Kapitel 132

A de na a reti-anoe foe Gado

A KANTI di a santa jeje kanti kon na a Pinksterfesa, na wan boeweisi taki Jesus doro baka na hemel. A fisjoen di a disipel Stefanus ben kisi sjatoe baka dati, e boeweisi toe taki Jesus doro drape. Leti bifo den e ston Stefanus kiri, foe di a gi kotoigi na wan getrowfasi, a e bari taki: „Loekoe! Mi e si hemel di opo èn a Manpikin foe libisma e tanapoe na a reti-anoe foe Gado.”

Ala di Jesus de na a reti-anoe foe Gado, a e wakti tapoe a komando foe en Tata: „Go poti na joe ondro na mindri den feanti foe joe.” Ma san Jesus e doe na ini a pisi ten dati, te leki a sa opo doe wan sani teige den feanti foe en? A e tiri den salfoe disipel foe en, foe di a e tjari den ini a preikiwroko foe den èn a e sreka den foe tron kompe kownoe makandra nanga en ini a Kownoekondre foe en Tata, baka te den kisi wan opobaka.

Foe eksempre, Jesus e froekisi Saulus (di baka ten, sma ben kon sabi moro boen leki Paulus, a Rome nen foe en) foe meki a teki fesi na ini a wroko foe meki disipel na tra kondre. Ala di Saulus de fajafaja gi a Wet foe Gado, tokoe den djoe relisi fesiman kori en. A bakapisi foe disi de, taki Saulus no wawan e feni en boen taki den e kiri Stefanus, ma a e go toe na Damaskus nanga a primisi di a kisi foe a heipriester Kajafas, foe tjari ala bakaman foe Jesus, den mansma so boen leki den oemasma di a e feni drape, kon baka na Jerusalem foe teki den go sroto. Ma te Saulus de na pasi, wantronso wan krin faja e koti na en lontoe èn a e fadon na gron.

„Saulus, Saulus, foe san ede joe e froefolgoe mi?”, wan sten e aksi komoto foe wan presi di sma no kan si. „Soema na joe, Masra?”, Saulus e aksi.

„Mi na Jesus, a sma di joe e froefolgoe”, na a piki.

Jesus e froeteri Saulus, di ben kon breni foe a froewondroe faja ede, foe go na Damaskus èn foe wakti drape tapoe sani di a sa taigi en foe doe. Baka dati Jesus e sori ensrefi na ini wan fisjoen na Ananias, wan foe den disipel foe en. Jesus e froeteri Ananias sani di abi foe doe nanga Saulus: „A man disi na wan patoe di mi ben froekisi foe tjari mi nen go na den nâsi èn na den kownoe èn na den manpikin foe Israèl toe.”

Ija, nanga a jepi foe Jesus, Saulus (di sma sabi now leki Paulus) nanga tra evangelie preikiman abi kefalek boen bakapisi na ini a wroko foe den foe preiki èn foe gi sma leri. Foe taki en leti, dan so wan 25 jari baka di Jesus sori ensrefi na Paulus di a ben de na pasi foe go na Damaskus, Paulus e skrifi taki a ’boen njoensoe preiki na ala mekisani di de na ondro hemel’.

Baka di foeroe jari moro pasa, Jesus e gi en lobi apostel Johanes wan lo fisjoen. Nanga jepi foe den fisjoen disi, di Johanes e skrifi foe den na ini a bijbel boekoe Openbaring, a de na libi foe si, foe taki en so, fa Jesus drai kon baka ini Kownoekondre makti. Johanes e taki dati „na ondro a krakti foe a santa jeje”, den ben tjari en go na ini „a dei foe Masra” di de na ini a ten di e kon. San na a „dei” disi?

Wan finifini studie foe den bijbel profeititori, so srefi foe Jesus en eigi profeititori foe den lasti dei, e tjari kon na krin taki „a dei foe Masra” ben bigin na ini a jari 1914 di ben de so prenspari gi a historia, ija, na ini a geslakti disi! So boen, a ben de na ini 1914 taki Jesus ben drai kon baka sondro foe sma ai si en, sondro poebliki pranpran nanga opo-opo, ala di soso en getrow foetoeboi ben sabi taki a drai kon baka. Na ini a jari dati Jehovah ben gi Jesus a komando foe go poti na en ondro na mindri den feanti foe en!

Jesus ben gi jesi na a komando foe en Tata, èn a ben krin hemel, poeroe Satan nanga den ogri jeje foe en, trowe den go na grontapoe. Baka di Johanes si na ini wan fisjoen taki disi pasa, a e jere wan sten na hemel di e meki bekènti: „Now a froeloesoe nanga a krakti nanga a kownoekondre foe wi Gado nanga a makti foe en Krestes kon!” Ija, na ini 1914 Krestes ben bigin tiri leki Kownoe!

Disi na troetroe boen njoensoe gi den anbegiman foe Jehovah na hemel! Den e kisi a tranga: „Oen prisiri, oen hemel nanga oenoe di e libi drape!” Ma fa a situwâsi de gi den sma di e libi na grontapoe? „Heloe foe grontapoe nanga se,” a sten na hemel e taki moro fara, „bika Didibri saka kon na oenoe, a abi bigi atibron, foe di a sabi taki a abi wan sjatoe pisi ten nomo.”

Wi de na a sjatoe pisi ten dati nownowde. Na ini a ten disi den e prati sma foe makandra foe go na ini a njoen grontapoe foe Gado noso foe kisi pori. A troe foe a tori de, taki na joesrefi e bosroiti now fa joe tamara sa de nanga a fasi fa joe e handri tapoe a boen njoensoe foe Gado Kownoekondre, di den e preiki na heri grontapoe na ondro a tiri foe Krestes.

Te a wroko foe prati sma foe makandra kon na wan kaba, dan Jesus Krestes sa dini leki A Sma di e teki presi gi Gado foe krin grontapoe foe Satan heri seti foe sani èn ala den sma di e horibaka gi dati. Jesus sa poeroe ala ogridoe na ini a feti di bijbel e kari Har–​Mágedon noso Armagedon. Baka dati, Jesus, di boiti Jehovah Gado srefi, na a moro bigi Sma na ini na universum, sa graboe Satan nanga den ogri jeje foe en èn a sa tai den doesoen jari na ini wan „peti di no abi gron”, dati wani taki, wan fasi pe sma no man doe notinoti, èn di joe kan teki gersi dede. Tori foe den Apostel 7:55-60; 8:1-3; 9:1-19; 16:6-10; Psalm 110:1, 2; Hebrewsma 10:12, 13; 1 Petrus 3:22; Lukas 22:28-30; Kolosesma 1:13, 23; Openbaring 1:1, 10; 12:7-12; 16:14-16; 20:1-3; Mateus 24:14; 25:31-33.

▪ Pe Jesus de, baka di a opo go na hemel, èn san a e wakti?

▪ Soema Jesus e tiri, baka di a opo go na hemel, èn fa a tiri foe en de foe si?

▪ O ten „a dei foe Masra” ben bigin, èn san ben pasa na a bigin foe a dei dati?

▪ Sortoe wroko foe prati sma foe makandra di e doe na ini a ten disi, abi krakti na tapoe ibriwan foe wi, èn tapoe a gron foe san den e doe a wroko disi foe prati sma foe makandra?

▪ San o pasa, baka te a wroko foe prati sma foe makandra kon na wan kaba?