Kapitel 20

A di foe toe wondroe, ala di a de na Kana

TE JESUS e drai go baka na a kontren pe a e libi, baka di a hori wan bigi preikiwaka na Judea, dan a no e doe dati foe teki bro. Na presi foe dati, a e bigin nanga wan moro bigi diniwroko srefi na Galilea, a presi pe a ben gro kon bigi. Ma na presi foe den disipel foe en e tan nanga en, den e drai go na oso baka na den famiri foe den èn na a wroko di den ben doe fosi.

Sortoe boskopoe Jesus e bigin preiki? Na a boskopoe disi: „A kownoekondre foe Gado kon krosibei. Abi berow èn poti bribi ini a boen njoensoe.” Èn san den sma e doe? Den Galileasma e teki Jesus na wan boen fasi. Ala sma e lespeki en. Ma disi no de spesroetoe foe a boskopoe di a tjari, ma moro foeroe foe di foeroe, foe den ben de na a Paska na Jerusalem wan toe moen na fesi, èn den ben si den foeroe froewondroe marki di a ben doe.

Soleki fa a sori, dan na Kana, Jesus e bigin nanga en bigi diniwroko foe Galilea. Joe kan memre kande ete taki, di a ben drai kon baka foe Judea, dan na wan trow-oso drape, a ben kenki watra kon tron win. Na a di foe toe okasi disi, a pikin foe wan lantiman foe kownoe Herodes Antipas, siki tranga. Te a lantiman e jere taki Jesus komoto na Judea kon na Kana, dan a e teki waka kon te foe en oso na Kaperna-um foe go soekoe Jesus. A man, di e sari srefisrefi, e begi Jesus tranga: ’Grantangi, kon wantewante, bifo a pikin foe mi dede.’

Jesus e piki: ’Go na oso baka. Joe manpikin kon betre!’ A lantiman foe Herodes e bribi en èn a e bigin teki a langa waka go na oso. Na pasi, den foetoeboi foe en e waka kon miti en. Den hasti densrefi foe froeteri en taki ala sani boen baka — a manpikin foe en kon betre baka! ’O ten a ben kon betre?’ a e aksi.

’Esrede na wan ten foe wán joeroe bakadina’, den e piki.

A lantiman e froestan taki disi na a srefi joeroe di Jesus ben taki: ’Joe manpikin kon betre!’ Baka dati, a man nanga en heri osofamiri e tron disipel foe Krestes.

So boen, Kana ben kisi a grani foe de a presi pe toe tron Jesus ben doe wondroe, leki wan marki taki a ben drai kon baka foe Judea. A no de foe taki, dati den wondroe disi a no den wan-enkri wondroe di a ben doe te na a ten disi, ma den de prenspari foe di den e marki a drai di Jesus ben drai go baka na Galilea.

Now Jesus e go na en oso na Nasaret. San e wakti en drape? Johanes 4:43-54; Markus 1:14, 15; Lukas 4:14, 15.

▪ San e pasa nanga den disipel foe Jesus te a e drai go baka na Galilea, èn fa den sma e teki en?

▪ Sortoe wondroe Jesus e doe, èn sortoe krakti disi abi na tapoe den sma di ben abi foe doe nanga a wondroe disi?

▪ Fa Jesus e meki Kana kisi wan grani na a fasi dati?