Kapitel Dritenti

„Trowstu a Pipel fu Mi”

Yesaya 40:1-31

1. San na wan fasi fa Yehovah e trowstu wi?

YEHOVAH na ’a Gado di e gi trowstu’. Den pramisi di a meki sma skrifi na ini a Wortu fu en, na wan fasi fa a e trowstu wi (Romesma 15:4, 5). Fu eksempre, te wan sma di yu lobi, dede, dan san ben kan gi moro trowstu leki a howpu taki a lobiwan dati o kisi wan opobaka na ini a nyun grontapu fu Gado? (Yohanes 5:28, 29) Èn fa a de nanga a pramisi di Yehovah e gi taki heri esi a sa tyari wan kaba kon na godelowsu fasi èn sa kenki a grontapu disi kon tron wan paradijs? ¿A no e gi wi trowstu taki wi abi a howpu fu pasa go na ini a Paradijs dati di e kon èn fu no dede noiti?​—Psalm 37:9-11, 29; Openbaring 21:3-5.

2. Fu san ede wi kan frutrow den pramisi fu Gado?

² ¿Wi kan frutrow den pramisi fu Gado trutru? ¡Iya, wi kan frutrow den! Wi kan frutrow dorodoro tapu a Sma di e pramisi den sani dati. A man du den sani di a taki èn a wani du den tu (Yesaya 55:10, 11). Yehovah ben sori disi na wan krakti fasi ini a tori fu den sani di a taki nanga mofo fu Yesaya, taki A ben sa meki a tru anbegi kon bun baka na ini Yerusalem. Meki wi go luku a profeititori dati, soleki fa a de fu feni na Yesaya kapitel 40, bika te wi e du dati, dan a kan tranga a bribi di wi abi na ini Yehovah, a Sma di e meki pramisi kon tru.

Wan Pramisi Di E Gi Trowstu

3, 4. (a) Sortu wortu di e gi trowstu èn di a pipel fu Gado sa abi fanowdu baka ten, Yesaya e skrifi? (b) Fu san ede Babilon sa tyari den sma di e libi na ini Yuda nanga Yerusalem go na ini katibo, èn o langa den sa de na ini katibo?

³ Na ini a di fu aiti yarihondro b.G.T., a profeiti Yesaya e skrifi  wortu di e gi trowstu èn di a pipel fu Yehovah sa abi fanowdu baka ten. Wantewante baka te Yesaya e fruteri Kownu Hiskia fu a pori di o kon tapu Yerusalem èn taki sma o tyari a Dyu pipel gowe na Babilon, dan Yesaya e meki den wortu fu Yehovah bekènti di e pramisi taki sani o meki kon bun baka: „’Trowstu, trowstu a pipel fu mi’, a Gado fu unu e taki. Taki nanga na ati fu Yerusalem èn bari taigi en taki a srudatiwroko fu en kon na wan kaba, taki a kisi pardon fu a fowtu fu en. Bika fu na anu fu Yehovah a kisi pardon tu tron someni leki ala den sondu fu en.’”​—Yesaya 40:1, 2.

⁴ „Trowstu”, a bigin wortu fu Yesaya kapitel 40, e sori na wan bun fasi a boskopu fu leti nanga howpu di de na ini a tra pisi fu a buku Yesaya. Fu di den sma di e libi na ini Yuda nanga Yerusalem fadon komoto na bribi, meki Babilon sa tyari den go na ini katibo na ini 607 b.G.T. Ma den Dyu katiboman dati no sa dini den Babilonsma fu ala ten. Nôno, den sa de na ini katibo soso te leki den „kisi pardon” fu a fowtu fu den. O langa dati sa de? Seibitenti yari, soleki fa a profeiti Yeremia e taki (Yeremia 25:11, 12). Baka dati Yehovah sa tyari wan fikapisi di abi berow fu Babilon go baka na Yerusalem. ¡Na ini a di fu 70 yari taki Yuda de sondro sma di e libi na ini, dan trutru a sa de wan trowstu gi den katiboman fu sabi taki a ten doro fu kisi a frulusu di Gado ben pramisi!​—Danièl 9:1, 2.

5, 6. (a) Fu san ede a langa waka fu Babilon go na Yerusalem no sa meki taki a pramisi fu Gado no sa kon tru? (b) Sortu krakti a sa abi tapu den tra nâsi taki den Dyu e drai go baka na a mamakondre fu den?

⁵ A waka fu Babilon go na Yerusalem na 800 te go miti 1600 kilometer èn dati e anga fu a pasi di wan sma teki. ¿A langa waka sa meki taki a pramisi fu Gado no sa kon tru? ¡Kwetikweti! Yesaya e skrifi: „¡Arki! Wan sma e bari kari na ini a gran sabana: ’¡Un sreka a pasi fu Yehovah! Meki a bigi pasi fu a Gado fu wi di e waka na ini a woestijn opo presi, kon reti. Meki ibri lagipresi kon hei èn meki ibri bergi nanga pikin bergi kon lagi. Èn a kundukundu gron musu kon plata èn a gron di no  grati musu tron wan lagipresi. Èn sma sa si a glori fu Yehovah trutru, èn ala skin musu si en makandra, bika a mofo fu Yehovah srefi taki dati.’”​—Yesaya 40:3-5.

⁶ Bifo tiriman fu Owstusei e bigin teki waka, dan furutron den ben e seni man go fu sreka a pasi fu di den ben e puru bigi ston na pasi èn ben e meki srefi grati pasi èn ben e meki pikin bergi kon plata. Ini a tori fu den Dyu di e drai go baka, a sa de neleki Gado srefi de na den fesi èn e puru iniwan sani di de na a pasi fu den. Te yu luku en bun, dan den sma disi na a pipel fu Yehovah di e tyari a nen fu en. Te a e meki a pramisi fu en kon tru, taki a sa tyari den go baka na a mamakondre fu den, dan dati sa meki taki ala den nâsi sa si a glori fu en. Awansi den nâsi dati e feni en bun noso no e feni en bun, den sa musu si taki Yehovah na a Sma di e meki den pramisi fu en kon tru.

7, 8. (a) Sortu kontru den wortu fu Yesaya 40:3 ben abi na ini a fosi yarihondro G.T.? (b) Sortu moro bigi kontru a profeititori fu Yesaya ben abi na ini 1919?

⁷ Di den Dyu ben drai go baka na a mamakondre fu den na ini a di fu siksi yarihondro b.G.T., dan dati no ben de a wan-enkri kontru fu a profeititori disi. Wan tra kontru ben de na ini a fosi yarihondro G.T. Yohanes a Dopuman ben de a sten fu wan sma di „e bari kari na ini a gran sabana”, leki wan kontru fu Yesaya 40:3 (Lukas 3:1-6). Na ondro a krakti fu a santa yeye, Yohanes ben fiti den wortu fu Yesaya tapu ensrefi (Yohanes 1:19-23). Bigin nanga 29 G.T., Yohanes ben bigin sreka a pasi gi Yesus Krestes. * A sani di Yohanes ben meki bekènti na fesi, ben meki taki sma ben fruwakti a Mesias di Gado ben pramisi, so taki den fu den sei, ben sa kan arki en èn waka na  en baka (Lukas 1:13-17, 76). Yehovah ben sa gebroiki Yesus fu tyari sma di abi berow go na ini a fri di soso a Kownukondre fu Gado kan gi — kon fri fu katibo fu sondu nanga dede (Yohanes 1:29; 8:32). Den wortu fu Yesaya ben abi wan moro bigi kontru di a fikapisi fu Israèl na yeye fasi ben kisi frulusu komoto na Babilon a Bigiwan na ini 1919 èn di den ben meki a tru anbegi kon bun baka.

⁸ Ma fa a de nanga den wan di abi na okasi fu kisi wini fu a fosi kontru fu a pramisi — den Dyu di de na ini katibo na Babilon? ¿Den kan frutrow trutru a pramisi di Yehovah gi taki a sa meki den drai go baka na a lobi mamakondre fu den? ¡Iya, den kan frutrow a pramisi dati! Nanga wortu di de krin fu frustan èn nanga agersitori di a teki fu na aladei libi, Yesaya e taki now fu wan tu sani di e overtoigi sma fu san ede den kan frutrow dorodoro na tapu taki Yehovah sa du soleki fa a taki.

Wan Gado Di a Wortu fu En E Tan fu Ala Ten

9, 10. Fa Yesaya e poti a libi fu libisma di de fu wan syatu pisi ten nomo, kontrari a „wortu” fu Gado di e tan fu ala ten?

⁹ Na a fosi presi, a wortu fu a Sma di e pramisi taki sani o meki kon bun baka, e tan fu ala ten. Yesaya e skrifi: „¡Arki! Wan sma e taki: ’¡Bari kari!’ Èn wan sma ben taki: ’San mi sa bari kari?’ ’Ala skin na grun grasi, èn ala lobi bun-ati fu den de leki a bromki fu a veld. A grun grasi kon drei, a bromki kon flaw, bika a yeye fu Yehovah srefi bro na en tapu. Fu tru, a pipel na grun grasi. A grun grasi kon drei, a bromki kon flaw; ma fu a sei fu a wortu fu a Gado fu wi, a sa tan te ten di no skotu.’”​—Yesaya 40:6-8.

¹⁰ Den Israèlsma sabi heri bun taki grasi no e tan fu ala ten. Na dreiten, a hati di a son hati e meki a grun grasi kon tron broin. Na son fasi, a libi fu libisma de leki grasi — a de fu wan syatu pisi ten nomo (Psalm 103:15, 16; Yakobus 1:10, 11). Yesaya e poti a libi fu libisma di de fu wan syatu pisi ten nomo, kontrari a „wortu” fu Gado, noso a prakseri di Gado abi, di e tan fu ala ten. Iya, „a wortu fu a Gado fu wi” e tan fu têgo. Te  Gado e taki, dan no wan sani kan meki den wortu fu en tron noti, noso meki taki den no e kon tru.​—Yosua 23:14.

11. Fu san ede wi kan frutrow tapu Yehovah taki a sa meki den pramisi di de na ini a Wortu fu en di skrifi, kon tru?

¹¹ Na ini a ten disi wi abi a prakseri di Yehovah abi skrifi na ini Bijbel. Bijbel kisi fu du nanga kefalek hebi gens na ini ala den yarihondro, èn vertaler nanga tra sma di no e frede, poti a libi fu den na ini kefar fu kibri Bijbel meki noti pasa nanga en. Ma a muiti wawan di den e du no e fruklari fu san ede Bijbel pasa ala den sani dati. Ala grani taki a pasa ala den sani dati, musu go na Yehovah, „a libi Gado di e tan fu ala ten” èn a Sma di e kibri a Wortu fu en meki noti pasa nanga en (1 Petrus 1:23-25). Prakseri fu disi: ¿Wi no kan frutrow tapu Yehovah taki a sa meki den pramisi di de na ini a Wortu fu en di skrifi, kon tru, fu di a kibri a Wortu dati meki noti pasa nanga en?

Wan Tranga Gado Di E Sorgu gi den Skapu fu En na wan Lobi-ati Fasi

12, 13. (a) Fu san ede wi kan frutrow a pramisi di e taki fu a meki di sani o meki kon bun baka? (b) Sortu bun nyunsu de gi den Dyu katiboman, èn fu san ede den kan frutrow na tapu?

¹² Yesaya e taki fu wan di fu tu reide fu san ede wi kan frutrow a pramisi di e taki fu a meki di sani o meki kon bun baka. A Sma di e gi a pramisi na wan tranga Gado di e sorgu na wan lobi-ati fasi gi a pipel fu en. Yesaya e taki moro fara: „Kren go na tapu wan hei bergi, yu uma di e tyari bun nyunsu kon gi Sion. Opo yu sten srefi nanga krakti, yu uma di e tyari bun nyunsu kon gi Yerusalem. Opo a sten. No frede. Taigi den foto fu Yuda: ’Dyaso na un Gado.’ ¡Luku! A Soeverein Masra Yehovah srefi sa kon leki wan trangawan [„srefi nanga krakti”, futuwortu], èn na anu fu en sa tiri gi en. ¡Luku! A pai di a e gi sma de nanga en, èn a moni di a e pai sma de  na en fesi. Leki wan skapuman a sa wei en eigi ipi. Nanga en anu a sa tyari den pikin skapu kon na makandra, èn na en borsu a sa tyari den. Den wan di de na bobi, a sa tyari nanga koni.”—Yesaya 40:9-11.

¹³ Na ini Bijbel ten, a ben de a gwenti taki umasma e hori fesa fu den feti di a kondre fu den wini èn e bari noso e singi a bun nyunsu fu feti di a kondre fu den wini noso fu frulekti di sa kon (1 Samuèl 18:6, 7; Psalm 68:11). ¡Yesaya e sori na  fesi taki bun nyunsu de gi den Dyu katiboman, nyunsu di den kan bari tranga fu sma yere sondro fu frede, iya, komoto na den ede fu den bergi — Yehovah sa tyari a pipel fu en go baka na a lobi Yerusalem fu den! Den kan frutrow na tapu, bika Yehovah sa kon „srefi nanga krakti”. Fu dati ede, no wan sani kan tapu en fu du san a pramisi.

14. (a) Fa Yesaya e sori a lobi-ati fasi fa Yehovah sa tyari a pipel fu en? (b) Sortu eksempre e sori fa skapuman e sorgu na wan lobi-ati fasi gi den skapu fu den? (Luku a boksu tapu bladzijde 405.)

¹⁴ Ma a tranga Gado disi abi switi fasi. Yesaya e taki heri moi fa Yehovah sa tyari a pipel fu en go baka na a mamakondre fu den. Yehovah de leki wan lobi-ati skapuman di e tyari den pikin skapu fu en kon na makandra èn e tyari den na en „borsu”. Dyaso a wortu „borsu” kande wani taki a tapusei ploi fu a krosi. Disi na pe skapuman sontron e tyari den nyunyun pikin skapu di no man waka so esi leki na ipi (2 Samuèl 12:3). A de seiker taki so wan situwâsi di e sori a libi fu skapuman èn di e naki sma ati, e gi a pipel fu Yehovah di de na ini katibo a dyaranti taki A e broko en ede nanga den na wan lobi-ati fasi. ¡Fu tru, den kan abi a frutrow taki so wan tranga, ma lobi-ati Gado, sa du san a pramisi den!

15. (a) O ten Yehovah ben kon „srefi nanga krakti”, èn suma na a ’anu di e tiri gi en’? (b) Sortu bun nyunsu wi musu meki bekènti sondro frede?

¹⁵ Den wortu fu Yesaya e taki sani na fesi di wani taki furu sani gi a ten fu wi. Na ini 1914, Yehovah ben kon „srefi nanga krakti” èn ben seti a Kownukondre fu en na hemel. Na ’anu di e tiri gi en’ na en Manpikin, Yesus Krestes, di Yehovah poti na tapu en kownusturu na hemel. Na ini 1919, Yehovah ben frulusu den salfu futuboi fu en na grontapu fu katibo na Babilon a Bigiwan èn den ben bigin seti a soifri anbegi fu a libi èn tru Gado krinkrin baka. A sani dati na bun nyunsu di den musu meki bekènti sondro frede, neleki den e bari tranga komoto na den ede fu den bergi, so taki a sani di den e meki bekènti e go na ala sei. ¡Fu dati ede, meki wi opo a sten fu wi èn  fruteri tra sma sondro frede taki Yehovah Gado seti a soifri anbegi fu en baka na tapu a grontapu disi!

16. Na sortu fasi Yehovah e tyari a pipel fu en na ini a ten disi, èn sortu eksempre a sani disi e poti?

¹⁶ Den wortu fu Yesaya 40:10, 11 abi moro sani na ini di wi kan gebroiki na ini a ten disi. A e gi trowstu fu si a lobi-ati fasi fa Yehovah e tyari a pipel fu en. Neleki fa wan skapuman sabi san ibri skapu abi fanowdu — so srefi den pikin skapu di no man waka so esi leki den trawan — na so Yehovah sabi san ibriwan fu den getrow futuboi fu en no man du. Boiti dati, leki wan skapuman di abi lobi-ati fasi, Yehovah e poti na eksempre gi Kresten skapuman. Owruman musu handri nanga na ipi na wan lobi-ati fasi, èn waka baka a fasi fa Yehovah srefi e sori taki a e broko en ede nanga sma na wan lobi-ati fasi. Ala ten den musu hori na prakseri fa Yehovah e denki fu ibri memre fu na ipi, „di a ben bai nanga a brudu fu en eigi Manpikin”.​—Tori fu den Apostel 20:28.

A Abi Ala Makti èn A Abi Ala Koni

17, 18. (a) Fu san ede den Dyu katiboman kan frutrow a pramisi di e taki fu a meki di sani o meki kon bun baka? (b) Sortu aksi di e meki sma kisi lespeki nanga frede, Yesaya e poti?

¹⁷ Den Dyu katiboman kan frutrow a pramisi di e taki fu a meki di sani o meki kon bun baka, bika Gado abi ala makti èn a abi ala koni. Yesaya e taki: „Suma marki den watra na ini en mindri-anu nomo èn marki a bigi fu hemel srefi nanga na anu nomo èn poti a doti fu gron na ini wan marki, noso wegi den bergi nanga wan marki, èn den pikin bergi na ini a wegi? Suma marki a yeye fu Yehovah, èn suma ben kan meki a kon sabi wan sani leki a raiman fu en? Na suma a ben go fu aksi rai so taki den ben sa meki en frustan, noso suma e leri en a pasi fu retidu, noso suma e leri en sabi, noso e meki en kon sabi srefi a pasi fu trutru frustan?”​—Yesaya 40:12-14.

¹⁸ Den aksi disi di e meki sma kisi lespeki nanga frede, na aksi di den Dyu katiboman musu denki dipi fu den. ¿A de so,  taki wi leki libisma nomo kan tapu a frudu noso a falawatra fu den kefalek bigi se? ¡Kwetikweti! Ma gi Yehovah den se di e tapu grontapu, de leki wan dropu watra na ini en anu. * ¿Libisma di no de noti kan marki a kefalek bigi hemel di lai nanga stari noso wegi den bergi nanga pikin bergi fu grontapu? Nôno. Toku Yehovah e marki hemel so makriki neleki fa wan sma ben sa kan marki wan sani nanga wan anu — a pisi na mindri na ede fu a doin nanga na ede fu a pikin finga, te yu bradi na anu. Te yu luku en bun, dan Gado kan wegi bergi nanga pikin bergi tapu wan wegi. ¿A moro koni libisma kan gi Gado rai srefi san a musu du na ondro a situwâsi fu a ten disi noso taigi en san a musu du na ini a ten di e kon? ¡Kwetikweti!

19, 20. Sortu wortu di de krin fu frustan Yesaya e gebroiki fu poti krakti na tapu o bigi a makti fu Yehovah de?

¹⁹ Fa a de nanga den tranga nâsi fu grontapu? ¿Den kan kakafutu gi Gado te a e du san a e pramisi? Yesaya e piki fu di a e taki fu den nâsi nanga den wortu di e kon now: „¡Luku! Den nâsi de leki wan dropu na ini wan embre; èn leki a fini doti na tapu a wegi den de. ¡Luku! Den èilanti a e opo leki fini doti. Srefi Libanon no nofo fu meki wan faya tan bron, en den werdri meti fu en no nofo gi wan bron-ofrandi. Gi en, ala den nâsi de leki wan sani di no de; a si den leki noti èn leki wan sani di no de trutru.”​—Yesaya 40:15-17.

²⁰ Gi Yehovah, heri nâsi de leki wan dropu watra di e fadon komoto na ini wan embre. Den de noti moro leki a fini doti di e kon furu na tapu wan wegi, sondro taki a abi krakti tapu sani. * Kon meki wi taki dati wan sma ben musu bow wan kefalek  bigi altari èn a gebroiki ala den bon di de na tapu den bergi fu Libanon leki udu fu leti a faya. Èn kon meki wi taki dati a ben musu tyari ala meti di ben wakawaka na tapu den bergi dati leki srakti-ofrandi. Srefi so wan ofrandi no ben sa bun fu gi Yehovah. Neleki a prenki di Yesaya gebroiki te so fara no bun nofo, meki a e gebroiki moro krakti wortu — ala den nâsi de leki „sososani” na ini na ai fu Yehovah.​—Yesaya 40:17, Da Buku fu dem Profetie.

21, 22. (a) Fa Yesaya e poti krakti na tapu taki wi no kan teki Yehovah gersi no wan sani? (b) Na sortu bosroiti wi e kon te wi e arki den sani di Yesaya e taki na wan fasi di de krin fu frustan? (c) San a profeiti Yesaya e skrifi di e kruderi nanga sabidensi? (Luku a boksu tapu bladzijde 412.)

²¹ Fu poti krakti moro fara na tapu taki sma no kan teki Yehovah gersi no wan sani, dan Yesaya e go sori now o don den sma de di e meki kruktu gado fu gowtu, solfru noso udu. ¡Fa a de wan don sani fu prakseri taki iniwan fu den kruktu gado dati ben kan de wan sani di fiti fu poti na ini a presi fu a ’Sma di e libi na tapusei fu a lontu fu grontapu’ èn di e tiri den sma di e libi na tapu!​—Leisi Yesaya 40:18-24.

²² Ala den sani disi di Yesaya taki na wan fasi di de krin fu frustan, e meki wi kon na wan bosroiti — no wan sani kan tapu Yehovah, di abi ala makti, di abi ala koni èn di yu no kan teki gersi no wan sani, fu du san A e pramisi. ¡Ai, fa den wortu fu Yesaya ben musu gi trowstu èn gi tranga na den Dyu di de na ini katibo na Babilon di ben angri fu drai go baka na a mamakondre fu den! Na ini a ten disi, wi tu kan frutrow na tapu taki den sani di Yehovah e pramisi gi a tamara fu wi, sa kon tru.

„Suma Meki den Sani Disi?”

23. San na a sani di kan meki taki den Dyu katiboman kisi deki-ati, èn tapu sortu sani Yehovah e poti krakti now ini a tori fu ensrefi?

²³ Ete wan tra sani de fu san ede den Dyu katiboman kan kisi deki-ati. A Sma di e pramisi taki a sa frulusu den, na a  Sma di meki ala sani èn a Sma fu pe ala dinamik krakti e kon. Fu poti krakti tapu den fruwondru sani di a man du, dan Yehovah e poti a prakseri tapu a man di a man du sani èn di de fu si na den sani di a kria: „’Nanga suma unu sa agersi mi, so taki unu meki mi tron en speri?’ a Santawan e taki. ’Opo un ai go na loktu èn luku. Suma kria den sani disi? Na a Sma di e tyari a legre fu den go na doro, so srefi a nomru fu den, di e kari den alamala srefi na den nen. Fu di a abi dinamik krakti pasa marki, èn fu di a abi tumusi bigi krakti tu, meki no wan fu den no e mankeri.’”​—Yesaya 40:25, 26.

24. Fa Yehovah e sori taki a no abi speri te a e taki fu ensrefi?

²⁴ A Santawan fu Israèl e taki fu ensrefi. Yehovah e sori go na den stari fu hemel fu sori taki a no abi speri. Neleki fa wan srudati komandanti man orga den legre fu en, na so Yehovah e tiri den stari. Efu a ben musu tyari den kon na wan, dan ’no wan fu den no ben sa mankeri’. Ala di den stari furu srefisrefi, toku a e kari ibriwan fu den na den nen, disi kan de wan nen gi ibri stari aparti, noso wan fasi fa a e kari den di de leki wan nen gi den. Neleki srudati di e gi yesi, na so den e tan hori a presi fu den èn e hori densrefi na a yoisti komando, bika a Fesiman fu den abi „dinamik krakti” pasa marki èn a „abi tumusi bigi krakti”. Fu dati ede den Dyu katiboman abi reide fu frutrow tapu en. A Mekiman di e komanderi den stari, abi a krakti fu horibaka gi den futuboi fu en.

25. San wi ben sa kan du tapu a kari di Gado gi èn di skrifi na Yesaya 40:26, èn nanga sortu bakapisi?

²⁵ Suma fu wi kan weigri fu teki a kari di Gado gi èn di skrifi na Yesaya 40:26: „Opo un ai go na loktu èn luku”? Den sani di den astronomiaman fu a ten disi kon feni, sori taki hemel di lai nanga stari e meki sma kisi moro lespeki nanga frede srefi, leki fa den ben de na ini a ten fu Yesaya. Astronomiaman di e luku go na hemel nanga den telescoop fu den di den kan si kefalek bun fara nanga dati, e bereken taki na universum di de fu si, abi moro leki 125 milyard stari sistema.  ¡We, wán fu den wawan — a stari sistema di nen Merkipasi — abi moro leki 100 milyard stari, soleki fa sma bereken! Te wi sabi dati, dan a musu buweigi wi ati fu abi lespeki gi a Mekiman fu wi èn fu frutrow dorodoro tapu den sani di a pramisi.

26, 27. San Yesaya e taki fu a fasi fa den katiboman na ini Babilon e firi, èn sortu sani den musu sabi?

²⁶ Fu di Yehovah sabi taki den yari te den Dyu katiboman de na ini katibo sa kowru a faya fu den, dan nanga yepi fu a santa yeye A meki Yesaya skrifi den wortu disi na fesi di e gi den a dyaranti disi: „Fu san ede yu e taki, o Yakob, èn yu e bari taki, o Israèl: ’A pasi fu mi kibri gi Yehovah èn Gado no e poti prakseri na a sori di sma musu sori mi retidu’? Yu no kon sabi noso yu no yere? Yehovah, a Mekiman fu den moro farawe presi fu grontapu, na wan Gado te ten di no skotu. A no e  weri noso en skin no e kon hebi. Sma no kan kon sabi a frustan fu en finifini.”​—Yesaya 40:27, 28. *

²⁷ Yesaya e skrifi den wortu fu Yehovah di e sori fa den katiboman na ini Babilon e firi, hondrohondro kilometer fu a mamakondre fu den. Son wan fu den e denki taki a Gado fu den no si noso no sabi a „pasi” fu den — a fasi fa a libi fu den tranga. Den e denki taki Yehovah no e ke nanga den onregtfardiki sani di den e ondrofeni. Efu a no den sani di densrefi e ondrofeni, dan na den bodoi di den kisi e memre den na sani di den musu kon sabi. Yehovah man frulusu a pipel fu en èn a wani du dati tu. En na a têgo Gado èn a Mekiman fu a heri grontapu. Fu dati ede a abi a krakti ete di a ben sori di a ben meki sani, èn a man doro srefi na a makti Babilon. So wan Gado no kan kon weri èn no kan libi a pipel fu en. Den no musu fruwakti taki den man frustan krinkrin den sani di Yehovah e du, bika a frustan fu en — noso inzicht, a koni fu man si sani krin, èn a man di a man si den dipi sani fu wan tori — na wan sani di den no man frustan.

28, 29. (a) Fa Yehovah e memre a pipel fu en taki a sa kon yepi den sma di weri? (b) Sortu eksempre Yehovah e gebroiki fu sori fa A e gi krakti na den futuboi fu en?

²⁸ Yehovah e gebroiki Yesaya fu go doro fu gi deki-ati na den katiboman di lasi-ati: „A e gi krakti na den wan di weri, èn a wan di no abi dinamik krakti a e gi krakti pasa marki. Den boi sa kon weri èn den sa kon swaki, èn den yonkuman srefi seiker sa naki futu fadon, ma den wan di e howpu tapu Yehovah, sa kisi krakti b aka. Den sa opo go na loktu nanga frei neleki aka. Den sa lon èn den no sa kon swaki; den sa waka èn den no sa kon weri.”​—Yesaya 40:29-31.

²⁹ Te Yehovah e taki dati a de fanowdu fu gi krakti na a sma di weri, dan kande a abi a muilek waka na prakseri di den katiboman sa musu teki, so taki den kan drai go baka na a  kondre fu den. Yehovah e memre a pipel fu en taki a de wan eigifasi fu en fu kon yepi sma di weri èn di e suku yepi na en. Srefi den moro krakti libisma — „boi” nanga „yonkuman” — kan kon swaki fu di den weri èn naki futu fadon fu di den weri srefisrefi. Ma Yehovah e pramisi fu gi krakti na den wan di e frutrow tapu en. A sa gi den krakti fu man lon èn fu waka sondro fu kon weri. Fu sori fa A e gi krakti na den futuboi fu en, dan Yehovah e gebroiki na aka, wan tranga fowru di kan  frei hei yuru langa èn di gersi taki a e frei sondro muiti. * Fu di den Dyu katiboman abi a fruwakti fu kisi a yepi dati fu Gado, dan den no abi fu lasi-ati.

30. Fa tru Kresten na ini a ten disi kan kisi trowstu fu den lasti vers fu Yesaya kapitel 40?

³⁰ Den lasti vers disi fu Yesaya kapitel 40 abi wortu na ini di e gi trowstu na tru Kresten di e libi na ini den lasti dei fu a godelowsu seti disi. Fu di so furu banawtu nanga problema de di e meki sma lasi-ati, dan a e gi wi wan korostu firi fu sabi taki a Gado fu wi e si den problema di wi e kisi èn den onregtfardiki sani di wi e ondrofeni. Wi kan de seiker taki a Sma di meki ala sani, a Sma di „a frustan fu en no skotu”, sa poti ala onregtfardikifasi kon reti baka na en eigi reti ten èn na en eigi fasi (Psalm 147:5, 6). Na a srefi ten wi no musu horidoro nanga wi eigi krakti. Yehovah, di abi gudu pasa marki, kan gi krakti — iya, „krakti di e pasa san de normaal” — na den futuboi fu en di e kisi tesi.​—2 Korentesma 4:7.

31. Sortu pramisi di abi fu du nanga leti a profeititori fu Yesaya ben abi gi den Dyu di ben de na ini katibo na Babilon, èn tapu sortu sani wi kan frutrow dorodoro?

³¹ Prakseri den Dyu di de na ini katibo na Babilon na ini a di fu siksi yarihondro b.G.T. Hondrohondro kilometer farawe, a lobi Yerusalem fu den e tan sondro taki sma libi na ini, èn a tempel fu en e broko na pisipisi. A profeititori fu Yesaya ben abi wan pramisi gi den, taki den sa kisi leti na yeye fasi èn howpu di e gi den trowstu. ¡Yehovah ben sa tyari den go baka na a mamakondre fu den! Na ini 537 b.G.T. Yehovah ben tyari a pipel fu en go na a kondre fu den èn ben sori taki en na a Sma di e meki pramisi kon tru. Wi so srefi kan frutrow dorodoro tapu Yehovah. Den pramisi di A gi ini a tori fu a Kownukondre, èn di Yesaya e taki so moi fu en na ini en profeititori, sa kon tru. ¡Ai, dati na bun nyunsu trutru — wan boskopu fu leti gi a heri libisma famiri!

[Futuwortu]

[Aksi fu a tori disi]

[Faki na tapu bladzijde 404, 405]

 Yehovah, wan Lobi-ati Skapuman

Fu sori taki Yehovah e broko en ede nanga a pipel fu en, dan Yesaya e teki Yehovah gersi wan lobi-ati skapuman di e tyari den pikin skapu fu en na en borsu (Yesaya 40:10, 11). Soleki fa a sori, dan Yesaya ben gebroiki den trutru sani disi di den skapuman ben du, fu sori a lobi-ati eksempre dati. Wan sma fu a ten disi di ben luku den skapuman di de na tapu den skoinsi sei fu a Hermonbergi na Mindri Owstusei e fruteri: „Ibri skapuman ben e luku en ipi bun fu si fa a ben waka nanga den. Te a ben feni wan nyunyun pikin skapu, dan a ben poti en na ini den ploi fu en . . . bigi tapusei krosi, fu di a ben sa de tumusi swaki fu waka baka a mama. Te a borsu fu en ben furu, dan a ben poti den pikin skapu na tapu en skowru èn ben hori den na den futu, noso a ben poti den na ini wan saka noso baskita na tapu a baka fu wan buriki, te leki den pikinwan ben man waka baka den mama.” ¿A no e gi wi trowstu fu sabi taki wi e dini wan Gado di e broko en ede na so wan lobi-ati fasi nanga a pipel fu en?

 [Faki na tapu bladzijde 412]

Sortu Vorm Grontapu Abi?

Na ini owruten, furu sma ben bribi taki grontapu ben plata. Ma sensi a di fu siksi yarihondro b.G.T., a Griki filosofiaman Pythagoras ben taki dati grontapu musu de wan lontu sani. Toku tu hondro yari bifo Pythagoras ben kon nanga a prakseri fu en, a profeiti Yesaya ben taki heri krin èn nanga seikerfasi: „Wan Sma de di e libi na tapusei fu a lontu fu grontapu” (Yesaya 40:22). A Hebrew wortu chugh di vertaal dyaso nanga „lontu”, kan vertaal nanga „wan lontu sani”. A de prenspari fu si taki soso wan lontu sani de fu si leki wan lontu vorm fu ibri uku. * Fu dati ede langa ten fosi a ten fu en, a profeiti Yesaya ben skrifi wan fruklari di e kruderi nanga sabidensi èn di no abi anansitori fu fositen na ini.

[Futuwortu]

 [Prenki na tapu bladzijde 403]

Yohanes a Dopuman ben de wan sten di „e bari kari na ini a gran sabana”