Kapitel 74

A e gi Marta rai, èn a e gi leri di abi foe doe nanga begi

NA A TEN foe Jesus diniwroko na Judea, a e go na a pikin dorpoe Betania. Djaso na pe Marta, Maria, nanga Lasarus, a brada foe den, e libi. Kande Jesus ben miti den dri sma disi wan leisi kaba na ini a pisi ten foe en diniwroko èn na so fasi a de wan boen mati foe den kaba. Awansi fa a tori sidon, Jesus e go now na a oso foe Marta èn Marta e gi Jesus wan switikon na ini.

Nanga prisiri Marta wani gi Jesus den moro boen sani di a abi. Foe troe, a de wan bigi grani te wan sma abi a pramisi Mesias na en oso! So boen, Marta e go sreka wan boen bigi njanjan èn a e sorgoe gi tra pikinpikin sani foe meki a tan di Jesus e tan drape, de wan moro switi èn prisiri sani.

Ma Maria, a sisa foe Marta, e sidon na Jesus foetoesei e arki Jesus. Baka wan pisi ten, Marta e kon drape èn a e taigi Jesus: „Masra, joe no abi trobi taki mi sisa meki mi wawan sorgoe gi ala sani? Foe dati ede, taigi en foe kon jepi mi.”

Ma Jesus e weigri foe taigi Maria wan sani. Na presi foe dati, a e gi Marta rai foe di Marta e broko en ede toemoesi nanga materia sani. „Marta, Marta,” a e piri-ai gi en na wan switi fasi, „joe e broko joe ede nanga foeroe sani èn e meki joesrefi sorgoe foe dati. Ma pikinso sani nomo de fanowdoe, noso soso wán.” Jesus e taki dati a no de fanowdoe foe gi foeroe ten na a sreka di a e sreka foeroe sortoe njanjan. Soso wan toe sortoe njanjan noso srefi wán sortoe njanjan nomo boen kaba.

Den prakseri foe Marta boen; a wani de wan oema di e sorgoe boen gi en fisitiman. Ma foe di a e poti toemoesi foeroe prakseri na tapoe materia sani, meki a e misi na okasi foe kisi leri foe Gado eigi Manpikin srefi! Dati meki Jesus e bosroiti: „Maria foe en sei, ben froekisi a boen pisi, èn sma no sa teki dati poeroe foe en.”

Baka ten, na wan tra okasi, wan disipel e aksi Jesus: „Masra, leri wi fa foe begi, neleki fa Johanes ben leri den disipel foe en toe.” Kande a disipel disi no ben de drape di Jesus ben gi a Modelbegi na ini en Bergitaki, so wan wán nanga afoe jari pasa kaba. Foe dati ede Jesus e taki ete wan tron san a ben leri, ma baka dati a e go doro nanga wan agersitori foe poti krakti na tapoe taki a de fanowdoe foe horidoro na ini begi.

„Soema foe oenoe sa abi wan mati”, na so Jesus e bigin, „èn sa go na en na mindri-neti èn taigi en: ’Mati, leni mi dri brede, bika didjonsro wan mati foe mi komoto na wan waka kon na mi, èn mi no abi noti foe gi en’? Èn a sma dati e piki joe foe inisei: ’No trobi mi moro. A doro sroto kaba, èn den jongoe pikin foe mi de na bedi nanga mi; mi no kan opo foe gi joe wan sani.’ Mi e taigi oenoe: Awinsi a no sa opo èn gi en wan sani, foe di a de en mati, dan foe troe a sa opo èn gi en ala san a abi fanowdoe, foe di a ben horidoro na wan asranti fasi.”

Nanga na agersitori disi, Jesus no wani sori taki Jehovah Gado no de klariklari foe piki na tapoe tranga begi, soleki fa a mati ben doe na ini a tori di Jesus ben froeteri. Nôno, ma a e sori taki efoe wan mati di no de klariklari foe jepi, tokoe ete sa doe wan sani, foe di a trawan ben tan aksi, dan wi lobi-ati Tata na hemel sa doe disi foe troe! Foe dati ede Jesus e taki moro fara: „Mi e taigi oenoe foe dati ede: Tan aksi, èn oenoe sa kisi; tan soekoe, èn oenoe sa feni; tan naki na tapoe doro, èn den sa opo doro gi oenoe. Bika a sma di e aksi, e kisi, èn a sma di e soekoe sa feni, èn a sma di e naki na tapoe doro, den sa opo doro gi en.”

Dan Jesus e tjari onvolmaakti, sondoe libisma papa kon na ini a tori èn a e taki: „Foe troe, sortoe papa de na oen mindri di, efoe en manpikin e aksi en wan fisi, kande sa gi en wan sneki na presi foe wan fisi? Noso efoe a e aksi en wan eksi toe, dan a sa gi en wan kroektoe-tere? So boen, efoe oenoe, ala di oenoe takroe, sabi fa foe gi boen presenti na oen pikin, omeni moro a Tata na hemel sa gi santa jeje na a sma di e aksi en foe dati!” Ija, Jesus e gi troetroe deki-ati di e boeweigi wan sma foe horidoro na ini begi. Lukas 10:38–11:13.

▪ Foe san ede Marta e sreka so wan bigi njanjan gi Jesus?

▪ San Maria e doe, èn foe san ede Jesus e prèise en na presi foe Marta?

▪ San e meki Jesus e taki ete wan tron san a ben leri sma na ini a tori foe begi?

▪ Fa Jesus e sori taki a de fanowdoe foe horidoro na ini begi?