Kapitel Fo

Na Oso fu Yehovah Opo Kon Hei

Yesaya 2:1-5

1, 2. Sortu wortu kerfu na tapu wan skotu na a pren fu den Verenigde Nâsi, èn fu pe den teki den wortu dati?

„DEN sa naki den feti-owru fu den kon tron prugu. Èn den lansri fu den kon tron grasi-nefi: nâsi no sa opo feti-owru teige nâsi. So srefi den no sa leri orloku moro.” Den wortu disi kerfu na tapu wan skotu na a pren fu den Verenigde Nâsi na ini a foto New York. Someni tenti yari langa, sma no ben sabi pe den ben teki den wortu dati. Fu di a marki fu den VN na fu wroko fu tyari vrede kon na heri grontapu, meki a ben makriki fu kon na a bosroiti taki den wortu dati ben kon fu den sma di ben opo den VN na ini 1945.

² Ma na ini 1975, den ben kerfu a nen Yesaya nanga wan beitri na ini a skotu na ondro den wortu dati. Na a ten dati a ben de krin fu si taki den wortu no ben kon fu a ten disi. Fu taki en leti, den wortu ben skrifi leki wan profeititori moro leki 2700 yari pasa kaba na ini san de now a di fu tu kapitel fu a buku Yesaya. Furu dusun yari langa sma di lobi vrede denki dipi fa den sani di Yesaya ben taki na fesi ben sa feni presi èn o ten. Wi no abi fu aksi wisrefi dati moro. Na ini a ten disi wi e si na wi fesi na aparti kontru fu a profeititori disi fu owruten.

3. Suma na den nâsi di e naki den feti-owru fu den kon tron prugu?

³ Suma na den nâsi di e naki den feti-owru fu den kon tron prugu? Wi de seiker taki den no de den disiten politiek nâsi nanga tiri. Te leki now den nâsi disi meki feti-owru, noso fetisani, fu go feti èn fu hori „vrede” nanga yepi fu krakti. ¡Fu taki en leti, ala ten den nâsi abi a gwenti fu naki den prugu kon tron feti-owru! A profeititori fu Yesaya e kon tru ini sma  fu ala nâsi, sma di e anbegi Yehovah, „a Gado fu vrede”.​—Filipisma 4:9.

Den Nâsi Di E Go na a Soifri Anbegi

4, 5. San den fosi vers fu Yesaya kapitel 2 e taki na fesi, èn san e poti krakti tapu a frutrow di wi kan frutrow tapu den wortu dati?

⁴ Yesaya kapitel 2 e bigin nanga den wortu disi: „A sani di Yesaya, a manpikin fu Amos, ben si na ini wan fisyun ini a tori fu Yuda nanga Yerusalem: Èn a musu pasa na ini a kabapisi fu den dei taki a bergi fu na oso fu Yehovah sa poti kon steifi moro hei leki na ede fu den bergi, èn fu tru den sa opo en kon moro hei leki den pikin bergi; èn na en ala den nâsi musu go.”​—Yesaya 2:1, 2.

⁵ Luku taki den sani di Yesaya e taki na fesi no de soso wan sani di a e denki nomo. Yesaya e kisi a komando fu skrifi sani di „musu pasa” — sondro misi. Awansi san Yehovah abi na prakseri, ’fu tru a abi bun bakapisi’ (Yesaya 55:11). Soleki fa a sori, dan fu poti krakti tapu a frutrow di wi kan frutrow tapu a pramisi fu en, Gado ben meki a profeiti Mika, di ben de fu a ten fu Yesaya, skrifi na ini en buku nanga yepi fu a santa yeye a srefi profeititori di skrifi na Yesaya 2:2-4.​—Mika 4:1-3.

6. O ten a profeititori fu Yesaya e kon tru?

⁶ O ten a profeititori fu Yesaya musu kon tru? „Na ini a kabapisi fu den dei.” A New International Version e taki: „Na ini den lasti dei.” Den Kresten Griki Buku fu Bijbel ben taki na fesi fu sani di ben sa sori san na a pisi ten disi. Den sani di ben sa feni presi na ini a pisi ten disi na feti, gronseki, pestsiki, mankeri fu nyanyan èn „muilek ten . . . di tranga fu pasa” * (2 Timoteus 3:1-5; Lukas 21:10, 11). A kontru fu den profeititori dati e gi buweisi pasa marki taki wi e libi „na ini a kabapisi fu den dei”, den lasti dei fu a disiten grontapu  seti. A no de fu taki dati wi ben sa fruwakti fu si taki den sani di Yesaya ben taki na fesi kon tru na ini a ten fu wi.

Wan Bergi Pe Sma Kan Anbegi

7. Fu sortu profeititori di e prenki sani na fesi, Yesaya e taki?

⁷ Nanga wan tu wortu, Yesaya e taki krin fu wan profeititori di e prenki sani na fesi. Wi e si wan hei bergi, èn wan tumusi moi oso, a tempel fu Yehovah, de na en tapu. A bergi disi hei moro den bergi nanga pikin bergi di de na en lontu. Ma a no e gi sma na idea taki wan ogri de fu kon noso a no e meki sma kon frede; a e hari sma. Sma fu ala nâsi e angri fu kren go na a bergi fu na oso fu Yehovah; den e go na a bergi. Disi makriki fu si na ini wi prakseri, ma san a wani taki?

8. (a) Nanga san pikin bergi nanga bergi abi fu du na ini a ten fu Yesaya? (b) San a go di den nâsi e go na „a bergi fu na oso fu Yehovah” e prenki?

⁸ Na ini den dei fu Yesaya, furutron pikin bergi nanga bergi abi fu du nanga anbegi. Fu eksempre, den de presi pe sma e anbegi kruktu gado èn pe den santa presi fu den falsi gado de (Deuteronomium 12:2; Yeremia 3:6). Ma na oso, noso tempel, fu Yehovah e meki na ede fu a Moriabergi na Yerusalem kon moi. Getrow Israèlsma e teki waka go na Yerusalem dri tron wan yari èn den e kren a Moriabergi fu anbegi a tru Gado (Deuteronomium 16:16). So bun, a go di den nâsi e go na „a bergi fu na oso fu Yehovah” e prenki a tyari di furu sma tyari kon na wan na a tru anbegi.

9. San „a bergi fu na oso fu Yehovah” e prenki?

⁹ A no de fu taki dati na ini a ten disi a pipel fu Gado no e kon makandra na wan trutru bergi di abi wan tempel fu ston. Den legre fu Rome ben pori a tempel fu Yehovah na Yerusalem na ini 70 G.T. Boiti dati, na apostel Paulus ben tyari kon na krin taki a tempel na Yerusalem nanga a tabernakel di ben de fosi a tempel dati, ben e prenki wan sani. Den ben prenki wan moro bigi trutru sani di de na yeye fasi, „a tru tenti, di Yehovah ben seti, èn no libisma”  (Hebrewsma 8:2). A tenti dati di de na yeye fasi, na a seti fu anbegi Yehovah di abi en gron tapu a frulusu-ofrandi fu Yesus Krestes (Hebrewsma 9:2-10, 23). Akruderi a sani disi, „a bergi fu na oso fu Yehovah” di Yesaya 2:2 e taki fu dati, e prenki a soifri anbegi fu Yehovah di poti kon hei na ini a ten fu wi. Den wan di e teki a soifri anbegi no e kon makandra na iniwan presi na grontapu; den e kon makandra fu anbegi na ini wánfasi.

A Hei Di a Soifri Anbegi E Kon Hei

10, 11. Na sortu fasi na anbegi fu Yehovah kon hei na ini den dei fu wi?

¹⁰ A profeiti e taki dati „a bergi fu na oso fu Yehovah”, noso soifri anbegi, ben sa „poti kon steifi moro hei leki na  ede fu den bergi” èn „opo . . . kon moro hei leki den pikin bergi”. Langa ten bifo a ten fu Yesaya, Kownu David ben tyari na ark fu a frubontu go na a Sionbergi na Yerusalem, di ben hei 760 meter moro leki a se. Na drape na ark ben tan te leki den ben tyari en go na a tempel di ben kaba bow na tapu a Moriabergi (2 Samuèl 5:7; 6:14-19; 2 Kroniki 3:1; 5:1-10). So bun, na ini a ten fu Yesaya, a santa ark ben kon hei kaba na wan trutru fasi èn den ben poti en na ini a tempel, na wan presi di ben hei moro leki den furu pikin bergi di ben de na en lontu èn di sma ben gebroiki gi falsi anbegi.

¹¹ A no de fu taki dati na yeye fasi, ala ten na anbegi fu Yehovah de moro hei leki den sani di den sma di e dini falsi gado e du tapu a kontren fu relisi. Ma na ini a ten fu wi,  Yehovah hei en anbegi kon te na hemel, moro hei leki ala fasi fu anbegi di no krin, iya, moro hei leki ala „den pikin bergi” nanga „na ede fu den bergi”. Fa so? Moro furu nanga yepi fu a tyari kon na wan fu den wan di wani anbegi en „nanga yeye èn nanga waarheid”.​—Yohanes 4:23.

12. Suma na „den manpikin fu a kownukondre”, èn sortu sani tyari kon na wan?

¹² Krestes Yesus ben taki fu „wan kaba fu wan seti fu sani” leki wan kotiten te den engel ben sa tyari „den manpikin fu a kownukondre” kon na wan — den wan di abi a howpu fu tiri makandra nanga Yesus ini hemel glori (Mateus 13:36-43). Sensi 1919, Yehovah gi „den wan di tan abra” fu den manpikin disi krakti fu teki prati nanga den engel na a kotiwroko (Openbaring 12:17). So bun, na a fosi presi „den manpikin fu a kownukondre”, den salfu brada fu Yesus, na den wan di tyari kon na wan. Baka dati den e teki prati na wan tra wroko fu tyari sma kon na wan.

13. Fa Yehovah blesi a salfu fikapisi?

¹³ Na ini a kotiten disi, Yehovah yepi a salfu fikapisi safrisafri fu frustan en Wortu, Bijbel, èn fu gebroiki en. Disi ben meki taki a soifri anbegi kon hei tu. Ala di ’dungru srefi e tapu grontapu, èn deki dungru den nationaal grupu’, toku den salfuwan „e skèin leki tyariman fu leti” na mindri a libisma famiri, fu di Yehovah krin den èn meki den kon soifri (Yesaya 60:2; Filipisma 2:15). Fu di den wan disi di salfu nanga a santa yeye „furu nanga a soifri sabi fu a wani fu en ini ala koni nanga frustan fu sani na yeye fasi”, meki den e „skèin krin neleki son na ini a kownukondre fu a Tata fu den”.​—Kolosesma 1:9; Mateus 13:43.

14, 15. Sortu sani tyari kon na wan, boiti taki „den manpikin fu a kownukondre” tyari kon na wan, èn fa Hagai ben taki na fesi fu dati?

¹⁴ Boiti dati, tra sma go na „a bergi fu na oso fu Yehovah”. Den wan disi di Yesus kari den „tra skapu” fu en, abi a howpu fu libi fu têgo na wan paradijs grontapu (Yohanes 10:16;  Openbaring 21:3, 4). ¡Bigin nanga den yari baka 1930, dusundusun sma ben kon, baka dati hondrohondro dusun sma ben kon, èn now milyunmilyun sma e kon! Na ini wan fisyun di na apostel Yohanes ben kisi, a e taki fu den leki „wan bigi ipi, di no wan sma ben man teri èn di komoto na ala nâsi nanga lo nanga pipel nanga tongo”.—Openbaring 7:9.

¹⁵ A profeiti Hagai ben taki na fesi taki a bigi ipi disi ben o kon. A ben skrifi: „Disi na san Yehovah fu den legre taki: ’Ete wan leisi — a de wan syatu pisi ten — èn mi e seki hemel nanga grontapu nanga se nanga a drei gron. Èn mi wani seki ala den nâsi, èn den warti sani fu ala den nâsi [den wan di e moksi densrefi na den salfu Kresten ini a soifri anbegi] musu kon na ini; èn mi wani furu na oso disi nanga glori’, na so Yehovah fu den legre taki” (Hagai 2:6, 7). A de di a „bigi ipi” disi di e gro ete, nanga den salfu kompe fu den, de, e hei, iya, e gi glori na a soifri anbegi na ini na oso fu Yehovah. Noiti na fesi den skrifi fu someni sma taki den tyari kon na wan ini na anbegi fu a tru Gado, èn disi e tyari glori kon gi Yehovah nanga a Kownu fu en di a poti na tapu a kownusturu, Yesus Krestes. Kownu Salomo ben skrifi: „Te a pipel furu, dan dati e gi wan kownu glori.”​—Odo 14:28.

Anbegi Kon Hei na ini a Libi fu Sma

16-18. Sortu kenki son sma tyari kon so taki den kan anbegi Yehovah na wan fasi di a feni bun?

¹⁶ A fiti taki Yehovah e kisi ala grani taki a soifri anbegi kon hei na ini a ten fu wi. Toku den wan di e go na en abi a grani fu abi wan prati na a wroko disi. Neleki fa wi musu du muiti fu kren wan bergi, na so wi musu du muiti tu fu kon sabi den regtfardiki markitiki fu Gado èn fu libi akruderi den markitiki dati. Neleki den Kresten na ini a fosi yarihondro, na so den futuboi fu Gado na ini a ten disi gowe libi fasi fu libi nanga du di no e kruderi nanga a tru anbegi.  Huruman, anbegiman fu kruktu gado, sutaman, fufuruman, sma di abi bigi-ai, drunguman nanga tra sma kenki den fasi fu den èn „wasi kon krin” ini na ai fu Gado.​—1 Korentesma 6:9-11.

¹⁷ Wan moi eksempre fu disi na a ondrofenitori fu wan yongu uma di ben skrifi: „Wan ten mi no ben abi no wan howpu. Mi ben e libi ini hurudu èn ben e drungu doronomo. Mi ben abi siki di ben abi fu du nanga seks. Mi ben seri drug tu èn mi no ben broko mi ede nanga no wan sani.” Baka di a ben studeri Bijbel, dan a ben tyari bigi kenki kon, so taki a ben kan libi akruderi den markitiki fu Gado. Now a e taki: „Mi de nanga wan korostu ati, mi abi lespeki gi misrefi, mi abi wan howpu fu a tamara, mi abi wan trutru osofamiri èn a moro bun sani na taki mi abi wan matifasi nanga wi Tata, Yehovah.”

¹⁸ Srefi baka te sma kon ini a posisi taki Yehovah feni den bun, toku den alamala musu tan hei a soifri anbegi fu di den e poti na anbegi disi na a moro prenspari presi na ini a libi fu den. Dusundusun yari pasa kaba, Yehovah ben sori nanga yepi fu Yesaya taki a ben abi a frutrow taki ipi-ipi sma ben sa de na ini a ten disi di de fayafaya fu meki na anbegi di den e anbegi en, de a moro prenspari sani na ini a libi fu den. ¿Yu de wan fu den?

Wan Pipel Di Kisi Leri fu a Pasi fu Yehovah

19, 20. Sortu sani a pipel fu Gado e leri, èn pe?

¹⁹ Yesaya e fruteri wi moro fu den wan di e teki a soifri anbegi na ini a ten disi. A e taki: „Fu tru, furu pipel sa go èn taki: ’Un kon, èn meki wi opo go na a bergi fu Yehovah, na a oso fu a Gado fu Yakob; èn a sa leri wi fu den pasi fu en, èn wi sa waka na tapu den pasi fu en.’ Bika na Sion a wet sa komoto, èn a wortu fu Yehovah sa komoto na Yerusalem.”​—Yesaya 2:3.

²⁰ Yehovah no e meki a pipel fu en wakawaka neleki skapu  di lasi. Nanga yepi fu Bijbel nanga publikâsi di abi den gron tapu Bijbel, a e gi den en „wet” nanga en „wortu”, so taki den kan kon sabi den pasi fu en. A sabi disi e meki taki den man „waka na tapu den pasi fu en”. Den e taki nanga makandra fu den pasi fu Yehovah nanga ati di furu nanga warderi èn akruderi a tiri di Gado e gi. Den e kon makandra na bigi kongres èn ini moro pikin grupu — na den Kownukondre zaal èn na ini den oso fu sma — so taki den kan arki den pasi fu Gado èn kon sabi den (Deuteronomium 31:12, 13). Na so fasi den e waka baka a model fu den fosi Kresten, di ben kon makandra fu gi makandra deki-ati èn so srefi fu gi makandra tranga fu „sori [furu] lobi èn fu du [furu] bun wroko”.​—Hebrewsma 10:24, 25.

21. Na sortu wroko den futuboi fu Yehovah e teki prati?

²¹ Den e gi trawan a kari fu „opo go” na a hei anbegi fu Yehovah Gado. ¡Disi e kruderi heri bun nanga a komando di Yesus ben gi den disipel fu en syatu bifo a ben opo go na hemel! A ben taigi den: „Go fu dati ede, èn meki disipel fu sma fu ala nâsi, èn dopu den na ini a nen fu a Tata èn fu a Manpikin èn fu a santa yeye, èn leri den fu du ala den sani di mi komanderi unu” (Mateus 28:19, 20). Den Kotoigi fu Yehovah e gi yesi èn e go na heri grontapu fu leri sma èn fu meki disipel èn e dopu den, èn Gado e horibaka gi den.

Feti-owru Kon Tron Prugu

22, 23. San Yesaya 2:4 e taki na fesi, èn san wan fesiman fu den VN ben taki fu dati?

²² Now wi e doro na a tra vers, di wan pisi fu en kerfu na tapu a skotu na a pren fu den VN. Yesaya e skrifi: „Fu tru, a sa hori krutu na mindri den nâsi èn a sa poti afersi kon reti ini a tori fu furu pipel. Èn den sa musu naki den feti-owru fu den kon tron prugu èn den lansri fu den kon tron grasi-nefi. Nâsi no sa opo feti-owru fu feti nanga nâsi, so srefi den no sa leri orloku moro.”​—Yesaya 2:4.

 ²³ A ben sa muilek srefisrefi fu man doro dati. Federico Mayor, driktoro-generaal fu a United Nations Educational, Scientific, and Cultural Organization (Organisâsi fu den Verenigde Nâsi Di Abi fu Du Nanga a Gi Di Den E Gi Leri, Sabidensi Nanga Kulturu), ben taki wan leisi: „A gersi taki ala den kefalek takru ogridu fu feti, di wi e si nanga yepi fu aparaat di e meki sma yere sani noso si sani na ini a ten disi, no man tapu a go-na-fesi fu a kefalek bigi fetilegre di den seti èn di de furu yarihondro langa. Den geslakti fu a ten disi abi a wroko di komoto na Bijbel èn di pikinmoro den no man du, fu „naki den feti-owru fu den kon tron prugu” èn fu tyari a kenki kon fu wan firi gi feti — di kweki sensi owruten — kon tron wan firi gi vrede. Efu den man du disi, dan a ben sa de a moro bun èn moro hei sani di sma na heri grontapu ben kan du, èn a moro bun erfenis gi den bakapikin fu wi.”

24, 25. Na ini suma den wortu fu Yesaya e kon tru, èn na sortu fasi?

²⁴ Den nâsi leki grupu noiti no sa man doro a hei marki disi. A de wan marki di den no man doro kwetikweti. Sma di komoto na furu nâsi èn di de na ini wánfasi ini a soifri anbegi, e meki den wortu fu Yesaya kon tru. Yehovah „poti afersi kon reti” na mindri den. A leri a pipel fu en fu libi ini vrede nanga makandra. Fu tru, na wan agersi fasi den naki den „feti-owru  fu den kon tron prugu èn den lansri fu den kon tron grasi-nefi” ini wan grontapu di prati èn di furu nanga strei. Fa?

²⁵ Wán reide na taki den no e teki sei na ini den feti fu den nâsi. Syatu bifo a dede fu Yesus, man di ben abi fetisani ben kon fu hori en. Di Petrus ben gebroiki wan feti-owru fu feti gi en Masra, dan Yesus ben taigi en: „Poti a feti-owru fu yu na en presi baka, bika ala den wan di e teki a feti-owru, sa lasi den libi nanga a feti-owru” (Mateus 26:52). Sensi a ten dati, den sma di e waka na ini den futustap fu Yesus, naki den feti-owru fu den kon tron prugu èn den no e teki fetisani fu kiri tra sma èn den no e horibaka gi feti na tra fasi. Den e „du muiti fu abi vrede nanga ala sma”.​—Hebrewsma 12:14.

A Du Di Wi E Du Muiti fu Kisi den Pasi fu Vrede

26, 27. Fa a pipel fu Gado e „suku vrede èn [e] du muiti fu kisi en”? Gi wan eksempre.

²⁶ A vrede fu a pipel fu Gado e go moro fara leki fu weigri nomo fu teki prati na feti. Ala di den de na ini moro leki 230 kondre èn e teki presi gi someni tongo nanga kulturu, toku den abi vrede nanga makandra. Wi e feni na ini den wan disiten kontru fu den wortu fu Yesus, di ben taigi den disipel fu en na ini a fosi yarihondro: „Nanga disi ala sma sa sabi taki unu na mi disipel, efu unu abi lobi na un mindri” (Yohanes 13:35). Kresten na ini a ten disi na „sma di e tyari vrede kon” (Mateus 5:9, futuwortu). Den e „suku vrede èn [e] du muiti fu kisi en” (1 Petrus 3:11). Yehovah, „a Gado di e gi vrede”, e horibaka gi den.​—Romesma 15:33.

²⁷ Moi eksempre de fu den wan di leri fu de sma di e tyari vrede kon. Wan yonkuman e skrifi fu a fasi fa a ben e libi fosi: „Muilek sani di mi ben ondrofeni ben leri mi fa mi musu feti gi misrefi. A ben meki taki mi kisi ogri-ati èn taki mi ben atibron nanga a libi. Ala ten mi ben de na ini feti. Ibri dei mi ben e feti nanga wan tra pikin fu a birti, sontron  nanga kofu, sontron nanga ston noso batra. Mi ben gro kon tron wan ogri-ati sma.” Ma te fu kaba a ben teki a kari fu go na „a bergi fu na oso fu Yehovah”. A ben leri den pasi fu Gado èn ben tron wan futuboi fu Gado di lobi vrede.

28. San Kresten kan du fu suku vrede?

²⁸ Furu fu den futuboi fu Yehovah no ben du den ogri-ati sani dati fosi. Toku srefi ini pikin sani — fasi fu sori sma switifasi, fasi fu gi sma pardon èn firi gi sma — den e meki muiti fu abi vrede nanga tra sma. Ala di den de onvolmaakti, toku den e meki muiti fu gebroiki a Bijbel rai fu „tan frudrage makandra èn gi makandra pardon na wan fri fasi efu a wan abi wan sani fu kragi fu a trawan”.​—Kolosesma 3:13.

Wan Tamara Pe Vrede Sa De

29, 30. Sortu fruwakti de gi grontapu?

²⁹ Yehovah du wan tumusi moi sani na ini „a kabapisi fu den dei” disi. Komoto fu ala nâsi a tyari sma di wani dini en, kon na wan. A leri den fu waka na tapu den pasi fu en, den pasi fu vrede. Disi na den sma di sa pasa a „bigi banawtu” di e kon, libilibi èn pasa go na ini wan nyun grontapu pe vrede de èn pe feti sa kon na wan kaba fu têgo.​—Openbaring 7:14.

³⁰ Feti-owru — fetisani — no sa de moro. A psalm skrifiman ben skrifi fu a ten dati: „Un kon, luku den wroko fu Yehovah, fa a poti fruwondru sani di pasa, na grontapu. A e meki feti kon na wan kaba te na a moro farawe presi fu grontapu. A e broko a bo èn a e koti a lansri trutru na pisipisi; a e bron den wagi na ini faya” (Psalm 46:8, 9). Nanga a fruwakti dati na prakseri, dan a frumane di Yesaya e gi now fiti na ini a ten disi, neleki fa a ben fiti di a ben skrifi en: „O un sma fu na oso fu Yakob, un kon èn meki wi waka na ini a leti fu Yehovah” (Yesaya 2:5). Iya, meki a leti fu Yehovah skèin na tapu wi pasi now, èn wi sa waka na tapu en pasi fu ala têgo ten.​—Mika 4:5.

[Futuwortu]

[Aksi fu a tori disi]