Kapitel Tutenti Na Siksi

„No wan Sma Di E Libi Drape Sa Taki: ’Mi Siki’”

Yesaya 33:1-24

1. Fu san ede den wortu fu Yesaya 33:24 e gi trowstu?

„TE NANGA now ala den sani di Gado meki e tan geme makandra èn den abi pen makandra.” Na so na apostel Paulus ben taki (Romesma 8:22). Ala di sabidensi tapu a kontren fu datratori e go na fesi, toku siki nanga dede e tan trobi a libisma famiri. ¡Fu dati ede, a pramisi di e tyari a pisi disi fu a profeititori fu Yesaya kon na wan heimarki, moi srefisrefi! Prakseri a ten te „no wan sma di e libi drape sa taki: ’Mi siki’” (Yesaya 33:24). O ten èn fa a pramisi disi sa kon tru?

2, 3. (a) Na sortu fasi a nâsi Israèl siki? (b) Fa Gado e gebroiki Asiria leki a „tiki” fu en fu gi trangaleri?

² Yesaya e skrifi na ini wan ten di a pipel di Gado ben meki wan frubontu nanga den, siki na yeye fasi (Yesaya 1:5, 6). Den sungu go so dipi na ini a fadon di den fadon komoto na bribi èn na ini hurudu, taki den musu kisi hebi trangaleri fu Yehovah Gado. Yehovah e gebroiki Asiria leki a „tiki” fu en fu gi a trangaleri dati (Yesaya 7:17; 10:5, 15). Fosi, den Asiriasma meki a noordsei tin-lo kownukondre Israèl fadon na ini a yari 740 b.G.T. (2 Kownu 17:1-18; 18:9-11). Wan tu yari baka dati, Kownu Sanherib fu Asiria e bigin feti fayafaya nanga a zuidsei kownukondre Yuda (2 Kownu 18:13; Yesaya 36:1). Te a kefalek bigi legre fu Asiria e hari pasa na ini a kondre, dan a gersi leki Yuda no man lon gi a bigi pori dati.

³ Ma Asiria, di e go moro fara leki a komando di a kisi fu gi a pipel fu Gado trangaleri, e feti baka en eigi gridi marki fu  wini grontapu (Yesaya 10:7-11). ¿Yehovah sa gi pasi taki Asiria no sa kisi strafu fu na ogri-ati fasi fa a e handri nanga a pipel fu en? ¿A nâsi sa kon betre fu a siki di a siki na yeye fasi? Na ini Yesaya kapitel 33, wi e leisi den piki di Yehovah e gi tapu den aksi disi.

Fufuru Sani Nanga Tranga fu a Sma Di E Fufuru Sani Nanga Tranga fu Trawan

4, 5. (a) Sortu kenki Asiria sa ondrofeni? (b) San Yesaya e begi gi a pipel fu Yehovah?

⁴ A profeititori e bigin: „¡Helu fu yu di e fufuru sani nanga tranga fu trawan, sondro taki sma e fufuru sani fu yu nanga tranga, èn helu fu yu di e handri na wan feradelek fasi, sondro taki tra sma handri na wan feradelek fasi nanga yu! Na a momenti te yu kaba fufuru sani nanga tranga fu trawan, den sa fufuru den sani fu yu nanga tranga. Na a momenti te yu no e handri na wan feradelek fasi moro, den sa handri na wan feradelek fasi nanga yu” (Yesaya 33:1). Yesaya e taki langalanga nanga Asiria, a nâsi di e fufuru sani nanga tranga fu trawan. A gersi taki sma no man wini a nâsi dati di lobi feti te a de na a heimarki fu en makti. A ’fufuru sani nanga tranga fu trawan, sondro taki sma e fufuru sani fu en nanga tranga’. A pori den foto fu Yuda èn puru srefi den gudu fu na oso fu Yehovah. ¡A gersi taki a e du den sani dati sondro fu a kisi strafu! (2 Kownu 18:14-16; 2 Kroniki 28:21) Ma now a situwâsi sa kenki. „Den sa fufuru den sani fu yu nanga tranga”, na so Yesaya e meki bekènti sondro frede. ¡A profeititori disi e gi trowstu na den getrow sma trutru!

⁵ Na ini a pisi ten dati di e meki sma frede, den loyaal anbegiman fu Yehovah sa musu go na en fu suku yepi. Fu dati ede Yesaya e begi: „O Yehovah, sori wi bun-ati. Tapu yu wi howpu. Tron na anu fu wi [fu gi wi krakti nanga yepi] ibri mamanten, iya, a frulusu fu wi na ini a ten fu banawtu. Pipel lon gowe te den yere a babari fu dyugudyugu. Di yu opo, dan nâsi panya go na ala sei” (Yesaya 33:2, 3). A fiti taki Yesaya e begi dati  Yehovah e frulusu a pipel fu En, soleki fa A du someni leisi kaba na ini a ten di pasa (Psalm 44:3; 68:1). ¡Èn no langa baka te Yesaya taki a begi disi, dan a e taki na fesi san na a piki di Yehovah e gi tapu dati!

6. San sa pasa nanga Asiria, èn fu san ede a sani disi fiti?

⁶ „Sma sa tyari den sani di unu [den Asiriasma] fufuru, kon na wan trutru, neleki te den kakalaka tyari sani kon na wan, neleki ipi-ipi sprenka di e frei kon na tapu wan sma” (Yesaya 33:4). Yuda sabi heri bun sortu takru bakapisi a abi te insekt e broko go na ini wan kondre. Ma disi leisi, na den feanti fu Yuda sa kisi pori. Asiria sa lasi na wan fasi di sa gi en bigi syen. ¡Den srudati fu en sa musu lon gowe èn sa musu libi furu gudu na baka di den ben fufuru, so taki den sma di e libi na ini Yuda kan tyari den gudu dati kon na wan! A e fiti nomo taki sma sa fufuru sani nanga tranga fu Asiria, di sma sabi fu na ogri-ati fasi fu en.​—Yesaya 37:36.

A Disiten Asiriasma

7. (a) Suma na ini a ten disi wi kan teki gersi a nâsi Israèl di siki na yeye fasi? (b) Suma Yehovah sa gebroiki leki a „tiki” fu en fu pori Krestenhèit?

⁷ Fa a profeititori fu Yesaya fiti na ini a ten fu wi? Wi kan teki a nâsi Israèl di siki na yeye fasi, gersi Krestenhèit di no de getrow. Neleki fa Yehovah ben gebroiki Asiria leki wan „tiki” fu strafu Israèl, na so a sa gebroiki wan „tiki” fu strafu Krestenhèit — nanga a tra pisi fu a grontapumakti fu falsi relisi, „Babilon a Bigiwan” (Yesaya 10:5; Openbaring 18:2-8). A „tiki” dati sa de den nâsi di de memre fu den Verenigde Nâsi — wan organisâsi di den e prenki na ini Openbaring leki wan redi-kloru werdri meti, di abi seibi ede nanga tin tutu.​—Openbaring 17:3, 15-17.

8. (a) Suma na ini a ten disi wi kan teki gersi Sanherib? (b) Suma a disiten Sanherib sa gi deki-ati fu feti, èn nanga sortu bakapisi?

⁸ Te a disiten Asiriasma e rigeri na ini a kontren fu falsi relisi,  dan a sa gersi leki sani no man tapu en. Satan Didibri, di abi a fasi fu denki leki di fu Sanherib, sa kisi deki-ati fu bigin feti — no soso nanga organisâsi di fadon komoto na bribi èn di musu kisi strafu, ma so srefi nanga tru Kresten. Milyunmilyun sma komoto na a grontapu fu Satan, di abi so srefi Babilon a Bigiwan na ini. Den e teki a sei fu a Kownukondre fu Yehovah makandra nanga a fikapisi fu den salfu yeye manpikin fu Yehovah. Satan, „a gado fu a seti fu sani disi”, ati e bron fu di tru Kresten e weigri fu gi en grani èn a sa bigin feti fayafaya nanga den (2 Korentesma 4:4; Esekièl 38:10-16). Ala di sondro tweifri a feti disi sa meki sma frede, toku a pipel fu Yehovah no abi fu hari densrefi puru fu frede ede (Yesaya 10:24, 25). Gado e gi den a dyaranti taki a sa de „a frulusu fu [den] na ini a ten fu banawtu”. A sa kon ini a tori èn sa tyari wan pori kon na tapu Satan nanga na ipi fu en (Esekièl 38:18-23). ¡Neleki na ini owruten, na so sma sa fufuru srefi den sani nanga tranga fu den wan di e pruberi fu fufuru den sani fu a pipel fu Gado nanga tranga! (Teki gersi Odo 13:22b.) A nen fu Yehovah sa kon santa, èn sma di pasa a pori sa kisi pai fu di den suku „koni nanga sabi, [nanga] a frede gi Yehovah”.​—Leisi Yesaya 33:5, 6.

Wan Warskow gi Sma Di no Abi Bribi

9. (a) San den „trangaman” nanga den „boskopuman fu vrede” fu Yuda sa du? (b) San na Asiriasma sa du te Yuda du muiti fu meki vrede?

⁹ Ma san sa de a takru kaba gi den sma na ini Yuda di no abi bribi? Yesaya e sori a pori di Asiria de fu tyari kon na den tapu. (Leisi Yesaya 33:7.) Den srudati „trangaman” fu Yuda bari krei fu frede ede fu di Asiria e kon krosibei. „Boskopuman fu vrede”, sma di den seni go fu taki-go-taki-kon fu vrede nanga den Asiriasma di lobi feti, kisi fu du nanga spotu èn nanga bigi syen. Den sa bari krei nanga bigi sari fu a sani di den no man du. (Teki gersi Yeremia 8:15.) Na ogri-ati Asiriasma no sa firi sari gi den. (Leisi Yesaya 33:8, 9.) Sondro fu abi sari-ati a no sa ke nanga den kruderi di a meki nanga den sma di e  libi na ini Yuda (2 Kownu 18:14-16). Na Asiriasma sa „wisiwasi den foto” fu Yuda, fu di a sa si den leki wisiwasi foto èn sa spotu den èn a no sa abi lespeki gi a libi fu libisma. A situwâsi sa de so takru, taki a kondre srefi sa sari, fu taki en na wan agersi fasi. Libanon, Saron, Basan nanga Karmel sa sari tu fu a pori.

10. (a) Fa a sa kon na krin taki den „trangaman” fu Krestenhèit no sa man yepi en? (b) Suma sa kibri trutru Kresten na ini a dei fu banawtu fu Krestenhèit?

¹⁰ Den srefi sortu situwâsi sa kon seiker na ini a ten di no de so fara moro te den nâsi e bigin fu feti nanga relisi. A sa de fu soso fu kakafutu na skin fasi gi den krakti disi di e pori sani, neleki na ini a ten fu Hiskia. Den „trangaman” fu Krestenhèit — den politiekman fu en, den man fu en di e du monitori, nanga tra sma di abi makti — no sa man kon yepi en. Den sa broko den „frubontu” noso kruderi tapu a kontren fu politiek nanga monitori, di meki fu kibri den afersi fu Krestenhèit (Yesaya 28:15-18). Den muiti di den e du fayafaya na wan koni fasi fu no meki a pori kon na den tapu, no sa wroko. Te den sa teki noso pori den gudu fu Krestenhèit nanga den bisnis pe moni poti go na ini, dan sma no sa du bisnis moro. Iniwan sma di e prakseri bun fu Krestenhèit ete, no sa du noti moro leki fu tanapu fara nomo èn sari fu di a no de moro (Openbaring 18:9-19). ¿Yehovah sa wai a tru Krestendom puru makandra nanga a falsiwan? Nôno, bika Yehovah srefi e gi a dyaranti disi: „ ’Now mi sa opo’, Yehovah e taki, ’now mi sa hei misrefi; now mi sa opo misrefi kon hei’” (Yesaya 33:10). Te fu kaba, Yehovah sa kon ini a tori gi getrow sma, soleki Hiskia, èn tapu na Asiriasma fu a no hari go moro fara.​—Psalm 12:5.

11, 12. (a) O ten èn fa den wortu fu Yesaya 33:11-14 e kon tru? (b) Sortu warskow den wortu fu Yehovah e gi, gi a ten disi?

¹¹ A sma di no de getrow no kan fruwakti fu kisi so wan kibri. Yehovah e taki: „Unu kisi bere fu drei grasi, unu sa meki drei grasi. Un eigi yeye di de leki wan faya sa pori unu krinkrin. Èn pipel musu kon tron leki a bron di sma e bron karki.  Neleki maka di sma koti puru, na so sma sa bron den srefi nanga faya. ¡Yere, unu di de farawe, san mi musu du! Èn sabi a makti fu mi, unu di de krosibei. Na ini Sion, den sondari kon frede; beifi kon kisi den wan di fadon komoto na bribi: ’Suma fu wi kan tan wan pisi ten na wan faya di e pori sani krinkrin? Suma fu wi kan tan wan pisi ten na wan bigi faya di e bron sani pori?’” (Yesaya 33:11-14) A de krin taki den wortu disi abi fu du nanga a ten te Yuda e kisi fu du nanga wan tra feanti, Babilon. Baka a dede fu Hiskia, Yuda e drai go baka na den godelowsu fasi fu en. Na ini den wan tu tenti yari baka dati, a situwâsi na ini Yuda e go na baka so kefalek, taki a heri nâsi musu firi a faya fu na atibron fu Gado.​—Deuteronomium 32:22.

¹² A kon na krin taki godelowsu prakseri di trangayesi sma abi èn takru plan di den meki fu wai pasi gi a krutu fu Gado, de noti moro leki drei grasi di sma no man gebroiki. Te yu luku en bun, dan a bigimemre èn a trangayesi fasi fu a nâsi trutru sa meki den sani feni presi di e tyari en go na a pori fu en (Yeremia 52:3-11). Godelowsu sma sa „kon tron leki a bron di sma e bron karki”. Den sa pori krinkrin! Te den trangayesi sma di e libi na ini Yuda e prakseri dipi fu a pori disi di de fu kon, dan den e frede srefisrefi. Den wortu di Yehovah taigi Yuda di no de getrow, e prenki a situwâsi fu den memre fu Krestenhèit na ini a ten disi. Efu den no e poti prakseri na a warskow fu Gado, dan wan takru tamara e wakti den.

„Waka ini Regtfardikifasi Doronomo”

13. Sortu pramisi Yehovah e gi na a sma „di e waka ini regtfardikifasi doronomo”, èn fa a ben kon tru ini a kefal fu Yeremia?

¹³ Kontrari fu dati, Yehovah e taki now: „Wan sma de di e waka ini regtfardikifasi doronomo èn di e taki san reti, di no wani teki onregtfardiki wini di sma kisi na wan bedrigi fasi, di e seki den anu fu en fu no teki tyuku, di e tapu a yesi fu en fu no arki na a kiri di sma e kiri trawan, èn di e tapu den ai fu en so taki a no si san ogri. Na en na a sma di sa tan na den  hei presi srefi; a hei presi fu en pe kefar no de, sa de presi di abi klepston di e tanapu leti-opo pe sma no man go makriki. En eigi brede den sa gi en trutru, èn a no sa mankeri watra” (Yesaya 33:15, 16). Soleki fa na apostel Petrus e taki en baka ten, dan „Yehovah sabi fa fu frulusu sma di gi densrefi na ini a dini fu en, komoto na tesi, ma a e kibri den onregtfardikisma gi a krutudei fu kan koti den puru” (2 Petrus 2:9). Yeremia ben ondrofeni so wan frulusu. Na a ten di Babilon ben lontu a foto, dan sma ben musu „nyan brede di den ben wegi èn [den ben musu nyan] nanga seryusu broko-ede” (Esekièl 4:16). Son umasma ben nyan srefi a meti fu den eigi pikin (Kragisingi 2:20). Ma Yehovah ben sorgu taki Yeremia no ben de na ini kefar.

14. Fa Kresten na ini a ten disi kan tan „waka ini regtfardikifasi doronomo”?

¹⁴ Na a srefi fasi Kresten na ini a ten disi musu „waka ini regtfardikifasi doronomo”, èn hori den markitiki fu Yehovah ala dei (Psalm 15:1-5). Den musu „taki san reti” èn no wani taki lei èn sani di no tru (Odo 3:32). A bedrigi di sma e bedrigi èn a teki di sma e teki tyuku na wan aladei sani kande na ini furu kondre, ma den de wan tegu sani gi wan sma „di e waka ini regtfardikifasi doronomo”. Kresten musu tan abi „wan eerlijk konsensi” tu ini bisnis afersi, èn musu du tranga muiti fu no gebroiki kruka noso bedrigi taktik (Hebrewsma 13:18; 1 Timoteus 6:9, 10). Èn wan sma di ’tapu a yesi fu en fu no arki na a kiri di sma e kiri trawan, èn di tapu den ai fu en so taki a no si san ogri’, sa luku sortu poku èn sortu ontspanning a e teki (Psalm 119:37). Na a krutudei fu en, Yehovah sa kibri èn horibaka gi den anbegiman fu en, di e libi akruderi den markitiki dati.​—Sefania 2:3.

Den E Si a Kownu fu Den

15. Sortu pramisi sa yepi getrow Dyu katiboman fu horidoro?

¹⁵ Now Yesaya e sori wi pikinso fu a tumusi moi sani disi fu a tamara: „Wan kownu na ini en moifasi, na san den ai fu yu sa  si; den sa si wan kondre di de farawe. Yu eigi ati sa taki nanga wan safri sten fu wan sani di e gi frede: ’Pe a sekretarsi de? Pe a sma de di e pai sma moni? Pe a sma de di e teri den toren?’ Yu no sa si no wan pipel di asranti, wan pipel di a tongo fu den dipi tumusi fu sma arki dati, wan tongo di e gagu sondro taki yu man frustan en” (Yesaya 33:17-19). A pramisi di abi fu du nanga a Mesias Kownu nanga en Kownukondre sa yepi getrow Dyu fu horidoro na ini den langa someni tenti yari di den de na ini katibo na Babilon, awansi den kan si a Kownukondre dati fu farawe nomo (Hebrewsma 11:13). Te a tiri fu a Mesias e kon tru te fu kaba, dan sma sa memre frafra na ogri-ati fasi fa den Babilonsma ben tiri. Sma di pasa a feti fu na Asiriasma libilibi sa aksi nanga prisiri: „Pe den ogri-ati amtenari de, di ben meki wi pai belasting, di ben meki wi pai moni èn di ben teki na edemoni fu wi?”​—Yesaya 33:18, Moffatt.

16. Sensi o ten a pipel fu Gado man „si” a Mesias Kownu, èn nanga sortu bakapisi?

¹⁶ Den wortu fu Yesaya e gi a dyaranti taki den Dyu ben sa kon fri fu katibo na ini Babilon. Ma ibri Dyu katiboman sa musu wakti na opobaka so taki a kan nyan bun te a pisi disi fu a profeititori sa kon tru dorodoro. Fa a de nanga den futuboi fu Gado na ini a ten disi? Sensi 1914, a pipel fu Yehovah man „si” a Mesias Kownu, Yesus Krestes, na ini ala en moifasi di de na yeye fasi (Psalm 45:2; 118:22-26). A bakapisi fu dati de, taki den kon fri fu a kwinsi di a godelowsu seti fu Satan e kwinsi den èn komoto na ondro a makti fu a seti dati. Den abi trutru seikerfasi na yeye fasi na ondro Sion, a presi pe a Kownukondre fu Gado de.

17. (a) Sortu pramisi gi ini a tori fu Sion? (b) Fa den pramisi di Yehovah gi ini a tori fu Sion kon tru ini a Mesias Kownukondre èn ini den sma di e horibaka gi a Kownukondre dati na grontapu?

¹⁷ Yesaya e taki moro fara: „¡Luku Sion, a foto pe wi e hori den fesa fu wi! Den eigi ai fu yu sa si Yerusalem leki wan presi pe sma e tan sondro fu abi broko-ede, leki wan tenti di no wan sma sa broko. Noiti sma sa hari den pen fu a tenti fu en  puru, èn sma no sa priti no wan fu den titei fu en na tu pisi. Ma drape a Gran Sma, Yehovah, sa de gi wi wan presi fu liba èn fu bradi kanari. No wan grupu loboto sa waka drape, èn no wan bigi sipi sa koti abra drape” (Yesaya 33:20, 21). Yesaya e gi wi a dyaranti taki sma no kan rutu a Mesias Kownukondre fu Gado puru noso pori en. Boiti dati, a de krin taki getrow sma di e horibaka gi a Kownukondre dati na grontapu na ini a ten disi, e kisi a kibri dati tu. Srefi efu furu sma e kisi hebi tesi, toku den wan di de na ondro a Kownukondre fu Gado e kisi a dyaranti taki no wan muiti di sma du fu pori den leki wan gemeente sa kan abi bun bakapisi (Yesaya 54:17). Yehovah sa kibri a pipel fu en na a fasi fa wan bigi gotro noso kanari e kibri wan foto. ¡Pori e wakti iniwan feanti di e kon fu feti nanga den — srefi wan feanti di tranga leki wan „grupu loboto” noso wan „bigi sipi”!

18. Sortu frantwortu Yehovah e teki?

¹⁸ Ma fu san ede sma di lobi a Kownukondre fu Gado kan abi na overtoigi taki Gado sa kibri den? Yesaya e fruklari: „Yehovah na wi Krutuman, Yehovah na a Sma di e gi wi Wet, Yehovah na wi Kownu; ensrefi sa frulusu wi” (Yesaya 33:22). Yehovah e teki a frantwortu fu kibri èn fu tiri a pipel fu en, di e erken a posisi fu en leki a Moro Hei Soeverein. Den sma disi de klariklari fu saka densrefi na ondro a tiri fu en di de nanga yepi fu a Mesias Kownu fu en. Den e erken taki Yehovah abi a makti no wawan fu meki wet, ma so srefi fu sorgu taki sma e hori densrefi na den. Ma fu di Yehovah lobi regtfardikifasi nanga retidu, meki a tiri fu en, di de nanga yepi fu en Manpikin, no de wan hebi gi den anbegiman fu en. Na presi fu dati, den ’gi densrefi wini’ fu di den e saka densrefi na ondro a makti fu en (Yesaya 48:17). Noiti a no sa gowe libi den loyaalwan fu en.​—Psalm 37:28.

19. San Yesaya e taki fu a man di den feanti fu a getrow pipel fu Yehovah no man du noti?

¹⁹ Yesaya e taigi feanti fu a getrow pipel fu Yehovah: „Den titei fu yu musu anga lusulusu; den no sa hori a mast fu den  steifi leti-opo; den no span wan seiri. Na a ten dati, den sa musu prati srefi bogobogo fu den sani di den fufuru; srefi den malengriwan sa tyari trutru furu sani kon na wan di den fufuru” (Yesaya 33:23). A sa kon na krin taki iniwan feanti di e kon feti nanga Yehovah, no sa man du noti èn no sa man yepi ensrefi. A sa de leki wan fetisipi di den titei fu en lusu, di abi wan mast di e sekiseki èn di no abi seiri. A pori di sa kon tapu den feanti fu Gado sa abi so furu gudu leki bakapisi, taki srefi malengrisma sa man fufuru sani tu. Fu dati ede wi kan abi a frutrow taki nanga yepi fu Kownu Yesus Krestes, Yehovah sa wini den feanti fu en na ini a „bigi banawtu” di e kon.—Openbaring 7:14.

Sma E Kon Betre

20. Na sortu fasi a pipel fu Gado sa kon betre, èn o ten?

²⁰ A pisi disi fu a profeititori fu Yesaya e tapu nanga wan pramisi di e gi deki-ati: „No wan sma di e libi drape sa taki: ’Mi siki.’ Den sma di e libi na ini a kondre sa de den wan di sa kisi pardon fu den fowtu fu den” (Yesaya 33:24). A siki di Yesaya e taki fu en, de na a fosi presi na yeye fasi, bika a abi fu du nanga sondu, noso „fowtu”. Ini a fosi kontru fu den wortu disi, Yehovah e pramisi taki baka te a nâsi kon fri fu katibo na ini Babilon, a sa kon betre na yeye fasi. (Yesaya 35:5, 6; Yeremia 33:6; teki gersi Psalm 103:1-5.) Baka te den Dyu di drai kon baka, kisi pardon fu den sondu di den ben du fosi, dan den sa seti a soifri anbegi baka na ini Yerusalem.

21. Na sortu fasi den anbegiman fu Yehovah na ini a ten disi e kon betre na yeye fasi?

²¹ Ma a profeititori fu Yesaya abi wan disiten kontru. A pipel fu Yehovah na ini a ten disi kon betre tu na yeye fasi. Den kon fri fu falsi leri soleki a dede di a sili no man dede, a Dri-wánfasi nanga helfaya. Den e kisi tiri na moreel sei, di e fri den fu  hurudu èn di e yepi den fu teki bun bosroiti. Èn tangi fu a frulusu-ofrandi fu Yesus Krestes, meki den abi wan krin posisi na fesi Gado èn den abi wan krin konsensi (Kolosesma 1:13, 14; 1 Petrus 2:24; 1 Yohanes 4:10). A fasi disi taki sma kon betre na yeye fasi, abi winimarki na skin sei. Fu eksempre, te Kresten e tan fara fu seks di no de akruderi bun gwenti nanga wet èn no e gebroiki sani di abi fu du nanga tabaka, dan dati e kibri den gi siki di sma e kisi fu trawan nanga yepi fu seks èn gi son kanker sortu.​—1 Korentesma 6:18; 2 Korentesma 7:1.

22, 23. (a) Sortu bigi kontru Yesaya 33:24 sa abi na ini a ten di e kon? (b) San na a fasti bosroiti fu tru anbegiman na ini a ten disi?

²² Boiti dati, baka Armagedon wan moro bigi kontru sa de fu den wortu fu Yesaya 33:24 na ini a nyun grontapu fu Gado. Na ondro a tirimakti fu a Mesias Kownukondre, libisma na ala sei sa kon betre na skin sei èn so srefi den sa kon betre na yeye fasi (Openbaring 21:3, 4). Syatu baka te a seti fu sani fu Satan kisi pori, dan wondru leki den wan di Yesus ben du di a ben de na grontapu, seiker sa feni presi na heri grontapu. ¡Den breniwan sa si, den dofuwan sa yere, den malengriwan sa waka! (Yesaya 35:5, 6) Disi sa meki taki ala sma di pasa a bigi banawtu libilibi kan teki prati na a bigi wroko fu meki grontapu tron wan paradijs.

²³ Baka dati, te na opobaka e bigin, dan wi de seiker taki den wan di sa kon baka na libi, sa opo baka nanga bun gosontu. Ma te Yehovah e gebroiki a waarde fu a frulusu-ofrandi moro nanga moro, dan moro winimarki na skin sei sa de a bakapisi, te leki a libisma famiri kon volmaakti. Dan den regtfardikiwan sa „kon na libi” dorodoro (Openbaring 20:5, 6). Na a ten dati, na yeye fasi èn na skin sei, „no wan sma di e libi drape sa taki: ’Mi siki’”. ¡Dati na trutru wan moi pramisi! ¡Meki a de so, taki ala tru anbegiman na ini a ten disi teki a fasti bosroiti fu de na mindri den wan di sa ondrofeni a kontru fu dati!

[Aksi fu a tori disi]

 [Prenki na tapu bladzijde 344]

Yesaya e begi Yehovah nanga frutrow

 [Prenki na tapu bladzijde 353]

Tangi fu a frulusu-ofrandi, meki a pipel fu Yehovah abi wan krin posisi na en fesi

 [Prenki na tapu bladzijde 354]

Na ini a nyun grontapu, libisma na ala sei sa kon betre na skin sei