A grontapu disi o tan?

Noiti ete sma taki so furu fu a kaba fu grontapu leki na ini a ten disi. Furu sma frede taki grontapu o kon na wan kaba fu di trawan o gebroiki ogri-ati fetisani di kan kiri ipi-ipi sma. Tra sma e denki taki grontapu o kisi pori fu di sma e doti a grontapu. Trawan frede taki grontapu o kon bruya na ekonomia sei, èn taki disi o meki taki heri ipi sma o feti nanga makandra.

A grontapu disi kan kon na wan kaba trutru? Efu dati de so, dan san disi wani taki? A pasa wan leisi kaba, taki wan grontapu kon na wan kaba?

Wan grontapu ben kon na wan kaba èn wan trawan ben kon na ini en presi

Iya, a pasa wan leisi kaba, taki wan grontapu ben kon na wan kaba. Luku fa grontapu ben de na ini a ten fu Noa. A ben kon takru srefisrefi. Bijbel e taki: „A grontapu fu a ten dati ben kisi pori di watra sungu en.” Bijbel e taki sosrefi: „[Gado] no ben hori ensrefi tu fu strafu wan libimakandra fu owruten, ma a ben kibri Noa, wan preikiman fu regtfardikifasi, makandra nanga seibi tra sma, di a ben tyari wan bigi frudu kon na tapu wan libimakandra fu ogri sma.”​—2 Petrus 2:5; 3:6.

Luku san a kaba fu a grontapu dati ben wani taki èn san a no ben wani taki. A kaba fu grontapu no ben abi fu du nanga a kaba fu libisma. Noa nanga en osofamiri no dede di a Frudu ben kon na grontapu. A grontapu srefi nanga den moi stari na hemel no kisi pori tu. Den dati ben tan. A grontapu di kisi pori, ben de „wan libimakandra fu ogri sma”, iya, wan ogri sistema.

Baka wan pisi ten, Noa kisi moro bakapikin èn wan tra grontapu bigin kon. Te na a dei fu tide, a tra grontapu noso sistema dati de ete. Historia e sori taki furu feti nanga ogridu ben de na grontapu. San o pasa nanga a grontapu disi? A o tan?

San o pasa nanga a grontapu disi?

Baka di Bijbel fruteri taki a grontapu na ini a ten fu Noa kisi pori, Bijbel e taki tu: „Nanga yepi fu a srefi wortu dati,  Gado libi den hemel nanga a grontapu fu now fu bron den nanga faya” (2 Petrus 3:7). Iya, wan tra Bijbel skrifiman e taki: „Grontapu [a wan di de now] e pasa gowe.”​—1 Yohanes 2:17.

Bijbel no e taki dati a trutru grontapu nanga den stari na hemel o pasa gowe. Dati no ben pasa tu na ini a ten fu Noa (Psalm 104:5). Ma a grontapu sistema disi o kisi pori. Den „hemel” fu en, noso den tiriman di de na ini a makti fu Satan, o kisi pori, èn Satan en „grontapu”, noso a libisma libimakandra, o kisi pori tu neleki fa wan sani e kisi pori te faya e bron en (Yohanes 14:30; 2 Korentesma 4:4). A grontapu, noso a sistema disi o kisi pori trutru neleki fa a grontapu di ben de bifo a Frudu, ben kisi pori. Srefi Yesus Krestes ben taki dati „a ten fu Noa” na wan eksempre di e sori wi san ben o pasa leti bifo a grontapu disi ben o kon na wan kaba.​—Mateyus 24:37-39.

A moi fu si taki Yesus ben taki fu a ten fu Noa, di a ben gi wan piki tapu wan aksi fu den apostel fu en. Den ben aksi en: „Sortoe marki sa de te Joe sa kom baka, en te grontapoe sa kaba?” (Mateyus 24:3, Da Bijbel na ini Sranantongo). Den bakaman fu Yesus ben sabi taki a grontapu sistema disi ben o kon na wan kaba. Den ben frede a sani disi?

Nôno, di Yesus ben taki fu sani di ben o pasa bifo a kaba fu grontapu, dan a ben gi den futuboi fu en deki-ati fu prisiri, ’bika a frulusu fu den ben de krosibei’ (Lukas 21:28). Iya, den ben o kon fri fu Satan nanga en ogri sistema, èn den ben o go na ini wan nyun grontapu pe soso vrede ben o de!​—2 Petrus 3:13.

Ma o ten a grontapu disi sa kon na wan kaba? Fa sma ben o sabi taki Yesus ben ’sa kom baka’ èn taki ’grontapoe sa kaba’? Sortu „marki” a ben gi den apostel?

„A marki”

A Griki wortu di den gebroiki dyaso gi a wortu „kon” na par·ouʹsi·a, èn a wani taki „denoya”. Trutru disi wani taki ’fu  de krosibei’. Sobun, te sma ben o si „a marki”, dan disi no ben wani taki dati Krestes ben o kon heri esi, ma taki a ben drai kon baka, èn taki a ben doro kaba. Te sma ben o si „a marki”, dan disi ben o wani taki dati Krestes ben bigin tiri na hemel leki Kownu, sondro taki libisma ben man si dati. A ben wani taki tu, dati heri esi Krestes ben o kiri den feanti fu en.​—Openbaring 12:7-12; Psalm 110:1, 2.

Yesus no ben sori taki „a marki” ben abi fu du nanga wán sani nomo. A ben taki fu wan lo sani di ben o pasa na grontapu. Ala den sani disi ben o pasa na ini a ten di Bijbel skrifiman ben kari „den lasti dei” (2 Timoteus 3:1-5; 2 Petrus 3:3, 4). Luku wan tu fu den sani di ben o abi fu du nanga „den lasti dei”, soleki fa Yesus ben taki na fesi.

„A wan pipel o opo go feti nanga a tra pipel, èn a wan kownukondre nanga a tra kownukondre” (Mateyus 24:7). Den feti fu a ten disi bigi moro den wan di sma ben e feti fosi. Wan historia skrifiman ben taki: „A Fosi Grontapufeti [di ben bigin na ini 1914] ben de a fosi feti pe ala kondre na grontapu ben de na ini.” Toku a di fu Tu Grontapufeti ben moro ogri, èn te na a dei fu tide feti lai na grontapu. Iya, den sani di Yesus taki, kon tru na wan fasi di ala sma man si krin!

„Angriten o de” (Mateyus 24:7). Baka a Fosi Grontapufeti wan bigi angriten ben kon. Noiti ete so wan bigi angriten ben de. Baka a di fu Tu Grontapufeti, wan bigi angriten ben de tu. Fu di wan di fu feifi pisi fu den sma na grontapu e pina fu angri, meki ibri yari sowan 14 milyun pikin e dede. Iya, „angriten” de trutru!

„Bigi gronseki o de” (Lukas 21:11). Sensi 1914, dan ibri yari gronseki kiri tin tron so furu sma leki na ini den yarihondro na  fesi. Luku omeni sma dede na ini wan tu bigi gronseki nomo: 200.000 sma dede na China na ini a yari 1920; 140.000 sma dede, noso lasi na Yapan na ini 1923; 32.700 sma dede na Torkukondre na ini 1939; 66.800 sma dede na Peru na ini 1970; na ini 1976, sowan 240.000 sma dede na China (son sma e taki dati na 800.000 sma dede). Iya, disi na „bigi gronseki” fu tru!

’Takru siki di e kiri ipi-ipi sma o de na difrenti presi’ (Lukas 21:11). Syatu baka a Fosi Grontapufeti, sowan 21 milyun sma dede fu a siki di sma e kari Spaanse griep. Wan buku ben taki: „Noiti ete someni sma dede na ini so wan syatu ten” (Science Digest). Sensi a ten dati, hondrohondro milyun sma dede fu atisiki, kanker, AIDS (SIDA), nanga furu tra siki.

„Moro nanga moro sma o du ogri” (Mateyus 24:12). Sensi 1914, sma kon sabi a grontapu fu wi leki wan grontapu di lai nanga ogridu. Furu presi de pe sma frede te den de na strati, awinsi na deiten. Te neti sma e tan na ini den oso fu den, aladi den doro sroto, noso den e tapu den doro nanga isri, fu di den frede fu go na dorosei.

Soleki fa profeititori sori, dan furu tra sani de ete di ben o pasa na ini den lasti dei, èn ala den sani disi e kon tru. Den e sori wi taki a kaba fu grontapu de krosibei. Ma wi kan breiti taki sma de di o tan na libi te a kaba o kon. Bijbel e taki dati „grontapu e pasa gowe”, ma a e pramisi tu  taki „a sma di e du a wani fu Gado, sa tan fu têgo”.​—1 Yohanes 2:17.

Sobun, wi musu leri san na a wani fu Gado èn wi musu du a wani dati tu. Na so wi kan tan na libi te a grontapu disi o kon na wan kaba èn wi sa man prisiri fu têgo fu den blesi di wi o kisi na ini a nyun grontapu fu Gado. Bijbel e pramisi taki na ini a ten dati, „Gado . . . o figi ala watra puru na den ai [fu libisma], èn dede no sa de moro; nowan sari, noso krei, noso pen no sa de moro”.​—Openbaring 21:3, 4.

Te a no skrifi tra fasi, dan den bijbeltekst na ini a traktaat disi teki puru fu a New World Translation of the Holy Scriptures èn fu a Nyun-Grontapuvertaling fu den Kresten Griki Buku fu Bijbel.

[Sma di abi a reti fu a prenki na tapu bladzijde 6]

Den sma di abi a frantwortu fu den fowtow: Na opolani: USAF fowtow. A pikin: WHO fowtow. Na W. Cutting meki a fowtow. Gronseki: Y. Isjijama, Hokkaido Universiteit, Yapan.