Na Anu fu Yehovah E Kon Hei
Kapitel Tutenti Na Wan
Na Anu fu Yehovah E Kon Hei
1. Fu san ede Yesaya abi warderi gi Yehovah?
YESAYA lobi Yehovah trutru èn a e prisiri fu prèise en. A e bari: „O Yehovah, yu na mi Gado. Mi e hei yu, mi e prèise yu nen.” San e yepi a profeiti fu sori warderi gi a Mekiman fu en na so wan bun fasi? Wan prenspari sani na fu di a sabi Yehovah nanga den sani di a e du. Den sani di Yesaya e taki now e tyari a sabi disi kon na krin: „Bika yu du kefalek moi sani, bosroiti di yu teki fu sensi owruten, de getrow èn den de fu frutrow” (Yesaya 25:1). Neleki Yosua di ben libi bifo en, na so Yesaya sabi taki Yehovah de getrow èn taki sma kan frutrow en, èn taki ala den „bosroiti” fu en — den sani di a abi na prakseri — e kon tru.—Yosua 23:14.
2. Sortu bosroiti fu Yehovah Yesaya e meki bekènti now, èn fu sortu sani a e taki kande na ini a bosroiti disi?
2 Den bosroiti fu Yehovah wani taki so srefi den sani di a meki bekènti taki a o krutu den feanti fu Israèl. Yesaya e meki wan fu den krutu disi bekènti now: „Yu meki wan foto tron wan ipi fu ston, èn yu meki wan tranga foto tron wan brokopresi di e broko na pisipisi, èn yu meki wan toren pe freimdesma e tan, no de wan foto moro, di sma no sa bow baka srefi te ten di no skotu” (Yesaya 25:2). San na a foto disi di Yesaya no e kari na a nen? Kande Yesaya e taki fu Ar fu Moab — Moab ben de langa ten kaba wan feanti fu a pipel fu Gado. * Noso kande a e taki fu wan tra foto di moro tranga — Babilon.—Yesaya 15:1; Sefania 2:8, 9.
3. Na sortu fasi den feanti fu Yehovah e gi en glori?
3 San den feanti fu Yehovah sa du te a bosroiti di a teki ini a tori fu a tranga foto fu den e kon tru? „Den wan di de wan tranga pipel, sa gi yu glori; a foto fu den nâsi di e handri na wan ogri-ati fasi, den sa frede yu” (Yesaya 25:3). Wi kan frustan taki den feanti fu na almakti Gado sa frede en. Ma fa den e gi en glori? ¿Den sa libi den falsi gado fu den èn teki a soifri anbegi? ¡Kwetikweti! Na presi fu dati, a de so taki, neleki Farao nanga Nebukadnesar, den e gi Yehovah glori te den musu erken taki a hei krinkrin moro den.—Exodus 10:16, 17; 12:30-33; Danièl 4:37.
4. Sortu „foto fu den nâsi di e handri na wan ogri-ati fasi” de na ini a ten disi, èn fa srefi en musu gi Yehovah glori?
4 Na ini a ten disi, „a foto fu den nâsi di e handri na wan ogri-ati fasi” na „a bigi foto di abi wan kownukondre di e tiri den kownu fu grontapu”, namku, „Babilon a Bigiwan”, a grontapumakti fu falsi relisi (Openbaring 17:5, 18). A moro prenspari pisi fu a grontapumakti disi na Krestenhèit. Fa den relisi fesiman fu Krestenhèit e gi Yehovah glori? Fu di den e erken na wan bita-ati fasi den tumusi moi sani di a du gi den Kotoigi fu en. Spesrutu na ini 1919 di Yehovah ben meki den futuboi fu en wroko fayafaya baka, baka di den ben kon fri fu a de di den ben de na ini katibo na yeye fasi na ini Babilon a Bigiwan, den fesiman disi „ben kon frede èn ben gi glori na a Gado fu hemel”.—Openbaring 11:13. *
5. Fa Yehovah e kibri den wan di e frutrow dorodoro tapu en?
5 Ala di den feanti fu Yehovah e si en leki wan sma di e meki den kon frede, toku a de wan kibripresi gi den safri-atiwan èn gi den wan di abi sakafasi èn di wani dini en. Ogri-ati relisi tiriman nanga politiek tiriman e pruberi ala sani kande fu meki a bribi fu tru anbegiman kon swaki, ma den no man du dati bika den tru anbegiman disi e frutrow dorodoro tapu Yehovah. Te fu kaba, na wan makriki fasi a e meki den sma di e gens en, tan tiri èn a e du dati neleki a ben e tapu a faya son fu a woestijn nanga wan wolku noso ben e tapu a krakti fu wan sibibusi nanga wan skotu.—Leisi Yesaya 25:4, 5.
’Wan Fesa-nyanyan gi Ala Pipel’
6, 7. (a) Sortu fesa-nyanyan Yehovah e prati, èn gi suma? (b) San a fesa-nyanyan di Yesaya e taki na fesi fu dati, e prenki?
6 Leki wan lobi-ati papa, Yehovah no e kibri den pikin fu en wawan meki ogri no miti den, ma a e gi den nyanyan tu, spesrutu na yeye fasi. Baka di a ben fri a pipel fu en na ini 1919, dan a ben sreka wan fesa-nyanyan gi den fu di den ben wini, wan fesa-nyanyan di abi bogobogo nyanyan na yeye fasi: „Yehovah fu den legre trutru sa meki gi ala pipel na tapu a bergi disi, wan fesa-nyanyan fu preti di lai nanga oli, wan fesa-nyanyan fu win di den kibri na tapu a sakasaka, fu preti di lai nanga oli èn di furu nanga bonyo fatu, fu win di den kibri na tapu a sakasaka, di soifri.”—Yesaya 25:6.
7 Yehovah e prati a fesa-nyanyan na tapu a „bergi” fu en. San na a bergi disi? A de „a bergi fu na oso fu Yehovah” pe ala den nâsi e go „na ini a kabapisi fu den dei”. A de a „santa bergi” fu Yehovah, pe den getrow anbegiman fu en no e du ogri èn den no e pori sani (Yesaya 2:2; 11:9). Na tapu a hei presi disi pe sma e anbegi, Yehovah e prati a bogobogo fesa-nyanyan fu en gi getrow sma. Èn den bun sani na yeye fasi di wi e kisi so furu now, e prenki den bun sani na skin fasi di wi sa kisi te a Kownukondre fu Gado e tron a wan-enkri tiri fu a libisma famiri. Na ini a ten dati angri no sa de moro. „Siri-nyanyan sa de bogobogo na grontapu; na tapu na ede fu den bergi sani sa de pasa marki.”—Psalm 72:8, 16.
8, 9. (a) Sortu tu bigi feanti fu a libisma famiri Yehovah sa puru na pasi? Tyari dati kon na krin. (b) San Gado sa du fu puru a syen di de na tapu a pipel fu en?
8 Den wan di e teki prati now na a fesa na yeye fasi di kon fu Gado, abi tumusi moi fruwakti. Arki den sani di Yesaya e taki now. A e teki sondu nanga dede gersi wan „breiwroko” noso „wensre” di e tyokro sma, èn a e taki: „Na tapu a bergi disi [Yehovah] sa swari trutru a fesi fu a wensre di e lontu ala pipel, èn a breiwroko di brei na tapu ala den nâsi. A sa swari dede trutru fu têgo, èn a Soeverein Masra Yehovah trutru sa figi den watra-ai puru fu ala den fesi.”—Yesaya 25:7, 8a.
9 ¡Iya, sondu nanga dede no sa de moro! (Openbaring 21:3, 4) Boiti dati, Yehovah sa puru so srefi a syen di den futuboi fu en frudrage dusundusun yari langa fu di sma lei gi den. „A syen di en pipel e kisi, a sa puru en na heri grontapu, bika Yehovah srefi taki en” (Yesaya 25:8b). Fa dati o feni presi? Yehovah sa puru den sma di e tyari a syen dati kon: dati na Satan nanga a siri fu en (Openbaring 20:1-3). A no de fu fruwondru taki a pipel fu Gado sa kisi a firi fu bari taki: „¡Luku! Disi na wi Gado. Wi howpu tapu en, èn a sa frulusu wi. Disi na Yehovah. Wi howpu tapu en. Meki wi prisiri èn breiti nanga a frulusu di e kon fu en.”—Yesaya 25:9.
A E Lagi den Heimemrewan
10, 11. Na sortu krakti fasi Yehovah sa handri nanga Moab?
10 Yehovah e frulusu den wan fu a pipel fu en di e sori sakafasi. Ma Moab, wan birtikondre fu Israèl, abi bigimemre, èn Yehovah e tegu gi bigimemre (Odo 16:18). Fu dati ede wan bigi syen e wakti Moab. „Na anu fu Yehovah sa kon na tapu a bergi disi, èn sma musu trapu Moab nanga futu na en presi, neleki te sma e trapu wan ipi drei grasi nanga futu na ini wan ipi mest. Èn A musu bradi den anu fu en na Moab mindri, neleki te wan swenman e bradi den anu fu swen, èn a musu lagi a heimemre fasi fu Moab nanga den triki fasi fa den anu fu En e buweigi. Èn a tranga foto, nanga den hei skotu fu yu di e meki sma firi densrefi seiker, a musu trowe go na gron; a musu lagi Moab, èn a musu meki a tuka nanga grontapu, te na ini a doti.”—Yesaya 25:10-12.
11 Na anu fu Yehovah sa „kon” fu kibri en santa bergi. Ma sma o naki den heimemre sma fu Moab, èn den o trapu den, neleki fa sma e trapu en „na tapu wan ipi mest”. Na ini a ten fu Yesaya, sma e trapu drei grasi na ini ipi-ipi pupe fu meti fu kan meki mest; so bun, Yesaya e taki na fesi taki Yehovah sa meki Moab kisi bigi syen, ala di Moab abi hei skotu di gersi leki noti no kan pasa nanga en.
12. Fu san ede na spesrutu ini a tori fu Moab Yehovah e meki a krutu bekènti?
12 Fu san ede na spesrutu ini a tori fu Moab Yehovah e teki a krakti bosroiti dati? Den Moabsma na bakapikin fu Lot, a neef fu Abraham èn wan anbegiman fu Yehovah. Fu dati ede den no de birtisma wawan fu a nâsi di Gado ben meki wan frubontu nanga den, ma den de so srefi famiri. Ala di dati de so, toku den teki falsi gado èn den e sori taki den de wan bigi feanti fu Israèl. Den musu kon na wan ogri kaba. Ini a tori disi, Moab de leki den feanti fu den futuboi fu Yehovah na ini a ten disi. A de spesrutu leki Krestenhèit, di e taki dati a rutu fu den de na ini a fosi yarihondro Kresten gemeente ma di, soleki fa wi ben si kaba, de a moro prenspari pisi fu Babilon a Bigiwan.
Wan Singi fu Frulusu
13, 14. Sortu „tranga foto” a pipel fu Gado abi na ini a ten disi, èn suma e kisi pasi fu go na ini a foto?
13 Fa a de nanga a pipel fu Gado? Fu di den e prisiri taki Yehovah e feni den bun èn a e kibri den, meki den e opo a sten fu den fu singi. „Na a dei dati sma sa singi a singi disi na ini a kondre Yuda: ’Wi abi wan tranga foto. Frulusu srefi a e poti leki skotu èn leki fortresi. Un opo den portu, so taki a regtfardiki nâsi, di e tan tyari ensrefi na wan getrow fasi, kan kon na inisei’” (Yesaya 26:1, 2). Ala di tweifri no de taki den wortu disi ben kon tru na ini owruten, toku den e kon tru na wan krin fasi na ini a ten disi tu. A „regtfardiki nâsi” fu Yehovah, Israèl na yeye fasi, e kisi wan tranga organisâsi di gersi wan foto. ¡Dati na trutru wan sani di e gi den fu prisiri èn di e gi den fu singi!
14 Sortu sma e kon na ini a „foto” disi? A singi e gi a piki: „A fasi fu denki di no e degedege, yu [Gado] sa gi kibri na ini têgo vrede, bika dati meki sma e frutrow tapu yu. Un frutrow tapu Yehovah fu ala ten, bika na ini Yah Yehovah a Klepston de fu ten di no skotu” (Yesaya 26:3, 4). „A fasi fu denki” di Yehovah e horibaka gi, na a wani di sma wani gi yesi na den regtfardiki gronprakseri fu en èn a frutrow di den e frutrow tapu en èn no tapu den seti fu grontapu di abi fu du nanga bisnis, politiek nanga relisi èn di abi furu muiti fu du sani. „Yah Yehovah” na a wan-enkri Klepston di kan meki sma firi densrefi seiker èn di den kan frutrow. Yehovah e kibri den wan di e frutrow dorodoro tapu en èn den e nyan bun fu „têgo vrede”.—Odo 3:5, 6; Filipisma 4:6, 7.
15. Fa sma lagi „a hei foto” na ini a ten disi, èn na sortu fasi „den futu fu a sma di e pina” e trapu en masi?
15 ¡Dati de trutru heri tra fasi leki san e pasa nanga den feanti fu a pipel fu Gado! „A trowe den wan na gron di e libi na tapu a hei presi, a hei foto. A e lagi en, a e lagi en te na grontapu; a e meki en tuka nanga a doti. A futu sa trapu en masi, den futu fu a sma di e pina, den futustap fu den mofinawan” (Yesaya 26:5, 6). Kande Yesaya e taki dyaso agen fu wan „hei foto” na ini Moab, noso kande a abi wan tra foto na prakseri, soleki Babilon, di trutru kon hei fu di a abi heimemre. Awansi fa a no fa, Yehovah teki „a hei foto” abra fu di a kenki a situwâsi, èn den ’mofinawan fu en nanga den sma fu en di e pina’ trapu a foto nanga futu. Na ini a ten disi a profeititori disi e fiti Babilon a Bigiwan bun, spesrutu Krestenhèit. Na ini 1919, a „hei foto” disi ben musu fri a pipel fu Yehovah — wan fadon di ben gi en bigi syen — èn a pipel fu Yehovah fu den sei, teki en na den tapu fu trapu Babilon a Bigiwan di ben hori den na ini katibo fosi (Openbaring 14:8). Fa? Fu di den e meki bekènti na publiki taki Yehovah sa teki refensi tapu en.—Openbaring 8:7-12; 9:14-19.
A E Angri fu Regtfardikifasi èn fu Sma „Memre” Yehovah
16. Sortu moi eksempre Yesaya e gi di abi fu du nanga a gi di wan sma e gi ensrefi na ini a dini fu Gado?
16 Baka a fektori singi disi, dan Yesaya e tyari kon na krin o loyaal a ben dini Gado èn san na den winimarki di a e kisi fu di a e dini a Gado fu regtfardikifasi. (Leisi Yesaya 26:7-9.) A profeiti de wan moi eksempre fu wan sma di e ’howpu tapu Yehovah’ èn di e angri srefisrefi fu a „nen” fu Yehovah èn fu sma „memre” En. Na sortu fasi sma e memre Yehovah? Exodus 3:15 e taki: „Yehovah . . . na mi nen te ten di no skotu, èn disi na a sani fu den kan memre mi, a wán geslakti baka a trawan.” Yesaya lobi a nen fu Yehovah nanga ala sani di abi fu du nanga a nen tu, so srefi den regtfardiki markitiki nanga den fasi fu En. Den wan di e kweki wan srefi sortu lobi gi Yehovah abi a dyaranti taki a sa blesi den.—Psalm 5:8; 25:4, 5; 135:13; Hosea 12:5.
17. Sortu grani den godelowsuwan no sa kisi?
17 Ma a no ala sma lobi Yehovah nanga den hei markitiki fu en. (Leisi Yesaya 26:10.) Srefi efu den godelowsuwan kisi wan kari, den e weigri na wan tranga-ede fasi fu leri regtfardikifasi so taki den kan go na ini „a kondre fu opregtifasi”, a kondre pe den futuboi fu Yehovah, di opregti na moreel sei èn na yeye fasi, e tan. Fu dati ede den godelowsuwan „no sa si a heifasi fu Yehovah”. Den no sa tan na libi fu nyan bun fu den blesi di a libisma famiri sa kisi bogobogo, baka te a nen fu Yehovah kon santa. Srefi na ini a nyun grontapu, te a heri grontapu sa de wan „kondre fu opregtifasi”, son sma no sa du wan sani te Yehovah sori a lobi bun-ati fu en. Den nen fu den wan dati no sa skrifi na ini a buku fu libi.—Yesaya 65:20; Openbaring 20:12, 15.
18. Na sortu fasi son sma na ini a ten fu Yesaya breni fu di den wani dati, èn o ten Yehovah sa dwengi den fu „si” en?
18 „O Yehovah, na anu fu yu kon hei, ma den no e si en. Den sa si en èn sa kisi syen fu a faya di yu abi gi a pipel fu yu. Iya, a faya srefi gi den sma di e gens yu, sa pori den” (Yesaya 26:11). Na ini a ten fu Yesaya, a kon na krin taki na anu fu Yehovah kon hei te Yehovah e kibri a pipel fu en, fu di a e du wan sani nanga den feanti fu den. Ma moro furu fu den no erken dati. Te fu kaba, Yehovah sa dwengi den wan disi, di breni na yeye fasi fu di den wani dati, fu „si” noso erken Yehovah te a faya di a abi fu du sani fayafaya e pori den krinkrin (Sefania 1:18). Baka ten Gado e taigi Esekièl: „Den sa musu sabi taki mi na Yehovah.”—Esekièl 38:23.
„Yehovah Lobi a Sma Di A E Gi Trangaleri”
19, 20. Fu san ede èn fa Yehovah gi a pipel fu en trangaleri, èn suma kisi wini fu a trangaleri dati?
19 Yesaya sabi taki iniwan vrede nanga bun di den kompe-kondreman fu en abi na fu di Yehovah e blesi den. „O Yehovah, yu sa gi wi vrede, bika srefi ala den wroko fu wi, yu du gi wi” (Yesaya 26:12). Ala di Yehovah du dati èn ala di a gi a pipel fu en na okasi fu tron „wan kownukondre fu priester èn wan santa nâsi”, toku Yuda ben abi wan takru èn wan bun historia (Exodus 19:6). Ibritron baka a pipel fu Yuda go anbegi falsi gado. A bakapisi ben de taki ibritron baka den kisi trangaleri. Ma a trangaleri dati na wan buweisi fu a lobi fu Yehovah bika „Yehovah lobi a sma di a e gi trangaleri”.—Hebrewsma 12:6.
20 Furutron Yehovah e gi a pipel fu en trangaleri fu di a e gi tra nâsi, „tra masra”, pasi fu tiri den. (Leisi Yesaya 26:13.) Na ini 607 b.G.T., a e gi den Babilonsma pasi fu tyari den Israèlsma go na ini katibo. ¿Den e kisi wini fu dati? Te wan sma e pina, dan dati no e gi en wini. Ma efu a sma di e pina e leri wan sani fu a sani di e pasa, a abi berow èn a e gi ensrefi na ini a dini fu Yehovah wawan, dan a e kisi wini (Deuteronomium 4:25-31). ¿Iniwan fu den Dyu e sori opregti berow? ¡Iya! Yesaya e taki na ini wan profeititori: „Nanga yepi fu yu wawan wi sa kari a nen fu yu.” Baka te den Dyu komoto na ini katibo na ini 537 b.G.T., dan furutron den musu kisi trangaleri fu tra sondu ede, ma noiti moro den e fadon fu anbegi gado fu ston.
21. San sa pasa nanga den wan di kwinsi a pipel fu Gado?
21 Fa a de nanga den sma di ben hori Yuda na ini katibo? „Fu di den no man du noti na ini dede, meki den no sa opo. Fu dati ede yu poti yu prakseri na den, so taki yu ben sa kan wai den puru èn no ben sa meki sma kari a nen fu den moro” (Yesaya 26:14). Babilon sa pina fu di a ben handri na wan ogri-ati fasi nanga a nâsi di Yehovah teki. Nanga yepi fu den Mediasma nanga den Persiasma, Yehovah sa pori Babilon di abi bigimemre èn a sa fri a pipel fu en di de na ini katibo. Den sa meki taki a bigi foto dati, Babilon, no man du noti, èn pikinmoro a dede. Te fu kaba a no sa de moro.
22. Fa Gado blesi a pipel fu en na ini a ten disi?
22 Na ini a disiten kontru, wan fikapisi fu Israèl na yeye fasi di ben kisi trangaleri, ben kon fri fu Babilon a Bigiwan èn ben du a diniwroko fu Yehovah baka na ini 1919. Salfu Kresten ben kisi krakti baka èn den ben gi densrefi fayafaya na a preikiwroko fu den (Mateus 24:14). Yehovah fu en sei, blesi den meki den gro, èn a e tyari srefi wan bigi ipi fu „tra skapu” kon fu dini makandra nanga den (Yohanes 10:16). „Yu meki a nâsi kon moro bigi; o Yehovah, yu meki a nâsi kon moro bigi; yu gi yusrefi glori. Yu bradi ala den grens fu a kondre te na farawe. O Yehovah, na ini a ten fu banawtu den prakseri yu; den puru na ati fu den kon na doro ini wan safri begi, di den ben kisi trangaleri fu yu.”—Yesaya 26:15, 16.
„Den Sa Opo Baka”
23. (a) Na sortu aparti fasi Yehovah e sori a krakti fu en na ini 537 b.G.T.? (b) Fa Yehovah sori a krakti fu en na a srefi sortu fasi na ini 1919 G.T.?
23 Yesaya e taki baka fu a situwâsi di e wakti Yuda te Yuda de na ini katibo ete na Babilon. A e teki a nâsi gersi wan uma di de fu meki, ma di no man meki a pikin efu wan sma no e yepi en. (Leisi Yesaya 26:17, 18.) A yepi dati e kon na ini 537 b.G.T., èn a pipel fu Yehovah e drai go baka na a mamakondre fu den, ala di den de fayafaya fu bow a tempel baka èn fu meki a tru anbegi kon bun baka. Fu taki en leti, a nâsi opo baka na dede. „Den dedewan fu yu sa libi. Wan dedeskin fu mi — den sa opo baka. ¡Wiki èn meki wan prisiri babari, un sma di e tan na ini a doti! Bika a dow fu yu de leki a dow fu den maluw èn a gron srefi sa trowe den wan di no man du noti na ini dede, soleki fa dati e pasa te wan sma gebore” (Yesaya 26:19). ¡Dati na trutru wan kefalek moi fasi fa Yehovah e sori a krakti fu en! Moro fara, ¡sma ben kan si trutru wan kefalek moi sani di den wortu dati ben kon tru na yeye fasi na ini 1919! (Openbaring 11:7-11) ¡Èn wi e howpu srefisrefi tapu a ten te den wortu disi e kon tru na wan trutru fasi na ini a nyun grontapu èn te den wan di no man du noti na ini dede ’e yere Yesus sten èn e kon na doro’ fu den memre-grebi!—Yohanes 5:28, 29.
24, 25. (a) Fa den Dyu na ini 539 b.G.T. gi yesi kande na a komando fu Yehovah fu go kibri? (b) San den „inisei kamra” wani taki kande na ini a ten disi, èn na sortu fasi wi musu denki fu den wan disi?
24 Ma efu getrow sma wani nyan bun fu den blesi na yeye fasi di Yehovah ben pramisi nanga mofo fu Yesaya, dan den musu gi yesi na den komando fu Yehovah: „Go, mi pipel, go na ini den inisei kamra fu yu, èn tapu den doro na yu baka. Kibri yusrefi gi wán momenti nomo, te leki a krutu di mi e krutu sma pasa gowe. ¡Bika luku! Yehovah e komoto na ini a presi fu en fu aksi a sma di e libi na ini a kondre fu gi frantwortu fu a fowtu di a du, èn fu tru, a kondre sa tyari kon na krin taki a kiri sma èn a no sa kibri den sma moro di a kiri.” (Yesaya 26:20, 21; teki gersi Sefania 1:14.) A pisi disi abi wan fosi kontru kande te den Mediasma nanga den Persiasma e wini Babilon na ini 539 b.G.T., na ondro a tiri fu Kownu Sirus. Soleki fa a Griki historia skrifiman Senofon e taki, dan te Sirus e go na ini Babilon, a e gi ala sma a komando fu tan na ini den oso fu den, bika den srudati fu en di e rèi asi kisi „komando fu kiri ala sma di den feni na dorosei”. Na ini a ten disi, den „inisei kamra” na ini a profeititori disi ben kan abi furu fu du nanga den furu tindusun gemeente fu a pipel fu Yehovah na heri grontapu. Den gemeente dati sa tan prei wan prenspari rol na ini a libi fu wi, srefi te wi pasa na ini „a bigi banawtu” (Openbaring 7:14). ¡A de prenspari srefisrefi taki wi tan denki na wan yoisti fasi fu a gemeente èn taki wi abi demakandra nanga en doronomo!—Hebrewsma 10:24, 25.
25 Dyonsro a kaba sa kon gi a grontapu fu Satan. Wi no sabi ete fa Yehovah sa kibri a pipel fu en na ini a ten dati di e gi frede (Sefania 2:3). Ma wi sabi taki a tan di wi sa tan na libi sa anga fu a bribi di wi abi na ini Yehovah èn fu a de di wi de loyaal èn e gi yesi na en.
26. San na „Lefiatan” na ini a ten fu Yesaya èn na ini a ten fu wi, èn san e pasa nanga a „se bubu” disi?
26 Yesaya e luku go na a ten dati èn e taki na fesi: „Na a dei dati, Yehovah sa gebroiki a feti-owru fu en di tranga, di bigi èn di krakti, fu poti en prakseri na Lefiatan, a sneki di e gratigrati, iya, na Lefiatan, a kronkron sneki, èn a sa kiri a se bubu trutru di de na ini se” (Yesaya 27:1). Na ini a fosi kontru, „Lefiatan” e sori go na den kondre pe Israèl ben panya go, soleki Babilon, Egipti nanga Asiria. Den kondre disi no sa man tapu a pipel fu Yehovah fu drai kon baka na a mamakondre fu den na a yoisti ten. Ma suma na a disiten Lefiatan? A gersi leki a de Satan — „a fosi sneki” — nanga a godelowsu seti fu sani fu en dyaso na grontapu, a wrokosani di a e gebroiki fu feti nanga Israèl na yeye fasi (Openbaring 12:9, 10; 13:14, 16, 17; 18:24). Na ini 1919, „Lefiatan” ben lasi a makti di a ben abi tapu a pipel fu Gado èn heri esi a no sa de moro krinkrin te Yehovah sa „kiri a se bubu trutru”. Na a srefi ten, no wan sani di „Lefiatan” e pruberi fu du kande nanga a pipel fu Yehovah sa abi trutru bun bakapisi.—Yesaya 54:17.
„Wan Droifidyari fu Win Di E Skuma”
27, 28. (a) Nanga sortu sani a droifidyari fu Yehovah furu a heri grontapu? (b) Fa Yehovah e kibri a droifidyari fu en?
27 Yesaya e sori now nanga wan tra singi taki a pipel fu Yehovah di kon fri, abi furu bun bakapisi: „Un singi gi en na a dei dati: ’¡Wan droifidyari fu win di e skuma! Mi, Yehovah, e kibri en. Ibri momenti mi sa gi en watra. So taki no wan sma no e du wan ogri nanga en, meki mi sa kibri en srefi dei nanga neti’” (Yesaya 27:2, 3). Fu tru, a fikapisi fu Israèl na yeye fasi nanga den kompe fu den di e wroko tranga, furu heri grontapu nanga froktu na yeye fasi. ¡Dati na trutru wan sani di e gi den fu hori fesa — fu singi! Ala grani e go na Yehovah, a sma di na wan lobi-ati fasi e sorgu gi a droifidyari fu en.—Teki gersi Yohanes 15:1-8.
28 ¡Fu tru, prisiri kon ini a presi fu na atibron di Yehovah ben atibron na fesi! „Mi ati no e bron. Suma sa gi mi maka-busibusi nanga takru wiwiri na ini a feti? Mi sa trapu na den tapu. Na a srefi ten mi sa sutu faya gi den. Noso, meki a hori a fortresi fu mi steifi; meki a suku vrede nanga mi; meki a suku vrede nanga mi” (Yesaya 27:4, 5). Fu sorgu taki den droifibon fu en e tan meki bogobogo „win di e skuma”, dan Yehovah e masi iniwan krakti di gersi takru wiwiri èn di ben kan pori a droifidyari fu en, èn a e bron den neleki faya. ¡Fu dati ede, no meki no wan sma tyari a tanbun fu a Kresten gemeente kon na ini kefar! Na presi fu dati, meki ala sma ’hori a fortresi fu Yehovah steifi’, èn meki den suku fu Gado feni den bun èn gi den kibri. Te den e du dati, dan den e suku vrede nanga Gado — wan sani di de so prenspari taki Yesaya e taki tu leisi fu en. San na a bakapisi? „Na ini den dei di e kon, Yakob sa kisi rutu, Israèl sa meki bromki èn sa sproiti trutru; èn den sa furu a fatu gron nomo nanga a nyanyan di e gro na tapu” (Yesaya 27:6). * ¡A kontru fu a vers disi na trutru wan kefalek moi buweisi fu a krakti di Yehovah abi! Sensi 1919, salfu Kresten furu grontapu nanga „nyanyan di e gro”, gosontu nyanyan na yeye fasi. A bakapisi de taki milyunmilyun tra skapu di de loyaal kon moksi densrefi nanga den èn makandra den „e du santa diniwroko gi [Gado] . . . dei nanga neti” (Openbaring 7:15). Na mindri wan kruka grontapu, den wan disi e tan hori densrefi nanga prisiri na den hei markitiki fu en. Èn Yehovah e tan blesi den fu di a e meki den gro. ¡Meki a de so, taki wi no e frigiti noiti taki wi abi a bigi grani fu abi wan prati na a „nyanyan di e gro” èn fu prati en nanga trawan fu di wisrefi e bari prèise babari!
[Futuwortu]
^ paragraaf 2 Kande a nen Ar wani taki „Foto”.
^ paragraaf 4 Luku De Openbaring — Haar grootse climax is nabij!, bladzijde 170.
^ paragraaf 28 A boksu tapu bladzijde 285 e taki fu Yesaya 27:7-13.
[Aksi fu a tori disi]
[Faki na tapu bladzijde 285]
„Wan Bigi Tutu” E Meki Fri Bekènti
Na ini 607 b.G.T., den pen fu Yuda e kon moro takru te Yehovah e gi a tranga-ede nâsi fu en trangaleri nanga a naki di A e naki den nanga katibo. (Leisi Yesaya 27:7-11.) A fowtu fu a nâsi bigi tumusi fu meki meti-ofrandi meki den kon bun baka nanga Gado. Fu dati ede, neleki fa wan sma ben sa kan panya skapu noso bokoboko go na ala sei nanga „wan babari di e meki sma skreki” noso neleki fa a ben sa kan ’wai’ wiwiri gowe nanga wan tranga winti, na so Yehovah yagi Israèl puru fu a mamakondre fu den. Baka dati, srefi swaki sma, di den umasma e agersi, man gebroiki den sani di tan abra na ini a kondre.
Ma a ten e doro gi Yehovah fu frulusu a pipel fu en puru den na ini katibo. A e fri den neleki fa wan gronman ben sa kan fri olijf di den bon ben e hori leki strafuman, fu taki en so. „A musu pasa na a dei dati taki Yehovah sa naki a froktu puru, fu a watra fu [na Eufraat] Liba di e lon esi-esi te na a lagipresi fu Egipti pe watra e lon, èn na so sma sa piki unu srefi, a wan baka a trawan, o manpikin fu Israèl. Èn a musu pasa na a dei dati taki den sa blo wan bigi tutu, èn den wan di de fu dede na ini a kondre Asiria èn den wan di den panya go na ini a kondre Egipti, sa kon fu tru èn sa boigi go na gron gi Yehovah na tapu a santa bergi na Yerusalem” (Yesaya 27:12, 13). Baka te Sirus wini na ini 539 b.G.T., dan a e gi wan komando fu fri ala den Dyu na ini a gran kownukondre fu en, so srefi den wan na ini Asiria nanga Egipti (Esra 1:1-4). A de neleki „wan bigi tutu” e bari a prèisesingi fu sori taki a pipel fu Gado kon fri.
[Prenki na tapu bladzijde 275]
„Wan fesa-nyanyan fu preti di lai nanga oli”
[Prenki na tapu bladzijde 277]
Den wan di ben de katiboman fosi, e trapu Babilon na ondro den futu
[Prenki na tapu bladzijde 278]
„Go na ini den inisei kamra fu yu”
