-ati tiriman, èn den e du ala muiti fu no sori noiti srefi leki den de „sma di e basi den wan di de a gudu fu Gado”.​—1 Petrus 5:3.

29, 30. (a) San Yehovah e meki bekènti gi den wan di e weigri fu kisi wini fu a fasi fa A e soifri sma? (b) Na sortu fasi a pipel e kon kisi „syen” fu den bon nanga den dyari fu den?

²⁹ Fa a de nanga a „doti” di kari na ini a profeititori fu Yesaya? San e pasa nanga den wan di e weigri fu kisi wini fu a soifri di Gado e soifri sma? Yesaya e taki moro fara: „Èn a fadon fu den sma di opo densrefi teige Gado èn fu den sondari  sa de na a srefi ten, èn den wan di e gowe libi Yehovah, sa kon na a kaba fu den. Bika den sa syen fu den makti bon di unu ben wani srefisrefi, èn unu sa kon fruleigi fu den dyari ede di unu teki” (Yesaya 1:28, 29). Den wan di e opo densrefi teige Yehovah èn e sondu teige En, fu di den e weigri fu poti prakseri na den boskopu fu den profeiti fu en di de leki wan warskow te leki a lati tumusi, trutru e „fadon” èn den e „kon na a kaba fu den”. Dati e pasa na ini 607 b.G.T. Ma san a wani taki te den e taki fu bon nanga dyari disi?

³⁰ Doronomo den Yudeasma abi wan problema nanga na anbegi fu kruktu gado. Furutron bon nanga dyari nanga pikin busi de prenspari ini den lagi du fu den. Fu eksempre, den anbegiman fu Bâ-al nanga en wefi, Astoret, e bribi taki na dreiten den tu gado dede èn den beri. Fu meki den kon na libi èn kon de man nanga wefi baka, so taki a gron kan meki nyanyan baka, dan den anbegiman fu kruktu gado e kon makandra fu du lagi sortu seks na ondro den „santa” bon na ini den pikin busi noso na ini den dyari. Te alen e kon ini a kondre èn a gron e kon fatu, dan den falsi gado e kisi a grani fu dati; den anbegiman fu kruktu gado e firi tranga na ini den kruktu bribi fu den. Ma di Yehovah tyari wan kaba kon krinkrin na den anbegiman fu kruktu gado di e opo densrefi teige en, dan no wan kruktu gado e kibri den. Den sma di e opo densrefi teige Gado, e kon „syen” gi den bon nanga den dyari disi di no abi makti.

31. Nanga sortu sani di de moro takru leki syen, den anbegiman fu kruktu gado e kisi fu du?

³¹ Ma den sma fu Yudea di ben anbegi kruktu gado, e kisi fu du nanga wan moro takru sani leki syen. Yehovah e kenki na agersitori èn now a e agersi na anbegiman fu kruktu gado srefi nanga wan bon. „Unu sa tron leki wan bigi bon di den wiwiri fu en kon drei, èn leki wan dyari di no abi watra” (Yesaya 1:30). Na agersitori disi e fiti ini a faya èn drei weer fu Mindri Owstusei. No wan bon noso dyari kan tan langa sondro fu kisi watra doronomo. Te den prani dati e kon drei, dan spesrutu a makriki fu faya bron den. Fu dati ede na agersitori na vers 31 e kon soleki fa wi ben sa kan fruwakti.

32. (a) Suma na „a tranga man” di den e taki fu en na vers 31? (b) Na sortu fasi a sa tron „drei titei”, sortu „fonku” sa meki taki a e teki faya, èn nanga sortu bakapisi?

 ³² „A tranga man sa tron drei titei fu tru, èn a bakapisi fu en wroko sa tron wan fonku; èn ala tu sa bron na a srefi ten trutru, sondro taki wan sma e kiri a faya” (Yesaya 1:31). Suma na a „tranga man” disi? A Hebrew wortu e tyari a prakseri kon abra fu skin krakti nanga furu gudu. Kande a e sori go na a gudu bakaman fu falsi gado, di e frutrow tumusi tapu ensrefi. Na ini a ten fu Yesaya, neleki na ini a ten fu wi, furu sma e weigri fu teki Yehovah nanga en soifri anbegi. A gersi leki sani e waka bun srefi gi son sma. Ma Yehovah e warskow taki den sma dati sa de leki „drei titei”, grofu titei fu vlas di de so swaki èn so drei taki den e priti ini tu, fu taki en so, soso te den e smeri faya nomo (Krutubakra 16:8, 9). A bakapisi fu a wroko fu na anbegiman fu kruktu gado — awansi na den kruktu gado fu en, den furu gudu fu en, noso awansi san a e anbegi na presi fu Yehovah — sa de leki a „fonku” di e leti a faya. A fonku nanga drei titei sa bron, den sa figi puru, na ini wan faya di no wan sma kan kiri. No wan krakti ini na universum kan bruya den volmaakti krutu fu Yehovah.

33. (a) Fa den warskow di Gado gi fu a krutu di musu kon ete, e sori so srefi a sari-ati fu en? (b) Sortu okasi Yehovah e gi a libisma famiri now, èn fa disi abi krakti tapu ibriwan fu wi?

³³ ¿A lasti boskopu disi e kruderi nanga a boskopu na vers 18 di e taki fu sari-ati èn fu a kisi di sma kan kisi pardon? ¡Kwetikweti! Yehovah meki den futuboi fu en skrifi den warskow dati èn meki den bekènti fu di a abi sari-ati. Fu taki en leti, „a no wani taki wan sma e kisi pori, ma a wani taki ala sma musu abi berow” (2 Petrus 3:9). A de a grani fu ibri tru Kresten na ini a ten disi fu meki den warskow boskopu fu Gado bekènti gi a libisma famiri, so taki sma di abi berow kan kisi wini fu a gi di Gado lobi gi pardon srefisrefi èn so taki den kan libi fu têgo. ¡Disi na switifasi trutru fu a sei fu Yehovah fu gi a libisma famiri wan okasi fu „poti afersi kon reti” nanga en bifo a lati tumusi!

[Futuwortu]

[Aksi fu a tori disi]