Kapitel Tutenti Na Neigi

Wan Kownu E Kisi Pai fu a Bribi fu En

Yesaya 36:1–39:8

1, 2. Fa a kon na krin taki Hiskia na wan moro bun kownu leki Akas?

HISKIA ben abi 25 yari di a ben tron kownu fu Yuda. Sortu tiriman a ben sa de? ¿A ben sa waka baka na eksempre fu en papa, Kownu Akas, èn sa meki den sma di de na ondro a tiri fu en waka baka falsi gado? ¿Noso a ben sa tyari a pipel ini na anbegi fu Yehovah, soleki fa en fositen tata, Kownu David, ben du?​—2 Kownu 16:2.

² No langa baka di Hiskia ben tron kownu, dan a ben de krin fu si taki a ben wani „du san ben de yoisti na ini Yehovah ai” (2 Kownu 18:2, 3). Na ini a fosi yari di a ben tiri, a ben gi a komando taki a tempel fu Yehovah ben musu meki kon bun baka èn taki sma ben musu bigin baka nanga den diniwroko na ini a tempel (2 Kroniki 29:3, 7, 11). Baka dati a ben orga sani fu hori wan bigi Paskafesa èn a ben gi a heri nâsi wan kari fu kon na a fesa — so srefi den tin noordsei lo fu Israèl. ¡Ai, dati ben de wan fesa di den no ben sa frigiti! No wan enkri fesa ben de leki a wan dati sensi den dei fu Kownu Salomo.​—2 Kroniki 30:1, 25, 26.

3. (a) San den sma di ben e libi na ini Israèl nanga Yuda ben du di ben de na a Paskafesa di Hiskia ben seti? (b) San Kresten na ini a ten disi e leri fu a sani di den sma di ben de na a Paskafesa dati ben du sondro draidrai?

³ Na a kaba fu a Paskafesa, na ati fu den wan di ben de na a fesa ben buweigi den fu koti den santa postu puru, broko den santa pilari, broko den hei presi nanga den altari fu den falsi gado fu den. Baka dati den ben drai go baka na den foto fu den nanga a fasti bosroiti fu dini a tru Gado (2 Kroniki 31:1). ¡Dati ben de trutru heri tra fasi leki a fasi  fa den ben denki na relisi sei fosi! Tru Kresten na ini a ten disi kan leri fu a sani disi o prenspari a de fu ’no libi a kon di den e kon makandra’. Den sortu konmakandra dati e prei wan tumusi prenspari rol fu gi den deki-ati, awansi den hori na ini den gemeente noso na tra okasi soleki bigi konmakandra nanga kongres. Den konmakandra e meki taki a bradafasi èn so srefi a yeye fu Gado buweigi den fu „tranga makandra fu sori lobi èn fu du bun wroko”.​—Hebrewsma 10:23-25.

A Bribi fu En E Kisi Tesi

4, 5. (a) Fa Hiskia sori taki a no de na ondro a makti fu Asiria? (b) San Sanherib du fu meki den srudati fu en feti nanga Yuda, èn sortu sani Hiskia e du fu no meki taki den kon feti wantewante nanga Yerusalem? (c) Fa Hiskia e sreka sani fu kibri Yerusalem gi den Asiriasma?

⁴ Seryusu tesi e wakti Yerusalem. Hiskia broko wan frubontu di en papa, Akas, di no ben de getrow, ben meki nanga den Asiriasma. A poti srefi den Filistiasma na en ondro, di e wroko makandra nanga Asiria (2 Kownu 18:7, 8). A sani disi meki a kownu fu Asiria atibron. Fu dati ede wi e leisi: „A ben pasa na ini a di fu tinafo yari fu Kownu Hiskia, taki Sanherib, a kownu fu Asiria, ben hari go feti nanga ala den tranga foto fu Yuda èn a ben teki den abra” (Yesaya 36:1). Kande fu di  Hiskia e howpu taki a kan kibri Yerusalem gi a feti di na ogri-ati legre fu Asiria e kon feti wantewante nanga den, meki a e agri fu pai Sanherib kefalek furu edemoni fu 300 talenti solfru nanga 30 talenti gowtu. *​—2 Kownu 18:14.

⁵ Fu di nofo gowtu nanga solfru no de na ini a gudukamra fu kownu fu pai na edemoni, meki Hiskia e teki ala sortu diri metaal di a kan puru fu a tempel. A e koti so srefi den doro fu a tempel puru, di abi gowtu na tapu, èn a e seni den go na Sanherib. A sani disi e plisi na Asiriasma, ma soso fu wan syatu pisi ten nomo (2 Kownu 18:15, 16). A de krin taki Hiskia e kon frustan taki den Asiriasma no sa libi Yerusalem langa sondro fu trobi en. Fu dati ede a musu sreka sani. A pipel e tapu den watra fonten di ben kan gi watra na den Asiriasma di e broko kon. Hiskia e meki den fortresi fu Yerusalem kon tranga tu èn a e tyari furu fetisani kon na wan, so srefi „bogobogo peiri nanga skelt”.​—2 Kroniki 32:4, 5.

6. Tapu suma Hiskia e frutrow?

⁶ Ma Hiskia e frutrow tapu Yehovah fu den legre, èn no tapu den koni taktik fu feti noso tapu den fortresi. A e gi den srudati edeman fu en deki-ati: „Abi deki-ati èn de tranga. No frede noso skreki fu a kownu fu Asiria ede èn fu a heri ipi sma di de nanga en; bika moro sma de nanga wi leki nanga den. Wan anu di meki fu skin de nanga en, ma Yehovah, wi Gado, de nanga wi fu yepi wi èn fu feti den feti fu wi.” A pipel gi yesi èn e bigin „frutrow tapu den wortu fu Hiskia, a kownu fu Yuda” (2 Kroniki 32:7, 8). Pruberi fu si na ini yu prakseri den span sani di e kon now te wi e go luku syatu kapitel 36 te go miti 39 fu a profeititori fu Yesaya.

Rabsakei E Tyari a Tori fu En Kon Na Fesi

7. Suma na Rabsakei, èn fu san ede den seni en go na Yerusalem?

⁷ Sanherib e seni Rabsakei (wan srudati titel, a no wan nen fu wan sma) makandra nanga tu tra sma di abi wan hei posisi  go na Yerusalem fu aksi a foto fu gi abra (2 Kownu 18:17). Dri fu den sma di e teki presi gi Hiskia, Elyakim, a basya fu na oso fu Hiskia, Sebna, a sekretarsi, nanga Yoa, a manpikin fu Asaf, a skrifiman, e waka go miti den dorosei a skotu fu a foto.​—Yesaya 36:2, 3.

8. Fa Rabsakei e pruberi fu broko a fasi fa Yerusalem e kakafutu gi en?

⁸ A sani di Rabsakei abi na prakseri no muilek — a musu overtoigi Yerusalem fu gi abra sondro wan feti. A e taki na ini Hebrewtongo èn e bari fosi: „San na a sani disi di yu frutrow na tapu? . . . Tapu suma yu frutrow dan, taki yu opo yusrefi teige mi?” (Yesaya 36:4, 5). Baka dati Rabsakei e spotu den Dyu di kon frede, èn a e memre den taki den de krinkrin den wawan. Na suma den kan go fu suku yepi? ¿Na a „ken disi di masi”, Egipti? (Yesaya 36:6) Na a ten dati, Egipti trutru gersi wan ken di masi; fu taki en leti, Etiopia teki a kondre dati di ben de wan grontapumakti fosi, abra fu wan syatu pisi ten, èn a sma di de Farao fu Egipti now, Kownu Tirhaka, a no wan Egiptisma, ma wan Etiopiasma. Èn Asiria de fu wini en (2 Kownu 19:8, 9). Fu di Egipti no man frulusu ensrefi, dan a no sa man yepi Yuda.

9. San kande e meki taki Rabsakei e taki dati Yehovah ben sa gowe libi a pipel fu En, ma san na den tru tori?

⁹ Rabsakei e sori now taki Yehovah no sa feti gi a pipel fu En bika a no feni den bun. Rabsakei e taki: „Efu yu e taigi mi: ’Tapu Yehovah, wi Gado, wi frutrow’, ¿dan a no en na a sma di Hiskia puru den hei presi nanga den altari fu en?” (Yesaya 36:7) A no de fu taki dati den Dyu no drai den baka kwetikweti gi Yehovah fu di den broko den hei presi nanga den altari fu a kondre puru, ma trutru den drai kon baka na Yehovah.

10. Fu san ede a no de prenspari efu den sma di e feti gi Yuda furu noso no furu?

¹⁰ Baka dati Rabsakei e memre den Dyu taki na srudati sei den Asiriasma moro bun srefisrefi na ala fasi. A e kon nanga  a heimemre tyalensi disi: „Meki mi gi yu tu dusun asi fu si efu yu, fu yu sei, man poti tyariman na den tapu” (Yesaya 36:8). Ma te yu e luku en bun, ¿a de wan prenspari sani efu den asi-tyariman fu Yuda di leri feti, furu noso no furu? Nôno, bika a frulusu fu Yuda no e anga fu a tranga di den moro tranga na srudati sei. Odo 21:31 e fruklari afersi na a fasi disi: „Na asi na wan sani di sreka gi a dei fu feti, ma frulusu na fu Yehovah.” Baka dati Rabsakei e taki dati Yehovah e blesi den Asiriasma, èn no den Dyu. Noso, na so a e taki, den Asiriasma noiti no ben kan go so fara na ini a kontren fu Yuda.​—Yesaya 36:9, 10.

11, 12. (a) Fu san ede Rabsakei wani taki nomonomo na ini „a tongo fu den Dyu”, èn fa a e pruberi fu kori den Dyu di e arki? (b) Sortu krakti den sani di Rabsakei taki ben sa kan abi tapu den Dyu?

¹¹ Den man di e teki presi gi Hiskia e broko den ede nanga a krakti di den sani di Rabsakei e taki, sa abi tapu den man di kan yere en komoto na a tapusei pisi fu a skotu fu a foto. Den Dyu heihei-man disi e aksi: „Grantangi, taki nanga den futuboi fu yu na ini a Siriatongo, bika wi e arki; èn no taki nanga wi na ini a tongo fu den Dyu so taki a pipel di de na tapu a skotu e yere” (Yesaya 36:11). Ma Rabsakei no wani taki na ini a Siriatongo. ¡A wani sai tweifri nanga frede na ini den Dyu, so taki den sa gi abra èn a kan wini Yerusalem sondro wan feti! (Yesaya 36:12) Fu dati ede na Asiriasma e taki agen na ini „a tongo fu den Dyu”. A e warskow den sma di e libi na ini Yerusalem: „No meki Hiskia kori unu, bika a no man frulusu unu.” Baka dati a e pruberi fu kori den sma di e arki en, fu di a e taki fu a sortu libi di den Dyu ben kan abi na ondro a tiri fu Asiria: „Un gi unsrefi abra na mi èn kon na mi, èn meki ibriwan fu unu nyan fu en eigi droifibon èn ibriwan fu unu nyan fu en eigi figabon èn ibriwan fu unu dringi watra fu en eigi watrabaki, te leki mi e kon èn trutru sa tyari unu go na wan kondre leki un eigi kondre, wan kondre fu siri-nyanyan nanga nyun win, wan kondre fu brede nanga droifidyari.”​—Yesaya 36:13-17.

 ¹² Den Dyu no sa koti nyanyan a yari disi. A broko di Asiria broko go na ini a kondre meki taki den no man prani sani. A fruwakti fu nyan droifi di lai nanga sap èn fu dringi kowru watra, musu e hari a prakseri fu den man srefisrefi di e arki na tapu a skotu. Ma Rabsakei no kaba ete fu pruberi fu meki a bribi fu den Dyu kon swaki.

13, 14. Fu san ede a sani di ben pasa nanga Samaria no abi noti fu du nanga a situwâsi fu Yuda, ala di Rabsakei e taki dati a de tra fasi?

¹³ Rabsakei e kari wan tra sani fu den furu sani di a e taki. A e warskow den Dyu fu no bribi Hiskia efu a ben sa taki: „Yehovah srefi sa frulusu wi.” Rabsakei e memre den Dyu taki den gado fu Samaria no ben man tapu den Asiriasma fu wini den tin lo. Èn fa a de nanga den gado fu den tra nâsi di Asiria wini? „Pe den gado fu Hamat nanga Arpad de?” a e aksi. „Pe den gado fu Sefarfaim de? ¿Èn den frulusu Samaria puru na mi anu?”​—Yesaya 36:18-20.

¹⁴ A no de fu taki dati Rabsakei, wan anbegiman fu falsi gado, no sabi taki wan bigi difrenti de na mindri Samaria di fadon komoto na bribi, nanga Yerusalem di de na ondro a tiri fu Hiskia. Den falsi gado fu Samaria no ben abi a makti fu frulusu a tin-lo kownukondre (2 Kownu 17:7, 17, 18). Na a tra sei, Yerusalem di de na ondro a tiri fu Hiskia, drai baka gi den falsi gado èn go dini Yehovah baka. Ma den dri sma fu Yudea di e teki presi gi Hiskia, no e pruberi fu tyari dati kon na krin gi Rabsakei. „Den ben tan pî èn den no ben piki en no wan wortu, bika a komando fu a kownu ben de: ’Unu no musu piki en’” (Yesaya 36:21). Elyakim, Sebna nanga Yoa e drai go baka na Hiskia èn e taigi en den sani di Rabsakei taki.​—Yesaya 36:22.

Hiskia E Teki wan Bosroiti

15. (a) Sortu bosroiti Hiskia musu teki now? (b) Sortu dyaranti Yehovah e gi a pipel fu en?

¹⁵ Kownu Hiskia musu teki wan bosroiti now. ¿Yerusalem  sa gi abra na den Asiriasma? wroko makandra nanga Egipti? noso kakafutu gi den èn feti? Hiskia de na ini bigi banawtu. A e go na a tempel fu Yehovah, ala di a e seni Elyakim nanga Sebna, makandra nanga den owruman fu den priester, fu go aksi Yehovah bodoi nanga mofo fu a profeiti Yesaya (Yesaya 37:1, 2). Den boskopuman fu a kownu di e weri saka e taigi Yesaya, taki: „A dei disi na wan dei fu banawtu èn fu kisi piri-ai èn fu asrantifasi di e gi syen . . . Kande Yehovah, yu Gado, sa yere den sani di Rabsakei taki, di a kownu fu Asiria, en masra, ben seni kon fu spotu a libi Gado, èn trutru A sa aksi en frantwortu fu den wortu di Yehovah, yu Gado, yere” (Yesaya 37:3-5). ¡Iya, den Asiriasma e tyalensi a libi Gado! ¿Yehovah sa poti prakseri na den sani di den e taki fu spotu en? Nanga mofo fu Yesaya, Yehovah e gi den Dyu a dyaranti disi: „No frede fu den wortu ede di yu yere,  di den dinari fu a kownu fu Asiria taki fu mi na wan skempi fasi. Luku, mi e poti wan yeye na ini en, èn a musu yere wan boskopu èn drai go baka na en eigi kondre; èn trutru mi sa meki a fadon nanga a feti-owru na ini en eigi kondre.”​—Yesaya 37:6, 7.

16. Sortu brifi Sanherib e seni kon?

¹⁶ Na a srefi ten, sma kari Rabsakei fu de na a sei fu Sanherib ala di a kownu e feti na Libna. Baka ten Sanherib sa du wan sani nanga Yerusalem (Yesaya 37:8). Toku a gowe di Rabsakei e gowe, no e tyari wan kaba kon na a banawtu di Hiskia de na ini. Sanherib e seni brifi fu tapu skreki gi en pe den e skrifi san den sma di e libi na ini Yerusalem kan fruwakti efu den no wani gi abra: „Yusrefi yere san  den kownu fu Asiria ben du nanga ala den kondre fu di den ben pori den, ¿èn yusrefi sa kisi frulusu? ¿Den gado fu den nâsi di den fositen tata fu mi ben pori, ben frulusu den? . . . Pe a kownu fu Hamat de, nanga a kownu fu Arpad nanga a kownu fu a foto Sefarfaim — fu Hena èn fu Ifa?” (Yesaya 37:9-13) Te yu luku en bun, dan den Asiriasma e taki dati a de wan don sani fu kakafutu gi den. ¡Te den sma fu Yerusalem sa kakafutu gi den, dan dati sa tyari soso moro problema kon!

17, 18. (a) San na a sani di e buweigi Hiskia fu aksi Yehovah fu gi en kibri? (b) Fa Yehovah e piki na Asiriasma nanga mofo fu Yesaya?

¹⁷ Fu di Hiskia e broko en ede srefisrefi nanga den bakapisi fu a bosroiti di a musu teki, meki a e bradi den brifi fu Sanherib na fesi Yehovah na ini a tempel (Yesaya 37:14). Na ini wan opregti begi a e aksi Yehovah tangitangi fu poti prakseri na den sani di na Asiriasma skrifi fu tapu skreki gi en èn a e tapu a begi fu en nanga den wortu disi: „Èn now, o Yehovah, wi Gado, frulusu wi fu na anu fu en, so taki ala den kownukondre fu grontapu kan kon sabi taki yu, o Yehovah, yu wawan na Gado” (Yesaya 37:15-20). A sani disi e sori krin taki Hiskia e broko en ede spesrutu, no nanga a frulusu di Yehovah sa frulusu en, ma nanga a syen di sa kon na tapu a nen fu Yehovah efu Asiria e wini Yerusalem.

¹⁸ Yehovah e gebroiki Yesaya fu piki a begi fu Hiskia. Yerusalem no musu gi abra na Asiria; a musu kakafutu gi en. Yesaya e taki sondro frede a boskopu di Yehovah abi gi na Asiriasma, neleki a e taki nanga Sanherib: „A nyunwenke umapikin fu Sion wisiwasi yu, a spotu yu. Na yu baka na umapikin fu Yerusalem seki en ede [na wan spotu fasi]” (Yesaya 37:21, 22). Fu taki en leti, dan Yehovah e taki moro fara baka dati: ’Suma na yu taki yu e spotu a Santawan fu Israèl? Mi sabi den sani di yu e du. Yu e angri fu kisi makti srefisrefi; yu e skepi srefisrefi. Yu frutrow tapu a makti fu den srudati fu yu èn yu wini furu kondre. Ma sma kan wini  yu. Mi sa bruya den sani di yu abi na prakseri. Mi sa wini yu. Dan mi sa du nanga yu soleki fa yu du nanga trawan. ¡Mi sa poti wan aka na ini yu noso èn mi sa tyari yu go baka na Asiria!’​—Yesaya 37:23-29.

„Disi Sa De a Marki Gi Yu”

19. Sortu marki Yehovah e gi Hiskia, èn san a wani taki?

¹⁹ Sortu dyaranti Hiskia abi taki a profeititori fu Yesaya sa kon tru? Yehovah e piki: „Disi sa de a marki gi yu: A yari disi sma sa nyan fu den siri di ben fadon èn di e gro, èn na ini a di fu tu yari sma sa nyan siri-nyanyan di e gro fu densrefi; ma un sai siri èn koti a nyanyan na ini a di fu dri yari, èn prani droifidyari èn nyan den froktu fu den” (Yesaya 37:30). Yehovah sa sorgu gi nyanyan gi den Dyu di fasi na ini a foto. Ala di den no man prani siri fu di Asiria teki a foto abra, toku den sa man nyan a nyanyan di den piki fu san den kotiman libi na baka a yari di pasa. A yari na baka, wan sabayari, den no musu wroko den gron fu den, ala di a situwâsi fu den muilek srefisrefi (Exodus 23:11). Yehovah e pramisi taki efu a pipel e gi yesi na a sten fu en, dan nofo siri-nyanyan sa sproiti na ini den gron fu hori den na libi. Dan na ini a yari na baka, sma sa sai siri na a fasi fa den gwenti sai èn nyan bun fu den froktu fu a tranga wroko fu den.

20. Na sortu fasi den sma di lon gowe gi a feti di na Asiriasma e kon feti nanga den, sa „kisi rutu go na ondrosei èn sa gi froktu na tapusei”?

²⁰ Now Yehovah e teki a pipel fu en gersi wan sani di prani èn di sma no man rutu puru makriki: „Èn den wan fu na oso fu Yuda di lon gowe . . . trutru sa kisi rutu go na ondrosei èn sa gi froktu na tapusei” (Yesaya 37:31, 32). Iya, den wan di e frutrow tapu Yehovah no abi fu frede noti. Den nanga den bakapikin fu den sa tan fu ala ten na ini a kondre.

21, 22. (a) San Yehovah taki na fesi ini a tori fu Sanherib? (b) Fa èn o ten den sani kon tru di Yehovah taki ini a tori fu Sanherib?

²¹ Fa a de nanga den sani di Asiria e taki fu tapu skreki gi  Yerusalem? Yehovah e piki: „A no sa kon na ini a foto disi, èn a no sa sutu wan peiri drape, èn a no sa kon na en fesi nanga wan skelt, èn a no sa opo wan dan fu lontu en. Na a pasi di a ben kon, na a srefi pasi a sa drai go baka, èn a no sa kon na ini a foto disi” (Yesaya 37:33, 34). Te yu luku en bun, dan no wan feti sa de na mindri Asiria nanga Yerusalem kwetikweti. A de wan fruwondru sani taki na den Asiriasma, no den Dyu, di sa lasi sondro wan feti.

²² Soleki fa Yehovah ben taki, dan a e seni wan engel di e  kiri den moro bun srudati fu a legre fu Sanherib — 185.000 man. Soleki fa a sori, dan disi e feni presi na Libna, èn te Sanherib srefi e wiki, dan a e si taki den fesiman, edeman nanga tranga man fu en legre dede. A e firi syen èn e drai go baka na Ninifei, ma ala di a e lasi hebi, toku na wan tranga-ede fasi a e tan gi ensrefi na a falsi gado fu en, Nisrok. Wan tu yari baka dati, di Sanherib e anbegi na ini a tempel fu Nisrok, dan tu fu den manpikin fu en kiri en. Ete wan tron a e kon na krin taki Nisrok di no abi libi, no abi a krakti fu frulusu sma.​—Yesaya 37:35-38.

A Bribi fu Hiskia E Meki Kon Moro Tranga

23. Na ini sortu muilek situwâsi Hiskia de, te Sanherib e kon feti nanga Yuda fosi, èn san a muilek situwâsi disi wani taki?

²³ Na a ten te Sanherib e kon feti nanga Yuda fosi, dan Hiskia e kon siki tranga. Yesaya e taigi en taki a o dede (Yesaya 38:1). A kownu di abi 39 yari, brokosaka srefisrefi. A e broko en ede no nanga en eigi tanbun wawan, ma so srefi nanga a tamara fu a pipel. Yerusalem nanga Yuda de na ini kefar taki den Asiriasma o broko go na ini den. Efu Hiskia dede, dan suma sa teki fesi na ini a feti? Na a ten dati, Hiskia no abi wan manpikin fu teki a tirimakti abra. Na ini wan fayafaya begi Hiskia e aksi Yehovah tangitangi fu sori sari-ati gi en.​—Yesaya 38:2, 3.

24, 25. (a) Fa Yehovah sori bunfasi gi Hiskia di A piki a begi fu en? (b) Sortu wondru Yehovah e du, soleki fa a skrifi na Yesaya 38:7, 8?

²⁴ Yesaya no gowe libi den fesi dyari fu a paleisi ete te Yehovah e seni en fu go baka na a bedi fu a siki kownu nanga wan tra boskopu: „Mi yere a begi fu yu. Mi si den watra-ai fu yu. Luku, mi e gi yu ete tinafeifi yari fu libi; èn mi sa frulusu yu nanga a foto disi fu na anu fu a kownu fu Asiria, èn mi sa feti gi a foto disi” (Yesaya 38:4-6; 2 Kownu 20:4, 5). Yehovah sa sori nanga wan tumusu aparti marki taki a pramisi fu en de wan seiker sani: „Luku, mi e meki a skaduw fu den  tren di fu a son ede ben saka kon na tapu den tren fu a trapu fu Akas, go tin tren na baka.”​—Yesaya 38:7, 8a.

²⁵ Soleki fa a Dyu historia skrifiman Josephus e taki, dan wan trapu ben de na ini a paleisi fu kownu, èn kande wan pilari ben de krosibei fu en. Te a son e skèin tapu a pilari, dan wan skaduw e kon tapu a trapu. Te wan sma ben wani sabi o lati a de, dan a ben kan luku o fara a skaduw kren tapu den tren. Now Yehovah sa du wan wondru. Baka te a skaduw e saka safrisafri tapu den tren na a fasi fa a gwenti saka, dan a sa go na baka nanga tin tren. Suma yere oiti fu so wan sani? Bijbel e taki: „Èn safrisafri a son ben go tin tren na baka na tapu den tren fu a trapu pe a ben saka” (Yesaya 38:8b). Syatu baka dati, Hiskia e kon betre. Nyunsu fu a sani disi e panya go so fara leki Babilon. Te a kownu fu Babilon e yere fu a sani dati, dan a e seni boskopuman go na Yerusalem fu kon sabi den tru tori.

26. San na wan fu den bakapisi fu di Yehovah meki Hiskia libi moro langa?

²⁶ So wan dri yari baka di Hiskia kon betre na wan wondru fasi, dan en fosi manpikin, Manase, e gebore. ¡Te Manase e gro kon bigi, dan a no e sori warderi gi a sari-ati fu Gado, di sondro dati a no ben sa gebore! Na presi fu dati, na ini a moro bigi pisi fu en libi, Manase du furu sani di takru na ini Yehovah ai.​—2 Kroniki 32:24; 33:1-6.

Wan Fowtu ini a Fasi fa A E Si Sani

27. Na sortu fasi Hiskia e sori warderi gi Yehovah?

²⁷ Hiskia na wan man di abi bribi, neleki en fositen tata David. A e warderi a Wortu fu Gado. Soleki fa Odo 25:1 e sori, dan na en ben seti sani meki sma tyari den sani kon na wan di wi kan feni now na Odo kapitel 25 te go miti 29. Son sma e denki taki na en ben skrifi a di fu 119 Psalm tu. A singi fu Hiskia di e sori den firi fu tangi fu en èn di a skrifi baka di a kon betre, e sori taki a de wan man di abi furu warderi gi  sani. A e kon na a bosroiti taki a moro prenspari sani na ini a libi na taki wi man prèise Yehovah na ini a tempel fu En „ala den dei fu wi libi” (Yesaya 38:9-20). ¡Meki a de so, taki wi alamala e denki na a srefi fasi fu a soifri anbegi!

28. Sortu fowtu Hiskia meki ini a fasi fa a e si sani, wan pisi ten baka di Yehovah meki en kon betre na wan wondru fasi?

²⁸ Ala di Hiskia de getrow, toku a de onvolmaakti. Wan pisi ten baka di Yehovah meki en kon betre, Hiskia e meki wan seryusu fowtu ini a fasi fa a e si sani. Yesaya e fruteri: „Na a ten dati, Merodak-baladan, a manpikin fu Baladan, a kownu fu Babilon, ben seni brifi nanga wan presenti gi Hiskia, baka di a ben yere taki a ben siki, ma ben kisi krakti baka. Fu dati ede Hiskia ben bigin prisiri nanga den èn ben sori den na oso pe a ben poti den gudu fu en, a solfru nanga a gowtu nanga a balsem oli nanga a bun oli nanga a heri maksin fu fetisani fu en èn ala sani di ben de fu feni na ini den gudu fu en. A ben kon na krin taki noti no ben de di Hiskia no ben sori den na ini en eigi oso èn na ini a heri kontren pe a ben tiri.”​—Yesaya 39:1, 2. *

29. (a) San kan de a reide fu san ede Hiskia e sori a gudu fu en na den sma di komoto na Babilon? (b) San sa de a bakapisi fu a fowtu di Hiskia meki ini a fasi fa a si sani?

²⁹ Srefi baka te na engel fu Yehovah e naki Asiria na wan ogri fasi, toku Asiria e tan de wan kefar ete gi furu nâsi, so srefi gi Babilon. Kande Hiskia wani sori a kownu fu Babilon o kefalek a de, so taki a kan wroko makandra nanga en na ini a ten di e kon. ¡Ma Yehovah no wani taki den sma di e libi na ini Yerusalem abi demakandra nanga den feanti fu den; a wani taki den musu frutrow tapu en! Yehovah e gebroiki a  profeiti Yesaya fu tyari kon na krin gi Hiskia san o pasa na ini a ten di e kon: „Dei e kon, èn ala sani di de na ini yu eigi oso èn di den fositen tata fu yu tyari kon na wan te na a dei disi, den sa tyari gowe na Babilon trutru. Noti sa tan abra . . . Èn son wan fu den eigi manpikin fu yu, di sa komoto na yu, èn di yu sa tron papa fu den, densrefi sma sa teki èn trutru sa tron dinari fu kownu na ini a paleisi fu a kownu fu Babilon” (Yesaya 39:3-7). Iya, a srefi nâsi di Hiskia ben wani sori o kefalek a de, te fu kaba sa fufuru den gudu fu Yerusalem èn dwengi den sma di e libi na ini fu go na ini katibo. A sori di Hiskia e sori den gudu fu en na den Babilonsma, de soso fu wiki a gridi lostu fu den.

30. Fa Hiskia ben sori taki a ben abi wan yoisti fasi fu denki?

³⁰ Soleki fa a sori, dan 2 Kroniki 32:26 e sori go na a tori di Hiskia ben sori den Babilonsma a gudu fu en: „Hiskia ben saka ensrefi fu a heimemre fasi fu en ati ede, en nanga den sma di e libi na ini Yerusalem, èn na atibron fu Yehovah no ben kon na den tapu na ini den dei fu Hiskia.”

31. Fa sani ben waka nanga Hiskia, èn san disi e leri wi?

³¹ Ala di Hiskia ben de onvolmaakti, toku a ben de wan man di abi bribi. A ben sabi taki a Gado fu en, Yehovah, na wan trutru sma di abi firi. Te Hiskia ben de na ini banawtu, dan a ben begi Yehovah fayafaya, èn Yehovah ben yere a begi fu en. Yehovah Gado ben gi en vrede moro fara na ini den yari di a ben de na libi ete, èn Hiskia ben de nanga tangi na ati fu dati (Yesaya 39:8). Na so Yehovah musu de wan trutru sma gi wi na ini a ten disi. Te problema e opo ede kon, dan meki a de so, taki neleki Hiskia, wi e frutrow tapu Yehovah fu gi wi koni èn fu sori wi fu lusu den, „bika a e gi ala sma pasa marki èn sondro fu sori en tapu en fowtu” (Yakobus 1:5). Efu wi e tan horidoro èn e poti bribi na ini Yehovah, dan wi kan de seiker taki a sa tron „a sma di e pai den wan di e suku en seryusu”, now èn na ini a ten di e kon.​—Hebrewsma 11:6.

[Futuwortu]

[Aksi fu a tori disi]

[Prenki na tapu bladzijde 383]

Kownu Hiskia e frutrow tapu Yehovah te a e kisi fu du nanga a makti fu Asiria

 [Prenki di e tapu heri bladzijde 384]

[Prenki na tapu bladzijde 389]

A kownu e seni boskopuman go na Yesaya fu arki a rai fu Yehovah

[Prenki na tapu bladzijde 390]

Hiskia e begi taki a nen fu Yehovah musu kisi glori te Asiria fadon

[Prenki na tapu bladzijde 393]

Na engel fu Yehovah e kiri 185.000 Asiriasma