Kapitel Tinafo

Yehovah E Lagi wan Foto Di Abi Heimemre

Yesaya 13:1–14:23

1. O langa go na fesi a buku fu Yesaya e luku now?

A PROFEITI buku Yesaya ben skrifi na ini a di fu aiti yarihondro b.G.T. di Asiria ben broko go nanga tranga na ini a Pramisi Kondre. Soleki fa wi ben si kaba na ini den kapitel na fesi na ini a buku fu en, dan Yesaya e taki na fesi na wan kefalek soifri fasi fa a sa waka nanga sani di sa feni presi. Ma a buku e luku moro fara leki a ten di Asiria kon na makti. A buku e taki na fesi taki a pipel di Yehovah ben meki wan frubontu nanga den, sa drai kon baka fu den furu kondre pe den ben de na ini katibo. So srefi fu Sinear, a presi pe Babilon de (Yesaya 11:11). Na Yesaya kapitel 13, wi e feni wan tumusi aparti profeititori di, te a kon tru, sa opo a pasi gi a pipel fu Yehovah fu drai kon baka fu a katibo dati. A profeititori disi e bigin nanga den wortu disi: „A boskopu fu warskow Babilon di Yesaya, a manpikin fu Amos, ben si na ini wan fisyun.”​—Yesaya 13:1.

’Mi Sa Saka Heimemrefasi’

2. (a) Fa Hiskia e kisi fu du nanga Babilon? (b) San na a „marki” di den sa opo?

² Yuda e kon kisi fu du nanga Babilon na a ten di Yesaya de na libi. Kownu Hiskia e kon siki tranga èn baka dati a e kon betre. Ambasadoro di komoto na Babilon e kon fu fristeri en taki a kon betre, kande nanga a prakseri di den ben kibri gi sma, fu meki Hiskia wroko makandra nanga den ini a feti di den e feti nanga Asiria. Na wan don fasi Kownu Hiskia e sori den ala den gudu fu en. Leki wan bakapisi fu dati, Yesaya e taigi Hiskia taki  baka a dede fu a kownu, sma sa tyari ala den gudu dati go na Babilon (Yesaya 39:1-7). A sani disi e kon tru na ini 607 b.G.T. di Babilon e pori Yerusalem èn e tyari a nâsi go na ini katibo. Ma a pipel di Gado teki no sa tan fu têgo na ini Babilon. Yehovah e taki na fesi fa a sa opo a pasi, so taki den kan drai go baka na a kondre fu den. A e bigin: „Un opo wan marki na tapu wan bergi fu klepston di no abi noti na tapu. Kari den nanga wan tranga sten, wai nanga anu, so taki den kan pasa go na ini den portu fu den heihei-sma” (Yesaya 13:2). A „marki” na wan grontapumakti di e opo kon èn di sa puru Babilon fu en hei presi. Den sa opo en „na tapu wan bergi fu klepston di no abi noti na tapu” — èn di sa de krin fu si fu farawe. A nyun grontapumakti dati sa kisi a komando fu feti nanga Babilon èn sa pasa go nanga tranga na ini „den portu fu den heihei-sma”, den portu fu a bigi foto dati èn sa wini en.

3. (a) Suma na ’den wan di meki kon santa’ di Yehovah sa opo? (b) Na sortu fasi heiden legre „meki kon santa”?

³ Now Yehovah e taki: „Misrefi gi a komando na den wan fu mi di meki kon santa. Mi kari so srefi den trangawan fu mi fu sori na atibron fu mi, den wan fu mi di e prisiri srefisrefi. ¡Arki! ¡Wan ipi sma na tapu den bergi, wan sani di de leki furu pipel! ¡Arki! ¡A babari fu kownukondre, fu nâsi di tyari kon na makandra! Yehovah fu den legre e tyari a fetilegre kon na makandra” (Yesaya 13:3, 4). Suma na „den wan [disi] di meki kon santa” di poti na wroko fu meki taki Babilon di abi heimemre kon kisi sakafasi? Den na legre fu kondre di bondru kon na wan, „nâsi di tyari kon na makandra”. Den e saka kon fu wan farawe bergikontren fu feti nanga Babilon. „Den e kon fu a farawe kondre, fu a moro farawe presi fu hemel” (Yesaya 13:5). Na sortu fasi den meki kon santa? No na a fasi taki den santa kwetikweti. Den na heiden legre di no wani dini Yehovah. Ma na ini den Hebrew Buku fu Bijbel, „meki kon santa” wani taki „poti [wan sma] aparti so taki Gado kan gebroiki [en]”. Yehovah kan meki den legre fu den nâsi kon santa èn gebroiki na angri fu den fu kisi makti pe den e prakseri densrefi nomo, fu sori na atibron fu en. A ben gebroiki Asiria na a fasi disi. A sa gebroiki Babilon  na a srefi fasi (Yesaya 10:5; Yeremia 25:9). Èn a sa gebroiki tra nâsi fu strafu Babilon.

4, 5. (a) San Yehovah e taki na fesi ini a tori fu Babilon? (b) Nanga sortu sani den sma di sa kon feti nanga Babilon sa kisi fu du?

⁴ Babilon no de a moro tranga grontapumakti ete. Toku, di Yehovah meki sani bekènti nanga mofo fu Yesaya, dan A e si na fesi o ten Babilon sa teki a posisi dati, èn A e taki na fesi taki a sa fadon. A e taki: „¡Un bari krei, bika a dei fu Yehovah de krosibei! A sa kon leki a fufuru di na Almaktiwan e kon fufuru sani nanga tranga” (Yesaya 13:6). Iya, na presi fu meki bigi, Babilon sa bari krei fu di a furu nanga sari. Fu san ede? Fu „a dei fu Yehovah” ede, a dei te Yehovah e tyari a krutu kon na en tapu.

⁵ Ma fa Yehovah sa fufuru sani nanga tranga? Te a ten fu Yehovah e doro fu du dati, dan a sa gersi leki a foto de ini seikerfasi. Legre di broko go nanga tranga na ini a foto sa kisi fu du fosi nanga na Eufraatliba di e kibri a foto èn di e lon pasa na mindri a foto, èn den e gebroiki a watra fu a liba fu furu wan kanari di e gi kibri èn fu gi a foto watra fu dringi. Baka dati den sa kisi fu du nanga den kefalek bigi tranga skotu fu Babilon, di gersi leki sma no man teki den abra. Boiti dati, den maksin fu a foto sa furu srefisrefi nanga nyanyan. A buku Daily Bible Illustrations e taki dati Nabonidus — a lasti kownu fu Babilon — „ben du kefalek furu muiti fu furu den maksin fu a foto nanga nyanyan, èn sma ben bereken taki a foto ben abi nofo [nyanyan] fu hori den sma na libi di ben de na ini a foto, twenti yari langa”.

6. Sortu sani di den sma fu Babilon no fruwakti, o pasa te den sa feti nanga a foto, soleki fa ben taki na fesi kaba?

⁶ Ma den sani di sma e si fu dorosei nomo, kan bedrigi den. Yesaya e taki: „Fu dati ede srefi ala anu sa kon swaki, èn srefi a heri ati fu libisma di kan dede, sa smèlter. Èn sma kon bruya. Iya, krampu nanga a pen fu wan uma di de fu meki, e grabu den hori; den abi pen fu wan uma di de fu meki, neleki wan uma di e meki. Den e luku makandra nanga fruwondru. Den fesi fu den na fesi di e bron” (Yesaya 13:7, 8). Te den legre di e  wini e broko go nanga tranga na ini a foto, dan hebi pen di e kon wantronso neleki di fu wan uma di e meki, sa kon ini a presi fu a korostu firi di den sma abi di e libi na ini foto. Den ati fu den sa smèlter fu frede ede. Fu di den kon lan, dan den anu fu den sa kon swaki èn den no sa man feti baka. Den fesi fu den sa „bron” fu frede èn fu hebi pen ede. Nanga fruwondru den sa luku makandra, èn den sa aksi densrefi fa a bigi foto fu den ben kan fadon.

7. Sortu „dei fu Yehovah” e kon, èn san sa de den bakapisi gi Babilon?

⁷ Ma toku Babilon sa fadon seiker. Babilon sa kisi fu du nanga wan dei pe a musu gi frantwortu, wan „dei fu Yehovah”, di sa hati en fu tru. A moro hei Krutuman sa sori na atibron fu en èn a sa tyari krutu kon na tapu den sondu sma di e libi na ini Babilon èn di e frudini dati srefisrefi. A profeititori e taki: „¡Luku! A dei fu Yehovah e kon, na wan ogri-ati fasi nanga atibron èn nanga faya atibron, fu meki a kondre tron wan sani fu skreki, èn fu a kan wai den sondari fu a kondre puru” (Yesaya 13:9). Den fruwakti fu Babilon takru srefisrefi. A de neleki son, mun nanga den stari no e gi leti moro. „Bika srefi den stari fu hemel nanga en stari sistema fu Kesil no sa meki a leti fu den skèin; son sa kon dungru trutru te a e sori ensrefi, èn mun srefi no sa meki en leti skèin.”​—Yesaya 13:10.

8. Fu san ede Yehovah e gi a komando meki Babilon fadon?

⁸ Fu san ede a foto disi di abi bigimemre musu kisi so wan takru bakapisi? Yehovah e taki: „Fu tru, mi sa strafu a fatu gron fu en eigi ogridu ede, èn den godelowsu sma srefi fu den eigi fowtu ede. Èn fu tru, mi sa meki a bigimemre fu den asranti sma kon kaba, èn mi sa saka a heimemre fasi fu den ogri-ati tiriman” (Yesaya 13:11). A kanti di Yehovah sa kanti en atibron, sa de a strafu di Babilon sa kisi fu na ogri-ati fasi fa a handri nanga a pipel fu Gado. A heri kondre sa pina fu na ogridu ede fu den Babilonsma. ¡Den ogri-ati tiriman disi di abi bigimemre, no sa tyalensi Yehovah krinkrin moro!

9. San e wakti Babilon na a dei fu a krutu fu Yehovah?

⁹ Yehovah e taki: „Mi sa meki libisma di kan dede, tron wan  sani di yu no e si so furu leki gowtu di meki kon soifri, èn mi sa meki a sma fu grontapu tron wan sani di yu no e si so furu leki a gowtu fu Ofir” (Yesaya 13:12). Iya, a foto sa kon de sondro sma na ini. Yehovah e taki moro fara: „Fu dati ede mi sa meki hemel srefi kon bruya, èn grontapu sa seki komoto na en presi fu di Yehovah fu den legre atibron èn na a dei fu a faya atibron fu en” (Yesaya 13:13). A „hemel” fu Babilon, den furu gado nanga umagado fu en, sa bruya, èn den no sa man yepi a foto na a ten te a de na ini nowtu. „Grontapu”, a Gran Kownukondre Babilon, sa seki komoto na en presi, èn sma sa memre en leki soso wan tra gran kownukondre di no de na makti moro. „A musu pasa taki, neleki wan dia di den yagi gowe èn neleki wan ipi skapu di no abi wan sma di e tyari den kon na wan, den sa drai kon, ibriwan sma na en eigi pipel; èn den sa lowe gowe, ibriwan sma na en eigi kondre” (Yesaya 13:14). Ala den trakondre-sma di e horibaka gi Babilon sa gowe libi en èn lowe gowe, èn den sa howpu fu meki nyun matifasi nanga a grontapumakti di wini. Te fu kaba, Babilon sa ondrofeni a banawtu fu wan foto di sma wini, wan banawtu di a ben tyari kon na tapu someni tra foto na ini den glori dei fu en: „Den sa boro ibriwan sma di den feni, èn ibriwan sma di den grabu hori na a ten te den figi sani puru, den sa kiri en nanga a feti-owru; èn srefi den pikin fu den sa masi na pisipisi na fesi den ai fu den. Sma sa fufuru den oso fu den, èn sma sa didon nanga tranga na den eigi wefi fu den.”​—Yesaya 13:15, 16.

A Wrokosani Di Gado Gebroiki fu Tyari Pori Kon

10. Suma Yehovah sa gebroiki fu meki Babilon fadon?

¹⁰ Sortu makti Yehovah sa gebroiki fu meki Babilon fadon? So wan 200 yari na fesi, Yehovah e tyari a piki kon na krin: „Luku, mi e opo den Mediasma fu feti nanga den, di e si solfru srefi leki noti èn di, ini a tori fu gowtu, no e prisiri nanga dati. Èn den bo fu den sa masi srefi yonkuman na pisipisi. Èn den no sa abi sari-ati nanga a froktu fu a bere; na ai fu den no sa firi sari gi manpikin. Èn Babilon, a moimoi sani fu den kownukondre, a moifasi fu a glori fu den Kaldewsma, musu tron leki Sodom  nanga Gomora di Gado ben drai tapu” (Yesaya 13:17-19). A kefalek moi Babilon sa fadon, èn a wrokosani di Yehovah sa gebroiki fu du dati sa de den legre fu a farawe kondre Media di abi furu bergi. * Te fu kaba, Babilon sa de sondro sma na ini,  neleki den foto Sodom nanga Gomora pe den sma no ben libi akruderi bun gwenti nanga wet srefisrefi.​—Genesis 13:13; 19:13, 24.

11, 12. (a) Fa Media e tron wan grontapumakti? (b) Fu sortu tumusi aparti eigifasi fu den legre fu Media a profeititori e taki?

¹¹ Na ini a ten fu Yesaya, Media nanga Babilon de na ondro a tyatyari fu Asiria. Wan sani fu wan hondro yari baka dati, na ini 632 b.G.T., Media nanga Babilon e bondru kon na wan èn e wini Ninifei, a mamakondre fu Asiria. Disi e opo a pasi gi Babilon fu kon tron a moro tranga grontapumakti. ¡Ma a no sabi taki wan sani fu wan 100 yari baka dati, Media sa pori en! Suma, boiti Yehovah Gado, ben kan taki sani na fesi na so wan krakti fasi?

 ¹² Di Yehovah sori suma na a wrokosani di a wani gebroiki fu tyari pori kon, dan A e taki dati den legre fu Media „e si solfru srefi leki noti èn . . . ini a tori fu gowtu, [den] no e prisiri nanga dati”. ¡Dati na wan tumusi aparti eigifasi fu srudati di ati kon tranga fu feti ede! Bijbel sabiman Albert Barnes e taki: „Fu tru, yu no ben abi furu legre di ben broko go nanga tranga na ini tra kondre nanga a howpu fu fufuru gudu.” ¿Den legre fu Media e sori taki san Yehovah taki de tru ini a tori disi? Iya. Luku a komentaar disi di de fu feni na ini The Bible-Work èn di J. Glentworth Butler skrifi: „Tra fasi leki moro furu nâsi di oiti feti, den Mediasma, èn spesrutu den Persiasma, ben e si a waarde fu gowtu leki wan sani di no de so prenspari leki fu wini feti èn fu kisi glori.” * Nanga disi na prakseri, dan a no de wan fruwondru sani taki, di Sirus, a tiriman fu Persia, e fri den Israèlsma fu katibo na ini Babilon, dan a e gi den dusundusun gowtu beker nanga solfru beker baka di Nebukadnesar ben fufuru fu a tempel na Yerusalem.​—Esra 1:7-11.

13, 14. (a) Sortu spesrutu marki den Mediasma nanga den Persiasma wani doro, ala di den no e si gudu di den fufuru na feti leki wan prenspari sani? (b) Fa Sirus e pasa den sani fu Babilon di e gi kibri na a foto èn di den sma fu Babilon e dyaf fu dati?

¹³ Ala di den fetiman fu Media nanga Persia no abi wan tranga angri gi gudu di den fufuru na feti, toku den wani doro wan spesrutu marki srefisrefi. Den no wani tan na ondro no wan nâsi na grontapu. Boiti dati, Yehovah e poti en na ini na ati fu den fu „fufuru sani nanga tranga” (Yesaya 13:6). Fu dati ede, nanga den metaal bo fu den — di den kan gebroiki no wawan fu sutu peiri, ma so srefi fu naki èn fu masi den srudati trowe di de feanti fu den, den bakapikin fu den mama fu Babilon — den abi a fasti bosroiti fu wini Babilon.

¹⁴ Den fortresi fu Babilon no e tapu Sirus, a fesiman fu den legre fu Medo-Persia, fu du wan sani. Na a neti fu 5/6 oktober 539 b.G.T., a e gi a komando fu meki a watra fu na Eufraatliba  lon go na wan tra sei. Te a watra e saka, dan safrisafri den sma e broko go na ini a foto, èn e waka na ini a watra di e doro te na den bowtu fu den. Den kisi den sma di e libi na ini Babilon sondro fu den e fruwakti dati, èn Babilon e fadon (Danièl 5:30). Yehovah Gado e gebroiki en santa yeye fu meki Yesaya taki na fesi fu den sani disi di e feni presi, èn nanga dati A e sori sma taki na En e tiri afersi.

15. Sortu tamara e wakti Babilon?

¹⁵ O bigi a pori fu Babilon sa de? Arki na a sani di Yehovah e meki bekènti: „Noiti sma sa libi na ini, èn a no sa tan tu fu geslakti go miti geslakti. Èn drape na Arabiri no sa opo en tenti, èn no wan skapuman sa meki den ipi fu den didon drape. Èn drape den wan di e kon furutron na den kontren sondro watra sa didon trutru, èn den oso fu den musu kon furu nanga owrukuku. Èn drape den struisvogel musu tan, èn srefi ogri yeye di gersi bokoboko sa dyompodyompo lontu drape. Èn jakhals musu bari na ini den toren pe a e tan, èn a bigi sneki sa de na ini den paleisi fu switi prisiri. Èn a ten fu en fu kon, de krosibei, èn den dei fu en srefi no sa poti na wan tra ten” (Yesaya 13:20-22). A takru bakapisi fu a foto sa de taki a sa pori krinkrin.

16. Sortu frutrow a disiten situwâsi fu Babilon e gi wi?

¹⁶ Disi no ben feni presi wantewante na ini 539 b.G.T. Toku na ini a ten disi a de krin fu si srefisrefi taki ala sani di Yesaya ben taki na fesi ini a tori fu Babilon, kon tru. Babilon „de now wan presi pe wan bigi pori ben feni presi èn ben de dati furu yarihondro kaba, èn a de wan ipi fu broko ston”, na so wan sma e taki di e fruklari sani fu Bijbel. Dan a e taki moro fara: „A no kan taki wi e si a presi disi èn taki a no e memre wi o soifri den sani ben kon tru di Yesaya nanga Yeremia ben taki na fesi.” A de krin taki no wan libisma na ini a ten fu Yesaya ben kan taki na fesi fu a fadon fu Babilon èn fu a pori di a kisi te fu kaba. ¡Te yu luku en bun, dan den Mediasma nanga den Persiasma ben meki Babilon fadon so wan 200 yari baka di Yesaya ben skrifi a buku fu en! Èn a lasti pori fu Babilon ben kon furu hondro yari baka dati. ¿Disi no e tranga a bribi di wi abi na ini  Bijbel leki a Wortu fu Gado di A meki sma skrifi nanga yepi fu en santa yeye? (2 Timoteus 3:16) Boiti dati, fu di Yehovah ben meki profeititori kon tru na ini a ten di pasa, dan wi kan abi ala frutrow taki den Bijbel profeititori di no kon tru ete, sa kon tru na a reti ten fu Gado.

„Rostu fu a sari fu yu”

17, 18. Sortu blesi Israèl sa kisi fu di Babilon fadon?

¹⁷ A fadon fu Babilon sa de wan frulekti gi Israèl. A sa wani taki fu kon fri fu katibo èn fu abi na okasi fu drai go baka na a Pramisi Kondre. Fu dati ede Yesaya e taki now: „Yehovah sa sori taki a abi sari-ati nanga Yakob, èn a de seiker taki a sa teki Israèl ete; èn a sa gi den rostu trutru na tapu a gron fu den, èn a dorosei-sma di e tan na ini a kondre musu poti na den, èn den musu moksi densrefi nanga na oso fu Yakob. Èn pipel sa teki den trutru èn tyari den go na den eigi presi, èn na oso fu Israèl musu tyari den go na densrefi leki wan gudu na tapu a gron fu Yehovah, leki man-futuboi èn leki uma-futuboi; èn den musu tron sma di e teki den wan na ini katibo di ben hori den na ini katibo, èn den musu poti den wan na den ondro di ben e dwengi den fu wroko” (Yesaya 14:1, 2). Dyaso „Yakob” wani taki Israèl leki wan heri nâsi — ala 12 lo. Yehovah sa sori taki a abi sari-ati nanga „Yakob” fu di a sa meki a nâsi drai go baka na a kondre fu den. Dusundusun trakondre-sma, di furu fu den sa dini den Israèlsma leki tempel futuboi, sa go makandra nanga den. Son Israèlsma sa kon abi makti srefi tapu den sma di ben hori den na ini katibo fosi. *

¹⁸ A banawtu fu libi na ini katibo no sa de moro. Na presi fu dati Yehovah sa gi a pipel fu en „rostu fu a sari [fu den] èn fu a bruya [fu den] èn fu a tranga srafuwroko pe [sma] ben meki [den] tron wan srafu” (Yesaya 14:3). Fu di Israèl kon fri fu  den hebi fu srafuwroko na skin sei, dan a no sa pina moro fu a pen nanga broko-ede fu libi na mindri anbegiman fu falsi gado (Esra 3:1; Yesaya 32:18). A buku Lands and Peoples of the Bible e taki fu a sani dati: „Gi a Babilonsma den gado fu en ben de a srefi leki ibri Babilonsma nanga ala den moro takru sani fu a fasi fa wan sma de. Den gado fu Babilon ben de fredeman, drunguman nanga babawman.” ¡A de trutru wan frulekti fu komoto gowe fu so wan lagi situwâsi na relisi sei!

19. San de fanowdu efu Israèl wani kisi pardon fu Yehovah, èn san wi e leri fu dati?

¹⁹ Ma toku a sari-ati fu Yehovah no de sondro kondisi. A pipel fu en musu sori berow fu den godelowsu fasi fu den, di ben meki taki Gado strafu den so hebi (Yeremia 3:25). Te den bekènti den sondu fu den na wan eerlijk èn opregti fasi, dan dati sa meki taki Yehovah e gi den pardon. (Luku Nehemia 9:6-37; Danièl 9:5.) A srefi gronprakseri disi de tru na ini a ten disi. Fu di „no wan sma de di no e sondu”, meki wi alamala abi a sari-ati fu Yehovah fanowdu (2 Kroniki 6:36). Yehovah, a Gado di abi sari-ati, e gi wi a kari na wan lobi-ati fasi fu bekènti den sondu fu wi na en, fu abi berow èn fu tapu nanga iniwan fowtu fasi fa wi e tyari wisrefi, so taki wi kan kon betre baka (Deuteronomium 4:31; Yesaya 1:18; Yakobus 5:16). Disi no e yepi wawan fu meki a feni wi bun baka, ma a e gi wi trowstu tu.​—Psalm 51:1; Odo 28:13; 2 Korentesma 2:7.

Taki wan „Odo” gi Babilon

20, 21. Fa den birtikondre fu Babilon e prisiri nanga a fadon fu en?

²⁰ Moro leki 100 yari bifo Babilon opo leki a moro prenspari grontapumakti, Yesaya e taki na fesi san grontapu sa du te Babilon sa fadon. Na wan profeiti fasi a e komanderi den Israèlsma di kon fri fu katibo na ini Babilon: „Yu musu opo fu taigi a kownu fu Babilon na odo disi, èn yu musu taki: ’¡A sma di ben e dwengi trawan fu wroko, no dwengi den moro, a kwinsi di a ben kwinsi trawan, e kon na wan kaba! Yehovah broko a tiki fu den godelowsuwan, a tiki fu den wan di e tiri, a sma di ben e naki pipel fu atibron ede nanga wan naki di a ben naki  doronomo, a sma di ben poti nâsi na en ondro soso fu faya-ati ede nanga wan frufolgu sondro fu hori ensrefi’” (Yesaya 14:4-6). Babilon bow wan bigi nen leki wan kondre di e wini tra kondre, wan kondre di e kwinsi sma èn di e meki sma di de fri, kon tron srafu. ¡A fiti fu tru taki sma e memre a fadon fu Babilon nanga wan „odo” di na a fosi presi de langalanga gi a lin fu tiriman fu Babilon, di ben bigin nanga Nebukadnesar èn ben kaba nanga Nabonidus èn Belsasar! A lin fu tiriman dati ben tiri na ini den dei di ala sani ben e waka bun nanga a bigi foto!

²¹ ¡A fadon fu Babilon sa tyari wan kenki kon trutru! „Heri grontapu kon de na ini rostu, kon fri fu bruya. Sma e prisiri nanga prisiri babari. Srefi den jeneverbon prisiri nanga yu tu, den sedre fu a Libanon, èn den e taki: ’Sensi yu didon, no wan man di e kapu udu e kren kon na wi tapu’” (Yesaya 14:7, 8). Gi den tiriman fu Babilon, den kownu fu den birtikondre ben de leki bon di den musu fala èn di den tiriman ben kan gebroiki gi den eigi marki. We, ala den sani dati kon na wan kaba. ¡A man di e kapu udu, Babilon, kapu en lasti bon!

22. Fa, fu taki en na wan puwema fasi, a fadon fu a lin fu tiriman fu Babilon abi krakti tapu Syeol?

²² A fadon fu Babilon de so wan fruwondru sani taki a grebi srefi e du wan sani na tapu dati: „Srefi Syeol di de na ondrosei kon bruya fu yu ede, so taki a kan waka miti yu te yu e kon. Fu yu ede a wiki den wan di no man du noti fu di den dede, ala fesiman fu grontapu di yu kan agersi nanga bokoboko. A meki ala den kownu fu den nâsi opo fu den kownusturu fu den. Den alamala e opo den sten èn den e taigi yu: ’¿Den meki yu kon swaki tu leki wi? ¿Den agersi yu nanga wi? Den tyari a bigimemre fu yu go na ini Syeol, a babari fu den sani fu yu fu prei poku di abi snaar. Na yu ondro, sma e bradi woron leki wan bedi; èn woron e tapu yu’” (Yesaya 14:9-11). ¡Fu tru wan krakti fasi fu taki sani leki wan puwema! A de neleki a grebi fu a libisma famiri ben musu wiki ala den kownu di dede bifo a lin fu tiriman fu Babilon, so taki den kan gi odi  na a nyun sma di e kon. Den e spotu a makti fu Babilon di e tiri, di no man yepi ensrefi now, èn di e didon na tapu wan bedi fu woron na presi fu didon na tapu wan diri bedi, èn di tapu nanga woron na presi fu diri linnen.

„Leki wan Dedeskin Di Den Trapu Masi”

23, 24. Sortu bigifasi di de pasa marki den kownu fu Babilon e sori?

²³ Yesaya e go doro nanga na odo: „¡O, fa yu fadon komoto na hemel, yu di e skèin, manpikin fu a deibroko! ¡Fa den koti yu trowe go na grontapu, yu di ben meki den nâsi kon swaki!” (Yesaya 14:12) Bigimemre pe den e prakseri densrefi nomo e buweigi den kownu fu Babilon fu hei densrefi moro ala sma di de na den lontu. Leki wan stari di e skèin krin na ini a loktu na fruku mamanten, na so den e gebroiki makti na wan bigimemre fasi. Wan spesrutu sani di e meki taki den abi bigimemre, na a wini di Nebukadnesar ben wini Yerusalem, wan bigi sani di Asiria no ben man du. Na odo e sori san a lin fu tiriman fu Babilon di abi bigimemre, e taki: „Mi sa opo go na hemel. Mi sa opo a kownusturu fu mi kon hei moro den stari fu Gado, èn mi sa sidon na tapu a bergi pe den e kon makandra, na den moro farawe pisi fu noordsei. Mi sa opo misrefi hei moro den hei presi fu den wolku; mi sa meki misrefi gersi a Moro Heiwan” (Yesaya 14:13, 14). ¿Wan moro tegu sani ben sa kan de?

²⁴ Bijbel e agersi den kownu fu a lin fu kownu fu David nanga stari (Numeri 24:17). Bigin nanga David, den „stari” dati ben tiri komoto na a Sionbergi. Baka di Salomo ben bow a tempel na Yerusalem, dan a nen Sion ben kon abi fu du nanga a heri foto. Na ondro a Wetfrubontu, ala mansma fu Israèl ben de fruplekti fu teki waka go na Sion dri tron wan yari. Na so fasi a ben tron „a bergi pe den e kon makandra”. Fu di Nebukadnesar ben abi a fasti bosroiti fu poti den kownu fu Yudea na en ondro èn baka dati fu puru den fu a bergi dati, dan a e sori taki a abi a prakseri fu poti ensrefi kon hei moro den „stari” dati. A no e gi Yehovah a grani taki a wini  den. Fu taki en leti, na presi fu dati, na wan heimemre fasi a e poti ensrefi ini a presi fu Yehovah.

25, 26. Fa a lin fu tiriman fu Babilon kon na wan kaba na wan syen fasi?

²⁵ ¡Wan bigi kenki e wakti a lin fu tiriman fu Babilon di abi bigimemre! Babilon no sa meki kon hei moro den stari fu Gado kwetikweti. Na presi fu dati Yehovah e taki: „Den sa tyari yu go na ini Syeol, na den moro farawe pisi fu na olo. Den wan di e si yu, sa luku yu srefi nanga fruwondru; den sa luku yu bun srefi èn taki: ’¿Na disi na a man di ben bruya grontapu, èn di ben e meki kownukondre seki, èn di ben meki a fatu gron kon de leki a gran sabana èn di ben meki srefi den foto fu a fatu gron dati fadon, di srefi gi den strafuman fu en no ben opo a pasi di e go na oso?’” (Yesaya 14:15-17) A lin fu tiriman di e angri fu kisi makti, sa saka go na Hades (Syeol), neleki iniwan libisma.

²⁶ Dan pe a makti sa de di ben e wini kownukondre, di ben e pori fatu gron èn di ben e meki kefalek furu foto fadon? Pe a grontapumakti sa de di ben e teki katiboman èn di noiti ben e gi den pasi fu go baka na a kondre fu den? ¡Iya, a lin fu tiriman fu Babilon no sa kisi wan beri di fiti den srefi! Yehovah e taki: „Ala tra kownu fu den nâsi, iya, den alamala, didon na ini glori, ibriwan na ini en eigi oso. Ma fu yu sei, den trowe yu gowe sondro wan presi fu beri yu, leki wan sproiti di sma e tegu gi en, èn den weri sma di den sutu kiri nanga a feti-owru, leki krosi gi yu, sma di e saka go na den ston fu wan olo, leki wan dedeskin di den trapu masi. Yu no sa kon de wán nanga den na ini wan grebi, bika yu ben pori yu eigi kondre, èn yu ben kiri yu eigi pipel. Den no sa kari den bakapikin fu ogrisma na den nen te ten di no skotu” (Yesaya 14:18-20). Na ini a grontapu fu owruten, sma ben e si en leki wan syen sani te wan kownu no ben kisi wan warti beri. So bun, fa a de nanga den kownu fu a lin fu tiriman fu Babilon? A tru taki ibri kownu beri nanga grani kande, ma den trowe den kownu fu a lin fu tiriman fu a gran kownukondre  di ben komoto na Nebukadnesar, „leki wan sproiti di sma e tegu gi en”. A de neleki a lin fu tiriman ben trowe go na ini wan grebi di no abi wan nen na tapu — leki soso wan srudati di e waka nanga futu go na feti èn di sma kiri na ini feti. ¡Fu tru a de wan bigi syen!

27. Na sortu fasi den geslakti fu Babilon di musu kon ete e pina fu a fowtu ede di den fositen tata fu den ben du?

²⁷ Na odo e kaba nanga den lasti komando gi den Mediasma nanga den Persiasma di e wini: „Un sreka wan pisi udu pe den e kapu meti di srakti, gi den eigi manpikin fu en fu a fowtu ede di den fositen tata fu den ben du, so taki den no e opo èn e teki grontapu abra trutru èn e furu a fatu gron nanga foto” (Yesaya 14:21). A fadon fu Babilon sa de fu têgo. A lin fu tiriman fu Babilon sa rutu puru. Den no sa kon na libi baka. Den geslakti fu Babilon di musu kon ete sa pina fu „a fowtu ede di den fositen tata fu den ben du”.

28. San ben de a rutu fu a sondu fu den kownu fu Babilon, èn san wi e leri fu dati?

²⁸ A strafu di ben leisi gi a lin fu tiriman fu Babilon abi wan warti sani di wi kan leri fu dati. A rutu fu a sondu fu den kownu fu Babilon ben de na angri di den ben angri fu kisi makti doronomo (Danièl 5:23). Na ati fu den ben furu nanga wan lostu fu abi makti. Den ben wani tiri trawan (Yesaya 47:5, 6). Èn den ben angri fu kisi glori fu libisma, di nanga reti Gado musu kisi (Openbaring 4:11). A sani disi na wan warskow gi iniwan sma di abi makti — srefi na ini a Kresten gemeente. Na angri di sma e angri fu kisi makti, nanga bigimemre pe sma e prakseri densrefi nomo, na eigifasi di Yehovah no sa frudrage, no fu sma èn no fu nâsi.

29. San a bigimemre nanga na angri di den tiriman fu Babilon ben angri fu kisi makti, e sori?

²⁹ A bigimemre fu den tiriman fu Babilon ben e sori a yeye fu „a gado fu a seti fu sani disi”, Satan Didibri (2 Korentesma  4:4). A e angri fu kisi makti tu èn a wani poti ensrefi moro hei leki Yehovah Gado. Neleki fa a ben de nanga a kownu fu Babilon èn nanga a pipel di a ben poti na en ondro, na so a takru angri fu Satan fu kisi makti abi leki bakapisi taki a heri libisma famiri de na ini banawtu èn e pina.

30. Fu sortu tra Babilon Bijbel e taki, èn sortu fasi a abi?

³⁰ Boiti dati, wi e leisi na ini a buku Openbaring fu wan tra Babilon — „Babilon a Bigiwan” (Openbaring 18:2). Na organisâsi disi, a grontapumakti fu falsi relisi, abi so srefi heimemre, lobi fu kwinsi sma èn du ogri-ati sani. Leki wan bakapisi fu dati, a musu kisi fu du nanga wan „dei fu Yehovah” tu èn a musu kisi pori na a reti ten fu Gado (Yesaya 13:6). Sensi 1919 a boskopu meki bekènti na heri grontapu: „¡Babilon a Bigiwan fadon!” (Openbaring 14:8) Di a no ben man hori a pipel fu Gado na ini katibo, dan a ben fadon. Heri esi a sa kisi pori krinkrin. Yehovah ben komanderi ini a tori fu Babilon fu owruten: „Pai en baka akruderi den sani di a du. Du nanga en akruderi ala sani di ensrefi du. Bika a handri nanga Yehovah na wan asranti fasi, nanga a Santawan fu Israèl” (Yeremia 50:29; Yakobus 2:13). Babilon a Bigiwan sa kisi wan srefi sortu krutu.

31. San o pasa heri esi nanga Babilon a Bigiwan?

³¹ Fu dati ede, a lasti sani di Yehovah taki fu a profeititori disi na ini a buku Yesaya no de gi Babilon fu owruten wawan, ma so srefi gi Babilon a Bigiwan: „Mi sa opo du wan sani nanga den . . . Èn mi sa koti a nen nanga a fikapisi nanga den pikin nanga den bakapikin puru fu Babilon . . . Èn mi sa meki a tron a gudu fu den dyindyamaka èn mi sa meki a tron warimbo swampu fu watra, èn mi sa figi en puru nanga a sisibi di e pori sani” (Yesaya 14:22, 23). Den brokopresi fu Babilon fu owruten pe no wan sma e libi na ini, e sori san Yehovah sa du heri esi nanga Babilon a Bigiwan. ¡A e gi trowstu trutru na sma di lobi a tru anbegi! ¡A e gi deki-ati fu tru fu du muiti fu no meki den eigifasi fu Satan, soleki bigimemre, heimemre noso ogri-ati fasi, gro na ini wi noiti!

[Futuwortu]

[Aksi fu a tori disi]

[Prenki na tapu bladzijde 178]

Babilon di fadon sa tron a tanpresi fu meti fu a gran sabana

 [Prenki na tapu bladzijde 186]

Neleki Babilon fu owruten, na so Babilon a Bigiwan sa tron wan ipi fu broko ston