Kapitel 34

A e froekisi den apostel foe en

PIKINMORO wán jari nanga afoe pasa sensi Johanes a Dopoeman ben meki sma kon sabi Jesus leki a Pikin Skapoe foe Gado èn Jesus ben bigin nanga en poebliki diniwroko. Na a ten dati Andreas, Simon Petrus, Johanes, èn kande Jakobus (a brada foe Johanes), so boen leki Filipus nanga Natanaèl (di nen Bartolomeus toe), ben tron den fosi disipel foe en. Baka wan pisi ten, foeroe trawan ben moksi densrefi nanga den leki bakaman foe Krestes.

Now a ten doro gi Jesus foe froekisi den apostel foe en. Den disi sa tron den krosibei kompe foe en di sa kisi spesroetoe leri. Ma bifo Jesus e froekisi den, a e go na wan bergi èn heri neti a e begi, kande foe aksi Gado koni èn foe kisi en blesi. Te dei opo, a e kari den disipel foe en èn a e froekisi twarfoe man na den mindri. Ma foe di den e tan de sma di e kisi leri foe Jesus, meki sma e tan kari den disipel toe.

Siksi foe den sma di Jesus e froekisi, di kari dja na tapoesei, na den wan di ben tron den fosi disipel foe en. A e froekisi Mateus toe, di ben de na a belasting kantoro foe en, di Jesus ben kari en. Den tra feifi man di a e froekisi na Judas (di nen Tadeus toe), Judas Iskariòt, Simon a Cananeeër, Tomas, nanga Jakobus a manpikin foe Alfeus. A Jakobus disi nen Jakobus a Mendriwan toe, kande foe di en skin no bigi so noso foe di a jongoe moro a tra apostel Jakobus.

Den twarfoe man disi de wan pisi ten kaba nanga Jesus, èn a sabi den boen. Te joe e loekoe en boen, dan wan toe foe den na en eigi famiriman. Soleki fa a sori, dan Jakobus nanga en brada Johanes, na den fosi neef foe Jesus. Èn kande a de so, taki Alfeus ben de a brada foe Josef, Jesus kwekipapa. So boen, a manpikin foe Alfeus, na apostel Jakobus, ben moesoe de wan neef foe Jesus toe.

A no de foe taki, dati Jesus no abi problema foe memre den nen foe den apostel foe en. Ma joe kan memre den? We, hori na prakseri nomo taki toe man de di nen Simon, toe di nen Jakobus èn toe de di nen Judas, èn taki Simon abi wan brada Andreas, èn taki Jakobus abi wan brada Johanes. Dati na a fasi foe memre a nen foe aiti apostel. Den fo trawan na: wan belastingman (Mateus), wan sma di baka ten ben go tweifri (Tomas), wan di den ben kari kon foe ondro wan bon (Natanaèl), nanga en mati Filipus.

Erfoe foe den apostel kon foe Galilea, a kontren pe Jesus gro kon bigi. Natanaèl na foe Kana. Filipus, Petrus nanga Andreas na foe Betsa-ida. Baka ten Petrus nanga Andreas e froisi go na Kaperna-um, pe kande Mateus ben libi toe. Jakobus nanga Johanes ben de fisiman èn kande den ben libi na Kaperna-um toe noso na ini a birti drape. Soleki fa a sori, dan Judas Iskariòt, di baka ten ben tori Jesus, na a wan-enkri apostel di komoto na Judea. Markus 3:13-19; Lukas 6:12-16.

▪ Sortoe apostel ben kan de famiri foe Jesus?

▪ Soema na den apostel foe Jesus, èn fa joe kan memre den nen foe den?

▪ Foe sortoe kontren den apostel ben komoto?