Kapitel Tina-aiti

Sani Di Wi Kan Leri fu a De Di Sma No De Getrow

Yesaya 22:1-25

1. Fa a ben sa kan de fu de na ini wan foto fu owruten di feanti e lontu en?

PRAKSERI fa a ben sa de fu de na ini wan foto fu owruten di feanti ben lontu en. A feanti de dorosei fu den skotu — a tranga èn a de sondro sari-ati. Yu sabi taki a meki tra foto fadon kaba. Now a abi a fasti bosroiti fu wini a foto fu yu èn fu fufuru ala sani na ini èn fu didon nanga tranga na den sma di e libi na ini èn fu kiri den. Den legre fu a feanti tranga tumusi fu feti langalanga nanga den; yu kan howpu nomo taki den skotu fu a foto sa hori den na dorosei. Te yu e luku abra den skotu, dan yu kan si den toren di a feanti ben tyari kon fu lontu a foto. Den abi so srefi fetisani fu lontu a foto di man iti bigi ston fu naki den sani broko di e kibri yu. Yu e si den bigi postu fu den di abi isri penti èn di den e gebroiki fu broko skotu nanga portu, nanga den trapu fu den di den e gebroiki fu kren den skotu, den man fu den di e sutu nanga bo nanga den fetiwagi fu den, nanga den ipi srudati fu den. ¡Den sani di yu e si e meki yu frede trutru!

2. O ten feanti e lontu wan foto di Yesaya e taki fu dati na ini kapitel 22?

² Na Yesaya kapitel 22, wi e leisi fu so wan foto di feanti e lontu. Den e lontu Yerusalem. O ten a e feni presi? A muilek fu sori go na iniwan foto di feanti e lontu, pe ala den sani di den taki finifini fu den, e kon tru. A de krin taki wi kan frustan a profeititori moro bun te wi e taki moro furu fu den difrenti leisi di feanti sa lontu Yerusalem, wan warskow gi ala sma gi sani di e wakti den.

3. San den sma di e libi na ini Yerusalem e du te feanti e lontu a foto di Yesaya e taki fu dati?

 ³ San den sma di e libi na ini Yerusalem e du te den e kisi fu du nanga a lontu di a feanti e lontu a foto di Yesaya e taki fu dati? ¿Den e bari kari Yehovah fu frulusu den, leki a pipel di Gado ben meki wan frubontu nanga den? Nôno, den e sori wan fasi fu denki di don srefisrefi, wan srefi fasi fu denki di wi kan feni na ini a ten disi na mindri furu sma di e taki dati den e anbegi Gado.

Wan Foto Di Feanti E Lontu

4. (a) San na „a lagipresi fu a fisyun”, èn fu san ede a abi a nen disi? (b) San na a situwâsi na yeye fasi fu den sma di e libi na ini Yerusalem?

⁴ Na kapitel 21 fu Yesaya, ibriwan fu den dri krutu boskopu ben bigin nanga den wortu: „A boskopu fu warskow” (Yesaya 21:1, 11, 13). Kapitel 22 e bigin na a srefi fasi: „A boskopu fu warskow a lagipresi fu a fisyun: San e pasa nanga yu dan, taki un alamala kren go na tapu den daki?” (Yesaya 22:1) „A lagipresi fu a fisyun” e sori go na Yerusalem. Sma e kari a foto a lagipresi, fu di ala di a hei, toku moro hei bergi e lontu en. A abi fu du nanga „a fisyun” bika na drape Gado e gi furu fisyun èn e tyari furu sani kon na krin. Fu dati ede, den sma di e libi na ini a foto musu poti prakseri na den wortu fu Yehovah. Na  presi fu dati, den weigri fu poti prakseri na en èn fadon go na ini falsi anbegi. A feanti di e lontu a foto, na wan wrokosani di Gado e gebroiki fu krutu a tranga-ede pipel fu en.​—Deuteronomium 28:45, 49, 50, 52.

5. Fu san ede den sma e go na tapu den daki fu den kande?

⁵ Luku taki den sma di e libi na ini Yerusalem ’den alamala kren go na tapu den daki’ fu den oso fu den. Na ini owruten, den daki fu den oso fu Israèl ben plata èn furutron osofamiri ben kon makandra drape. Yesaya no e fruteri fu san ede den e du dati na a okasi disi, ma den wortu fu en e sori taki a no e feni a sani dati bun. Kande den go na den daki fu begi den falsi gado fu den tranga. Den gwenti du disi na ini den yari bifo a pori fu Yerusalem na ini 607 b.G.T.​—Yeremia 19:13; Sefania 1:5.

6. (a) Sortu situwâsi de furu na ini Yerusalem? (b) Fu san ede son sma e breiti pasa marki, ma san e wakti den?

 ⁶ Yesaya e taki moro fara: „Yu ben kon furu nanga bruya, wan foto di e meki furu babari, wan foto di de nanga prisiri. Den wan fu yu di sma kiri, a no den wan di den kiri nanga a feti-owru, èn a no den wan di dede na ini feti” (Yesaya 22:2). Ipi-ipi sma go na a foto, èn a foto de ini bruya. Sma na ini den strati e meki babari èn e frede. Ma son wan e breiti pasa marki, kande fu di den e firi seikerfasi noso fu di den e denki taki a kefar e pasa gowe. * Ma a de wan don sani fu breiti pasa marki na a ten disi. Furu sma na ini a foto o dede na wan moro ogri-ati fasi leki nanga a srapusei fu a feti-owru. Wan foto di feanti e lontu, no man kisi nyanyan fu tra presi. Den maksin na ini a foto e kon leigi moro nanga moro. A dede di sma e  dede fu angri èn a libi di tumusi furu sma e libi na ini wan presi, e meki taki siki e panya go na ala sei. Fu dati ede furu sma na ini Yerusalem sa dede fu angriten èn fu pestsiki ede. Disi e pasa na ini 607 b.G.T. èn na ini 70 G.T.​—2 Kownu 25:3; Kragisingi 4:9, 10. *

7. San den tiriman fu Yerusalem e du te feanti e lontu a foto, èn san e pasa nanga den?

⁷ Sortu tiri den tiriman fu Yerusalem e gi na ini a muilek situwâsi disi? Yesaya e piki: „Ala den ogri-ati tiriman fu yu lowe gowe na a srefi ten. Sma ben teki den leki strafuman sondro taki den ben abi wan bo fanowdu. Ala den wan fu yu di sma ben feni, den ben teki den makandra leki strafuman. Den ben lon gowe farawe” (Yesaya 22:3). ¡Den tiriman nanga den tranga man lon gowe èn a feanti kisi den baka dati! Sondro taki a feanti e span wan bo srefi gi den, a feanti e kisi den èn e tyari den gowe leki strafuman. Disi e feni presi na ini 607 b.G.T. Baka te a feanti broko a skotu fu Yerusalem, dan Kownu Sedekia e lowe gowe na neti nanga den tranga man fu en. A feanti e kon sabi dati, e go na den baka èn e kisi den na a lagipresi fu Yerikow. Den tranga man e panya go na ala sei. A feanti e grabu Sedekia, e breni en, e tai en nanga kopro bui èn e tyari en go na Babilon (2 Kownu 25:2-7). ¡Dati na trutru wan sari bakapisi fu a de di a no de getrow!

A E Lasi-ati fu a Rampu Ede

8. (a) San Yesaya e du te a e yere a profeititori di e taki na fesi fu a rampu di sa kon na tapu Yerusalem? (b) Fa a situwâsi sa de na ini Yerusalem?

⁸ A profeititori disi e naki na ati fu Yesaya srefisrefi. A e taki: „Unu no musu luku mi. Mi sa sori bitafasi ini a krei di mi e krei. Unu no musu wani nomonomo fu trowstu mi fu a fufuru di sma fufuru sani fu na umapikin fu a pipel fu mi nanga  tranga” (Yesaya 22:4). Yesaya ben sari fu a takru bakapisi fu Moab nanga Babilon di a ben taki na fesi fu dati (Yesaya 16:11; 21:3). Now a e lasi-ati moro srefi èn a sari krei fu en e kon moro tranga srefi te a e prakseri a rampu di sa kon na tapu en eigi pipel. A no de fu trowstu srefisrefi. Fu san ede? „Bika a de a dei fu bruya èn fu trapu sani masi èn fu pori sani di a Soeverein Masra, Yehovah fu den legre, abi na ini a lagipresi fu a fisyun. Na drape a sma de di e broko a skotu na pisipisi, èn a babari di e go na a sei fu a bergi” (Yesaya 22:5). Yerusalem sa kon furu nanga takru bruya. Sma sa wakawaka ini frede, sondro fu sabi san den musu du. Te a feanti e bigin broko kon pasa den skotu fu a foto, dan wan „babari di e go na a sei fu a bergi” sa de. ¿Disi wani taki dati den sma di e libi na ini a foto sa bari kari Gado na ini a santa tempel fu en na tapu a Moriabergi? Kande. Ma fu di den no de getrow, dan kande a wani taki nomo taki a bari di den e bari fu frede ede sa de fu yere tu na den bergi di e lontu den.

9. Taki fu a legre di de wan kefar gi Yerusalem.

⁹ Sortu feanti de wan kefar gi Yerusalem? Yesaya e fruteri wi: „Elam srefi teki a peirikokro, ini a fetiwagi fu a sma fu grontapu, nanga asi; èn Kir srefi meki a skelt kon de fu si” (Yesaya 22:6). Den feanti abi ala sani di den abi fanowdu gi a feti. Den abi man di e sutu nanga bo èn di e furu den peirikokro fu den nanga peiri. Fetiman e sreka den skelt fu den gi a feti. Fetiwagi de èn so srefi asi di den leri fu feti. A legre abi so srefi srudati fu Elam na ini, di de na noordsei fu a presi di de a Golf fu Persia now, èn fu Kir, di kande de krosibei na Elam. A kari di den kari den kondre dati e sori fu o fara den sma e kon di e broko go nanga tranga na ini a foto. A e sori tu taki a kan taki Elamsma di e sutu nanga bo de na ini a legre di de wan kefar gi Yerusalem na ini a ten fu Hiskia.

Den E Du Muiti fu Kibri a Foto

10. Sortu sani di e feni presi e sori san o pasa nanga a foto?

¹⁰ Yesaya e taki fu a fasi fa a situwâsi e waka: „A sa pasa taki  a moro bun pisi fu den lagipresi fu yu musu kon furu nanga fetiwagi, èn sondro misi den asi srefi musu go tanapu na a portu, èn sma sa puru a sani di e kibri Yuda” (Yesaya 22:7, 8a). Den lagipresi dorosei fu a foto Yerusalem lai nanga fetiwagi èn nanga asi èn den e seti densrefi fu broko den portu fu a foto. San na „a sani di e kibri Yuda” di a feanti e puru? Kande a de wan portu fu a foto di a teki di a feanti e teki en abra e sori san o pasa nanga den sma di e feti gi a foto. * Te den e puru a sani disi di e kibri a foto, dan a foto opo gi den sma di e kon feti nanga en.

11, 12. Sortu sani den sma di e libi na ini Yerusalem e du fu kibri a foto?

¹¹ Now Yesaya e poti prakseri na a muiti di a pipel e du fu feti gi densrefi. ¡A fosi sani di den e prakseri na — fetisani! „Na a dei dati yu sa luku a maksin fu fetisani fu na oso fu a busi, èn unu sa si trutru den olo srefi fu a skotu fu a Foto fu David, bika den sa de furu trutru. Èn unu sa tyari den watra fu a watra-olo di de na ondrosei kon na wan” (Yesaya 22:8b, 9). Den fetisani poti na ini a maksin fu fetisani fu na oso fu a busi. Salomo ben bow a maksin disi fu fetisani. Fu di a ben bow a maksin nanga sedre fu Libanon, meki sma ben sabi en leki „na Oso fu a Busi fu Libanon” (1 Kownu 7:2-5). Den e ondrosuku den olo di de na a skotu. Den e tyari watra kon na wan — wan prenspari marki fu kibri densrefi. Den sma abi watra fanowdu fu libi. Sondro dati, wan foto no kan tan tanapu. Ma luku taki Yesaya no e taki noti dati den e frutrow tapu Yehovah fu frulusu den. Na presi fu dati, den e frutrow tapu den eigi gudu. ¡Meki a de so, taki noiti wi no e meki a fowtu dati!​—Psalm 127:1.

¹² San den kan du nanga den olo dati di de na a skotu fu a foto? „Den oso fu Yerusalem unu sa teri trutru. Unu sa broko den oso tu fu meki taki sma no man doro a skotu” (Yesaya 22:10). Den e ondrosuku den oso fu si sortuwan den ben sa  kan broko puru, so taki den kan abi materiaal fu meki den olo kon bun baka. Den e du a muiti disi fu tapu a feanti fu no teki a skotu abra krinkrin.

Wan Pipel Di no Abi Bribi

13. Fa a pipel e pruberi fu sorgu taki watra de, ma suma den e frigiti?

¹³ „Wan beki sa de pe sma e tyari watra kon na wan, di unu musu meki na mindri den tu skotu gi den watra fu na owru watra-olo. Èn unu no sa luku a bigi mekiman fu en kwetikweti, èn unu no sa si a sma kwetikweti di langa ten pasa kaba meki en” (Yesaya 22:11). Den muiti di den e du fu tyari watra kon na wan, èn di Yesaya e taki fu dati dyaso èn na vers 9, e memre wi na a sani di Kownu Hiskia ben du fu kibri a foto gi den Asiriasma di ben broko go nanga tranga na ini a foto (2 Kroniki 32:2-5). Ma den sma fu a foto na ini a profeititori disi fu Yesaya, no abi bribi kwetikweti. Te den e wroko na a sani di e kibri a foto, dan den no e poti prakseri na a Mekiman, tra fasi leki Hiskia.

14. Na sortu don fasi a pipel e tyari ensrefi, ala di Yehovah e gi den a boskopu di abi wan warskow na ini?

¹⁴ Yesaya e taki moro fara: „A Soeverein Masra, Yehovah fu den legre, sa kari sma na a dei dati fu krei èn fu sari èn fu krebi na ede èn fu tai a mindribere nanga saka. ¡Ma luku! sma e prisiri èn e breiti, sma e kiri kaw èn sma e srakti skapu, sma e nyan meti èn sma e dringi win: ’Meki wi nyan èn dringi, bika tamara wi o dede’” (Yesaya 22:12, 13). Den sma di e libi na ini Yerusalem no e sori taki den abi konsensi-fonfon fu na opo di den e opo densrefi teige Yehovah. Den no e krei, e koti den wiwiri noso e weri saka leki wan marki fu sori taki den abi berow. Efu den ben du dati, dan kande Yehovah ben sa kibri den gi den takru sani di ben o kon. Na presi fu dati den e gi densrefi na prisiri fu a skin. A srefi fasi fu denki de na ini a ten disi na mindri furu sma di no e bribi na ini Gado. Fu di den no abi no wan howpu — no fu wan opobaka na dede noso fu libi na ini a Paradijs grontapu na ini a ten di e kon — meki den  e feti na baka wan libi pe den e satisferi den lostu fu den, èn den e taki: „Meki wi nyan èn dringi, bika tamara wi o dede” (1 Korentesma 15:32). ¡Den no e denki go moro fara srefisrefi! ¡Efu den ben sa frutrow tapu Yehovah nomo, dan den ben sa abi wan howpu di ben sa tan!​—Psalm 4:6-8; Odo 1:33.

15. (a) San na a krutu boskopu di Yehovah abi gi Yerusalem, èn suma e tyari den krutu fu en kon? (b) Fu san ede Krestenhèit sa kisi a srefi takru bakapisi leki di fu Yerusalem?

¹⁵ Den sma di e libi na ini Yerusalem di feanti e lontu den, no sa sabi san na seikerfasi. Yesaya e taki: „Ini den yesi fu mi, Yehovah fu den legre meki ensrefi bekènti: ’„Unu no sa kisi pardon fu a fowtu disi, te leki unu dede”, na so a Soeverein Masra, Yehovah fu den legre, taki’” (Yesaya 22:14). Fu a tranga-atifasi fu a pipel ede, meki den no sa kisi pardon. Den sa dede sondro misi. Disi na wan sani di de seiker. A Soeverein Masra, Yehovah fu den legre, taki dati. Leki wan kontru fu den wortu di Yesaya taki na fesi, dan rampu e kon tu tron na tapu Yerusalem di no de getrow. Den legre fu Babilon èn baka ten den legre fu Rome, e pori en. Na so rampu sa kon tu na tapu Krestenhèit di no de getrow èn di den memre fu en e taki dati den e anbegi Gado ma di, te yu luku en bun, e sori nanga den wroko fu den taki den no sabi en (Titus 1:16). Den sondu fu Krestenhèit, makandra nanga di fu den tra relisi fu grontapu, di e afrontu den regtfardiki pasi fu Gado, „kon tron leki wan ipi di hei te na hemel”. A sondu fu den bigi tumusi fu den kon bun baka nanga Gado, neleki a sondu fu Yerusalem di fadon komoto na bribi.​—Openbaring 18:5, 8, 21.

Wan Basya Di E Prakseri en Eigi Bun Nomo

16, 17. (a) Suma e kisi wan warskow boskopu fu Yehovah now, èn fu san ede? (b) San sa pasa nanga Sebna fu di a wani doro marki di hei?

¹⁶ Now a profeiti e poti en prakseri na wan sma di no de getrow, baka di a poti prakseri na wan pipel di no de getrow. Yesaya e skrifi: „Disi na san a Soeverein Masra, Yehovah fu den legre, taki: ’Go na inisei na a basya disi, na Sebna, di de basya  fu na oso: „San prenspari gi yu dyaso, èn suma prenspari gi yu dyaso, taki yu koti wan beripe gi yusrefi dyaso?” Na tapu wan hei presi a e koti a beripe fu en; ini wan klepston di e tanapu leti-opo a e koti wan tanpresi gi ensrefi.’”​—Yesaya 22:15, 16.

¹⁷ Sebna na „basya fu na oso”, kande na oso fu Kownu Hiskia. Leki wan basya fu na oso, a abi wan prenspari posisi, di de a di fu tu posisi baka a kownu. Den e fruwakti furu fu en (1 Korentesma 4:2). Toku te Sebna musu poti prakseri na den afersi fu a nâsi fosi, a e suku glori gi ensrefi. A e meki sma koti wan moi èn diri grebi gi ensrefi — a srefi leki di fu wan kownu — di hei na tapu wan klepston di e tanapu leti-opo. Yehovah, di e si disi, e meki Yesaya warskow a basya di no de getrow: „Luku! Yehovah e fringi yu go na ondro na wan kefalek krakti fasi, o man di gosontu èn tranga na skin fasi, èn a e grabu yu hori nanga tranga. Sondro misi a sa domru yu steifi, leki wan bal gi wan kondre di bigi. Na drape yu sa dede, èn na drape den asiwagi fu a glori fu yu sa de a syen fu na oso fu yu masra. Èn mi sa pusu yu gowe fu a posisi fu yu; èn sma sa puru yu na a wroko fu yu” (Yesaya 22:17-19). Fu di Sebna e prakseri en eigi bun nomo, meki a no sa abi srefi wan grebi leki ala tra sma na Yerusalem. Na presi fu dati, Yehovah sa fringi en neleki wan bal, fu dede na ini wan farawe kondre. Wan warskow de na ini a sani disi gi ala den sma na mindri a pipel fu Gado di kisi makti. Te den  e gebroiki a makti dati na wan fowtu fasi, dan dati sa meki taki den sa lasi a makti dati èn a kan taki Yehovah sa puru den fu a posisi fu den.

18. Suma sa kon na ini a presi fu Sebna, èn san a wani taki dati a sma dati sa kisi den basya krosi fu Sebna nanga a sroto fu na oso fu David?

¹⁸ Ma fa Yehovah sa puru Sebna fu a posisi fu en? Yehovah e tyari kon na krin nanga mofo fu Yesaya: „A musu pasa na a dei dati, taki mi sa kari a futuboi fu mi, namku, Elyakim, a manpikin fu Hilkia. Èn mi sa weri a langa krosi fu yu gi en, èn mi sa tai a berebanti fu yu steifi lontu en, èn mi sa gi a tirimakti fu yu na ini en anu; èn a musu tron wan tata gi a sma di e libi na ini Yerusalem èn gi na oso fu Yuda. Èn mi wani poti a sroto fu na oso fu David na en skowru tapu, èn a musu opo sondro taki wan sma e tapu, èn a musu tapu sondro taki wan sma e opo” (Yesaya 22:20-22). Elyakim, di kon na ini a presi fu Sebna, sa kisi den basya krosi fu en makandra nanga a sroto fu na oso fu David. Bijbel e gebroiki a wortu „sroto” fu agersi makti noso tiri. (Teki gersi Mateus 16:19.) Na ini owruten, wan raiman fu kownu, di kisi den sroto, ben sa kan abi a makti fu luku ala den kamra fu na oso fu kownu, èn e teki a bosroiti srefi suma kan wroko gi a kownu. (Teki gersi Openbaring 3:7, 8.) Fu dati ede a wroko leki basya de prenspari, èn den e fruwakti furu fu awansi suma e du a wroko dati (Lukas 12:48). A kan taki Sebna man du en wroko bun, ma fu di a no de getrow, dan Yehovah sa puru en èn poti wan tra sma na ini en presi.

Tu Agersi Pen

19, 20. (a) Fa a sa kon na krin taki Elyakim sa de wan blesi gi a pipel fu en? (b) San sa pasa nanga den wan di e tan frutrow tapu Sebna?

¹⁹ Te fu kaba Yehovah e taki na wan agersi fasi fu sori taki a e puru a makti fu Sebna èn e gi a makti dati na Elyakim. A e taki: „’Mi sa naki en [Elyakim] leki wan pen go na ini wan faste presi, èn a musu tron leki wan kownusturu fu glori gi na oso fu en tata. Èn den musu anga na en ala glori fu na oso fu a tata fu  en, den bakapikin nanga den sproiti, ala den pikin prapi, den prapi di gersi skarki, so srefi ala den prapi di de leki bigi watrakan. Na a dei dati’, na so Yehovah fu den legre taki, ’a pen [Sebna] di mi naki go na ini wan faste presi, sa hari puru, èn a musu koti puru èn fadon, èn a lai di de na en tapu, musu koti puru, bika Yehovah srefi taki dati.’”​—Yesaya 22:23-25.

²⁰ Na ini den vers disi, a fosi pen na Elyakim. A sa tron „wan kownusturu fu glori” gi na oso fu en papa, Hilkia. Tra fasi leki Sebna, a no sa gi na oso fu en papa noso a nen fu en syen. Elyakim sa de wan yepi di e tan, gi den prapi fu na osofamiri, dati wani taki, gi trawan di e wroko gi a kownu (2 Timoteus 2:20, 21). Kontrari fu dati, a di fu tu pen e sori go na Sebna. Ala di a kan gersi taki a de tranga tapu en posisi, toku Yehovah sa puru en. Iniwan sma di e tan frutrow tapu en, sa fadon.

21. Suma ben puru fu en presi na ini a ten disi, neleki Sebna, fu san ede, èn suma ben kon na ini a presi fu en?

²¹ A sani di Sebna ben ondrofeni, e memre wi taki na  mindri den wan di e taki dati den e anbegi Gado, den wan di e teki wroko di de leki wan grani, musu gebroiki den wroko dati fu dini trawan èn fu prèise Yehovah. Den no musu gebroiki a posisi fu den na wan fowtu fasi fu meki densrefi kon gudu noso fu kon pôpi. Fu eksempre, langa ten kaba Krestenhèit poti ensrefi leki wan basya di poti na wroko, a grupu di e teki presi gi Yesus Krestes na grontapu. Ma neleki fa Sebna ben tyari syen kon tapu en papa fu di a ben suku en eigi glori, na so den fesiman fu Krestenhèit tyari syen kon tapu a Mekiman, fu di den tyari furu gudu nanga makti kon na wan gi densrefi. Fu dati ede, di a ten fu krutu sma, di „bigin na a oso fu Gado”, ben kon na ini 1918, dan Yehovah ben puru Krestenhèit. Wi ben kon sabi wan tra basya — „a getrow basya, a koniwan” — èn Yesus poti en fu luku na osofamiri fu Yesus na grontapu (1 Petrus 4:17; Lukas 12:42-44). A grupu disi sori taki den warti fu teki a kownu „sroto” fu na oso fu David. Neleki wan „pen” di de fu frutrow, na so a kon na krin taki a de wan yepi di de fu frutrow gi ala den difrenti „prapi”, salfu Kresten di abi difrenti frantwortu èn di e frutrow tapu a grupu dati fu kisi nyanyan na yeye fasi. So srefi den „tra skapu” e anga fu a „pen” disi, a disiten Elyakim, neleki ’a dorosei-sma di de na ini  den portu’ fu Yerusalem fu owruten.​—Yohanes 10:16; Deuteronomium 5:14.

22. (a) Fu san ede a poti di wan tra sma ben poti leki basya na ini a presi fu Sebna, ben kon na a yoisti ten? (b) Fu san ede a poti di „a getrow basya, a koniwan” ben poti na wroko na ini a ten disi, ben de na a yoisti ten?

²² Elyakim ben kon na ini a presi fu Sebna, di Sanherib nanga den legre fu en ben de wan kefar gi Yerusalem. Na a srefi fasi „a getrow basya, a koniwan”, poti na wroko fu dini na ini a ten fu a kaba, di sa kon na wan kaba te Satan nanga den legre fu en e go feti wan lasti feti nanga „na Israèl fu Gado” èn nanga den tra skapu kompe fu den (Galasiasma 6:16). A bakapisi fu a feti dati sa de a pori fu den feanti fu regtfardikifasi, neleki na ini a ten fu Hiskia. Den wan di e suku yepi na a ’pen na ini wan faste presi’, a getrow basya, sa tan na libi, neleki fa getrow sma di ben e libi na ini Yerusalem, ben tan na libi di Asiria ben broko go nanga tranga na ini Yuda. ¡A de trutru wan koni sani fu dati ede, fu no hori fasti na a „pen” fu Krestenhèit di lasi a frutrow fu sma!

23. San pasa nanga Sebna te fu kaba, èn san wi kan leri fu dati?

²³ San e pasa nanga Sebna? Wi no abi no wan tori di e sori fa a profeititori di e taki fu en èn di skrifi na Yesaya 22:18, ben kon tru. Te a e hei ensrefi èn baka dati e kisi syen, dan a de leki Krestenhèit, ma kande a leri wan sani fu a trangaleri. Ini a tori disi, a de heri tra fasi leki Krestenhèit. Di Rabsakei, na Asiriasma, e aksi Yerusalem fu gi ensrefi abra, dan a nyun basya fu Hiskia, Elyakim, e tiri a grupu sma di e waka go fu miti en. Ma Sebna de na en sei leki wan sekretarsi fu a kownu. Soleki fa a sori, dan Sebna e wroko gi a kownu ete (Yesaya 36:2, 22). ¡Dati na wan kefalek moi sani di sma di lasi posisi fu diniwroko na ini na organisâsi fu Gado, kan leri fu dati! Na presi fu kisi bita-ati èn hori sma na ati, den koni te den e tan dini Yehovah ini awansi sortu wroko a e gi fu du (Hebrewsma 12:6). Te den e du dati, dan den sa wai pasi gi a rampu di sa kon na tapu Krestenhèit. Yehovah sa feni den bun èn a sa blesi den na ini ala têgo ten.

[Futuwortu]

[Aksi fu a tori disi]

[Prenki na tapu bladzijde 231]

Te Sedekia e lowe gowe, dan a feanti e kisi en èn e breni en

[Prenki na tapu bladzijde 232]

Den fruwakti takru gi den Dyu di no man komoto na ini Yerusalem

[Prenki na tapu bladzijde 239]

Hiskia meki Elyakim tron „wan pen na ini wan faste presi”

[Prenki na tapu bladzijde 241]

Neleki Sebna, na so furu fesiman fu Krestenhèit tyari syen kon tapu a Mekiman fu di den tyari furu gudu kon na wan

[Prenki na tapu bladzijde 242]

Na ini a ten disi wan getrow basya grupu poti fu luku na osofamiri fu Yesus