Kapitel 4

A de nanga bere, ma a no trow

MARIA de nanga bere dri moen kaba. Joe kan memre ete taki, a fosi pisi di a ben de nanga bere, a ben go loekoe Elisabet, ma now a drai kon baka na oso na Nasaret. A no sa teki langa fosi ala sma ini a presi pe a e libi, sa kon sabi taki a de nanga bere. Foe troe, a de ini wan situwâsi di e gi en foeroe broko-ede!

San e meki a situwâsi moro ogri, na taki Maria meki mofo foe trow nanga a temreman Josef. Èn Maria sabi taki na ondro a wet di Gado gi Israèl, den moesoe ston wan oema kiri di ben meki mofo nanga wan man foe trow, ma nanga en fri wani abi seks nanga wan tra man. Fa a moesoe tjari kon na krin gi Josef fa a doe kisi bere?

Foe di Maria ben gowe dri moen, wi kan de seiker taki Josef angri foe si en. Kande a de so, taki te den e miti makandra, Maria e brokobroko a njoensoe gi en. Kande a e doe moeiti foe tjari kon na krin gi Josef taki a de nanga bere nanga jepi foe Gado santa jeje. Ma leki fa joe kan prakseri, dan a de wan moeilek sani gi Josef foe bribi.

Josef sabi taki Maria abi wan boen nen. Èn soleki fa a sori, a lobi en srefisrefi. Ma awansi san Maria e taki toe, tokoe a sori troetroe taki a abi bere foe wan tra man. Ma ala di a sori taki disi de so, Josef no wani taki den ston Maria kiri noso taki den e gi en sjen na poebliki. Dati meki a e bosroiti foe prati foe Maria na wan kibri fasi. Ini a ten dati, den ben si toe sma di ben meki mofo nanga makandra foe trow, leki sma di trow kaba, èn den ben moesoe prati akroederi a wet foe ben kan broko a mofo di den ben meki nanga makandra foe trow.

Baka ten, ala di Josef e prakseri den tori disi ete, a e go sribi. Na engel foe Jehovah e sori ensrefi na en na ini wan dren èn a e taki: „No frede foe teki Maria joe wefi go na oso, bika a bere di a kisi, a kisi nanga jepi foe santa jeje. A sa kisi wan manpikin, èn joe moesoe kari en Jesus, bika a sa froeloesoe en pipel foe den sondoe foe den.”

Te Josef wiki, a de nanga tangi troetroe! Sondro foe draidrai a e doe soifri san na engel ben taigi en foe doe. A e teki Maria go na en oso. Te joe loekoe en boen, dan a doe di a e doe a sani disi na poebliki, de leki wan trow ceremonia. A e sori taki Josef nanga Maria de masra nanga wefi now akroederi a wet. Ma so langa Maria de nanga bere foe Jesus, Josef no abi seks nanga en.

Loekoe! A no sa teki langa moro foe Maria kisi en pikin, ma tokoe Josef e poti en tapoe wan boeriki. Pe den e go, èn foe san ede den e teki waka, ala di Maria kan kisi a pikin ibri momenti? Lukas 1:39-41, 56; Mateus 1:18-25; Deuteronomium 22:23, 24.

▪ San Josef e prakseri te a e kon sabi taki Maria de nanga bere, èn foe san ede?

▪ Fa Josef kan prati foe Maria, ala di den no trow ete?

▪ Sortoe sani di e doe na poebliki de leki a trow ceremonia foe Josef nanga Maria?