Kapitel 36

A bigi bribi foe wan legre-edeman

TE JESUS e hori a Bergitaki foe en, a doro so wan afoepasi foe en poebliki diniwroko. Disi wani taki, dati a abi soso wan sani foe wán jari nanga neigi moen ete foe klari en wroko na grontapoe.

Now Jesus e go na ini a foto Kaperna-um, wan sortoe tanpe pe a e go alaten baka foe doe a wroko foe en. Djaso den owroeman foe den djoe e kon na en nanga wan aksi. Wan heiden edeman foe a legre foe den Romesma, wan man di de foe wan tra ras leki den djoe, seni den kon.

A foetoeboi foe a legre-edeman di a lobi troetroe, siki so tranga taki a de foe dede, èn na edeman wani, taki Jesus dresi a foetoeboi foe en. Den djoe e taki fajafaja gi a boen foe na edeman: „A warti foe kisi a grani disi foe joe,” den e taki, „bika a lobi a nâsi foe wi èn ensrefi ben bow a snoga gi wi.”

Sondro foe draidrai, Jesus e go nanga den man. Ma te den kon ini a birti drape, a legre-edeman e seni mati kon foe taki: „Masra, no doe moeiti, bika mi no warti foe joe kon na ini mi oso. Foe dati ede mi no ben feni misrefi warti foe kon na joe.”

Den wortoe disi foe troe na wortoe di e sori a sakafasi foe wan edeman di gwenti foe gi trawan komando! Ma kande a e prakseri Jesus toe, foe di a e froestan taki den gwenti foe wan djoe e tapoe en foe abi demakandra nanga sma di no de djoe. Srefi Petrus ben taki: „Oenoe sabi heri boen, taki wet no e gi pasi foe wan djoe moksi ensrefi nanga wan sma foe wan tra ras noso foe go na en.”

Kande foe di na edeman no wani, taki Jesus ondrofeni den bakapisi di kan kon efoe a e pasa a gwenti disi, a e meki den mati foe en e aksi Jesus: „Taki wan sani èn meki mi foetoeboi kon betre. Bika mi na wan sma toe di poti na ondro makti, èn mi abi sroedati na mi ondro, èn na a wan mi e taki: ’Go!’, èn a e go, èn na a trawan: ’Kon!’, èn a e kon, èn na mi srafoe: ’Doe disi!’, èn a e doe en.”

We, te Jesus e jere disi, a e froewondroe. „Mi e taigi oenoe a waarheid”, a e taki, „na no wan sma na ini Israèl mi feni so wan bigi bribi.” Baka di Jesus dresi a foetoeboi foe na edeman, a e meki gebroiki foe na okasi foe froeteri fa sma di no de djoe èn di abi bribi, sa kisi a grani foe kisi blesi, wan sani di djoe, di no abi bribi, ben weigri foe teki.

„Foeroe sma”, na so Jesus e taki, „foe owstoesei kontren èn foe westsei kontren, sa kon èn didon na tafra nanga Abraham, èn nanga Isak, èn nanga Jakob, ini a kownoekondre foe hemel; ma den manpikin foe a kownoekondre sa trowe go na ini a doengroe na dorosei. Na drape den sa krei èn kaw tifi.”

’Den manpikin foe a kownoekondre di den sa trowe go na ini a doengroe na dorosei’, na djoe na skinfasi di no e teki na okasi di den fosi ben kisi foe de tiriman nanga Krestes. Abraham, Isak, nanga Jakob e prenki Gado en Kownoekondre seti. Na so Jesus e froeteri taki den heiden sa kisi kari foe, te joe loekoe en boen, didon na a hemel tafra „ini a kownoekondre foe hemel”. Lukas 7:1-10; Mateus 8:5-13; Tori foe den Apostel 10:28.

▪ Foe san ede djoe e taki gi a boen foe wan heiden legre-edeman?

▪ Foe san ede kande na edeman no wani taki sma kari Jesus kon na ini en oso?

▪ San Jesus wani taki nanga den sani di a e taki na a kaba?