Kapitel Tutenti Na Seibi

Yehovah E Kanti En Atibron na Tapu den Nâsi

Yesaya 34:1-17

1, 2. (a) Fu sortu sani wi kan de seiker ini a tori fu a refensi di Yehovah sa teki? (b) San Gado du fu di a e teki refensi?

YEHOVAH GADO abi pasensi no wawan nanga den getrow futuboi fu en, ma te a e kruderi nanga a prakseri fu en, dan a abi pasensi tu nanga den feanti fu en (1 Petrus 3:19, 20; 2 Petrus 3:15). Kande den feanti fu Yehovah no e frustan fu san ede a abi pasensi èn kande den e prakseri taki a no man noso a no wani du wan sani. Toku, soleki fa a di fu dritenti na fo kapitel fu Yesaya e sori, dan te fu kaba, ala ten Yehovah e aksi den feanti fu en fu gi en frantwortu (Sefania 3:8). Wan pisi ten, Gado ben gi pasi taki Edom nanga tra nâsi gens a pipel fu en sondro taki A kon na mindri. Ma Yehovah ben abi en eigi reti ten fu strafu den (Deuteronomium 32:35). Na so, na a fasti ten fu en, Yehovah sa teki refensi tapu ala den pisi fu a disiten godelowsu grontapu di e tyalensi a soevereiniteit fu en.

² A moro prenspari marki fu san ede Gado e teki refensi, na fu sori a soevereiniteit fu en èn fu gi glori na a nen fu en (Psalm 83:13-18). A strafu di a e tyari kon e buweisi tu taki den futuboi fu en de sma di trutru e teki presi gi en èn a e frulusu den fu takru situwâsi. Boiti dati, te Yehovah e teki refensi, dan ala ten dati e kruderi krinkrin nanga a retidu fu en.​—Psalm 58:10, 11.

Poti Prakseri, Un Nâsi

3. Sortu kari Yehovah e gi den nâsi nanga mofo fu Yesaya?

³ Bifo Yehovah e poti prakseri na a strafu di a sa tyari kon  tapu Edom, A e gi ala den nâsi wan seryusu kari nanga mofo fu Yesaya: „Kon krosibei, un nâsi, fu yere; èn un nationaal grupu, poti prakseri. Meki grontapu èn a sani di e furu en, arki, a fatu gron nanga ala nyanyan di a meki” (Yesaya 34:1). Ibritron baka a profeiti taki nanga den godelowsu nâsi. Now a de fu taki syatu fu den krutu di Gado o tyari kon na den tapu. ¿Den warskow disi wani taki wan sani gi a ten fu wi?

4. (a) Sortu kari den nâsi e kisi taki den musu du, soleki fa a skrifi na Yesaya kapitel 34:1? (b) ¿A krutu di Yehovah e krutu den nâsi e sori taki a de wan ogri-ati Gado? (Luku a boksu tapu bladzijde 363.)

⁴ Iya. A Soeverein fu na universum abi wan strei nanga ala den pisi fu a godelowsu seti fu sani disi. Dati meki den „nationaal grupu” nanga „grontapu” e kisi a kari fu yere a boskopu di abi en gron tapu Bijbel èn di Yehovah meki taki sma meki en bekènti na heri grontapu. Nanga wortu di e meki wi memre Psalm 24:1, Yesaya e taki dati a heri grontapu sa yere a boskopu disi — wan profeititori di kon tru na ini a ten fu wi te Yehovah Kotoigi e preiki „te na a farawe presi fu grontapu” (Tori fu den Apostel 1:8). Ma den nâsi no arki a boskopu disi. Den no e si a warskow di e taki fu a kaba fu den di de fu kon, leki wan seryusu sani. A no de fu taki dati disi no sa tapu Yehovah fu meki a wortu fu en kon tru.

5, 6. (a) Fu sortu sani den nâsi musu gi Gado frantwortu? (b) Fa wi kan taki dati a tru taki „den bergi musu smèlter fu a brudu fu den ede”?

⁵ Now a profeititori e taki fu a takru tamara di e wakti den godelowsu nâsi — wan sani di de heri tra fasi leki a kefalek moi howpu di a pipel fu Gado abi èn di Yesaya e taki fu en baka ten (Yesaya 35:1-10). A profeiti e taki: „Yehovah ati e bron nanga ala den nâsi, èn en ati e bron nanga a heri legre fu den. A musu tyari wan pori kon na den tapu; a musu gi den na sma, meki den kiri den. Èn sma sa trowe den wan fu den di trawan kiri; èn fu a sei fu den dedeskin fu den, a tingi smeri fu den sa opo go na loktu; èn den bergi musu smèlter fu a brudu fu den ede.​—Yesaya 34:2, 3.

 ⁶ Yehovah e poti prakseri na a brudu paiman fu den nâsi. Na ini a ten disi, den nâsi fu Krestenhèit abi a moro bigi brudu paiman. Den furu grontapu krinkrin nanga a brudu fu libisma na ini tu grontapufeti èn na ini furu moro pikin feti. Suma nanga reti musu aksi geregtighèit fu ala a brudu paiman disi? No wan tra sma leki a Mekiman wawan, a gran Sma di e gi wi libi (Psalm 36:9). A wet fu Yehovah poti a markitiki: „Yu musu gi sili fu sili” (Exodus 21:23-25; Genesis 9:4-6). Soleki fa a wet disi e sori, dan a sa meki a brudu fu den nâsi lon — te leki den dede. A tingi smeri fu den dede skin fu den di no beri sa tapu a loktu. ¡Den dede trutru na wan syen fasi! (Yeremia 25:33) A brudu di Yehovah e aksi baka leki paiman sa de nofo fu smèlter noso pori, fu taki en so, den bergi (Sefania 1:17). Te den nâsi fu grontapu sa si taki den srudati legre fu den pori krinkrin, dan den sa si a fadon fu den tiri fu den, di sontron Bijbel e prenki leki bergi na ini profeititori.​—Danièl 2:35, 44, 45; Openbaring 17:9.

7. San na den „hemel”, èn san na a „legre fu hemel”?

⁷ Agen Yesaya e gebroiki wan krakti fasi fu prenki sani te a e taki moro fara: „A heri legre fu hemel musu pori gowe. Èn den musu lolo hemel tapu, neleki wan bukulolo; èn en heri legre sa krempi, neleki fa den wiwiri e krempi èn e fadon komoto na a droifibon èn neleki fa wan figa di krempi e fadon komoto na a figabon” (Yesaya 34:4). Den wortu „a heri legre fu hemel” no wani taki den trutru stari nanga planeiti. Vers 5 nanga 6 e taki fu wan feti-owru di Yehovah e gebroiki fu kiri sma èn di e furu nanga brudu na ini den „hemel” dati. Fu dati ede, a sani disi musu e prenki wan sani na ini a kontren fu libisma (1 Korentesma 15:50). Fu di den tiri fu libisma hei leki hei tirimakti, meki Bijbel e agersi den nanga hemel di e tiri a libisma libimakandra di de na grontapu (Romesma 13:1-4). So bun, ’a legre fu hemel’ e prenki ala den legre fu den tiri disi fu a libisma famiri makandra.

8. Fa a kon na krin taki den agersi hemel de „neleki wan bukulolo”, èn san e pasa nanga den „legre” fu den?

 ⁸ A „legre” disi sa „pori gowe”, broko na pisipisi, leki wan sani di kan pori (Psalm 102:26; Yesaya 51:6). Gi a soso ai, a gersi taki a trutru hemel di de na tapu gersi wan bo, neleki wan owruten bukulolo di sma ben gwenti skrifi na a inisei pisi. Te a leisiman leisi den sani di skrifi na a inisei pisi fu wan lolo, dan a e lolo a bukulolo di a kaba leisi èn e poti en na wan sei. Na a srefi fasi „den musu lolo hemel tapu, neleki wan bukulolo”, dati wani taki, den libisma tiri musu kon  na a kaba fu den. Fu di den doro a lasti pisi fu a ten fu den, meki Yehovah musu tyari den kon na wan kaba na Armagedon. Den „legre” fu den di e meki sma fruwondru, sa fadon neleki fa drei wiwiri e fadon komoto na wan droifibon noso neleki fa „wan figa di krempi” fadon komoto na wan figabon. A ten fu den sa pasa kaba.​—Teki gersi Openbaring 6:12-14.

Wan Dei fu Tyari Strafu Kon

9. (a) Fu sortu famirilin Edom komoto, èn sortu banti gro na mindri Israèl nanga Edom? (b) San Yehovah e bosroiti ini a tori fu Edom?

⁹ Now a profeititori e taki spesrutu fu wan nâsi di de na ini a ten fu Yesaya — Edom. Den Edomsma na bakapikin fu Esau (Edom), di ben seri a reti di a ben abi leki fosi geborewan gi en twelengi brada, Yakob, fu kisi brede nanga nyanyan fu linze (Genesis 25:24-34). Fu di Yakob ben kon abi a reti fu a fosi geborewan di Esau ben musu kisi, meki Esau no ben wani si en brada na ai srefisrefi. Baka ten a nâsi Edom nanga a nâsi Israèl ben tron feanti, ala di den ben de bakapikin fu twelengi brada. Fu a feanti fasi disi di Edom ben abi nanga a pipel fu Gado, meki a tyari na atibron fu Yehovah kon na en tapu, èn A e taki now: „Fu tru, na ini hemel mi sa meki mi feti-owru kon furu nanga brudu. ¡Luku! Na tapu Edom a sa saka kon, èn na tapu a pipel di mi sa pori na ini retidu. Yehovah abi wan feti-owru; a musu kon furu nanga brudu; a musu lobi en nanga a fatu, nanga a brudu fu yongu manskapu nanga bokoboko, nanga a fatu fu den niri fu den manskapu. Bika Yehovah abi wan srakti-ofrandi na Bosra, èn a kiri furu meti na ini a kondre Edom.”​—Yesaya 34:5, 6.

10. (a) Suma Yehovah e meki fadon te a e gebroiki en feti-owru „na ini hemel”? (b) Fa Edom e tyari ensrefi te Babilon e feti nanga Yuda?

¹⁰ Edom e tan na wan hei bergikontren (Yeremia 49:16; Obadya 8, 9, 19, 21). Ma toku srefi den bergi disi di de leki fortresi no sa kibri den te Yehovah e gebroiki en feti-owru fu  krutu sma „na ini hemel” èn na so fasi e saka den tiriman fu Edom fu a hei posisi fu den. Edom abi kefalek furu srudati nanga fetisani, èn den fetilegre fu en e waka na ini den hei bergi fu kibri a kondre meki ogri no miti en. Ma a tranga Edom no e kon fu yepi Yuda te den legre fu Babilon e feti nanga en. Na presi fu dati, Edom e prisiri srefisrefi te a e si fa a kownukondre Yuda e fadon èn e gi tranga na den sma di e wini Yuda (Psalm 137:7). Edom e suku srefi den Dyu di  e lon gowe fu kibri a libi fu den èn a e gi den abra na den Babilonsma (Obadya 11-14). Den Edomsma abi na prakseri fu teki a kondre fu den Israèlsma di den gowe libi na baka, èn den e dyaf te den e taki nanga Yehovah.​—Esekièl 35:10-15.

11. Fa Yehovah sa pai den Edomsma baka fu di den tyari densrefi na wan feradelek fasi?

¹¹ ¿Yehovah e gi den Edomsma pardon taki den no e tyari densrefi leki wan brada? Nôno. Na presi fu dati a e taki na fesi ini a tori fu Edom: „Den werdri mankaw musu go na ondro nanga den, èn yongu mankaw nanga den trangawan; èn a kondre fu den musu kon furu nanga brudu, èn sma sa lobi srefi a doti fu den nanga a fatu” (Yesaya 34:7). Yehovah e taki fu den moro bigiwan nanga den moro mendriwan na ini a nâsi leki agersi werdri mankaw nanga yongu mankaw, leki yongu manskapu nanga bokoboko. A kondre fu a nâsi disi di abi brudu paiman musu kon furu nanga a brudu fu a pipel srefi nanga yepi fu a „feti-owru” di Yehovah sa gebroiki fu kiri den.

12. (a) Suma Yehovah e gebroiki fu tyari strafu kon tapu Edom? (b) San a profeiti Obadya e taki na fesi ini a tori fu Edom?

¹² Gado abi na prakseri fu strafu Edom fu san a du na wan ogri-ati fasi nanga En organisâsi di de na grontapu èn di abi a nen Sion. A profeititori e taki: „Yehovah abi wan dei fu teki refensi, wan yari fu tyari strafu kon tapu sma gi a krutu afersi fu Sion” (Yesaya 34:8). No langa baka te Yerusalem kisi pori na ini 607 b.G.T., dan Yehovah e gebroiki a kownu fu Babilon, Nebukadnesar, fu bigin teki refensi na wan regtfardiki fasi tapu den Edomsma (Yeremia 25:15-17, 21). ¡Te den legre fu Babilon e hari go feti nanga Edom, dan no  wan sani kan frulusu den Edomsma! A de „wan yari fu tyari strafu kon” tapu a kondre dati di abi furu bergi. Yehovah e taki na fesi nanga mofo fu a profeiti Obadya: „Fu na ogri ede di yu du nanga tranga nanga yu brada Yakob, meki syen sa tapu yu, èn sma sa musu koti yu puru te ten di no skotu. . . . Na a fasi fa yu du, na so sma sa du nanga yu. A fasi fa yu e handri nanga sma sa drai kon baka na tapu yu eigi ede.”​—Obadya 10, 15; Esekièl 25:12-14.

A Takru Tamara fu Krestenhèit

13. Suma na ini a ten disi de leki Edom, èn fu san ede?

¹³ Wan organisâsi de na ini a ten disi di bow wan srefi nen leki di fu Edom. Sortu organisâsi? We, suma na ini a ten disi teki fesi fu skempi èn fu frufolgu den futuboi fu Yehovah? ¿A no Krestenhèit nanga yepi fu a grupu fu kerki tiriman fu en? ¡Iya! Krestenhèit hei ensrefi so hei neleki bergi na ini den afersi fu a grontapu disi. A e taki dati a abi wan hei posisi na ini a seti fu sani fu a libisma famiri, èn den relisi fu en na a moro prenspari pisi fu Babilon a Bigiwan. Ma Yehovah poti „wan yari fu tyari strafu kon” tapu a disiten Edom fu di a e handri na wan ogri-ati fasi nanga a pipel fu En, den Kotoigi fu En.

14, 15. (a) San o pasa nanga a kondre Edom èn nanga Krestenhèit? (b) San den wortu di e taki fu tara di e bron èn fu smoko di e tan te ten di no skotu, wani taki, èn san den no wani taki?

¹⁴ Fu dati ede, te wi e luku a tra pisi fu a pisi disi fu a  profeititori fu Yesaya, dan wi no e prakseri Edom fu owruten nomo, ma so srefi Krestenhèit: „Den liba fu en musu kenki kon tron tara, èn a doti fu en musu kenki kon tron swarfu, èn a kondre fu en musu tron leki tara di e bron. Sma no sa kiri a faya na netiten noso deiten; te ten di no skotu a smoko fu en sa tan opo go na loktu” (Yesaya 34:9, 10a). A kondre Edom e kon so drei taki a de neleki a doti ben de swarfu èn taki den liba ben kon furu, no nanga watra, ma nanga tara. ¡Baka dati, sma sa bron den sani disi di kan teki faya makriki!​—Teki gersi Openbaring 17:16.

¹⁵ Son sma si en leki wan buweisi taki wan faya hel de, fu di den e taki fu faya, tara nanga swarfu. Ma Edom no e fringi go na ini wan helfaya di de wan anansitori, fu bron fu têgo. Na presi fu dati, a kisi pori, èn a komoto na grontapu neleki a bron krinkrin nanga faya èn nanga swarfu. Soleki fa a profeititori e sori moro fara, dan te fu kaba, a bakapisi no de taki a kisi têgo skin-ati, ma taki a tron wan „presi pe no wan sma e libi na ini . . . [wan] presi di tron busibusi . . . [èn] tron noti” (Yesaya 34:11, 12). A smoko di e ’opo go na loktu te ten di no skotu’ e sori disi na wan fasi di de krin fu frustan. Te wan oso e bron, dan smoko e tan komoto na den asisi wan pisi ten baka te den flam dede krinkrin, èn dati e gi sma di e luku a buweisi taki wan bigi faya ben de drape. Fu di Kresten na ini a ten disi e leri wan sani fu a pori di kon na tapu Edom, dan na wan fasi a smoko fu a bron di Edom ben bron e opo go na loktu ete.

16, 17. San Edom o tron, èn o langa a o tan na ini a situwâsi dati?

¹⁶ A profeititori fu Yesaya e go doro fu taki na fesi taki werdri meti sa kon na ini a presi fu den libisma di e libi na ini Edom èn e sori nanga dati taki wan pori o kon: „Fu geslakti te go miti geslakti a sa bron; fu têgo èn fu ala ten no wan sma no sa pasa na ini en. Èn a pelikaan nanga a dyindyamaka musu teki en abra, èn langayesi owrukuku nanga den raaf srefi sa tan na ini en; èn a musu bradi na en tapu a  markitiki fu presi pe no wan sma e libi na ini èn den ston fu presi di tron busibusi. Den heihei-sma fu en — no wan de drape di sma kan kari fu kan tron kownu, èn srefi ala den granman fu en sa tron noti. Na tapu den toren pe a e tan, maka musu gro, krasiwiwiri èn takru wiwiri di abi maka musu gro na den fortresi fu en; èn a musu tron wan tanpresi gi den jakhals, a fesi dyari gi den struisvogel. Èn den wan di e kon furutron na den kontren sondro watra musu miti meti di e bari krei, èn srefi den ogri yeye di gersi bokoboko sa kari go na en kompe. Iya, drape a yorkafowru sa rostu trutru èn feni wan rostupresi gi ensrefi. Drape a peirisneki meki en nesi èn e meki eksi.”​—Yesaya 34:10b-15. *

¹⁷ Iya, Edom sa tron wan kondre pe no wan sma e libi na ini. A sa tron wan busibusi presi, èn sa abi soso werdri meti, fowru nanga sneki na ini. A drei situwâsi disi fu a kondre sa tan „fu têgo èn fu ala ten”, soleki fa vers 10 e taki. A no sa meki kon bun baka.​—Obadya 18.

A Wortu fu Yehovah Sa Kon Tru Seiker

18, 19. San na „a buku fu Yehovah”, èn san o pasa nanga Krestenhèit, soleki fa a „buku” disi e taki?

¹⁸ ¡Disi e sori trutru na fesi sortu takru tamara a disiten prenki dati fu Edom, Krestenhèit, sa abi! A sori taki a de wan bigi feanti fu Yehovah Gado, èn a e frufolgu den Kotoigi fu En na wan ogri-ati fasi. Èn a de wan seiker sani taki Yehovah sa meki a wortu fu en kon tru. Te wan sma e teki a profeititori gersi a kontru, dan a sa si taki den tu sa kruderi nanga makandra — neleki fa a de seiker taki ibriwan fu den meti di e tan na ini Edom di no abi sma na ini, ’abi den eigi  patna’. Yesaya e taigi sma di o de studenti fu Bijbel profeititori, taki: „Yusrefi suku na ini a buku fu Yehovah èn leisi tranga: no wan fu den no ben mankeri; te yu luku en bun, dan ibriwan fu den no e misi fu abi en eigi patna, bika na a mofo fu Yehovah di gi a komando, èn na a yeye fu en di tyari den kon na wan. Èn na En trowe a lot gi den, èn nanga a markitiki en eigi anu gi den a presi. Te ten di no skotu den sa teki en abra; den sa tan na ini fu geslakti te go miti geslakti.”​—Yesaya 34:16, 17.

¹⁹ „A buku fu Yehovah” taki na fesi fu a pori fu Krestenhèit di de fu kon. A „buku [disi] fu Yehovah” e taki finifini taki Yehovah sa aksi frantwortu fu den sma di de feanti fu en èn di no abi sari-ati èn di e kwinsi a pipel fu en sondro fu abi berow. Den sani di ben skrifi ini a tori fu Edom, ben kon tru, èn disi e tranga a frutrow di wi abi taki a profeititori di abi fu du nanga Krestenhèit, a disiten prenki fu Edom, sa kon tru na a srefi fasi. „A markitiki”, a fasi di Yehovah e gebroiki te a e du sani, e gi a dyaranti taki na organisâsi disi di de fu pori na yeye fasi, sa tron wan busibusi presi pe sma no e libi na ini.

20. San Krestenhèit o ondrofeni, neleki Edom fu owruten?

²⁰ ¡Krestenhèit e du ala san a man fu kowru na ati fu den politiek mati fu en, ma a de fu soso! Soleki fa Openbaring kapitel 17 nanga 18 e sori, dan na Almakti Gado, Yehovah, sa poti en na ini na ati fu den, fu du wan sani nanga Babilon a Bigiwan, so srefi Krestenhèit. A sani dati di den sa du, sa frulusu a heri grontapu fu a falsi Krestendom. A situwâsi fu Krestenhèit sa kon de leki a takru situwâsi di Yesaya kapitel 34 e taki fu en. ¡A no sa de srefi na a „feti fu a bigi dei fu Gado, na Almaktiwan”, di sa tyari wan kaba kon na ala sani! (Openbaring 16:14). Neleki Edom fu owruten, na so Krestenhèit sa figi puru krinkrin fu grontapu, „fu têgo èn fu ala ten”.

[Futuwortu]

[Aksi fu a tori disi]

 [Faki na tapu bladzijde 363]

¿Wan Gado Di De Nanga Atibron?

Wortu soleki den wan di de fu feni na Yesaya 34:2-7 meki furu sma denki taki Yehovah na wan ogri-ati Gado, di furu nanga atibron, soleki fa den Hebrew Buku fu Bijbel e taki fu en. ¿Dati de tru?

Nôno. Ala di wanwan leisi Gado e sori na atibron fu en, toku ala ten na atibron dati de yoisti. Ala ten a abi en gron tapu gronprakseri, no tapu firi di sma no man dwengi. Boiti dati, a sani di ala ten e pusu a Mekiman fu sori na atibron fu en, na a reti di a abi taki sma e gi densrefi na en wawan èn fu di a de getrow fu hori a waarheid hei. A lobi di Gado abi gi regtfardikifasi èn a lobi di a abi gi sma di e du regtfardikifasi e tiri na atibron fu en. Yehovah e si ala den tori di abi fu du nanga wan afersi èn a sabi ala sani fu wan situwâsi dorodoro (Hebrewsma 4:13). A e leisi na ati; a e si o furu sma sabi sani, o furu sma no e poti prakseri, noso o fara sma e du sondu fu espresi; èn a e handri sondro fu teki sma partèi.​—Deuteronomium 10:17, 18; 1 Samuèl 16:7; Tori fu den Apostel 10:34, 35.

Ma Yehovah Gado ’no e kisi atibron esi-esi èn a abi lobi bun-ati pasa marki’ (Exodus 34:6). A e sori sari-ati gi den sma di abi frede gi en èn di e du muiti fu du regtfardikifasi, bika na Almaktiwan e erken taki libisma gebore nanga onvolmaaktifasi èn fu dati ede a e sori sari-ati gi den. Na ini a ten disi, Gado e du disi tapu a gron fu a srakti-ofrandi fu Yesus (Psalm 103:13, 14). Na a yoisti ten, Yehovah e puru na atibron fu en fu den sma di e erken a sondu fu den èn di abi berow èn di e dini en trutru (Yesaya 12:1). Te yu luku en bun, dan Yehovah no de wan Gado di de nanga atibron, ma a de wan koloku Gado, no wan Gado di sma no man taki nanga en, ma wan Gado di na ini vrede èn na wan tiri fasi e teki den sma di e taki nanga en na wan yoisti fasi (1 Timoteus 1:11). Disi de heri tra fasi leki den eigifasi di sma e taki dati den falsi ogri-ati gado fu den heiden di de sondro sari-ati abi èn di den e sori na ini den prenki fu den popki fu den gado dati.

[Karta na tapu bladzijde 362]

(Efu yu wani si pe den sani disi skrifi, luku a buku)

Bigi Se

Damaskus

Sidon

Tirus

ISRAÈL

Dan

Se fu Galilea

Yordanliba

Megido

Ramot-gilead

Samaria

FILISTIA

YUDA

Yerusalem

Libna

Lakis

Berseba

Kades-barnea

Sowtu Se

AMON

Raba

MOAB

Kir-hariset

EDOM

Bosra

Teman

 [Prenki na tapu bladzijde 359]

Krestenhèit furu grontapu krinkrin nanga brudu

[Prenki na tapu bladzijde 360]

„Den musu lolo hemel tapu, neleki wan bukulolo”