A de na oso baka na Kaperna-um
Kapitel 26
A de na oso baka na Kaperna-um
NA A ten disi a barinen foe Jesus panja go na ala sei, èn foeroe sma e teki waka go na den farawe presi pe a e tan. Ma baka wan toe dei, a e drai go baka na Kaperna-um na a Se foe Galilea. Esi-esi njoensoe e panja na ini foto taki a de na oso baka, èn foeroe sma e kon na a oso pe a de. Fariseiman nanga leriman foe Wet e komoto kon te na Jerusalem.
Na ipi sma bigi sote, taki den e tapoe a pasi na a doro, èn no wan sma kan go moro na inisei. A situwâsi poti so, taki a e fiti wan troetroe aparti sani di o feni presi. San e feni presi na a okasi disi na wan toemoesi prenspari sani, bika a e jepi wi foe froestan taki Jesus abi a makti foe poeroe a roetoe foe libisma pina èn foe meki ala sma di a wani, kon gosontoe baka.
Ala di Jesus e gi leri na a ipi sma, fo man e tjari wan lanman na tapoe wan bedi kon na a oso. Den wani, taki Jesus moesoe dresi a mati foe den, ma foe na ipi sma ede, den no man pasa go na inisei. Disi e meki den sari troetroe! Ma dati no e meki den lasi-ati. Den e kren go na tapoe a plata dak, e meki wan olo na ini èn den e saka a bedi nanga a lanman na tapoe, leti na sei Jesus.
Jesus ati e bron foe a sani disi di kon na mindri? Kwetikweti! Na presi foe dati, a e naki en ati troetroe te a e si a bribi di den abi. A e taigi a lanman: „Joe kisi pardon foe joe sondoe.” Ma Jesus kan gi pardon foe sondoe troetroe? Den leriman foe Wet nanga den Fariseiman no denki so. Den denki na ini den ati: „Foe san ede a man disi e taki na a fasi disi? A e pori Gado nen. Soema kan gi pardon foe sondoe, boiti Gado wawan?”
Foe di Jesus sabi san den e prakseri, meki a e taigi den: „Foe san ede oenoe e denki den sani disi na ini oen ati? San moro makriki, foe taigi a lanman: ’Joe kisi pardon foe joe sondoe’, noso foe taki: ’Opo tanapoe, teki joe bedi èn waka’?”
Ne Jesus e meki na ipi sma, makandra nanga den wan di e kroetoe en, si wan toemoesi aparti sani di sa tjari kon na krin taki a abi a makti foe gi pardon foe sondoe na grontapoe èn taki a de foe troe a moro bigi man di oiti ben libi. Jesus e drai loekoe a lanman èn e komanderi: „Opo tanapoe, teki joe bedi, èn go na joe oso.” Èn wantewante a man e doe disi, èn na fesi foe ala sma a e teki en bedi èn e waka go na dorosei! Nanga froewondroe den sma e gi Gado glori èn den e bari taki: „Noiti ete wi ben si so wan sani”!
Joe ben si taki Jesus e sori, taki sondoe abi foe doe nanga siki èn taki, foe kisi pardon foe sondoe, abi foe doe nanga a kon di sma e kon gosontoe? Bijbel e tjari kon na krin taki wi fosi papa, Adam, ben sondoe èn taki wi alamala kisi den bakapisi foe a sondoe dati, dati wani taki, siki nanga dede. Ma na ondro a tiri foe Gado Kownoekondre, Jesus sa gi pardon foe sondoe na ala sma di lobi Gado èn di e dini En, èn dan ala siki sa poeroe na pasi. Dati sa de troetroe wan switi sani! Markus 2:1-12; Lukas 5:17-26; Mateus 9:1-8; Romesma 5:12, 17-19.
▪ San ben de a situwâsi foe wan troetroe aparti sani di ben o feni presi?
▪ Fa a lanman ben doro Jesus?
▪ Foe san ede wi alamala abi sondoe, ma fa Jesus ben gi howpoe taki sma kan kisi pardon foe sondoe èn wan volmaakti gosontoe?