Kapitel Feifi

Yehovah E Lagi den Sma Di E Hei Densrefi

Yesaya 2:6–4:1

1, 2. Fu san ede a profeiti boskopu fu Yesaya gi den Dyu fu en ten de prenspari gi wi?

FU DI a profeiti Yesaya e tegu gi a situwâsi fu Yerusalem nanga Yuda, meki a e taki nanga Yehovah Gado now èn e fruklari: „Yu gowe libi yu pipel, na oso fu Yakob” (Yesaya 2:6a). San meki taki Gado no ben wani a pipel moro di ensrefi ben teki leki en „spesrutu gudu”?​—Deuteronomium 14:2.

² A krutu di Yesaya ben krutu den Dyu fu a ten fu en prenspari srefisrefi gi wi. Fu san ede? Fu di a situwâsi fu Krestenhèit na ini a ten disi de a srefi leki di fu a pipel fu Yesaya, èn na so a de tu nanga a krutu di Yehovah e leisi. Te wi e poti prakseri na san Yesaya e meki bekènti, dan dati sa meki taki wi e frustan krin san Gado e krutu èn dati sa yepi wi fu tan fara fu den du di a no e feni bun. Fu dati ede, meki wi poti prakseri nanga faya fruwakti na a profeiti wortu fu Yehovah, soleki fa a skrifi na Yesaya 2:6–4:1.

Ini Bigimemre den E Boigi

3. Sortu fowtu fu a pipel fu en Yesaya e erken?

³ Yesaya e erken a fowtu fu a pipel fu en èn e taki: „Den kon furu nanga san komoto na a Owstusei, èn den na sma di e du towfruwroko neleki den Filistiasma, èn den lai nanga den pikin fu trakondre-sma” (Yesaya 2:6b). So wan 800 yari moro na fesi, Yehovah ben komanderi a pipel fu en di a ben teki: „No meki unsrefi kon doti nanga iniwan fu den sani disi, bika nanga ala den sani disi den nâsi di mi e seni gowe komoto na un fesi,  meki densrefi kon doti” (Lefitikus 18:24). Yehovah ben dwengi Bileam fu taki fu den wan di A ben teki puru na mindri trawan leki En spesrutu gudu: „Komoto na a ede fu den klepston mi e si den, èn komoto na den pikin bergi mi e luku den. Leki wan pipel den e tan drape den wawan, èn den no e teri densrefi na mindri den nâsi” (Numeri 23:9, 12). Ma na ini a ten fu Yesaya, den wan di Yehovah ben teki, teki den tegu sani abra di den nâsi lontu den du èn den „furu nanga san komoto na a Owstusei”. Na presi taki den e poti bribi na ini Yehovah nanga en wortu, den e du „towfruwroko neleki den Filistiasma”. Den no e hori densrefi aparti fu den nâsi kwetikweti èn a kondre „lai” nanga „den pikin fu trakondre-sma” — sondro tweifri den de trakondre-sma di e meki a pipel fu Gado kon sabi den godelowsu sani di den e du.

4. Sortu krakti a abi tapu den Dyu taki den gudu èn taki den tranga na srudati sei, na presi taki den e gi Yehovah tangi fu den sani dati?

⁴ Te Yesaya e si na ekonomia situwâsi pe sani e waka bun na a ten dati èn a tranga di Yuda tranga na srudati sei na ondro a tiri fu Kownu Usia, dan a e taki: „A kondre fu den furu nanga solfru èn nanga gowtu, èn wan kaba no de na den gudu fu den. Èn a kondre fu den furu nanga asi, èn wan kaba no de na den asiwagi fu den” (Yesaya 2:7). ¿A pipel e gi Yehovah tangi fu a gudu dati èn fu a tranga di den tranga na srudati sei? (2 Kroniki 26:1, 6-15) ¡Kwetikweti! Na presi fu dati, den e poti a frutrow fu den tapu a gudu srefi èn e drai den baka gi a Sma fu pe den gudu komoto, Yehovah Gado. San na a bakapisi? „A kondre fu den lai nanga gado di no warti notinoti. Den e boigi gi den sani di den anu fu den meki, gi den sani di den finga fu den meki. Èn a sma fu grontapu e boigi, èn wan man e saka ensrefi, èn yu no man gi den pardon kwetikweti” (Yesaya 2:8, 9). Den e drai den fesi puru fu a libi Gado èn e boigi gi kruktu gado di no abi libi.

5. Fu san ede a boigi di wan sma e boigi gi kruktu gado no de wan fasi fu sori sakafasi?

 ⁵ A boigi di wan sma e boigi kan sori taki a sma abi sakafasi. Ma a boigi di wan sma e boigi gi sani di no abi libi, de fu soso èn a e „saka” na anbegiman fu a kruktu gado, a e lagi en. Fa Yehovah kan gi pardon na so wan sondu? San den anbegiman disi fu kruktu gado sa du te Yehovah e aksi frantwortu fu den?

’Den Heimemre Ai Musu Saka’

6, 7. (a) San e pasa na a dei fu a krutu fu Yehovah nanga den sma di e hei densrefi? (b) Na tapu sortu sani èn na tapu suma Yehovah e sori na atibron fu en, èn fu san ede?

⁶ Yesaya e taki moro fara: „Go na ini a klepston èn kibri yusrefi na ini a doti fu a frede di sma e kon frede fu Yehovah ede, èn fu a tumusi moi heifasi fu en” (Yesaya 2:10). Ma no wan klepston sa bigi nofo fu kibri den, èn no wan tapun sa deki nofo fu kibri den gi Yehovah, na Almaktiwan. Te a e kon fu tyari en krutu kon, dan „den heimemre ai fu a sma fu grontapu musu saka, èn a heimemre fasi fu den man musu boigi; èn Yehovah wawan musu kon hei na a dei dati”.​—Yesaya 2:11.

⁷ „A dei di de fu Yehovah fu den legre” e kon. A sa de wan ten gi Gado fu sori en atibron „na tapu ala den sedre fu Libanon di hei èn di opo kon hei èn na tapu ala den tranga bon fu Basan; èn na tapu ala den hei bergi èn na tapu ala den pikin bergi di opo kon hei; èn na tapu ibri hei toren èn na tapu ibri skotu di meki kon tranga; èn na tapu ala den sipi fu Tarsis èn na tapu ala den boto di sma wani srefisrefi” (Yesaya 2:12-16). Iya, na a dei fu na atibron fu Yehovah, A sa poti prakseri na ibri organisâsi di libisma opo leki wan simbôl fu a heimemre fu en èn na ibri godelowsu sma. Na so fasi „a heimemre fasi fu a sma fu grontapu musu boigi èn a heimemre fasi fu den man musu saka; èn Yehovah wawan musu kon hei na a dei dati”.​—Yesaya 2:17.

8. Fa a krutudei di den ben taki na fesi fu dati, e kon na tapu Yerusalem na ini 607 b.G.T.?

⁸ A krutudei di den ben taki na fesi fu dati, e kon na tapu den Dyu na ini 607 b.G.T. di Kownu Nebukadnesar fu Babilon e pori  Yerusalem. Den sma di e libi na ini Yerusalem e si taki a lobi foto fu den e bron èn taki den moi oso fu a foto broko na pisipisi, èn taki a tranga skotu fu en naki broko. A tempel fu Yehovah kon tron wan ipi broko ston. Den gudu fu den noso den fetiwagi fu den de notinoti na „a dei di de fu Yehovah fu den legre”. Èn fa a de nanga den kruktu gado fu den? A e pasa neleki fa Yesaya e taki na fesi: „Den gado di no warti notinoti sa pasa gowe krinkrin” (Yesaya 2:18). Den e tyari den Dyu — so srefi den granman nanga den tranga man — go na ini katibo na Babilon. Yerusalem sa de wan foto pe no wan sma e libi na ini 70 yari langa.

9. Na sortu fasi a situwâsi fu Krestenhèit de a srefi leki di fu Yerusalem nanga Yuda na ini a ten fu Yesaya?

⁹ ¡A situwâsi fu Krestenhèit de a srefi leki di fu Yerusalem nanga Yuda na ini a ten fu Yesaya! Krestenhèit kweki trutru wan krosibei matifasi nanga den nâsi fu a grontapu disi. A e horibaka fayafaya gi den Verenigde Nâsi èn a furu en oso nanga kruktu gado èn nanga den sani di a e du di no de akruderi Bijbel. Den sma di e horibaka gi en lobi materia gudu èn e poti a frutrow fu den tapu srudati makti. ¿Èn a no de so, taki den e si den kerki tiriman fu den leki sma di warti fu kisi biginen èn e gi den titel nanga grani? Sondro misi Yehovah sa meki a hei di Krestenhèit e hei ensrefi kon tron noti. Ma o ten?

A „Dei fu Yehovah” Di De Krosibei fu Kon

10. Na sortu „dei fu Yehovah” den apostel Paulus nanga Petrus e sori go?

¹⁰ Den Buku fu Bijbel e sori go na wan „dei fu Yehovah” di sa de moro prenspari srefisrefi leki a krutudei di ben kon na tapu Yerusalem nanga Yuda fu owruten. Na ondro a krakti fu a santa yeye na apostel Paulus ben taki dati a „dei fu Yehovah” di e kon, abi fu du nanga a denoya fu Kownu Yesus Krestes di poti na tapu a kownusturu (2 Tesalonikasma 2:1, 2). Petrus ben taki dati a dei dati abi fu du nanga a seti fu ’nyun hemel nanga wan nyun grontapu pe regtfardikifasi sa de’ (2 Petrus 3:10-13). A de a dei pe Yehovah sa tyari en krutu kon na tapu a heri godelowsu seti fu sani èn na tapu Krestenhèit tu.

11. (a) Suma sa man ’kakafutu na ondro’ a „dei fu Yehovah” di e kon? (b) Fa wi kan meki Yehovah de wi kibripresi?

 ¹¹ „¡Ke fu a dei”, a profeiti Yoèl e taki, „bika a dei fu Yehovah de krosibei, èn leki na ogri pori di e kon fu na Almaktiwan, a sa kon!” Fu di a „dei” dati de fu kon, ¿dan a no de so taki ala sma musu broko den ede efu den no de na ini kefar na ini a ten dati di e gi frede? „Suma kan kakafutu na en ondro?”, Yoèl e aksi. A e piki: „Yehovah sa de wan kibripresi gi en pipel” (Yoèl 1:15; 2:11; 3:16). ¿Yehovah Gado sa de wan kibripresi gi den wan di abi heimemre èn di e poti a frutrow fu den tapu gudu, srudati makti nanga den gado di libisma meki? ¡Dati no kan srefisrefi! Gado ben gowe libi srefi a pipel di a ben teki, di den ben handri na a fasi disi. ¡A de prenspari srefisrefi taki ala den futuboi fu Gado „suku regtfardikifasi, suku safrifasi”, èn e ondrosuku seryusu a presi di na anbegi fu Yehovah e teki na ini a libi fu den!​—Sefania 2:2, 3.

„Gi den Pikin Moisimoisi èn gi den Fremusu”

12, 13. Fu san ede a fiti taki den anbegiman fu kruktu gado e trowe den gado fu den „gi den pikin moisimoisi èn gi den fremusu” na a dei fu Yehovah?

¹² Fa den anbegiman fu kruktu gado sa si den kruktu gado fu den na a ten fu a bigi dei fu Yehovah? Yesaya e piki: „Sma sa go na ini den olo fu den klepston èn na ini den olo fu a doti fu a frede di sma e kon frede fu Yehovah ede, èn fu a tumusi moi heifasi fu en, te a e opo fu meki grontapu seki. Na a dei dati a sma fu grontapu sa trowe den gado fu en fu solfru di no abi waarde èn den gado fu en fu gowtu di no warti notinoti . . . gi den pikin moisimoisi èn gi den fremusu, so taki a kan go na ini den olo fu den klepston èn na ini den olo fu den klepston di e tanapu leti-opo, fu a frede di sma e kon frede fu Yehovah ede, èn fu a tumusi moi heifasi fu en, te a e opo fu meki grontapu seki. Fu a bun fu yu ede, no du noti nanga a sma fu grontapu di a bro fu en de na ini en noso-olo, bika tapu a gron fu san den musu hori en na prakseri?”​—Yesaya 2:19-22.

¹³ Den pikin moisimoisi e libi na ini olo na ini a gron, èn den  fremusu e go rostu na ini ston-olo di dungru èn di leigi. Boiti dati, pe furu fremusu e go rostu na wan presi, dan drape wan tegu smeri de èn wan ipi pupe di e kon bigi moro nanga moro. Fu trowe den kruktu gado go na ini den presi dati na wan sani di fiti. Wan presi di dungru èn di no krin na ala san den warti fu kisi. Fu a sei fu a pipel, den sa suku kibri na ini den olo fu a klepston na a dei fu a krutu fu Yehovah. So bun, a takru bakapisi fu den kruktu gado nanga den anbegiman fu den sa de a srefi. Soleki fa a profeititori fu Yesaya ben taki, dan den kruktu gado di no abi libi no ben frulusu den anbegiman fu den èn so srefi Yerusalem fu na anu fu Nebukadnesar na ini 607 b.G.T.

14. San sma di e poti prakseri na grontapu afersi sa du na a dei fu Yehovah di e kon, te a o tyari en krutu kon na tapu a grontapumakti fu falsi relisi?

¹⁴ San sma o du na a ten fu a dei fu Yehovah di e kon te a o tyari en krutu kon na tapu Krestenhèit nanga tra pisi fu a grontapumakti fu falsi relisi? Te sma o kisi fu du nanga a situwâsi di e go na baka na heri grontapu, dan furu fu den kande sa kon frustan taki den kruktu gado fu den no warti notinoti. Na presi fu suku kibri na den, dan a kan taki yoisti den e suku kibripresi nanga kibri na grontapu organisâsi di no abi fu du nanga yeye afersi, kande so srefi na den Verenigde Nâsi, a „redi-kloru werdri meti” fu Openbaring kapitel 17. Na „den tin tutu” fu na agersi werdri meti dati sa pori Babilon a Bigiwan, a grontapumakti fu falsi relisi, di Krestenhèit na wan prenspari pisi fu dati.​—Openbaring 17:3, 8-12, 16, 17.

15. Fa Yehovah wawan sa „kon hei” na a krutudei fu en?

¹⁵ Ala di a kan taki na den agersi tin tutu disi sa pori Babilon a Bigiwan èn sa bron en langalanga, toku te yu luku en bun, a de a krutustrafu di Yehovah sa tyari kon. Openbaring 18:8 e taki ini a tori fu Babilon a Bigiwan: „Dati meki na ini wán dei den plaag fu en sa kon, dede nanga sari nanga angriten,  èn den sa bron en krinkrin nanga faya, fu di Yehovah Gado, di ben krutu en, tranga.” So bun, Yehovah Gado, na Almaktiwan, e kisi a grani taki a e fri a libisma famiri fu a makti di falsi relisi ben abi na den tapu. Soleki fa Yesaya e taki, dan „Yehovah wawan musu kon hei na a dei dati. Bika a de a dei di de fu Yehovah fu den legre.”​—Yesaya 2:11b, 12a.

’Den Fesiman E Meki Yu Wakawaka’

16. (a) San na „ala sani di den e poti frutrow na tapu” ini wan libisma libimakandra? (b) Fa a pipel fu Yesaya sa pina fu di den puru „ala sani di den e poti frutrow na tapu” fu a libimakandra fu den?

¹⁶ Efu wan libisma libimakandra wani de tranga, dan a musu abi en „sani di [a] e poti frutrow na tapu” — sani di de fanowdu soleki nyanyan nanga watra nanga, san moro prenspari, fesiman di sma kan frutrow na tapu èn di man tiri a pipel èn man tan hori orde na ini a libimakandra. Ma Yesaya e taki na fesi ini a tori fu Israèl fu owruten: „¡Luku! a tru Masra, Yehovah fu den legre, e puru fu Yerusalem èn fu Yuda ala sani di den e poti frutrow na tapu, ala brede èn ala watra, tranga man nanga fetiman, krutuman nanga profeiti, nanga a sma di e du lukuman-wroko, nanga owru man, edeman fu feifitenti sma nanga a sma di trawan e lespeki srefisrefi nanga raiman nanga a sabiman fu bonuwroko nanga a sma di abi a koni fu meki tapu” (Yesaya 3:1-3). Boi ete sa tron granman èn sa tiri na wan kaprisi fasi. No wawan den tiriman sa kwinsi a pipel, ma „trutru a pipel sa kwinsi makandra, a wan sa kwinsi a trawan . . . Den sa handri na wan asranti fasi, wan boi sa handri na wan asranti fasi nanga wan owru man, èn a sma di den e si leki lagi sma sa handri na wan asranti fasi nanga a wan di musu kisi grani” (Yesaya 3:4, 5). Pikin-nengre e „handri na wan asranti fasi” nanga den owruwan fu den èn den no abi lespeki gi den. A fasi fa a libi de, sa de so lagi, taki a wan sma sa taigi a trawan di no doro den markitiki fu man tiri: „Yu abi wan dyakti. Yu musu tron wan ogri-ati tiriman gi wi, èn na ipi sma disi di den teki abra musu de na ondro yu anu” (Yesaya 3:6). Ma den wan di e kisi a kari dati, sa weigri fu teki a kari  èn sa hori nomonomo taki den no man dresi a kondre di abi soro èn taki den no abi a gudu fu du a frantwortu. Den sa taki: „Mi no sa tron wan sma di e dresi soro; èn na ini mi oso brede no de èn wan dyakti no de. Unu no musu poti mi leki wan ogri-ati tiriman fu tiri a pipel.”​—Yesaya 3:7.

17. (a) Na sortu fasi a sondu fu Yerusalem nanga Yuda ben de „leki di fu Sodom”? (b) Suma Yesaya e gi a fowtu fu a situwâsi fu a pipel fu en?

¹⁷ Yesaya e taki moro fara: „Yerusalem naki futu, èn Yuda srefi fadon, fu di a tongo fu den nanga den du fu den de teige Yehovah, fu di na ini na ai fu a glori fu en, den e opo densrefi teige en. A fasi wawan fa den fesi de, trutru e kotoigi teige den, èn den e fruteri fu a sondu fu den di de leki di fu Sodom. Den no kibri dati. ¡Helu fu a sili fu den! Bika densrefi meki rampu kon na den tapu” (Yesaya 3:8, 9). A pipel fu Gado opo densrefi teige a tru Gado nanga den sani di den e taki èn nanga den sani di den e du. Srefi a fasi fa den fesi de sondro syen èn sondro fu sori berow, e puru den sondu fu den kon na doro, di de so wan tegu sani leki den sondu fu Sodom. Den de ini wan frubontu nanga Yehovah Gado, ma a no sa kenki den markitiki di a poti gi den. „A sa go bun nanga a regtfardikiwan, bika den sa nyan a froktu fu den du fu den. ¡Helu fu a godelowsuwan! — Rampu; ¡bika a sa kisi a paiman di den eigi anu fu en ben gi! Fu a sei fu a pipel fu mi, den sma fu en di e prati wroko e handri na wan tranga fasi, èn soso umasma e tiri den trutru. O a pipel fu mi, den wan di e tyari yu, e meki yu wakawaka, èn den bruya den pasi fu yu pe yu musu waka.”​—Yesaya 3:10-12.

18. (a) Sortu krutu Yehovah e leisi gi den owruwan nanga den granman fu a ten fu Yesaya? (b) San wi e leri fu a krutu di Yehovah e krutu den owruwan nanga den granman?

¹⁸ Yehovah e ’leisi strafu’ gi den owruwan nanga den granman na Yuda èn ’e kon na ini wan krutu afersi’: „Na unu bron a droifidyari. A sani di den ben fufuru fu a sma di e pina, de na ini den oso fu unu. Sortu marki unu abi taki unu e masi a pipel fu mi, èn taki unu e kwinsi den sma di e pina, hebi?”  (Yesaya 3:13-15) Na presi fu wroko gi a tanbun fu a pipel, den fesiman e teki prati na sani di sma e du fu bedrigi trawan. Den e gebroiki a makti fu den na wan fowtu fasi, fu di den e meki densrefi kon gudu èn e fufuru den pôtiwan nanga den wan di de na nowtu. Ma den fesiman disi musu gi Yehovah fu den legre frantwortu fu a kwinsi di den e kwinsi den sma di e pina. ¡Dati na wan seryusu warskow gi den wan di de ini frantwortu posisi na ini a ten disi! Meki a de so, taki ala ten den e luku bun dati den no e gebroiki a makti fu den na wan fowtu fasi.

19. Fa Krestenhèit ben de frantwortu fu a kwinsi di a ben e kwinsi sma èn fu a frufolgu di a ben e frufolgu sma?

¹⁹ Krestenhèit — spesrutu den kerki tiriman nanga den prenspariwan fu en — kisi furu sani na wan bedrigi fasi di musu de fu a gewoon pipel. A kwinsi a pipel èn a e tan kwinsi den. So srefi a fon a pipel fu Gado, frufolgu den èn handri den na wan ogri-ati fasi èn a tyari bigi syen kon na tapu a nen fu Yehovah. Na en reti ten, Yehovah sa krutu en seiker.

„Wan Bron Marki na Presi fu Moifasi”

20. Fu san ede Yesaya e krutu „den umapikin fu Sion”?

²⁰ Baka te a profeiti Yesaya e krutu den ogridu fu den fesiman, dan a e taki nanga den umasma fu Sion, noso Yerusalem. Soleki fa a sori, dan fu modo ede „den umapikin fu Sion” e weri „keti . . . na den futu” — keti di den fasi na den aifutu fu den — di e meki wan moi babari. Fu espresi den umasma no e meki bigi stap èn e waka „esi-esi sondro fu meki bigi stap”, èn e kweki san den ben sa kan si leki wan moi fasi fa wan umasma musu waka. Ma san fowtu na a sani disi? A de a fasi fa den umasma disi ben tyari densrefi. Yehovah e taki: „Den umapikin fu Sion kon kisi heimemre èn e langa den neki te den e waka èn e meki  sani nanga den ai fu hari sma” (Yesaya 3:16). So wan heimemre fasi musu kisi strafu.

21. Fa a krutu di Yehovah krutu Yerusalem abi krakti tapu den Dyu umasma?

²¹ Fu dati ede, te Yehovah e tyari en krutu kon na tapu a kondre, dan den heimemre „umapikin fu Sion” disi sa lasi ala sani — srefi a moifasi di den lobi so kefalek. Yesaya e taki na fesi: „Trutru Yehovah sa meki na edekrabasi fu den umapikin fu Sion kon kisi krasikrasi tu, èn Yehovah srefi sa meki a fesi-ede fu den kon de fu si. Na a dei dati Yehovah sa teki a moifasi fu den futulinga puru nanga den edebanti nanga den moimoi sani di gersi mun, den yesilinga nanga den bui nanga den duku, den anyisa nanga den keti di den e weri na den futu nanga den borsubanti nanga den ’oso fu a sili’ [kande switismeri batra] nanga den skropu di e meki babari èn di den e gebroiki leki moimoi sani [noso, tapu], den fingalinga nanga den nosolinga, den langa fesakrosi nanga den tapusei krosi nanga den duku nanga den monisaka, nanga den anuspikri nanga den krosi di den weri na ondro den tapusei krosi, nanga den tai-ede nanga den bigi duku.” (Yesaya 3:17-23; luku den futuwortu.) ¡Dati na trutru wan sari kenki di sa feni presi!

22. Sortu tra sani den umasma fu Yerusalem e lasi, boiti den moimoi sani fu den?

²² A profeiti boskopu e go doro fu taki: „Na presi fu balsem oli, soso wan tingi smeri sa de; èn na presi fu wan leribuba, wan titei sa de; èn na presi fu wan kefalek moi wiwiri, piri-ede sa de; èn na presi fu wan diri krosi, den sa tai a bere nanga wan saka; wan bron marki sa de, na presi fu moifasi” (Yesaya 3:24). Na ini 607 b.G.T., den umasma fu Yerusalem di abi bigifasi, e kenki fu sma di gudu, kon tron sma di pôti. Den e lasi a fri fu den èn e kisi „a bron marki” fu katibo.

„Den Sa Teki Ala den Warti Sani Puru fu En Trutru”

23. San Yesaya e meki bekènti ini a tori fu Yerusalem?

²³ Now Yehovah e taki nanga a foto Yerusalem èn e meki bekènti: „Nanga a feti-owru den eigi man fu yu sa fadon, èn  a makti fu yu sa fadon nanga feti. Èn den dromofo fu en sa musu sari èn sa musu sori taki den e sari, èn den sa teki ala den warti sani puru fu en trutru. A sa sidon na tapu a gron” (Yesaya 3:25, 26). Den sa kiri den man fu Yerusalem, srefi den trangawan fu en, na ini feti. A foto sa pori krinkrin. Gi den „dromofo fu en”, a sa de wan ten fu „sari èn [fu] sori taki den e sari”. Den sa „teki ala den warti sani puru” fu Yerusalem èn a sa tron wan foto pe no wan sma e libi na ini.

24. Sortu takru bakapisi a abi gi den umasma fu Yerusalem taki den mansma lasi den libi nanga a feti-owru?

²⁴ A lasi di den mansma lasi den libi nanga a feti-owru sa abi takru bakapisi gi den umasma fu Yerusalem. Yesaya e tapu a pisi disi fu a buku fu en di abi profeititori na ini èn e taki na fesi: „Seibi umasma trutru sa grabu wán man hori na a dei dati èn taki: ’Wi sa nyan wi eigi brede èn wi sa weri wi eigi dyakti; nomo meki sma kari wi na a nen fu yu fu puru a syen fu wi’” (Yesaya 4:1). Mansma di ben doro a yari taki den mag trow, sa mankeri so kefalek, taki difrenti umasma sa tai densrefi na wán man, so taki sma kan kari den na a nen fu a man — dati wani taki, so taki sma sabi den leki den wefi fu en — èn na so fasi den no e kisi a syen taki den de sondro wan masra. A Wet fu Moses ben aksi dati wan trowmasra musu gi en wefi nyanyan nanga krosi (Exodus 21:10). Ma fu di den umasma disi e agri fu ’nyan den eigi brede èn weri den eigi krosi’, dan den wani fri a man fu en plekti di a abi akruderi wet. ¡Dati na trutru wan kefalek muilek situwâsi gi den „umapikin fu Sion” di ben abi heimemre fosi!

25. San o pasa na ini a ten di no de so fara moro nanga den sma di e hei densrefi?

²⁵ Yehovah e lagi den sma di e hei densrefi. Fu tru, na ini 607 b.G.T., a e meki taki a heimemre fasi fu a pipel di a teki „boigi” èn meki taki a „heimemre fasi” fu den „saka”. Meki a de so, taki tru Kresten noiti no frigiti taki „Gado e kakafutu gi den heimemrewan, ma a e gi no-frudini bun-ati na den sakafasiwan”.​—Yakobus 4:6.

[Aksi fu a tori disi]

[Prenki na tapu bladzijde 50]

Den kruktu gado, den gudu nanga koni tapu a kontren fu srudati afersi no e kibri Yerusalem na a dei fu a krutu fu Yehovah

 [Prenki na tapu bladzijde 55]

Na „a dei fu Yehovah”, a grontapumakti fu falsi relisi sa kisi pori